新手帶挈爆波叔

日期: 08/01/2015
農曆: 六月十七
地點: 下白泥鴨仔坑波叔魚場
釣友: 大表妹、細表妹、YY

是咁的，有這次下白泥波叔釣魚場之旅的構思源於之前阿大表妹問我話佢想和她的同事去釣下魚玩下，而我就建議她到魚場去玩，因為一來去魚場又唔駛坐船怕暈船浪，二來又唔會像艇釣般比較難遷就和更改時間，最後她則選擇了我建議入面的「波叔」釣魚場。不過可能由於礙於經驗關係，當日雖然係有魚訊和曾經有魚中勾，可惜最後都並未能成功上魚，盡興而回。而咁啱上星期飯聚嘅時候我地又再談論起佢果日嘅情況，繼而愈講愈興起就話不如搵日我再同佢入多去波叔度一次去覆桌，一於就「喺邊度跌低，就喺邊度企返起身」。而咁啱阿細表妹又係度而聽落去佢又有點興趣咁，問我佢唔識釣魚、甚至連魚竿都未揸過有無問題；而我就同佢地講話無問題，一於一次過帶哂佢地中魚，於是就有左今次嘅「下白泥波叔覆桌之旅」了。但勢估唔到，新手嘅釣魚運又再一次發揮無限功力了，仲帶挈哂我地全人類爆釣呢！

好喇，咁呢我地中午一齊同家人飲完茶先至起行，入到去波叔度都差唔多成下晝三點，不過呢個係盡在我嘅計算之內，事關出發前我已經上網在面書內的釣魚群組向一些富有好姐、波叔釣魚場經驗的師兄們查詢過，佢地都話唔駛咁早入黎，因為較開口時段一般都係早上十點同下晝三點後；而我上次來的經驗告訴我，5點後才是較為開口的時段，所以三點鐘我們才施施然的來到其實正好，還可以避開正午太陽最曬的時候，雖然場地總算是有太陽傘提供給我們遮陰。但女孩子嘛，咁梗係唔好曬到太黑啦，所以一來太陽無咁曬才來啦，二來在她們來到又茶蚊怕水同太陽油嘅時候我就先為佢地兩個開竿設置釣組，然後才慢慢開自己那支十八尺磯竿。除左魚竿之外，我亦放置了兩個手繩「地雷」，反正魚場是日又唔係多人，為求中魚，梗係貪心一點開多幾種不同武器，為求達到目的，不擇手段啦，哈哈。所以結果我們三個人總共的火力就是地雷兩個，一個沉底一個浮波；魚竿四支，兩支沉底，大表妹果支就用浮波釣腳邊，我支磯竿就釣池中心，務求每個地方都有不同釣法覆蓋。

不過可由真係由於時間尚中，岩岩開始作釣的時候，魚訊真係好一般，表妹們在我還在慢慢設置釣組時就已經開始作釣，但到我將所有火力全開好之時都未有魚訊，當然，曾經大表妹腳邊的那支標是有沉過，但相信都是魚仔在作祟，事關抽了好幾次竿都抽不中的，雖然整支標都已經沉到水裡去呢！沒辦法，那就繼續等待吧。而其實未黎到釣魚場之前阿細表妹就話過希望今日能夠釣到一兩條魚就足夠開心了，而佢又話新手通常都會比較有運，所以今日都覺得應該會釣到魚嘅。老實講，通常新手真係比較有運，如果唔係，又點會毒得到你班新手中毒呢，所以就係我地三個人都無所事事嘅時候，行遠左少少、仲係度研究緊支竿點玩，係度收收、放放，拖拖拉拉緊條魚絲嘅細表妹忽然就感覺到猛烈的一擊，然後我就見到佢支竿已經彎哂；本來我都仲諗住開口在旁指示佢點樣做，教佢點樣頂魚同收魚；但係第一次中魚嘅佢，好明顯就已經方串大亂，能夠抓住支竿頂住就已經不錯了。然後佢就叫我幫手，咁我於是就從佢手中接過魚竿，然後就硬砌左條魚幾下，令到條魚攰左一大半而我又肯定條魚都應該無咩能耐反擊走得甩之後，我就將魚竿傳遞返比阿細表妹，教佢頂住支竿再慢慢收，我再幫佢調較磅頂，咁終於玩多兩手條魚就見影，盲曹一條呢。而其實呢個時候條魚都已經謝哂皮、無力反撲了，於是我就充當釣魚僮為表妹撈魚，將這條佢第一次用魚竿中嘅魚撈上黎，目測大約有兩斤多三斤吧，認真爽呢。開心得細表妹話今日嘅目標已經達成了；不過我就搭咀咁話雖然魚係佢中，但頂魚最開心果幾下比我玩左，所以希望佢快點中過另一口然後可以自己一手包辦搞掂條魚，而我就則只在旁提示和幫手撈魚，絕不插手魚竿之任何操作。

而中完呢條盲鬼之後，其實大表妹都仲係有那些抽唔到的魚訊，而我竟然叫哂四飛卻是水靜河非，咁至於細表妹呢? 未幾佢又有一一下魚訊，我亦見佢抽中左，但係佢以為中左魚之後都要繼續抽竿動作以令條魚走唔甩，所以佢就不斷揮竿上抽下放，卻就係因為咁樣令到魚線有虛絲，竟然比條魚有機可乘走甩左。不過就算係走甩左，都係一個好嘅經驗，反正黎魚場就係著重學習、練習，多過於魚穫啦；所以我都是只有在旁袖手旁觀，加多把口比提示就算啦。今次走左，下次方法正確咪可以囉。一於再接再厲。不過可能都仲係生疏同略帶緊張嘅關係，係走魚之後無耐正當細表妹放低支竿(當然有綁失手繩)行過黎遮太陽之際，我地又見到佢支竿頭抖動了兩下之後就被拉扯了，於是細表妹就好怱忙咁趕過去抽竿抽魚，但係卻心急地抽了竿身的中間，而魚雖然其實已經本身中左，但係就在太猛烈的抽竿之下斷線了。咁我咪由走過佢同佢講解下正確嘅手法係應該如何好好利用整支魚竿去控制條魚咁囉，而其實我都覺得佢已經開始明白了，等待的就是再度練習的機會了。

不過，接下來，練習嘅機會並不是降臨到佢身上，又唔係坐左係太陽傘底下、專心等待嘅大表妹身上喎，而係我放在較遠處的那個沒用浮波的地雷度。其實又真係咁啱比我見到條魚線忽然拉行了，咁於是我咪暫時唔同阿表妹地講解中魚嘅較學，改而身教，立即走過去用手玩，不過一上手就知條魚唔係點樣大條了，係唔燒手嘅情況之下拉左兩手條魚已經無咩反抗能力，咁我又叫左佢地過黎接力，玩多唔夠十零秒，條魚就已經洗哂鰓，睇一睇，斤頭盲鬼一條，於是我就同表妹地講話唔駛用撈簊，直接逗條魚上黎就可以了。望下個鐘，4點半鬆少少，比我上次開齋嘅時間早左成兩個鐘，好有進步呢。

不過接下來嘅時間就比較疏口，大家都係等了又等，咁我咪問下細表妹佢係點樣令到那些魚咬佢嘅魚餌，結論都係話沉底時慢慢拖回來就會中，咁我見大表妹仲未開齋，咪建議佢不如轉釣組換沉底，不過有耐性的她就話不如再試多陣，睇下情況再作打算。但係呢，好動嘅細表妹呢個時候又係度拖拖下咁樣收線嘅時候終於來了一下魚訊，今次嘅佢比較冷靜，亦都吸收左之前嘅教訓，再加上我在旁邊同佢減壓同提示，好快咁樣就將條斤裝盲鬼收復了！正所謂屢戰屢敗、屢敗屢戰，始終都會戰到有戰勝的一次的！你說對不對？！而好明顯釣魚呢家野真係好旺新手，係佢中完魚無耐，放但左支魚竿埋黎坐左喺太陽傘底下嘅大表妹和我吹水之際，又係佢支竿有魚訊了，而今次佢已經記住了剛剛中魚的感覺，掌握左上魚的技巧，輕易咁樣又再將另一條斤裝盲鬼收復。

咁我有見及此，就同大表妹講話咁落去唔得啦，一於轉沉底搏一搏啦，然後就幫佢換左做沉底釣組。跟住我見天口熱熱地，就搵埋細表妹同我出去買野飲，而佢地兩個仲聽到我推介話呢度嘅餐蛋麵幾有誠意，而蠢蠢欲試。咁就啱啦，留低未開齋嘅大表妹係度看守陣地，我就同細表妹去補給，而呢個決定亦都證明左係無錯嘅！只見我地買完野返黎嘅時候，都未行到埋去，就聽到大表妹向我地喊道話快點過來幫手撈魚；原來佢已經中左魚，抽左魚，同埋收復埋條魚，就差在係唔知點樣一個人又控住魚又拎佢上黎，咁得啦，我即刻急步過去放低手上剛買回來嘅飲料，然後咪就咁逗條魚上黎囉，又係斤裝盲鬼一條。之但係唔好睇佢魚仔細細，其意義可重大呢！事關終於，大表妹證明左比佢自己同佢嘅朋友仔睇，佢係邊度跌低，就係邊度起返身！真係要比返個叻叻豬同讚好佢呢！而又真係，換左沉式釣組都唔夠半粒鐘，阿大表妹就成功服仇了，果然我們的決定做對了。望一望個鐘，六點都未夠呢！

但其實呢個時候先至係我地開始忙碌嘅時候，之前我都曾經將其中一支沉底換過假餌來試玩拖魚，因為眼見反正放哂低度都無咩魚搞，咪一於試試未玩過嘅手法囉，之但係眼見沉式有效，我咪又將支竿綁回沉底釣組囉。之但係正當我係度埋怨緊我咁耐都未有魚竿中過魚嘅時候，我忽然發覺我拋左出池中心嘅果支浮標唔見左喎，於是立即急急腳走去抽竿，條魚其實自身已經中左走唔甩了，我逗一逗就知條魚又係無反抗能力，於是盡量較鬆磅頂希望可以享受多一點將魚拉杯的時間，可惜魚仔真係唔給力，都唔夠廿秒，佢又投左降了，等我想讓比佢地玩嘅機會都無，於是有勞呀細表妹幫我拎住支竿好讓我將條斤裝盲鬼就咁的上來呢。而終於，我地磯釣釣組部門發市了！好事一不離二、二不離三，呢個黃昏時候就係波叔魚場開口放飯嘅時段了，我呢頭剛剛中完，果頭又到細表妹中魚，然後大表妹又中，跟手我另外果支善良的竿亦告開齋，亦就係忙到咁，放係遠處的那個沉底地雷我根本無暇應酬，所以都斷了好幾次魚了，到後來根本我地已經收夠籌索性釣少一個地雷，這是後話。

講返現場環境，中完魚，咁阿表妹地諗住趁仲係白天，仲有點黃昏、日落嘅感覺時就影多兩張靚相，咁呢細表妹就揸住支魚竿係度作狀釣魚、上下揮動地叫阿大表妹同佢影返張相，就係佢面向鏡頭，但又揮緊竿嘅時候，忽然就見到有魚襲擊，然後拉竿，阿細表妹即時作出抽竿頂魚反應，整個過程自然剛好盡數被大表妹攝入鏡頭之內，而我見佢已經十拿九穩我就埋位睇下其他魚竿，呢個時候又見到大表妹果支竿嘅魚絲有所郁動，我猜想其實已經中左魚了，於是就叫阿大表妹自己過來玩，上水又係一條盲鬼。

之後過左一陣，波叔出巡，咁佢隻狗狗又跟埋過黎，怕狗的細表妹就放低佢支竿走左過黎我旁邊「避難」，咁我咪同佢吹下水順便做擋戰牌啦，咁就係咁樣吹下水絞下線，忽然旁頂又被拉了、然後魚絲又出了，我頂左兩手知道又係斤裝盲鬼我就將竿橫傳比細表妹玩，真係就咁樣佢走過黎講兩句野都有玩魚。而由於岩岩中魚時我並未有收起有旁的那個沉波地雷，所以令到兩條魚線糾纏在一起，咁於是我就收返哂兩副上黎解，先解好善良的竿那邊在拋返出去之後就去重新綁過浮波地雷，然後就掟返落水，而係個浮波落左水都唔夠五秒定十秒個波仔就一野被拉左入水沒頂了，咁我梗係即時「引爆地雷」啦，一抽一中一逗，估計都係斤裝盲曹，不過畢竟係手繩，所以另有一番感覺，不過收左兩手我又將妳線交比表妹佢地玩，務求令佢地試下不同的中魚和收魚感覺。而起埋果條魚之後，我地是日嘅所有釣組都均已成功開齋，我亦都講笑咁話連呢個一路都無魚中嘅絕望之碌都有魚中，今日真係比阿新手表妹帶旺哂喇，而佢就話再係咁樣中魚中落去真係會中釣魚毒會上癮的，哈哈。跟手話都未講完，我池中心嘅果支標又沉左啦，我急急腳走過去一逗，中左魚，而見表妹地都算熟習左收魚嘅手法之後，就索性連支長磯竿都比佢地玩，於是就叫佢地過來接手輪流體驗一番，亦順道問下佢地感覺有乜分別。結果得到嘅答案就梗係話用呢支竿玩係比佢地嘅硬砌竿再爽多幾倍啦！

如是者，我地幾個人嘅魚竿都頻繁地中魚，而我都只係睇佢地兩個練習，而天色都慢慢開始轉暗，我就問佢地話幾時走好呀，八點都可以，不過專程入來下白泥睇日落的人很多，如果而家走就很傻仔，因為要同好多人一齊排隊搭小巴；不如再玩多陣等睇日落班人少些再作打算。咁表妹地見又我地呢段時間都不停中魚，當然沒有異議呢。而天色較暗，波叔亦走過來開了魚場的燈，方便在場人士夜釣有點燈光照明，而放眼現場，其實人數不多，可以說我們那邊的那半個場就得我們三表兄妹了。

由於有燈，雖然我那在池中心的那支浮標沒加夜光棒，但依稀仍然可以望見，不過就要比較留神，咁我咪叫埋兩個表妹幫手一齊留意咁囉。咁我就係同大表妹像大白天一樣留守太陽傘下那個位置，而細表妹就繼續在兩張椅子開外的那個旺位作釣。咁叫得佢地留神，咁有時又真係會因為反光而睇唔到支標的，咁阿大表妹就問我支標在那兒，我就同佢講話我們的十點方向，亦即左上方咁樣啦，而佢就睇左一陣之後就望見了；好喇，咁阿細表妹就又問從她的位置看那支浮標應該在那兒呢，咁我咪行過去佢果邊睇，然後同佢講話十一點方向啦，咁佢睇左幾秒都仲未睇到，我就繼續指比佢睇，點知指指下直頭突然就真係唔鬼見左支標，咁我就梗係走過支竿果邊抽竿啦，抽緊魚果陣表妹地已經走過黎話要玩，因為又真係比她們的那些硬砌架生來得好玩。雖然只是斤裝盲鬼，但係都已經令佢地又開心返一分幾十秒呢，唔似用硬野，十秒都差唔多唔駛就秒殺佢地。

而佢地玩緊魚嘅時候，又就係我返位嘅時候，當我返到太陽傘主位時，其實佢地果面都已經搞掂左條魚抽左上黎了，就係佢地解緊魚既時候我就係呢面見到大表妹支竿嘅魚竿在郁動，明顯有魚在下面游著拉著魚線，咁我就邊叫佢話佢知中魚邊抽魚啦，抽中之後我都未知係乜魚阿大表妹就走過黎叫我比佢玩，咁梗係好啦，反正睇佢地玩我都夠開心了，今日已經中左咁多口魚；而就係大表妹接手收魚嘅時候我都唔覺得條魚會比到乜野程度嘅掙扎，因為我抽完魚之後條魚係無乜動力的；但係呢個時候大表妹接手完才絞了兩下，我就見到佢支竿突然被扯，跟手竿身就滿弓了，我就立即同佢講話呢條魚唔係之前佢一直玩嘅級數，一定要小心應付，不過唔駛講都知道呢條魚唔係講笑，因為只見到細表妹揸住支竿頂起哂支竿滿哂弓嘅時候，條魚係同佢拚命角力，表妹牢牢的頂著魚竿，魚兒就拼命的游，拉扯著磅頂；只見魚線不停的出著，而表妹就只有死死地繼續拿著魚竿讓那魚獨狂亂闖，似足主人溜狗一樣，讓狗兒滿場飛；還好這邊半個魚場都沒有其他釣客，好讓我們為所欲為。咁當然我又唔會真係比條魚橫行無忌嘅，喺條魚每當游到差唔多埋池邊嘅時候我都會提示大表妹好好的控制那條魚的航向，讓牠反方向的游著，以免埋岸邊讓魚線過石斷；而因為有太陽傘的關係，所以也要避免魚竿和魚線繞著那把傘呢。另外還有點麻煩的就是我那隻絞其實有點不順，遇上這霸道的魚時就肯定更不好收線了；亦因為呢個緣故，大表妹每一下收線絞魚的動作都比較吃力，很像扭吃緊了的鑼絲蓋一般，慢慢的，咬緊牙關的，在絞著。我見狀，於是就問佢駛唔駛幫下手，因為我都知道隻絞嘅問題令佢百上加斤，但係你都真係估唔到佢點答你，哈，只聽見佢緩緩的答道：「吃力是有點，不過還可以... 而且，我鍾意這種感覺。」哈哈，聽到呢個答案嘅我同細表妹即時笑左出黎，比佢呢個出奇不意嘅答覆搞到捧腹大笑。而佢呢，就繼續認真的，吃力的絞著。就在我和細表妹係旁邊哝嘩鬼叫，又影相又尖叫的這段時間，出面在等車的人都因為聽到我們的喧鬧聲而一直好奇著我們釣到了怎樣的魚；而就算點樣霸道的魚，都總有疲累下來的時候，終於，長長的魚影終於現蹤影了，當然一如我所料是大星鱸啦，但係無論你點大，終於耐力都唔夠堅韌不屈的大表妹利害；最後，大表妹好不容易的將魚控制到太陽傘當前的地方，而作為魚僮、被細表妹稱為「魚棚叔叔」的我則將侍候已久的撈簊插入水將魚頭套著，然後兩手拉起，嘩，真的十分之重，但最後總算無驚無險的將魚拉了上來，大星鱸很重，應我雙手將佢抬上來的感覺，肯定至少有九到十斤！而在旁的兩個表妹早已由魚入撈簊的一剎開始興奮得呱呱大叫，連連拍手叫好！！呢條魚又真係比我上次黎時中的那一條更加大，我諗都唔駛諗就答到你係因為上次我都仲可以單手輕易的就舉起條魚拍照，但係呢條魚則令我舉到面容扭曲，要雙手才可穩穩的拿著牠拍照。至於細表妹一個，更加係拎起影相都有難度，咁唯有叫埋細表妹一齊拎先得啦，又或者係我托住個魚尾部份，咁先可以順利拍照完成。總而言之，呢條魚真係玩味十足，我估計大表妹用支硬砌竿都差唔多玩左成十分鐘呢！而全程我都只在旁稍作提示，阿表妹卻可以一路沉著應戰，最終將大星星擊敗，阿大表妹，你喺得嘅！！

而亦證明我地留守魚場作戰，讓出面等車的人龍先走的決定係正確的。而我亦順帶解釋埋比大表妹知點解今日我決定成下晝三點多先黎都無問題，同埋上次佢同佢同事咁早走係大大走寶了，因為黃金時段總在黃昏五點幾六點打後呢。中完呢條魚，你估下佢地仲會唔會即刻肯收竿走人呢? 唔駛問阿貴都知答案顯而易見吧。

咁樣就繼續釣落去啦，天色亦都已經黑齊，而我地三個嘅魚竿都有中過盲鬼，而呢個時候我見我地都中左咁多口魚，釣少那個放在遠處的沉底地雷亦無損失，於是就將它收好。而當我一返回太陽傘下坐低都唔夠兩分鐘，忽然間絕望之碌的那個沉波猛地一沉，是比之前的那些魚訊的下沉速度都要快，咁我就立即拿起線圈就抽，隨之而來的也是燒手的感覺，不過收收放放左幾手之後佢就開始出現疲態，再玩多兩手就見埋魚影，卻是今日的新品種，紅魔鬼一條呢！中完呢條魚，望下隻錶都差不多成九點了，等車的人龍亦開始散得七七八八，咁我就同表妹地講話不如我先開始收拾釣具，因為實在放置了各式各樣的武器，而佢地就繼續釣，因為佢地嘅釣竿收拾較為容易。而就係咁樣我就先從長長的磯竿開始，然後再到絕望之碌；而收完呢兩件武器我都唔見佢地有魚訊，可見魚兒的熱情亦開始冷卻。不過由於細表妹果支竿是從波叔那邊租過來用，所以根本不用收拾整理，只需走時歸還就可以，於是我就叫細表妹繼續作戰，而我同大表妹就一人收拾一支短竿。而就係我地收好釣竿整理行李嘅時候，今日注定是旺家的細表妹都竟然仲可以黎多一口魚訊和中魚，雖然也是今日的例牌常餐斤裝盲鬼，但係臨走前都仲可以埋個靚齋都唔可以話唔爽。而阿細表妹都笑逐顏開咁講話今日真係玩得好開心，真係釣魚釣到中哂毒，下次我再黎時一定要把她再叫上。又話估唔到黎果陣話如果比佢釣到一條魚都已經好滿足，結果卻足足中成十口！至於大表妹則表示，大仇已報，佢亦成功係佢跌到嘅地方企返起身，仲可以係佢同事面前吐氣揚眉、「耀武揚威」，此番釣行可謂令佢揚名立萬！至於回顧主日釣況，以數量黎計的話，細表妹可謂由頭帶到落尾，有成十一口，足足比目標多成十口！而大表妹都有成六口，至於我，原來唔聲唔聲夾埋都有成八口；當然，我用嘅武器數比佢地兩位加埋都仲要多，絕對是犯規呢，哈哈。至於魚種，盲曹可說是獨佔鰲頭，睇下細表妹起果十一口全部都係盲鬼就知咩事啦。我地廿五口入面佢地出現左足足廿三次，其餘兩口則是我的紅鮪和大表妹那條為佢贏得「是日大魚獎」的十斤大星鱸。而隨住細表妹標左個靚尾會之後，我地今日嘅「下白泥波叔覆桌之旅」亦都在一片歡樂、喧鬧之聲完滿結束了！大家都能盡興而回，至對我黎講最開心嘅既事就係兩個表妹今日都玩得開心、滿足；同埋，我又毒多兩個人仔中釣魚毒了，呵呵呵。

擺個靚陣先