紅雨不減親子樂

日期: 08/15/2015
農曆: 七月初二
地點: 維港東龍島、打浪排一帶
艇家: B記
釣友: 朱氏父子、Y氏父子
天氣: 初時紅雨、下晝陰天西南風 4級
水流: 生流、水質良好
釣穫: 三鬚 x1 (磅頭)、池魚6斤，連同其他雜魚全日埋單 13、4斤

是咁的，其實一路我地出開艇釣都是閒日多，事關一般好艇家嘅週末釣期都會一早已經比熟客仔包哂；而我老表呢就返寫字樓工的，所以閒日釣期佢從來都係不能參加。咁之但係佢又見我地釣魚釣得咁開心，有時仲叫埋佢老爸一齊釣添，所以佢都好有興趣加入我地歡樂爆釣團。咁擾擾攘攘，兜兜轉轉，就在我上個月-同準備仔出B記嘅時候-，我就同B記傾開話我有朋友仔都想搵佢釣，不過就要星期六日，咁佢話星期日就到2016先有啦，但星期六都偶爾會有，於是我問左佢有8月15呢一日之後趕快問完哂我嘅隊友之後就立即預約左先了。而今次嘅隊友則係由兩大集團組成，我老表朱氏父子、以及我Y氏父子呢！呢一個組合別人眼裡可沒什麼特別，但要數一數對上一次我們兩代人兩家父子同時釣魚應該數數都至少10年、甚至是15年以上了。所以是次機會絕對難逢，而且能夠聚聚天倫「親子」樂也是令人極為期待的一次釣行呢！

到左出發前一天，望下天文台天氣預測都係話週六會多雲及有幾陣驟雨，下晝轉晴，所以就算老表問我計劃行程會否有調動我根本都甚為淡定，仲答佢話無咁猛太陽陰陰地天仲舒服呢。之但係千人台之所以叫千人台就真係並唔係浪得虛名嘅，就係我朝早6點起身嘅時候，睇到嘅天氣概況係: 黃色暴雨警告現正生效，預測上午多時有雷雨，下晝則情況緩和。咁我個心都打個突，即時打比B記，但可能時候太早，仲未搵到B記，咁於是就諗住再睇定少少先出門口。呢個時候老表就發訊息問我，我就話正在聯絡艇家詢問情況，而佢可能因為好耐無出過海，比我更為擔心，之但係我雖然見是黃色暴雨警告，但睇分區天氣見我地的釣點其實情況並唔係太嚴重，終於我打到給B記，佢淡定的聲音傅過來說：「沒問題，照舊如常，我開艇你都信唔過咩?」，咁我當然信得過，不過有新手去點都要問清楚好一點的嘛。然後我就回覆老表說艇家睇過天氣情況話無問題。不過老表依舊擔心，說希望等天氣好一點才出發，我解釋了反正他也不懂，當然他老婆比他更擔心，然後最後我只說了一句就是，艇家比我們任何人都更緊張，同時也更有經驗，如果艇家衡量過情況說沒問題，就一般情況下都可以如常，而且維港是一個進可攻，退可守的好地方，若然真的外面風大雨大，那我們還是可以在維港內塘一帶作釣呀；君不見從來都未聽過維港之內有反艇啦吧? 而且真的若是有人不舒服，小艇隨時可以靠到內塘任何一個碼頭走人呢。就這樣，老表在一臉疑惑的情況下「被逼」出門口了，但係咪就係咁樣，先至令今日嘅爆釣得黎仲要唔曬嘅快樂旅程無胎死腹中到呢。

好啦，咁終於大家都在西灣河集合，然後就登上一早到達等待嘅B記艇中。一上去我就問佢咁嘅天氣，駛唔駛釣住內塘先，事關其實天文台在7點半時不但沒有除下黃色暴雨警告，更將警告級別提升至紅色暴雨警告，所以其實我個心一日未上B記艇一日都仲有些許忐忑不安。不過B記一見到我地就比左個定心丸答案我地，佢話無問題，直出東龍島後面，因為吹西南風，所以雨帶其實不會強烈吹襲我地釣點一帶喎；聽到佢咁講即時心都定哂，跟手見下個天其實又真係出面都唔係烏雲密佈吖，仲可以陰住天無咁曬黎釣添，真係諗起都舒服呢。

好啦，事不宜遲，未去到嘅時候梗係就要綁定架生啦，今次仲要幫埋成十年無釣魚嘅老表、同埋已經開始有老花嘅阿爸穿埋添，不過都係熟能生巧的道理啫；佢地要搞成5分鐘嘅野你比我一分鐘就搞掂啦。而且我費事佢地咁耐無釣容易整亂堆魚絲，所以幫佢地都係穿單勾波子壓底。至於我自己就梗係叫兩飛穿孖勾啦，底勾釣生蝦，上勾釣蝦仁，叫哂兩飛，務求大小通釣。而且魚餌今次更加難預算，因為買得多，又怕今日因下了很久大雨疏口而浪費；買得少，又怕遇到化餌魚仔黨而提早收工，所以都幾頭痕架。不過還好我都算有經驗，而且我仲有仕掛毛勾可以無餌生魚呢，呢個釣組等陣就會發揮佢強大嘅威力啦，這是後話。

咁終於我地無風無雨又無浪嘅情況之下黎到東龍背，望住果洲方向作釣，因為B記前幾日出艇都係呢一帶位置找到雞魚和沙立，所以今日又返黎呢度睇下有無運仔行。而釣之前我已經同我老表講話今日本來另一名要來的真正新手因病無來，所以我老表以資歷黎計全船佢就叫做最真手，又叫做「偽新手」，所以所謂的新手爆釣運佢今日有機會可以沾到一丁點，感覺佢應該今日都有不錯收穫。不過佢新手都真係要先從新熟習一下，所以開齋的還是我。基本上B記一到埗話可以落絲都唔夠幾分鐘我就已經響頭炮、先拔頭籌了。上水良型石狗公是也，比上次和準備仔來時的那些煲湯石狗可謂大返兩個馬鼻。接著都係我連續起多幾條石狗，跟住B記，然後我老爸也接著開齋了；跟住坐我對面，平時準備仔專用位置嘅老表亦都迎來久違的魚兒呢。跟手大家都陸續上魚，基本上每次B記一收繩返寨之後果下一到寨落繩就會中魚。我仲同我老表講如果超過三分鐘你都覺得無魚訊你可以拎返上黎睇下塊魚餌仲存在與否，因為每次一到埗我地落絲都幾乎即時中魚。我老爸則講話佢開首的三條魚是三個品種：石狗、烏絲、同梳蘿。而我就一味咁樣中石狗。不過中石狗也不錯，今日的石狗大多數都屬良型呢！之後一直都係呢個位置等待希望搵到石狗之餘仲搵到沙立同雞魚，可是魚就等唔到啦，大雨則來了。於是車埋山邊位置少少避雨，但其實都係聊勝於無，所以趁呢個下雨時候我就開竿綁定仕掛毛勾釣組，其他人則稍作小休，剩下不受影響的B記繼續搏命。而B記見我停左手，則叫我幫佢手拎桶魚出去生倉放，原來佢之前中左魚都一直放左係桶度無好似平時咁上魚後直接就掟出來，因為今日較多人坐在走廊通道位喎，所以佢收收埋埋、唔聲唔聲先黎一次過曬冷呢。哈哈，我仲同佢講話「B記你咁樣收埋哂中左嘅魚一次過先拎出黎，令我平時少左發奮嘅催化劑喎」，咁當然我立即都要繼續發奮啦。

不過等雨勢稍為減弱之後，發奮嘅，原來係老表。雨細後，架艇車返出少少之後釣，竟然比我老表抽中條我釣咁耐都未中過、卻又知道好滑嘅石碼頭上黎，即時同佢講話新手有運仔仲有食神添，呢條魚好野黎架，雖然都係得幾兩，但係味鮮肉滑，絕對會食到耳仔郁郁呢。至於我，因為呢個時候見到有堆池仔不斷打水，再加上雨戰用竿會好釣一些，所以暫時放下手繩，改以仕掛毛勾作戰。不過池仔魚訊疏落，只得小貓三四隻；不過除左池魚，我都的中石狗、梳蘿、扯旗仔，甚至小沙立添，真係向一直以來都只用手繩嘅老表同老爸完美示範左假餌嘅威力！不過，其實呢個只係上半場而已...

上半場仲有一段小插曲，呢個情況，其實亦出現過在廚房仔身上的。究竟係咩呢，就係我老爸學-廚房仔一樣敗陣了-，因為老爸又係沒有坐出艇頭開揚部分，而是坐在倉內，一直吸著那些悶人的廢氣，再加上久違沙場作戰，所以稍為敗陣。但係好笑就好笑在佢並沒有手停口停，在我見佢打誘餌時我當然叫佢稍為休息暫時把魚線放下，但係佢口裡打著誘餌，手部還是有所動作，跟住上多兩條石狗讓我們好看，真的是都讓我們沒話可說呢！

釣下釣下咁又到左中午了，由於一直都搵唔到前幾日老是常出現的沙立及雞魚，再加上流水暫轉，所以B記決定同隔離阿星仔艇一齊轉戰打浪排，睇下會唔會有轉機。沙立同雞魚我就答你唔到，之但係我個人爆釣時間就由到達打浪排的一刻正式開始上演！在接下來的兩個小時入面，我都沒有再勾過任何一塊魚餌，我只是憑那串毛勾任掛，就闖出了一片天。只見我一落勾，到底收起即中，而且唔係一條，而是每次都起碼兩、三條咁中，有時甚至是4條，甚至是5條！要知道那串仕掛才6隻勾，能夠中到5條，簡直已經係物盡其用。係接下來嘅呢段時間，雖然其他人仔都有中下魚，但係好肯定佢地4個加埋嘅數量都唔會夠我一個多，因為毛勾仕掛簡直就係池魚殺星，我落親又中，再落再中，最多都係上到黎甩返一兩條落海，但根本無所謂，因為已經過足手癮，甚至乎係中到手攰！只要係中超過一條以上，就已經有出磅頂嘅感覺；再者，中池魚唔會係同一時間，而係一路收一路中，所以你可以睇到竿頭是愈來愈垂，愈來愈彎的；就連感覺也是愈來愈沉、愈來愈墜手的！簡直係爽歪歪到震。就連觀眾們都話睇見都開心，不過由於佢地係手繩嘅關係，所以我縱使有多一副仕掛，到最後都只係留返比我亂左線之後為節省時間釣魚而再用過。當然，佢地都輪流中魚，但係講真彷彿這一帶已被池仔佔領，所以起魚速度同數量都與我望塵莫及。不過我其實也可說是勝之不武，只是贏在架生方面而已。因為一直都搵唔到其他魚開口，而B記見又我不斷爆釣，所以也樂得讓我繼續爽，起碼可以讓本身情況已經不俗嘅生倉更加生氣勃勃。而我爆釣、飛絲出磅頂嘅情況一直持續到... 被雞泡剪絲的一刻，就正式宣告結束落幕了。

既然成抽仕掛釣組被剪，本身又已經過哂手癮，係時候用返手繩勾生蝦搏下命啦，而我亦都叫一直用蝦仁嘅老表一齊轉生蝦、搏粗野，事關之前一直供應稍為緊張嘅生蝦已經因為在我無餌釣魚加佢只用蝦仁作釣嘅情況下得以舒緩。咁既然時間所剩無多，望下個鐘都已經3點半啦，生倉又已經無哂壓力，係唯獨差條撈簊魚壓下倉，咁再唔用生蝦更待何時！之不過都係果句啦，「新手玩哂」，就在老表轉用生蝦做餌都唔夠廿分鐘，佢又如常咁中魚啦喎，咁我又無乜留意佢喎，之但係真係唔讚B記唔得，佢真係一眼關七，係佢見到話我老表好似需要幫手叫我睇睇駛唔駛幫手，咁於是我望一望我老表，顯然佢收魚嘅動作係快左同急左嘅，雖然未至於好似準備仔咁樣面容扭曲，但係都已經係同佢之前嘅動作大相逕庭。我再問佢有何感覺佢就答我話感覺到條魚不斷掙扎、左搖右擺；咁我即時呼籲佢冷靜，並叫佢慢慢收之餘亦要保持拉力，以我則趕緊在艇蓬上將撈簊取下，然後指示佢繼續收魚，而時間亦都岩岩好，在我拿下撈簊都唔夠十秒就見到魚影，即時兜頭將撈簊插下，魚兒應聲入網。磅頭三鬚一條！上艇將條魚喺個撈簊拎出黎解時，只見魚勾其實剛剛勾在魚唇邊，差一點就甩勾或爆咀了，真的很險。若果老表收魚快左而我又未拎撈簊時條魚稍為掙扎的話，應該已經可以望住佢游返落水底了。結果解勾都唔駛，我地拎住佢影相時佢掙扎多兩野就已經自動解勾了，所以真係證明左老表今日有運行。什麼奇魚獎、大魚獎都盡歸佢手。而呢個時候望下個鐘，四點都未夠，大家即時信心大增。

可惜嘅係，三鬚係獨行魚種，所以並唔會有以往嘅什麼「一不離二、二不離三」嘅情況出現，一條就係一條。而前幾日老是常出現的斤裝沙立，今日卻一條不見；所以我地嘅釣行就係咁樣在我老表中完三鬚之後平平淡淡的一個小時後結束了。但係今日嘅釣況真係超額完成啦可以絕對話係。首先，朝早紅色暴雨而能夠成行就已經覺得係賺左，而出到黎又只係落左下個零鐘，但係換來嘅就係全日都不用在猛烈的太陽底下釣魚，認真舒服。再加上基本上由到埗的第一刻開始一直有良型石狗上水，仲有烏絲、石崇，良型魚仔可以話係無停過。然之後又有池魚比我過手癮，直頭爽到爆炸。事後在老表家中點算總共有超過60條池魚；照咁樣計返，大約兩個鐘120分鐘之內我釣到60條有多，真的是平均兩分鐘就有一條呢，真係我仲可以點苛求呢！再加上老表嘅驚險磅頭三鬚，簡直係錦上添花！最緊要嘅係，兩位老人家今日都玩得好開心、好滿足，佢地其實都過足手癮，雖然我字裡行間並沒有著墨太多寫佢地中魚嘅情況，但其實佢地都係密密手咁中魚的；認真要數魚穫數量，我老爸應該比作為「偽新手」的老表還要多呢，只不過老表今日中嘅魚都真係估佢唔到呢。而真係最感恩嘅係可以喺紅色暴雨之下我地仲可以風雨不改咁樣出黎親子樂，兩代人玩番一些大家十年有多都未試過一齊去玩的活動，簡直真係多謝上蒼造美呢！爸爸們，禾門哎妮。B記，亦都謝謝你。