打龜龜群聚港珠澳暢飲獅威

日期: 01/06/2016
農曆: 十一月廿七
地點: 西水港珠澳大橋、屯門一帶
艇家: 山歌仔
釣友: 打龜龜群組仝人
天氣: 天晴、東北風 3, 4級
水流: 死流、水質優良
釣穫: 獅威啤酒 x 2板

是咁的，今次釣魚之旅可謂等了又等。月頭本來同芒生加鬼仔約左山歌仔諗住聚舊加釣魚，奈何組長山歌仔話魚況不佳建議擇日再戰，咁唯有等待佳音。好啦終於等到芒生再度吹雞，第一時間在群組裡面報名，本來一開始是四人報名，點知去到出發前兩日竟然人人都能攝出空檔，一於黎個打龜龜WHATSAPP群組全體出動。這個群組嘅組長當然就係山歌仔，再加上芒生嘅釣魚好友組成，可謂人強馬壯，龜氣澎湃。在擇好日子等待釣期來臨之前大家都已經壯志成成，再加上我地在群組裡面又再提出玩大魚獎遊戲，所以連日來都一直情緒高漲。
好了到出發當日，本來近期大熱就係到青馬大橋一帶圍捕馬友，不過組長話我地今日有齊成組人出發，人多再加水深會好容易魚線疊魚線，所以決定唔玩夢幻之魚改而找尋另一西水冬天熱門 - 百花鱸。
以往釣鱸唔係去機場尾就係去屯門發電廠，不過今日則去了我之前都未去過的釣點，畢竟呢一兩年西水那邊的水利及基建工程著實大大改善了那邊的環境和生態，所以釣點同釣況都和以往大不同。咁究竟是日第一個釣點係邊度呢? 我只知道落艇之後大家集資好大魚獎彩池之後就出發，然後經過了機場之後則繼續一路向西的車，車多大約十多二十分鐘，直至見到了還在建造當中的港珠澳大橋，然後山歌仔就揀了其中一個樁位停了下來，宣告是日釣旅正式開始！
我地由於人多而且又車艇車得好快，所以車艇途中大家都未有先將架生綁好；所以就係我地眾人還在慢慢拎架生出黎邊吹水邊綁釣組時，山歌仔已經首先落繩了，並且即落唔夠一分鐘就已經即時有動作起魚，撈簊都唔駛用直接將魚飛上來，當然是目標魚的百花鱸啦。大家都因為要綁架生而未黎得切比反應，山歌仔已經又落釣繼續釣並且又再唔夠兩分鐘又再起手、飛魚上艇！嘩，真係我地未有人落繩佢就已經梅開二度！大家呢個時候先至如夢初醒，甚至有人講笑咁話不如我地索性唔綁架生、開住個手機拍攝山歌仔釣魚直播就算。
上完呢兩條魚，我地都已經陸續落繩釣魚，而山歌仔的動靜亦有所減緩，而我雖然感到有魚訊，但可能已經接近流水尾段，鱸魚食餌比較精口，加上我釣技不精、經驗不足，所以未能把握呢口食餌嘅時機而比係魚得逞，將大眼仔奪去。而坐我前面的阿喬過左幾分鐘唔夠就有動作收繩話有魚訊，跟手睇佢條繩又應該係中魚，不過收左幾手之後就鬆返，應該係甩魚了。但係要來始終都要來，過左一陣又係阿喬首先有魚食餌，不過見佢抽繩之後又唔似中左鱸魚咁，結果上到水見到嘅係一條成4, 5 兩重嘅大石狗！我地都笑說呢條大石狗暫時係大魚獎得主，而且更加講話大石狗都要揀食大眼仔而唔係隔離一直波子壓底勾蝦仔嘅阿言呢。其實除左阿言係用蝦仔釣波子壓底，其餘人士如我、芒生、同艾迪都係勾頭蝦希望有鱸魚青睞。
而果然，等左無耐，今次抽繩嘅輪到芒生，又係唔駛用撈簊直接飛上黎，磅頭鱸魚一條。大魚獎即時轉移左去芒生度。而山歌仔中完兩條鱸仔之後就靜哂，只好唏噓概嘆一聲蔡峰華嘅金句「剎那嘅光輝並唔代表永恆」。跟住用波子壓底嘅阿言終於釣返條石狗仔開齋了。而我則繼續都係有魚訊但唔識砌。流水就黎行到尾聲，心諗住再釣唔到真係無運行，不過這些東西又真係無得強求，再加上係自己技術問題，真係無得抱怨什麼。而且強如山歌仔都岩岩見佢起手收兩手然後甩左，並話跑掉的此鱸魚有成兩、三斤重；咁山歌仔都失手，我釣唔到又有什麼出奇? 不過正所謂好波不如好運，今次又係到我有魚訊，又係感覺到條鱸魚先緊緊的大眼仔含住，然後慢慢的拉，而終於今次比我感覺到佢有一下比較大力的食餌並且比我把握住了，終於一逗、即中，又係撈簊都唔駛用，頂佢兩下就乖乖上水，同山歌仔第二條魚一樣，斤半百花鱸一條！即時比芒生笑話：「龜仔龜唔哂喎，而家仲暫時拎住大魚獎添喎」，我就話唔希望呢條魚可以贏，有得揀我都想大家中多一點啦，又或者係我再釣到大條一點來贏得更加名正言順啦！
可惜之後流水差唔多靜哂，圍住港珠澳幾個橋莊釣都無乜食餌，而就算我同阿喬偶有食餌，亦都把握唔到，注定呢度我地就真係釣得咁多啦，於是山歌仔就話繞繩直車返去沙洲出面睇下有無其他魚釣啦，但真係流水靜得好交關，無魚釣，梗係飲啤酒啦，其實班衰仔係港珠澳已經開始飲，不過係黎到呢度飲都唔夠仲要玩埋猜媒同十五二十，甚至連山歌仔都加入埋玩返兩鋪，可想而知流水收哂之後我地係度做乜，哈哈。但係其實呢個時候都只不過11點咋。
沙洲無料到又再車埋少少去鯊魚排，但係鯊魚就無啦，條狀嘅牛秋就比阿喬搵到條，然之後我地又再繼續無了期咁等待同埋等待，啊，仲有飲住啤酒咁等待囉，終於等到12點半老山就話反正死哂流魚唔開口就人開口，車埋發電廠一帶開餐食午飯算數。食完飯就車左過去發電廠碼頭另一邊，水流都仍然好靜，魚訊可以話係零，連周圍幾隻艇都係無人起手。我見反正無原訊，索性就繩都唔落食下白糖羔；耀仔則講笑話勾蝦勾得唔好浸死埋隻蝦，叫阿芒生教佢勾，咁樣芒生就話等我勾一次比你睇啦，勾完放落去都唔夠兩分鐘，竟然見耀仔有料到，不過又係硬砌就上到黎，撈簊都唔駛用，但係竟然係一條靚仔斤裝牙點。大家都真係覺得好神奇無啦啦呢個時候會出現一條牙點出黎，再加上之前耀仔同芒生黎搵山歌仔釣魚又係一落就中牙點，所以而家耀仔個新朵就叫做「牙點王」了。而山歌仔見狀則笑笑口咁同耀仔講話在今日咁惡劣嘅環境之下佢仍然可以「力保不失」真係果然有殺氣。耀仔中埋魚，山歌仔見狀細細聲問芒生，得返坐艇頭嘅艾迪仲龜緊、會唔會唔開心架咁樣。跟住芒生咪答話出得黎釣魚，無所謂啦，無話包中包有魚家嘛，唔好諗咁多啦，飲勝。跟住佢兩個又繼續飲勝啦...而耀仔中完魚風流哂之後就開始進入睡眠模式。而我都係象徵式掟副繩落去釣，由於唔想逗住粒鉛咁重，索性換左做波子壓底由得佢拖住底釣算數，反正就算做一、兩斤魚12磅絲都唔會有問題。而艾迪索性無無聊開支小船竿出黎玩波子壓底，但唔開口就係唔開口，係真係連狗仔都唔食餌...真可謂靜得可怕。
耀仔同阿喬就已經徹底進入睡眠模式，我就同艾迪、阿言無無聊聊拎住副絲係度釣，山歌仔同芒生兩個就繼續一邊揸住副絲一邊隊啤傾心事，時間真係過得好不緩慢，大家都彷彿對中魚已無希望，就算成兩點水流應該轉返生少少都仲係無料到，不過就係大家都呆呆之際，阿言竟然忽然起手然後見佢好似要就魚咁樣，但係問佢又話唔駛撈簊，山歌仔又唔知點解好少有咁樣主動拎住個撈簊衝左上黎準備撈魚，點知上到水面佢一插落去之後上返黎就直接掟返條魚落水，眼尾都無望一下，不帶走一點雲彩。睇到呢度，我地已經知道阿言果條係咩魚了；無錯，就係法國馬友！阿言之後用魚鉗將魚解掉之後直接拋回海中，並且不斷口中唸唸有詞說真的枉費了一番心機和興奮，情願無中過咁樣，事關周圍的艇的人都已經悶到發荒，見阿言中魚當然都望過來，但係最後上水見魚竟然是法國馬友，真的感到讓人見笑了，哈哈。但係我可以話你知中完呢條魚之後大家就差唔多一直全日都無再中過魚，而阿言其實釣多一頭半個鐘差唔多到尾聲之時都已經讓步話就算比佢釣到爛肉梳都已經在所不計，起碼叫做已經過左手癮呢。但係我地之後轉左幾次位，無論係發電廠頭那邊的樁位，抑或是另一面碼頭底的隧道形樁柱，都係搵唔到生命跡象，最多好似係芒生釣多兩條石狗，就係我地全日最後嘅釣鑊了。而到左3點幾山歌仔見都再拖落去都係一潭死水，不如留返下次有魚再搏命，就係咁樣，3點半我地就已經收隊，而打龜龜群組2016打龜第一擊就完結了。而被稱為龜仔嘅我，亦竟然憑住全日唯一一口可以到釣的斤半鱸魚贏得了大魚獎，實在係感到有點勝之不武同埋可惜。因為我真係情願大家都多釣幾條，比我大的也不打緊，仲好過而家係攬住炒然後我係炒得最唔甘嘅果一個而得獎呢。而山歌仔亦概嘆話全日佢唯一高光時刻就係大家都準備好落餌嘅時候嘅果兩口魚，真係要講多一次「剎那光輝並唔代表永恆」。大家最後返到三家村內塘，首先山歌仔親手頒獎給我，然後大家再撈今天的魚鑊出來並將牠們和今天喝完的啤酒罐堆在一起拍照，結果當然是啤酒罐多過魚啦。不過難得大家竟然係都可以拿出空檔出來玩足一天，其實已經係好開心，釣到魚呢樣野真係當係額外獎勵，反正我地個群組亦有名你叫- 「打龜龜」嘛，哈哈。不過講真，跟左山歌艇都好幾年，真係從來都未試過坐多過5個人，今次真係一個新體驗呢；人多的確更熱鬧，而且如果認真一點競技起上來，當然比只有兩、三個人刺激啦！希望下次打龜龜的群組活動可以快點再度成團，到時我地又可以再度吃、喝、玩、樂、飲咁樣玩足一天了！

港珠澳大橋橋墩

魚唔開口人開口