YY08的部落格

 日期: 02/01/2016
農曆: 十二月廿三
地點: 西水 青馬橋底
艇家: 山歌仔
釣友: 芒生、鬼仔、彼得、鯊魚、YY
天氣: 寒雨、北風 5 級  (海上氣溫低於攝氏8度)
水流: 慢流、水質優良
釣穫: 夢幻之魚 
大魚獎得主：彼得
 

是咁的，今次釣魚之旅其實一早就已經安排好左，就係上次在轉機趕搭尾班火車 https://yy08.pixnet.net/blog/post/106159129  提及過取消了的山歌之旅嘅復刻版來的。所以主角仍然係鬼仔，而原本諗住芒生新年前會好忙，所以陣容最初只係得鬼仔、彼得、同埋我。不過咁岩我又同我踢開波嘅朋友仔阿鯊魚講左話搵次同佢去釣魚講左好鬼死耐，咁擇日不如撞日咪叫埋佢一同參與啦。而更加有趣的是，就在出發前一日咁我例牌會問下山歌仔有咩準備、幾點集合等毫無新意而又每次都要問的問題；咁我就在打龜龜群組入面問啦，咁阿組長竟然問我地有無興趣唔玩西水冬天大熱的鱸魚而改去青馬大橋底下一帶嘗試尋覓夢幻之魚 - 馬友咁喎；咁芒生睇見之後，又好有興趣，再睇下日曆又搵到幫手可以唔駛太過困身佢嘅飲食事業，所以就臨時決定加入；而組長亦都話只要眾人釣魚時都肯合作同埋忍讓，就算5個人去釣馬友都唔係問題，於是，就係咁樣我地突然間就即刻陣容鼎盛起來的準備去挑戰夢幻魚之旅了。

而就算出發前一兩天已經知道是日寒流又再襲港，我地仍然無懼寒冷，戰意熊熊；但真係勢估唔到，今日唔單止凍，仲要落足成日雨，但大家依舊沒有退縮、勇往直前衝向「偉大航道」尋覓馬友，真係可謂用盡生命在釣魚！在此不得不給予大家一個讚！

好了，講返釣旅。大家一早天都未光就已經出發，未夠7點半就已經到達深井，然後再買定補給物資，就正式由深井碼頭出發。留意返，今日我地無買午餐，因為組長一早已經講左話中午可以上返深井買暖暖燒味飯盒，所以我地都只係買左飲料同埋一些小食就落艇了。
行去碼頭果陣其實已經一直有毛毛雨落緊，咁根據天文台講話呢就今日係有一兩陣雨嘅，所以我都不以為意；但係去到釣點之後雨粉卻繼續一直咁落，毫無想停落黎的跡象；還好我地個個本身著得夠暖，所以都已經諗住會冒雨作戰亦無所謂。不過呢，釣餌方面就有點問題出現；因為原定會早到的生尤魚補給艇竟然在我地落艇之前同山歌仔講話會推遲到成9點至9點半才到，而呢個就係問題了，因為釣馬友用生尤魚絕對是完勝用生蝦的，所以如果我地用生蝦而在場其他釣艇都用尤魚的話，我地的勝算根本是零！啊，唔記得講呢，每年其實一到釣馬友的旺季，青馬橋下一底水域都可謂熱鬧非常，誇張一點的講你可以形容為水洩不通！事關隨隨便便的數數，你也能數到超過50隻小艇在釣馬友，如果是週末、假日等不用上班的日子，動輒過百隻小艇亦是等閒事。而就係如果人人都有尤魚做餌，而你無，根本中魚機會係百份之九十九唔會輪到你。而暫時，因為那架補給船的遲到，讓我們起了一點小問題，但唔通唔落繩釣咩? 梗係唔會啦，而山歌仔的策略就係唔痴埋去大伙兒圍著釣的地帶，反而在邊緣較疏艇的地方再駛開一點點釣，務求如果好彩比我地先搵到水底下那群馬友覓食的位置，可以趁其他艇未殺到埋黎之前希望馬友會睇得上我地暫時用住做餌的大眼仔。而其實呢個策略係湊效的，雖然遠處那堆圍住釣的小艇不時都有馬友釣到，但係我地在遠遠的另一邊釣時，山歌仔竟然有抽繩動作！可是佢呢下抽手竟然落空了，但係佢並無收繩，原來佢係一繩兩鉤勾夠兩直頭蝦作釣；果然條魚第一口偷襲得手之後好快又再向山歌仔的另一口餌攻擊了，而山歌仔竟然再度落空！呢種情況真係少之尤少，而由於形勢趕急，山歌仔亦深知錯失呢個機會之後基本上就好難再有偷襲機會了，因為有一部份其他釣艇已經開始向我們方向駛來，而重點是，他們手上用的，是生尤魚！所以山歌仔亦焦急非常，立即返寨再落多兩隻大眼仔落去，希望盡最後努力趕在尤魚大軍殺到前用大眼仔誘殺馬友敵軍。不過佢就再無魚訊了，而坐我隔離的鯊魚，可能由於是新手關係，並唔係好熟悉釣魚技巧，所以就算此時竟然有魚偷襲佢，再加上無奈地唔到釣只食淨蝦頭，所以他就把握不住機會而讓馬友偷襲得手了。而隨著尤魚大軍殺到，我們亦知道此昤我們只能慢慢等待到補給艇到來、待我們補給了生尤魚之後，才可和其他艇正面挑戰。

不過，我地都唔係淨係睇佢地其他艇釣的，因為呢，我再講下啦，其實青馬橋底由於是所有國際遠洋航線出入香港的兩個出入口水域之一，所以這裡不時有大型貨船經過，亦因為咁樣，作為航道中心點，其實這中間的航道位置是禁區，但奈何其他較近岸兩邊的位置都甚難釣到馬友，所以所有小艇還是犯險衝到航道中心作釣。而海事處的巡邏艇往往就會在所有大貨船駛到這青馬大橋一帶前出來驅趕阻著航道暢順運作的小艇，從而好讓大船安全駛過。亦就係咁樣我地邊之為「走鬼」。而「走鬼」的情起可謂有趣非常，就有如街頭無牌小販見到有食環署的職員前來捉鬼的模樣般四散逃竄，不過就只限外圍較接近巡邏艇的那些小艇，而狂較遠處的那些則爭取時間及機會釣到最後一分一秒；而有時更誇張的是，假如有些艇一開始就在是核心的外圍而被首先驅趕時，他們會再駛到核心的最外圍、最遠處下繩再釣多一兩分鐘呢；真係唔好睇少呢一兩分鐘呀，因為釣馬友真係可謂爭分奪秒，分分鐘就係釣多呢一分半分鐘就比你執返條架。 而每當巡邏艇鳴金收兵的時候，所有艇又會好似海盜搶灘、紅海海水分開之後再淹沒的情形一樣，極盡迅速之能事地衝回目標釣點。如果你們在埸的話，真係保證一定會覺得非常有趣。另外，其實今日整天我地都係預左要在不斷「走鬼」的情況下作釣，所以唔好淨係話係那些馬友偷襲我們的魚餌，其實今日係我地要不斷「走住鬼」咁樣去偷襲佢地的大寨 - 青馬橋底航道中心一帶呢！

而就係馬友大軍殺到過黎我地釣位無耐時，雖然又真係比其中幾架小艇釣上幾條馬友，但未幾就因為有大貨船要經過而看到海事處的巡邏艇出來驅逐小艇了。咁沒有生尤的我們當然一早就駛埋一面靠岸位置，並按山歌仔意思改用波子壓底勾生蝦仔釣石狗公，不過由於石狗體型普遍仲係偏細，所以一來較難釣上，二來想釣牠們的意欲亦不大，只可視作等待補給艇前來的解悶小活動而已。就係咁，時間來到九點，此時山歌仔從電話得知補給艇將到登龍洲，於是著我們收繩直奔該處等候；此時就發現方邊原來還有不下十艏快艇都和我們一樣，狂奔補給點，而其情況鯊魚就話好像拍A片的一班汁男衝埋去女優旁邊，等待勝利的一刻一樣。而又真係每個從補給艇下來、拎著一桶滿滿的生魷魚的人，都是面露著一臉滿足的笑容，好像已經中了獎、釣到了魚、贏得了世界的人一般開懷；真係唔講唔知原來佢地只係終於排得到魚餌準備回去青馬橋底下認真拼命廝殺，根本係仲未釣到魚的呢，哈哈。

好不容易我們終於也補給了生魷魚了，山歌仔立即二話不說就衝回青馬橋底，看看四周環境和釣況，然後揀了一個位置就叫我地落繩作釣了。呢個世界有些東西真係無得講，唔到你唔信；雖然山歌仔之前用尤魚係有食過餌，但只要其他艇一駛埋黎用生尤魚釣我地就即時收哂皮乜野魚訊都唔會有。但係而家呢我地就大家都係咁高咁大，大家一齊用生尤魚，於是就係比位置、比釣技，同埋比釣技了；咁樣啦喎，山歌仔梗係好過在場不少釣者啦，而講到呢度就梗係講緊話只見山歌仔落左繩都唔夠5分鐘，突然就起手一抽，然後一臉凝重的模樣，咁我地就梗係知佢中左魚，而且也不會三腳貓功夫的小魚；咁坐佢隔離位的我就梗係立即收繩並準備撈簊幫佢撈魚啦，仲問佢駛唔駛叫坐我前面的鯊魚和彼得收繩，因為怕會疊到佢的魚絲，不過山歌仔就話佢應付到，唔駛前面果兩位有所動作。一路都收得幾暢順，暢順到幾乎我諗住係一路就等到山歌仔一直唔停咁收繩上黎然後見魚就直插撈簊撈魚就可以了。但係事情發展就梗係唔係咁平淡啦，根據山歌仔事後講返話呢，就在佢收到條魚都差唔多曝光時條魚就開始發力了，而呢個時候山歌仔就梗係還拖「就魚」啦，不過條魚就徊遊以致攬埋我前面兩位的魚線，呢個時候山歌仔就同我講叫佢地前面千祈唔好收繩、要比繩、咁山歌仔先可以繼續同條魚搏鬥，就係咁樣三條魚絲疊埋哂又比條魚作左無謂的反擊一陣，結果條魚都係只得棄械投降。一見到魚影山歌仔再輕輕將魚一帶我就將準備多時的撈簊迎頭一插，馬友立即應聲入網，然後山歌仔就抓著撈簊頭連同糾纏著的魚絲一併拎上來，先把魚解了給我放冰箱，然後再解決那複雜的三角關係。嘩，講到好似好平淡好無野咁，話哂都叫做今日第一條撈簊目標魚丫！無錯，上水的當然就係差唔多只食生尤魚的目標魚 - 夢幻之魚了。而鯊魚由於是第一次跟我出艇釣魚，所以被眼前這條足足八斤有多的馬友「嚇」得目瞪口呆！事關我在約佢出黎釣魚果陣都係同佢講話今日去釣魚目標都係幾斤貨仔，再者畢竟係佢第一次親眼就見到有人係佢隔離咁若無其事、淡淡定定的就把一條大大碌的馬友收服了，所以佢都覺得成件事係夢幻非常。我咪同佢講話這些就是釣魚的樂趣了，亦是為什麼現在我們個個都在寒冷又下著雨的天氣下仍然繼續奮鬥的原因了！

大家見到大大碌馬友當然立時血胍噴張，鬥志熊熊。而且梗係要趁快就再釣，因為馬友都是一整群的，所以一條食餌就證明還有其他都會食餌。生歌仔即刻勾多兩隻尤魚就落繩了，但係落左繩才發現原來佢頭先解絲時是整個釣組剪了，他只綁了一邊忘了另一邊；而就係咁樣的一拋，就把整個雙勾釣組連兩隻生尤魚同埋鉛鉈成組拋到海底去了，即時懊惱非常，哈哈。

咁山歌仔見佢又要綁過釣組，而者都差唔多過左寨，咁咪叫我地其他人收繩返寨囉，咁其他人都差唔多收好，係得一向較慢手腳的彼得哥哥收得特別慢，咁我見佢收得慢慢地仲有點別扭咪走過去問佢駛唔駛幫拖囉，點知唔過去由自可，一過去我只見佢收到直頭有個魚影，而佢仲不斷咁樣收，我即時喝停佢並叫鬼仔遞給我撈簊，然後立即快快手把已經被彼得抽到離左少少水的馬友及時接住，一條兩斤多重的馬友終於唔清唔楚、糊裡糊塗咁就隨著彼得哥哥條魚線上左黎我地隻艇報到了！問返彼得哥幾時中魚、知唔知中左魚、同埋做咩中左魚都唔出聲時，佢就話其實山歌仔中魚果陣佢都感覺到有魚食餌佢咪抽左魚同中埋囉，但係由於當時我地眾人都既認真又緊張咁話其他人唔好收繩、要讓比山歌仔收，咁佢咪真係好聽話咁樣唔出聲又唔收繩囉，事關佢無經驗，唔知中左魚我地嘅處理方法係會完全唔一樣的。不過無論點，始終今日注定彼得哥有食神，條魚中左咁耐喺水底下面仲要無咩點收佢牌無比佢走甩，真係注定條魚唔想再做魚想投胎了，哈哈。果然好波不如好運！釣魚真係講咩都唔夠好運最實際。而就係咁樣，大魚獎之名暫時就落到彼得哥手上了。而山歌仔即時叫我地快點把握機會，因為通常一開口果度全基魚都會開口食餌咁喎。而之前其實比較安靜嘅彼得，此時由於中左魚可以風流釣，即時活潑起來，不斷對坐在他對面的鬼仔作出「挑釁」，指手劃足咁同鬼仔講話上次就睇足佢成日中魚，今次要鬼仔好好的望佢望返夠，認真佻皮。

而我地就在彼得哥已經上哂岸釣緊風流魚之時，繼續冒住又冷又落雨的情況底下，繼續住「一陣走鬼、一陣釣魚」的時光；不過就一直都無再搵到馬友肯上我地隻「洗頭艇」。而釣到差唔多十二鐘時，可能連續有大貨船駛過的關係，海事處隻巡邏艇就索性棟左係青馬橋底下，咁即係「趕絕」我地啦。咁山歌仔見又將會有一段時間無得釣，而且又不斷落住下，大家又凍又濕，就提議暫時先車艇回深井讓大家上岸吃個暖暖的午飯和避雨和避寒，一於回一回氣然後等吃完飯再繼續搏殺。大家當然都舉腳贊成啦，於是我地就即時返深井準備食午飯啦。咁黎到深井就梗係要食呢度馳名嘅深井燒鵝啦，所以我地就揀左一間叫傅記的飯店，然後立即衝入去叫飯食，並在等待開飯的時候，將剛剛買來的暖包們往身上內層的衣服貼。而當我地飲完啖熱茶再見到碟燒鵝飯送黎時，嘩，真係感動到呢，直頭係雪中送炭嘅果種感覺呀！

我地就食飽飯啦，但係山歌仔其實就係碼頭睇住隻艇，咁勞苦功高，梗係要買返個靚飯盒返去比佢食啦。大家補暖差電完成之後返到碼頭，等山歌仔食完之後大家係碼頭睇下海事處果面仲會唔會有船係度趕人。等左半粒鐘好似見佢駛埋左一面於是我地就落艇又再衝向青馬橋底了，點知一到就發現原來另一隻巡邏艇直情停左在橋底靠船塢一面看守著，咁即係中伏了！咁我地唯有駛埋馬灣一邊再做部署。就係度避風邊等的時候，大家都無無聊聊咁樣係度吹水，山歌仔呢個時候就喺生倉度撈左隻較細隻的生魷魚上黎搵淡水沖一沖就直接原隻生啪左，仲一臉滿足咁話好味道，而且仲同我地講話要連那些墨汁一併吃掉才更鮮甜，所以撈隻尤魚上黎時要盡量避免嚇到尤魚以致令尤魚噴墨咁喎，哈哈。見到山歌仔食得咁開心，我地梗係無執輸一齊話要試啦，反正又無得釣又買左咁多隻。於是乎芒生近水先得月，坐得近有得食先，然後又到鬼仔食，而我地仲拍埋短片留念添。到鯊魚食果隻仲好笑，直頭係佢被吞一刻申出觸鬚，我地睇就好似鯊魚個嘴有觸鬚同爪申出黎一般，非常搞笑。

就係咁樣真係又食又玩咁樣恃機等住隨時殺返出去青馬大橋繼續釣，但係隻巡邏艇就一直都唔願走，好似有心同我地作對咁樣，要盯死所有釣魚人，我們都估計可能有人玩得太過份惹怒了他們。而山歌仔呢個時候更加話呢段時候係是日最靚最適合釣魚的流水，但可惜偏偏就只有得睇但就無得釣，真係讓人既心急又沮喪。
咁樣死守都唔係辦法，但係衝出去又係無意義，正在我地心急如焚的時候，忽然見到有架巡邏艇率先駛回基地，而另一架都好像有意駛開一樣，咁我地就先從馬灣內塘駛出一點實行邊釣石狗為名，更近觀察情況為實，希望一見到連果隻唯一留守的巡邏艇一駛開我地就立即攻佔大寨！咁石狗仔又真係開口，之不過青馬這邊的石狗暫時又真的太細了，都讓人提不起勁去釣，所以大家都只係貪有個手感，但所有眼睛都是看住遠方的那一個焦點 - 橋底巡邏艇。而竟然釣釣下狗仔真係比我地見到隻目標巡邏艇有駛開的跡象喎！於是我立即同山歌仔講，而佢亦話睇定一點但就叫我地所有人都收哂魚絲先並等候佢指揮。我地每一個人呢個時候都立即興奮莫名，隨時準備進入即時搏殺狀態，因為呢一個狀態可能只係得幾分鐘甚至更短！
果然，真係見架巡邏艇往船塢方向果邊駛去喎，咁呢個時候山歌仔忍唔住啦，流水又靚又無落雨；呢個時候唔衝更待何時呀? 於是山歌仔確認我地無人落左繩釣魚之後就即刻著車衝向青馬橋底，其他一直埋伏在附近一帶水域的小艇見有勇士殺出都立即唔執輸紛紛衝出，其實如果你睇返呢個情境真係會覺得好好笑的；但係喺果一刻我地根本心無雜念，只係一心諗住一到埗然後等山歌仔一擺正隻艇我地就勾尤落繩、爭分套秒、把握機會！山歌仔即時落餌並著坐左邊的幾個包括我首先快快落餌，然後就再到在右邊的芒生他們落餌，只可惜，真係釣唔夠兩分鐘，就見到之前一直「堅守陣地」的巡邏艇在遠處忽然出現並有向我們這邊駛來的跡象，而且速度不低，絕不是今早那首善良的巡邏艇可比！咁見到「敵方」來勢兇兇，一點善意都沒有，今次山歌仔都唔敢再「釣多一分鐘得一分鐘」而是立即邊著引擎邊叫我們極速收繩然後就開車走人。因為真係見到呢隻巡邏艇十分兇恨而且一點面子也不給，有心和各路人馬周旋到底，而既然係咁我地真係只可以再次往馬灣一帶逃竄並再作觀察。而由於可能今次真係刺殺到巡邏艇大哥的神經了，所以佢直頭索性「棟」左喺橋底我地搜獵馬友的地方強勢展示比我地睇佢係決心要打擊我地今日嘅「違規」行為了。而見到佢咁有決心同大家抗衡嘅樣子、又再望下個鐘都成3點，再加上話哂都有返兩條魚壓下倉不至於打龜龜，我地最後都決定提早收工，打道回府。就係咁樣，我地今日嘅偷下、釣下、避下，再偷釣下的「青馬突襲馬友」計劃正式完結，雖然魚就釣得唔多，不過全日係度邊釣邊同海事處巡邏艇玩遊擊戰又確實幾有趣，如果唔係又凍又落雨咁就真係更加完美了。唯一嘅遺憾就真係如山歌仔講話下晝果段流水真係好靚好適合釣魚但係卻無機會落繩釣，真係比有得釣而釣唔到更加令人感到遺憾呢。不過呢個亦都係青馬橋底釣魚經歷的一部份呢。而最後返到碼頭除左頒返個大魚獎比阿彼得之外，我地仲要將條大馬友砍件分配予各人呢；而劏魚這種咁神聖嘅任務就梗係交比山歌仔同埋佢把砍崩刀啦，哈哈。而我地今日嘅羊年最後一擊亦都隨住大家分好魚上岸之後正式劃上句號。希望我地各位團友新一年猴年可以長釣長爆，所有龜氣就留返哂喺個羊年度唔好跟住黎猴年喇，唔駛好似阿山歌仔話齋咁同親鬼仔同YY出動總係真係是但有人龜得很啦。

在此亦預祝大家新年快樂 新一年繼續爆釣！！

 
早出門口到連第一班荃灣線嘅港鐵都未接到東涌線而要等成15分鐘車

 
集合

 
出發！
 
目的地 - 青馬大橋
 
艇山艇海
 

 
衝呀！汁男們！

 
好野，我地都係汁男。
 
濕到痴線，凍到爆炸。

 
先啪一個燒鵝飯

再啪多個燒鵝瀨粉，飽肚又夠暖笠笠。
 

 
大魚獎得主 - 彼得哥哥


 

 


砍件、分魚
 
天寒地凍返到上岸梗係第一時間啪返支維他奶啦

 
馬友要蒸熟一點才更好食更有魚味

分左條魚尾返屋企

魚獲同魚餌都咁好味