日期: 07/14/2016
農曆: 六月十一
地點: 維港將軍澳對出一帶
艇家: 自駕四匹
釣友: 阿丹、YY
天氣: 上晝陰天、驟雨及雷暴；午後暫轉晴天西南風 3-4級
水流: 慢速流、水質麻麻
釣穫: 爆釣池仔、一堆紅瓜衫全日埋單約 8斤

是咁的，以往和阿丹相約去釣魚都能選擇在平日出發，因為他的工作時間比較彈性，但由於最近這一年他轉換了工作環境，至令我們不再像以往這般能在閒日出發，而週末時份往往好艇家難求，而且要提早很多預約，不像平日般前兩天看了天文台的天氣預報告知天朗氣清兩日後就出發了，所以最近我的釣行日誌裡好像都不見了他的蹤影。
但係現在情況有變了！他的工作已經上了軌道，時間安排上又重回以往的陣性了；換言之，阿丹可以重新歸隊閒日釣團了，真的是天大喜訊!!

由於他很久沒出動，極度手痕，所以我就同佢講話如果佢想去，搵到同伴，我地隨時起行啦，而本身前幾日我地就計劃左是日連同阿丹舅仔和朱爸爸搵B記出動的，可惜舅仔有事很忙未能描空；咁我同阿丹講B記之行不如就暫且延期先，之但係如果佢真係好手痕的話，我又可以陪佢試下玩自駕四匹仔、即租用一部附有四匹馬力船尾機的小艇，自己駕駛自己釣。(法例規定駕駛馬力4匹或以下的小艇是不用持有船牌駕駛執照) 本來因為去唔成而沮喪的他聽到之後即時雙眼發光，諗都唔駛諗就話「羔羔羔」了。咁諗到「折衷」方法之後心情即時興奮起來，因為又可以出發了；而且最近睇臉書上那些釣魚群組的帖子都告知池魚群已經開始出現了，所以一諗起可以有機會爆釣池魚仔時手就即刻痕了；沒辦法，中了釣魚毒的人都是這樣的，哈哈。

就係咁樣到出發前一日阿丹好興奮咁打比我話已經等唔切啦，而佢亦想預先準備定釣魚用的蝦仁，問我得唔得閒，得閒就同佢一齊出去買蝦同埋醃製，順便食個下午茶同睇去釣具店逛下睇下有無抵玩的艇釣船竿可以介紹比佢舅仔。於是我就去左佢度一齊整爆釣秘製紅蝦仁，而事後證明我地極其成功，付出係有回報的。

阿丹出發前已經打定電話比租艇店主的老闆約定佢，佢同我地講話到達後再電聯佢就無問題，而本來我地打算10點前去到碼頭車得出去釣點大約10點半開始釣，因為睇定潮汐漲退數據手機程式話大約中午1點漲定，所以打算10點幾開始可以釣，盡量釣哂個漲流尾。而且睇天文台天氣預測都造朝早有局部雷雨，中午過後先逐漸轉晴，所以都唔駛太早去到。
朝早7點幾起身，果然天陰陰，執埋野諗住食埋早餐出門時，突然個天就落狗屎咁，於是打比阿丹話等場雨完左我先出門口，結果我地買完蝦去到將軍澳租艇的地方都已經10點半了。到埗後跟老闆九叔辦好手續就立即上了小艇，他問我們有沒有玩過，我告訴他我幾年前有玩過但已經很久沒玩了，所以請他簡單講再講解一下怎樣操作小艇。數數手指，原來對上一次自駕小艇已經要數到差不多7年前了，而當年也是和準備仔過來將軍澳這邊開2匹仔釣魚，後尾玩了幾次覺得有點辛苦，而且有專業艇佬車艇總之自己開艇強，亦更舒服，再加上認識多了幾位釣友可以約腳艇釣之後，我們就完全投入出艇家艇釣魚的懷抱了。今次由於唔夠腳而阿丹又真係好渴望可以釣返日魚的情況下，我決定毅然復出，暫且客串「艇佬」一天！

好了，九叔講解完就回到岸上，而我一開始當然是將馬力較得比較少，然後才慢慢調大；過了大約5分鐘，自覺可以控制自如了，甚至7年前的感覺都有點回來了，於是就火力全開、全速前進。就這樣駛了大約廿零分鐘、終於到達我們今日主要的釣點 - 將軍澳對出錨地B2浮泡一帶。這個釣點是我從臉書的釣魚群組裡的師兄告訴我的，但是大約那裡最好境況則還是要自己摸索。咁既然對釣場唔係太熟悉，咁就隨意揀一個近泡的位置開始吧。
這時無風無乜流，就算熜左尾機隨水漂住釣都無問題，不過餌一到底就遇到好多化餌黨 - 扯其立的猛烈攻勢了，所以我地都無計可施，唯有勾大粒少少蝦仁，希望喺那些扯其立化哂餌之前可以遇到有目標魚紅衫或者古惑仔看上我們的餌而光顧。果然首先開門紅的是我，只感到一輪扯其立細口的攻勢之後突然是有一口較像樣的食餌拉了一下，我就輕輕一逗，即中，收上黎，小紅瓜衫魚一條，為是日爆釣之旅打响頭炮！不過今日不是我的爆釣日，而是阿丹的 (雖然其實我又唔係真係釣得好少)，所以都唔駛等幾分鐘就到阿丹開齋了，不過卻是扯其立仔仔一條。佢見狀話咁細條都唔知放唔放生好，我就話艇釣通常習慣第一條魚都唔會放生，留個意頭，最多你之後回程時再把牠放了吧，於是我們就暫時把牠放進生倉去了。跟住我地繼續釣，都只係遇到無限化餌黨，我只能釣到幾口，同外加一條小梳蘿。係諗緊走去邊個位邊收絲時，我忽然在中水有魚咬勾，上水一看竟然係是日我的目標魚 - 池魚仔一條！於是我即刻叫阿丹跟我一起換上仕掛釣組，事關有池魚的話絕不不會是一條半條，而是起碼都有一群，只差在你能釣上多少。

可是就在我們綁釣組的時候，遠方的天開始變色了，能看得出來在石澳那邊已經是下著大雨了，我跟阿丹說快快綁完釣多一寨我地就可能要避雨了，但係綁完架生車返寨頭時我們的前方已經風雲色變了，貪心落繩釣多兩分鐘，就已經感覺到雨粉來了，立即叫阿丹收繩並立即開尾機準備搵位避雨，呢個時候我們看到的選擇有兩個，一/ 右手邊附近下了錨的大貨輪、二/ 左手邊下了錨的「固定」的躉船。阿丹選擇了 (一)，但係我諗緊我地隻艇咁細，唔單止要躲到背風位避風，最好仲可以固定我們的小艇，即將我們的小艇用繩連繫著那個避風點、甚至於再落錨，以至小艇不會飄流、飄走從而離開我地的背風位置；如果我選擇了(二)。由於我是「船長」，所以我擁有決定權，而且相對卞阿丹，我的海上經驗應該比阿丹要多，所以他聽過我的分析後也表示同意，不過其實我在一邊解釋給他聽時我已經開著艇往躉船方向全速駛過去了。就在還有大約兩三分鐘的時候，雷雨已經殺到，幸好雷還未打在我們這邊，不過雨粉就已經大得可怕，而我們則冒著大雨往目標躉船死裡駛過去，一駛到背風的位置時，果然情況立即有所改善，唔單止風減弱了，我們也不用遭受大雨強攻。而我立即叫阿丹把艇頭的繩纏在躉船的錨鍊上，以固定好船隻。不過因為背風背流，所以艇的方向是跟著躉船一樣，但這樣還不是最好的避風雨方法，於是我在用槳小撐了幾下，暫時將艇身橫向貼著的躉船尾部，然後用手抓著躉船突出的部分，就這樣，就算明明躉船以外的範圍都受著狂風暴雨侵襲著，甚至視野都幾乎是看不見了，但貼在躉船的背後的我們卻是出奇的平靜，只是頂蓬上的雨水不斷漏進來，但在這個時勢下只是受著這最低程度的雨水攻擊，還能有什麼要求呢? 而更誇張的是，外圍就因大雨而至令視乎幾更零，我們這邊卻平靜到讓我決定繼續釣魚。而我雖然單手抓著躉船，但是我還是單手用魚竿的繼續釣魚，而這時我感覺到池魚的魚訊，只不過甩了口，於是我立即叫阿丹趕快落繩釣池魚。其實釣池魚真的是非常容易，只要下面有群池魚而你有仕掛在手，把仕掛放到水底然後慢慢向上收，池魚就會自動攻擊仕掛並上釣了。而我們這個避雨位的水底正正就有一群池魚，所以這時雖然你可以話我倆是在避雨，但其實我們更在釣魚！因為這時阿丹和我都已經釣到池魚了，而阿丹更是不斷的釣上，有時甚至是一抽一次過上兩、三條，甚至是四條！我就沒有他那麼利害，不過我也是一條一條的釣上來。唔好忘記我有一隻手其實是一直都抓著躉船的，只是在放開線杯和收線的那一陣才暫時放一放開手。所以收到魚上來的時候我都把魚交給阿丹去解勾，而我就繼續扶住躉船，等他解好魚之後我又把仕掛放到水裡繼續釣魚；就係咁樣分工合作住，一齊釣魚，佢解魚、我扶艇，根本都把周圍其實是下著狂風大雨的事忘記了，因為好像其實係同我地無關，而就算下了差不多大半個鐘、雨勢有所減弱甚至差不多要停不來之後，我地仍然係繼續住我地既分工合作釣法，一點都沒有想暫停或者離開釣點轉位回去浮泡一帶作釣的念頭。

由於阿丹實在釣到上魚不停手的關係，佢真係可謂廢寢忘餐，連水都無飲過一滴；至於釣況無咁利害，而且享受大過釣魚的我，則決定暫時小休一會，吃上幾個麵包和飲返兩啖保礦力、好讓自己充一充電之後再繼續戰鬥。雨終於停左，我就同阿丹講不如釣多一陣就轉位出去附近搵下其他魚種，反正我地這時都有超過五十條池魚壓倉了，基本上都夠一我地兩個人各自返家一餐有多了；我就同佢講話佢今日咁旺，釣多廿條我地就轉位，我釣的則不算在內。而話口未完佢又已經釣上一掛兩條了，就這樣我地這時已經唔係因為天氣因素而留在這個躉船後面，而是繼續著倒數我們的爆釣池仔行動。雨下完，望下個鐘一點半有多，水流準備改變，魚訊開始疏落了一點，但最後阿丹還是完成了他的任務，就像活捉寵物小精靈一樣，終於把目標的二十條池魚也收服了，望一望個鐘，剛好兩點，換言之我地由避雨開始大約的12點到我地爆完池仔覺得夠皮可以轉位時的兩點，才不過是兩個小時呢，但這時我們已經有差不多八十條池仔在生倉裡活潑的游著。別人可能是在避著雨，我倆卻一點時間都沒浪費，甚至來了個爆釣，所以在邊避雨邊釣魚的時候我已經同阿丹講話呢個絕對係上天的安排，唔係呢場雨我地都唔會走位，唔走位我地就唔會走到黎呢個躉船秘位爆釣池仔，雖然我地如果唔轉位都可能在原先果個位釣到池魚，但係肯定唔會夠我地呢個躉船位釣到咁多，所以可能話係上天給我們的指引，引導我們過去果個位發掘到池魚群並爆釣！

就係咁樣我都已經覺得有運行啦，不過釣夠池仔我地就終於離開躉船，往其他位置搜索阿丹極想釣到的目標魚 - 「紅瓜衫」。不過由於對附近一帶海域唔太熟，平時出B記艇都好少會過來這邊作釣，所以對這邊的排口可謂沒有頭緒，唯有靠運。不過這時我們總是遇到化餌黨的攻擊，而不斷的走位，而由於這時風起了一點而且水流急了，所以熜尾機讓船隨意飄流來釣魚的這個方法根本不行，我只可以選擇落錨或者是我開機候艇來釣，但如果我要候艇的話，則無法分心釣魚；咁究竟點算好? 聽落好似係落錨好一點喎? 但係我首先選擇了後者，即我暫時唔釣，專心候艇讓阿丹先釣！點解咁做? 好似好偉大咁喎? 其實唔係架，我係分析過之後得出這個結果，我同阿丹講話唔駛唔好意思，咁樣其實係分工合作，因為就算我選擇左拋錨，如果船定了定後我們能夠釣魚但是又遇上化餌黨的話，我倆根本都無運行；咁點解我唔好好一路候艇讓阿丹釣，釣到有一個位置無咁多化餌黨而又有其他魚訊的時候，我們才落錨定、定位在那個位置一起釣呢?

呢個方法果然湊效，在轉了幾個位置之後，我終於駛到了一個位置阿丹說是沒有太密集的扯其立攻擊，跟住釣多幾分鐘之後佢話感覺到有一點絕對不是化餌黨、而是較像樣的魚訊；我地推斷如果唔係紅衫就係惑魚，都是我們的目標魚吧，於是就決定拋錨作釣了。而今日旺家我一早都已經講左係阿丹了，所以首先上魚的當然是他，而目標魚紅瓜衫出現了！雖然不大，但係絕對比扯其立強得多呢。未幾佢又再上多一條差唔多大的，我都替佢高興並叫佢快點釣多些，因為我都知道好波不如好運，既然佢今日好運，就讓他來負責中魚，我還是做好我的艇佬角色吧。不過呢個時候我卻忽然有一口較大力的魚訊，把我魚線一拉我就即抽，中魚，並同阿丹講話我呢條紅衫應該比佢剛剛的那條要大上一倍有多。果然一上水，良型紅瓜衫一條，大家即時歡呼，精神立即抖首起來，阿丹更是因為看到目標魚良型瓜衫而雙眼發光，並即時勾了一粒較大的紅蝦仁做餌。而果然重餌之下必有勇魚，佢都唔夠五分鐘就立即中魚！而其實睇佢支竿再加上佢既歡呼聲，喺佢未將魚抽到上水面時我都已經估到佢果條魚會係同我果條差唔多既良型紅瓜衫！只要一中魚，精神特別好；一不離二、二又不離三，之後阿丹又陸續再釣上幾條紅衫，我卻釣上幾條...代餌黨，哈哈。而更可憐的是，我更遭遇了幾次雞泡魚無情定的剪絲攻擊！目標魚訊減少，化餌黨和雞泡殺到，就是我們要轉位的訊號了；於是我就叫阿丹起錨然後我就再沿用之前的方法找尋新釣點，而今日行運的阿丹，在忘後的每個位置上都能找到目標魚，甚至另一目標魚 - 惑魚亦出現了在他的寶可夢收藏系列入面呢！而我則疏落的釣著扯其立和小瓜衫，並看著他個人表演。不過講真我又沒有失望喎，因為同阿丹釣咁多次魚，今日真係可謂佢最利害的一次，所以真係好戥佢高興；而就在我們最後的一個釣點，佢竟然除左最後中左條大雞旦惑之外，之前更加離奇地中到一條黃釘，真係再為寵物小精靈的精靈球再添一員呢。因為六點要還艇，所以我地就算在最後這個釣點開始感覺到魚訊有所增多時亦要無奈回程了，不過望一望個生倉，其實已經絕對收夠籌了。數一數絕對超過100條砍！而大約三份之二應該都是阿丹釣到的呢，認真利害。不過雖然阿丹係強勢爆釣，但係其實我又唔係真係弱雞到咁，只不過以往和他釣魚一般都是我釣得比較多，今天的他卻是完全爆釣吧了。然而，是日最後埋齋魚卻是我們決定收竿返歸時，阿丹一邊起錨我卻在磨爛蓆釣多兩槍仕掛時中的兩條池魚。所以話，我都唔係無貢獻架，戰至最後一秒鐘我都仲在戰鬥並有魚入生倉呢，哈哈哈。

就係咁樣收完呢兩池魚之後我就開動船尾機回程了，而回到九叔的基地時，佢睇到我地生倉入面的魚亦都讚我地今日幾好成績，並話要影返張相賣下廣告咁話喎，佢亦都好熱心咁幫我地撈魚落冰箱，你地見到下面條短片入面撈魚果個就係佢黎啦，平時這些時候都是我去撈魚然後搵人影相拍片的嘛，但見佢咁熱心，梗係讓個機會比佢幫我地手啦，哈哈哈。

點都好啦，今日既爆釣情況可謂絕對超出我預算，本身我都諗住會釣到池魚同瓜衫，但無諗過真係會釣到咁多魚，而阿丹的大爆發更是完全令人意想不到、喜出望外；最緊要係佢今日真係非常興奮，十分滿足，呢個先係我地出黎玩既目的嘛；而我亦慶幸今天沒有因為釣友人數不足而令釣行胎死腹中，而開心的是自己的開艇技術又再進步了，不過講到尾，能夠忙裡偷閒、出黎同好朋友玩足一天，享受釣魚的樂趣，絕對是阿丹口中所講的：任何好日子，都不及出來快活釣魚的好時光。