神靈指路上萬丈

路線: 大澳巴士總站> 番鬼塘> 二澳> 水澇漕石澗入口> 萬丈布石澗> 天池> 萬丈布頂> 萬丈布營地> 羌山郊遊徑> 龍仔悟園> 南涌村> 大澳
登山之友: 超級嘻嘻、YY

是咁的，今次郊遊之旅認真隨意，出發前果晚先決定呢個目的地，而且路線更是一直在變；但係過程可謂有點曲折離奇，呢個係後話。講返今朝一早同超級在中環港鐵站集合之後就直達東涌，然後再乘11號巴士到達大澳。是日天氣唔錯，原本係東涌果陣都見唔到個太陽，不過隨住坐巴士入大澳既時候就開始見到個太陽同埋藍天了。而落車之後我地正式開始是日旅程，首先就係行經果條都幾有浪漫氣息既粉紅色長橋直達番鬼塘村，橋旁兩邊都是紅樹林，卻不見有半隻礁潮蟹和彈塗魚呢。我地二人一邊走著一邊在研究著是日旅程既路線，咁基本上都係由番鬼塘村一路走到二澳，再走多一會就會到達底布水澇漕，不過我地到左二澳之後再沿路前走都唔見個入口，即時上網睇那些介紹呢條路線既網頁又無好明確咁指示，咁正當我地裹足不前既時候，神奇又帶點詭異既事情發生了：就係個小廟度忽然見到有個阿叔走左出黎，拎住幾支香插左喺香爐度祈福，咁我地由於唔係好熟路，於是就等佢拜完神之後問佢究竟水澇漕條路應該點行，係咪黎到呢個廟之前的那個上山的分岔口，佢只連聲說是，並沒其他多餘的話，我同超級同佢講過唔該之後就往回走了，而那個分岔路口其實並不是我們之前看過網頁之後打算走的那一個... 再加上往回走，經過二澳荒廢的小碼頭一帶時明顯感覺到風起了，我同超級都開玩笑咁講，其實呢個阿叔係咪呢度既神仙之類呢...

咁就唔理得咁多啦，既然選擇相信伯伯之言，咁我地就行左佢所指引既路線而上。結果我地就係錯過左底布水澇漕既，而我地行既果條山路小徑基本上係一行就已經直達萬丈布天池，而唔駛由水澇澗爬澗而上，咁我地已經笑笑口話好野，唔駛咁辛苦次次都「驚險」地郊遊，點知道原來一切都係冥冥之中自有主宰。黎到天池，見到有人把守唔比人游水浸水等，不過其實呢期咁既天氣都真係無人睇住都唔會落水囉，未凍過咩?! 咁不過佢有道閘仔，所以就無係正面行近天池，只係匆匆影左幾張相就算啦。
問題黎啦：究竟係點樣走架? 原路返轉頭我地又唔想而且亦都無打算；但係我地本身又唔係諗住行呢條路上黎咁究竟點樣先可以出返我地原本打升行既果條路呢我地又唔知。左度右度，又開左手機程式黎研究，結果我地決定係沿萬丈瀑布旁的山邊而上。原因係因為我地其實都有哂手套，行山杖，頭燈等基本裝備；二來而家算係秋季，水量應該唔多，再者我地都唔算係爬澗而上，我地都係沿住萬丈布石澗兩旁的小徑而上；咁我地衡量過以我地兩人的實力同體能係應該無問題之後就決定行走今日完全無諗過既路程而往上走了！都話呢個就係山神伯伯既指引啦，哈哈哈。

於是我地過左天池既另一邊，沿住絲帶(其實香港好多野路都係靠行山人士既絲帶路做記認)往上行，沿途有時還需要手腳並用，就係咁樣行下爬下，我地好快又黎到鼻涕布啦，跟住最過癮既事情又要發生啦。記得上次同超級去驚險選擇爬玉桂 https://yy08.pixnet.net/blog/post/106358173 時我地好揀唔揀就揀左條「驚險」既路線，而且又有遊繩要玩，估唔到今次黎到萬丈布都唔例外！雖然爬繩的距離唔算好多，不過都叫做係我地無預算過今日會又爬澗又遊繩既情況之下乜都做齊哂咁囉。而終於靠完繩再往上走多一會我地就上到布頂離開左條瀑布啦。呢個時候超級都不禁做出一個「媽呀，我地得左喇」既雙臂向天既動作，哈哈。終於都叫做離開左條萬丈布，我地霎時發現我地已經置身於草叢中，遠樹有些樹是挺漂亮的(恕小弟山野知識貧乏，唔知樹名)，在綠色的內圍外綑起了較淺綠又帶點黃的邊邊，這樹我沿路來以及離開左呢個山谷下山之後都未有再見到了。

從叢林中走出來可看見一個指示牌，都係告知郊遊人士如果再往前走就會係危險懸崖，我地深表認同，因為我地岩岩先係果度爬上黎丫嘛，哈哈。不過呢條路線我倆都認為係值得既，除左景觀仲有唔同既體驗，而且其實都唔算做好危險，只要保持警惕，小心謹慎，加上保護裝備就可以了。咁岩今日只係我地兩個黎，唔駛特別另外再照顧其他人士，所以我地覺得今日其實係無揀錯由天池爬上黎既路線既。咁好喇，離開左草叢堆，我地就見到一條小石橋，同埋正常既郊遊徑路線，亦即表示我地正式返回「現實世界」的正常山徑了。我又講笑咁話今日呢條路線真係好多「感恩位」喇，成日都比到驚喜同埋辛苦過後既感動位置；跟住我問超級應該向左定向右行，因為我地之前都無預計過會黎到呢度，而我地既手機訊號其實在天池、萬丈九曲果度開始已差不多變左做數據漫遊而關掉，係到上返黎呢度先叫勉強有返香港訊號，而我果個廢台就仍然都係無接收到... 咁超級就直接答我話往右走就可以了，於是我地就歡天喜地咁樣輕快地走在「康莊大道」上了。

輕輕鬆鬆無難度咁行，但係我地開始發覺有點奇怪，因為以超級睇既網頁同谷歌地圖指示，我地從小石橋出來走回大道之後其實應該好快就會遇到唔少分岔路的，但係我地而家行左成十五廿十分鐘都未見有路牌，唔好話係分岔路啦，於是立即拎返部手機出黎研究，先至發現原來我地頭先開心得滯一時大意無用心睇過條路線，所以我地而家係行左另外一條路，而呢條路係通往另一座山而唔係返過去萬丈布營地同埋大澳的呢！於是即刻往回頭走，由於我地本身係萬丈布行上黎已經比預計時間用多左些少，再加上現在一來一回的冤枉路，所以我地決定要提速追回這些用突了的時間，好趕在日落前返到大澳。雖說我地都帶有頭燈、電筒，後備電池等，但係能夠天黑前返回終點都是比較安穩的。果然在重新回到小石橋再往前走多一陣之後我地就已經見到第一個分岔口，選擇由龍仔果邊返大澳，再走多一陣就到達萬丈布營地了。這時超級就話佢醒起原來佢同朋友之前行過這條路的，佢對呢條路是有印象的；那就一切好辦了，我地再往前走就見到我地今日打算離開時走到的分岔點：深屈道與羌山郊遊徑二揀一。咁我地就揀左後者，之後經過左一堆白千尋再往下走就黎到龍仔悟園了。一路從山中走的時候其實我已經話基本上我地落山都唔會見到人影，因為天色已開始暗而且要走都應該走哂，但係黎到悟園又唔同講法呀，因為有工人係度做緊修葺工程呢。但係如果唔計呢幾個工人，我地真係由萬丈布頂後已經唔再見到郊遊人士了。點都好啦，離開悟園之後就基本上都是往下走的斜路，而這裡已經是鳳凰徑的第六段了，指示是清晰的，不過就只是一段斜度甚高的下坡段，還好斜坡旁總算附有破舊的石階可供行走；對於沒有用行山仗的我來說，走在石階要比走在斜坡上強，而超級則用他的兩支行山仗慢慢的走在斜坡而下。我都苦笑著說這段路是全日最不好走的一段，既辛苦又沒風景，好不容易的走著就終於都來到山腳了。經過了南涌村，再走回粉紅大橋時剛巧就是日落的時候了。我們都說時間岩岩好，除左趕到天黑前返回現實世界之外，還可以係大橋上欣賞著美美的日落，甚是寫意。再加上我地帶著、以備不時之需的麥當勞包包，更是錦上添花！

回到大澳巴士站，稍作休息，本身諗住坐巴士返東涌坐地鐵返港島同陳同學食飯，但係黎到巴士站我地見到一來往東涌的巴士站排著一龍、二來又有另一架往梅窩的巴士在上客，即時決定改變策略 - 坐巴士丁梅窩再搭船返中環！而呢個決定可謂全日咁多個美好選擇之中最完美的一個，因為往梅窩的巴士比往東涌的巴士少人得多，而巴士通常都是和船期夾好的，所以一到梅窩我地就已經可以上船了，等得三幾分鐘就又開船了。而坐船絕對比地鐵好，因為成架船咁寬廣都只係一百人唔夠，我同超級根本就係座位任揀，而且座椅舒服，對於剛剛行走完一天的我們來說絕對係享受，這在擠湧又嘈吵的地鐵上根本就是沒可能的事！舒舒服服的攤左半個鐘我地就回到中環碼頭了，之後再會合陳同學來個嘻嘻晚飯小聚，今日呢個郊遊之旅可謂是完美收結呢。
總括黎講今日成日都好順利，所走的路線在半推半就之下就順其自然的完成了。不過如果有些較初階的同伴我諗就可能真係要改道而行了，畢竟安全永遠是最優先的考量條件。而全日路程要山有山、要水有水，要澗又澗，仲要浪漫有浪漫，真係一條值得推介既路線呢。不過我同超級都講笑咁話，希望唔好次次都要「驚險」，次次都要遊繩呢，哈哈。
#次次都驚險，唔通次次都想驚險咩。

坐車又坐船咁終於黎到大澳了

粉紅橋