日期: 01/03/2019
農曆: 十一月廿八
地點: 青龍頭、馬灣一帶
艇家: 泉嫂
釣友: 鬼仔、鬼爸、容伯、YY
天氣: 天晴相當清涼、間中毛毛雨、東北風四至五級
水流: 中等至快流速、水質算好
釣穫: 細鱗 x1 (~3斤) 爆狗爆惑 其餘離魚小量 埋單當20斤算
是咁的，首先祝大家2019年新年快樂。我地今次釣期係因為鬼仔又到每年例牌回港小休假既指定動作，雖然最近天氣麻麻又凍，但係大家旨在人人可以新年快樂有得去釣魚，所以都係喺有限既幾日裡面揀左一日相對天氣較溫和的日子，約好艇家我地就期待住出發了。雖然時間倉促了點，但是蝦仁還是需要準備的，始終呢個秘製蝦仁每次都總會有點用武之地既，而事後證明呢個世界真係唔可以懶，永遠多手準備就係可能會有效果，因為我信機會都係留比有準備既人的。
天氣寒冷，早幾日天文台仲一路都每日掛住寒冷天氣警告，今日氣溫算係有所回升，不過全日卻都帶著毛毛雨粉，所以有風吹起時其實都幾清涼架。但係都無阻我地釣魚既熱情呢。一早係青龍頭肥姨度拎左沙蝦仔之後就去碼頭落艇了，但其實我係想去源利買點大眼仔落艇搏下粗野的，但係原來佢地都無賣大眼仔，所以最後只有抱住歡樂釣魚，聽天由命的心態落艇，準備好好享受同鬼仔歡聚同埋新年第一擊了。
這位艇家泉嫂，我就應該未上過佢艇，因為我都好少出青龍頭艇家的，而以前和鬼仔鬼爸來這邊釣魚都是搵泉叔，即泉嫂的老公的。不過近呢三兩年聽鬼爸佢地講因為泉叔都年事漸長，所以佢地都唔想泉叔咁辛苦，改為搵較年輕一點的泉嫂繼續征戰青馬。
好啦，咁我地第一站就直車汲水門，首先就教為靠近大嶼山那面的山邊位；係呢度一開齋既就係艇家泉嫂，一見魚影，原來係近期其中一樣大熱- 絲立。中完魚泉嫂即刻就話呢度既絲立鍾意食蝦仁，最好剝埋殼咁話喎。咁眾人都立即跟風啦。不過蝦仁都有喺肥姨度買(其實係佢送既)神仙蝦同埋我既秘製蝦仁，咁一開始長輩們都對我那堆看上去極唔吸引既蝦仁嗤之以鼻，明白既，因為賣相不討好仲要質地怪怪又染了色會整污糟手；所以佢地都係用住神仙蝦先，而我就梗憬試下自己趕時間醃製出來既製成品再加下門生蝦啦。如果絲立都對我有點嫌棄，應該係對我既人嫌棄而唔關蝦餌事。無錯容伯同埋鬼爸先後都用神仙蝦釣得良型絲立，泉嫂更加試過起孖做絲立爸爸添，但係坐我前面既鬼仔咪一樣用我既蝦仁中到絲立，仲中埋良型沙鑽添呢。但係我呢，卻係全無動靜，一點魚訊都沒有。咁如果淨係絲立唔食，咁起碼我都會有一條半條其他魚既魚訊吧至少；但係呢個第一個釣點，我係全程為他人鼓掌歡呼呢。而泉嫂之後就話流水開始靜落黎，絲立將會隨之收口，結果我就係與呢種近期大熱既絲立擦身而過了。之後我地就駛左過去近龍蝦灣同南灣果邊既位置作釣，鬼仔先中一條石惑，但係我就係中條大肚石狗公，所以都係將佢放回大海為佳。就係咁樣我2019第一魚就係一條「放生魚」了，哈哈。跟手中多條小石狗之後我都終於重回正軌，起返幾條石惑。大家都係繼續係呢一帶釣下石狗同埋石惑；唯獨係我咁好彩起到一條良型花惑作安慰獎以告慰我錯過絲立之傷痛呢。而除左起魚之外，其中也有一段小插曲呢：就係話說我有一下抽起支竿時見有點重量，但又無掙扎既痕跡，咁就問鬼仔係咪勾到佢既魚絲啦，佢又話無，結果我收到上黎一睇原來係海蘋果；咁都無乜野，釣到海蘋果都係好正常不過的，點知我放返落去都唔夠五分鐘，我就由釣多一次海蘋果，令我概嘆乜我真係有咁中意食蘋果咩?哈哈。
如是者開始流緊，泉嫂就話轉位過去青緊大橋果面釣，黎到呢面，其實都係繼續惑仔同埋石狗仔。呢個季節黎得青馬橋底，通常都係釣馬友的；不過我地無大眼仔同埋黃魚，所以就無我地份啦，但係今日我地呢個時候過到黎青馬橋底卻不見半隻釣艇；正奇怪莫非係海事處巡邏艇一直留守橋底監視及驅趕? 望真一點又唔係喎，原來佢地都車哂去嘉頓對出航道一帶搵食，睇黎馬友今日轉移左陣地咁喎。
我地就一路隨流飄過橋底去到爛排燈塔對出一帶繼續作釣，而遠處果堆馬友艇則由嘉頓果邊追流去到海美灣對出一帶繼續搵馬仔。而鬼仔則愈釣愈眼訓，最後更加問我借了坐塾，拉出冰箱，拿到艇頭，做佢每次上艇都做的事- 訓覺。唔訓由自可，訓左就真係蝕底左。係佢訓覺呢段期間，呢個位置由於好多石狗攻擊，所以我地都不時起魚，而泉嫂真係密過摩打手，基本上見佢好多時都係落餌一陣就中，更不時起孖呢，我諗單係鬼仔訓左果一個小時入面泉嫂至少上左有三四十條石狗呢！認真誇張。不過可能一直大家都係上緊石狗呀，惑仔咁，並未有代作需要用到撈簊，所以我地就話希望下半場轉流時轉位可以用生蝦搏返條好野等新一年出艇可以濕下個撈簊黎個新年行好運。講完都唔夠十五分鐘，之前一直忙於解線而沉靜左好一陣子既容伯突然叫左句「攞撈簊唔該」！本來這些「粗重野」就我做開既，不過咁啱鬼仔就訓係佢隔離，個撈簊又係鬼仔身邊，咁佢自己佢就由睡寶寶化身成為小魚僮啦。玩左大約半分鐘，終於見到魚影，是正在開駛的火車頭呢，不過鬼仔就像如夢初醒般無什反應，要待容伯呼喚一聲再將撈簊插入水中，將魚撈到艇上來。上水擾攘一番，即時為其上了容伯帶來的掛磅，足足有1.7公斤呢，換轉左港斤都有成兩斤十二兩呢！真係行起運上黎時，避都避唔開，事關容伯都話諗住釣石狗所以都係勾神仙蝦做餌，結果咪又係大大條火車頭駛埋黎搶餌走人！眾人見到份量十足的火車頭都精神為之一震，唯獨鬼仔，佢撈完魚之後都係繼續返去訓佢既覺，留低我地其他人繼續奮鬥。
望下個鐘，原來已經兩點幾，時間真係快，大家繼續都係在呢度期待著下一條「撈簊魚」，可惜上來的都是狗仔多，釣多一陣就算鬼仔終於醒來回魂作釣，都仍然係釣得石狗同石惑。再釣多陣，泉嫂就又話呢度起左流好難釣，一於轉位，我地就車左過馬灣的另一邊的淡水灣作釣啦，不過係呢度就真係乏善可陳啦，咁泉嫂見唔對路，於是就話不如駛過石仔灣果面睇下有無惑仔釣下。嘩，唔黎由自可，一黎就真係唔止為今日加添一點色彩咁簡單，雖然我地係呢個位都真係只係釣惑，但係就卻迎來了一個小高潮。一去到落餌唔夠一分鐘，泉嫂就已經起左條目標魚- 雞旦惑了；然後就到前面既鬼仔，然之後就到我了。雖然其餘既人都有中到，不過之後呢段時間就可以話係泉嫂同埋鬼仔既天下了。點解鬼仔忽然戰鬥力提升左咁多既? 因為係淡水灣作釣果陣佢見悶悶地無乜魚就話不如借我支竿去玩下，咁我見水又唔深個位又唔大風咁佢又想玩梗係由佢玩啦，自己就釣手繩，點知佢借左支竿去之後無耐泉嫂就話轉位去釣惑仔。無錯呢度都唔係深過剛才個釣點好多，但係少數怕長計，而且佢又唔怕會亂絲同埋唔怕濕手抽漏魚，所以命中率其高，有時仲起孖做爸爸呢。不過今日釣呢堆雞旦惑就有點竅門，就係到底之後要抽高返幾尺，因為咁樣既深度先係佢地既覓食泳層。我好彩無偷懶，就算同鬼仔交換左副手繩返來，並沒有即刻落餌釣魚，而係剪左鬼仔原先個單勾釣組，改而用三角零圈開多門勾釣，所以我既命中率雖然不及泉嫂同埋鬼仔，但都較用緊單門勾既兩位長輩係多。而由於實在有點爆釣，所以泉嫂都打電話比阿泉叔叫佢開架艇過黎釣埋一份，好搵返餐魚仔食下。可能就係因為有泉叔係隔離釣魚，所以泉嫂都釣到成五點十五分先正式宣佈完場。而我諗係呢大約一個鐘頭多點既爆惑時間，我地執返無十斤都起碼有八斤既雞旦惑呢，真係為今日既新件開運釣魚錦上添花呢！
總括黎講，今日咁既天氣都仍然執返廿斤野真係叫做收貨有餘啦，雖然撈艟魚得一條，但係在無大眼仔等大餌既加持之下，可以有人起返條火車頭迎新年都可以話係願望達成啦。而且本身我同鬼仔都無太大期望只諗住用平常心去釣，好好享受一日就已經好足夠了，所以今日對我黎講都已經算係超額完成了！係呢度再祝各位大大新年快樂，有個開心美滿的2019啦。
天未光就出門口了
天氣相當清涼
終於到我開齋了
青馬橋與青衣船塢
鬼仔例牌動作 - 午睡
中場戰況
容伯與細鱗
容伯坐火車
良型火車頭
容伯坐火車開心自拍...咪住...鬼仔究竟係度做緊乜?!
生倉即刻飽滿返
鬼仔中惑
再中
又中
起孖添
我地一齊中
又再一齊中不過今次佢又仲做埋爸爸添啦
終於我都起返次孖做爸爸喇
鬼爸撈魚時間
係咁多！
上岸分魚
即刻拎去加工 - 起肉爆炒細鱗
爆炒細鱗與骨尾再加石狗煲湯
又滑又鮮味
魚味濃煙
請先 登入 以發表留言。