恆濤二對二決戰青龍頭

日期: 09/13/2020
農曆: 七月廿六
地點: 青馬一帶
艇家: 馬灣輝仔、華仔
釣友: 阿濤、阿毛、朗奴、YY
天氣: 天晴、間左有微雨、微風後轉東北風三級
水流: 慢流、水質一般
釣穫: 、細鱗x3 (九斤x 1、斤裝 x 1、磅頭x 1)、火點x 2(磅頭x 1、六兩x 1) 什魚幾條埋單12斤

是咁的，上次我和男神於青馬有個約會 https://yy08.pixnet.net/blog/post/106450939 完左之後，阿濤唔止將我地呢幾位釣友加左入佢既釣魚群組度，亦都好快同阿恆就商量另一次釣魚之旅；而佢地想搞得有點趣味及激情，於是就決定搞一個小型休閒對抗賽 – 阿濤小隊決戰阿恆小隊。經過隊長們商討，決定兩隊分別出兩艇，總共四艇，然後競逐個人大魚獎及最佳釣艇獎，即每艇拿出最重的三條魚，加埋最重就可以贏得比賽了，獎品就是每人額外多一張紅衫魚而成的獎金。而法國馬友及非食用魚則不會納入計重魚種入面，而艇家所釣到的魚亦不包括在最佳釣艇的成績入面。我本身就無報名嘅，不過臨出發前兩天阿濤打黎話有人臨時黎唔到問我去唔去，咁我就恭敬不如從命啦。

咁出發之前我地自己小隊就決定了，雖然都係比賽，但亦同時想增加歡樂氣氛，所以就兩艇拍住釣，齊齊搵魚抗「恆」。至於對手係點樣我地就唔理啦。出發前幾日我地已經不時留意住天文台嘅天氣預測，一開始話會有成四至五級東風，同埋會有驟雨及雷暴，我地都有點擔心；即使去到出發前一天嘅天氣預測話風勢會變做微風二級後轉三級有驟雨雷暴，半夜還是來了一場黃色暴雨警告塊到零晨兩點多，所以我地都有了打水戰的心理準備。

點知訓醒覺卻見到天色出奇地好，真係以為係幻覺，不過雨衣仍然帶備傍身，以免魚唔食餌人已經濕透了。點都好啦，去到青龍頭碼頭，集合人齊之後我地就出發了。一落艇阿艇家輝仔就同阿濤商量是日釣行大計，就決定先去試下搵今期大熱黃翔，畢竟黃翔是能夠計分的魚，如果能夠幸運地執到一兩條的話，對我地今日既戰果會非常有利；所以第一釣點就直奔小欖對出的沙倉一帶。這裡基本目標魚就是黃翔和爛肉梳，無乜石口位，所以其他魚種會相對較少機會釣到。當然，呢個世界總係會有外道魚嘅。

由於這些魚群跟流走不是太過聚集在所謂的排口，所以一般都係要試同搵，又或者係之前一日艇家的戰績又或者黎到多近見唔見有人起魚等等；而我地艇家就在大概位置用測魚機探到下面大概有魚群，於是就揀定位置落餌正式開釣。落左餌都唔夠幾分鐘，就見輝仔有抽魚動作，不過跟住就見唔到應該有既彎竿情況，而係好快就見到一條九棍上水了，跟住當然就係放返條九棍落海然後勾過隻大眼仔繼續企頭釣企頭啦。我地個個都當然係勾頭蝦啦，水流雖然有點急，不過個底倒是真係幾滑，石都唔多舊，底都基本唔駛試，對於我地另外一艇較為新手既隊友們黎講都算係一個較容易處理既釣點。果然過左無耐，就見到對面阿華仔都有食餌，雖然係一條小牛秋，但係都叫做開左個齋先；打個底，增強自信心，考試分分鐘都會一百分。不過原來考試一百分既，係我地呢面艇既阿輝。只見佢支竿頭有點震，然後佢仲話好似班仔食緊餌啦，咁我都不以為意咁樣繼續邊釣邊幫另外副架生綁釣組，跟住到佢支竿有一口重既食餌，佢一抽一頂之後唔夠幾秒已經話好實好勁，我聽到都即時收起我副繩，費事有機會繞到佢條繩走魚就無謂啦；跟住支竿就已經滿弓同埋開始飲水，佢見狀都話可能係懵仔魚喎，我都即時拎起手機開始拍片；嘩，真係不得了，我只係見到阿輝一手一手咁頂魚同收魚，不過支竿雖然都滿哂弓同埋有幾下比條魚反擊到要飲水，但由於阿輝勾得頭蝦都係用得粗繩，再加上下面無石，所以同條魚搏鬥起來都仲係應付自如，終於玩左大約一分鐘條魚見到光了，當然唔係黃翔啦，而係細鱗，不過我見魚影白色一塊都真係好大餅下；條魚見光都嘗試衝返向水底同埋艇底，阿輝就左兩下竿、飲多兩下水、再繼續張弛有道咁樣一下一下咁收條魚上黎，到水面見到條魚我同阿濤都已經第一時間嘩左一聲，然後由魚僮阿濤將條魚撈左上黎之後，跟住就係全艇人同時嘩聲四起，因為條魚真係好大餅，目測有成八、九斤！真係好耐無見過咁大架火車頭啦，仲要係港水同埋唔係傳統釣細鱗位置，總之就係不得之了嘅外道啦！不過我地隨即既反應就係點解條細鱗係要揀阿輝口餌黎食而唔食前少少，揀我地四個是但一口餌黎食咪好囉，基本上可以即時宣佈是日最佳釣艇獎得主甚至直接頒獎比我地咁樣了。不過世事就係咁樣，而家因為係艇家中魚，所以我地嘅比賽成績可以仍然話係零。心情絕對同平時無比賽時、果種有魚壓倉既感覺真係完全唔同，亦都係比賽既有趣之處呢，哈哈。

見到除左黃翔仲有外道魚再加上咁鬼大條，大家即時都醒神不少，事關艇家話其實最近都唔係真係好多黃翔釣，不過都過黎搏一陣咁囉，唔理啦，黎得就梗係要抱有信念！不過外道東西看來繼續糾纏住我地嘅艇... 因為當我有一口好似食餌嘅情作一上下咁拉我嘅餌時我都未知係乜，不過轉頭佢就攬到我隔離嘅朗奴隻蝦實一實，咁我地都估應該會係針墨定係尤魚，果然跟到上水面見到係一隻火箭尤。不過朗奴支竿同阿艇家個位置有點距離，艇家撈唔到，咁於是朗奴過左支竿比我，但係隻火箭尤呢個時候又縮左一縮，咁我就比返朗奴揸竿，隻野又再攬埋黎，但係阿艇家又唔夠手長，就係咁樣糾纏左一陣，正當隻野開始到達艇家嘅撈箕攻擊範圍、而準備起手嘅時候，隻野突然噴墨然後閃人走左，真係耐人尋味。唔緊要啦，火箭尤都唔係我地想要嘅外道，雖然如果兜到的話真係有機會勾佢落去做餌搏下粗野，不過既然而家佢走左咁我地就一切隨緣啦。但係外道既野，真係唔好睇少佢地，落左去五分鐘咋嘛，今次又係朗奴喎，又係聽到佢話有野攬住喎，咁梗係慢慢收上黎啦，見光竟然唔係尤魚既物體而係一隻白蟹！阿輝即時用撈箕將其收服，今次我地就話如果想再搏大魚，勾呢隻有成5、6兩既白蟹落去絕對係唔錯嘅選擇，只可惜呢度係港水而唔係外海呢。見到咁多外道出現係朗奴身上，佢都話唔爭在出現埋八爪魚保羅了，不過輝仔就話如果唔要保羅而要魚的話，可以試下中條左口架。不過可能真係黃翔不見時，外道特別多；今次又輪返到輝仔副繩了，都係尤魚之流攬住上，而上到黎時阿輝自己一手一腳包辦、比我地在旁幫手的話肯定更乾淨利落；講返先，今次輪到係大尾尤。

當你以為外道都出現得七七八八嘅時候，命運之輪又再轉到去朗奴身上，今次見到佢係有抽魚既動作喇，雖然唔係大條，但都起碼叫係食餌又唔係攬餌既動作先嘛，終於收到上黎一睇，嘩，係同阿輝預言嘅左口嘅朋友 – 地寶黎架，真係成件事好有趣呢。

其實有咁多外道出現，主要我諗都係因為目標魚群黃翔沒有出現，無左佢地係度瘋狂搶食，外道才可以出來搵兩餐晏仔吧。現場所見，超過十隻艇係度搵黃翔，但係就無見到有任何艇起到目標魚，大家都係喺度等運到，都係周圍望下附近嘅艇有無動靜。過左無耐，就喺我地前面果隻艇嘅艇頭果位釣手有所動作，遠處望過去已經見到支竿彎到行哂，跟住佢就一手一手咁收，我地仲見到個艇家車前隻艇咁樣方便阿釣手起魚，但係又一直都唔見有魚跳水，我地都覺得唔會係黃翔或者爛肉梳，大家就係度估緊究竟外道魚會是什麼，終於過多半分鐘，見到條魚出水了，竟然是一條青班！足足有成四至五斤添呢！大家都好出奇點解會有青班係度出現，要知道呢個釣點叫沙倉，附近海床真係石都搵唔到粒，咁又點會適合屬於排口魚嘅青班呢？輝哥就解釋話唯一諗到就係因為呢頭每日都有人放生魚到海裡面去，而呢個位同汀九橋底一樣都係一個放生點，所以可能咁啱有批善信買左一堆青班放生而剛巧喺呢個點放左落海而條魚又未開始周圍散去搵排口呢埋，剛巧又見到有口魚餌，又咁啱肚仔餓咁咪上左黎比大家見下咁囉。

外道當道，亦即其實應該出現既魚群唔係度，所以玩多一陣水流減弱左輝哥就叫我地繞繩車去燈籠洲果面搵下火點班仔等，我見勢就轉左揸竿釣下波子壓底開兩門勾，不過上門就唔係蝦仁而係揀一些細隻的蝦仔勾頭，睇下撞唔撞到火點牙點等。不過流水都仍然幾急，唔係太好釣，但我本住開個齋先再揸返大餌既心態，繼續玩多陣終於比我中到條小石釘。跟住有一口幾清脆嘅食餌拉左我竿一下，不過我唔知係反應不來定係真係唔到釣啦，收返繩上來睇，就只見上門勾得返對蝦眼，即係條魚如果大口少少應該就直接搞掂左架啦，而家唔到釣就證明佢未行死運囉。

由於流水關係，我控竿技術麻麻，又唔係太感覺到咁釣魚嘅傳遞感覺，於是我就轉左揸手繩玩，不過都係無口。船就一路食住個流向燈塔位果面釣，阿輝仔話之前一日係度釣到好多爛肉梳，即使係無乜食用價值同埋係比賽非計分魚，但係見我地悶左咁耐都想比幾口我地玩下爽下等流水再減弱時再去汲水門橋底同倒扣灣果面玩下。佢話尋日個探魚機係打到呢個位白哂，即係有成箕法國馬友係度，當左呢隻係法國咁樣定居，但係而定就打得好少，而如果魚既數量唔多，佢地就唔會點搶餌同埋食餌食得好衰。阿濤就有一口食餌既，但係只係輕輕拉左口餌咬左個蝦身就走頭，所以都係唔到釣。

既然無口，我地又收繩轉位，輝哥就車左去我同阿丹上次女將兵團初征夢幻釣場 https://yy08.pixnet.net/blog/post/106432006 中石玤果度附近釣。過到黎我就諗住換返繩釣企頭嘅，點知我見輝哥都改左用波子壓底，咁我咪跟囉，跟艇佬總是無壞既我覺得。佢就話揸竿連釣左幾日仲有一日係玩鐵板所以手攰於是而家黎呢個位抖下喎，不過我覺得既然佢揀左黎呢個位抖住用波子釣，梗係有佢既道理嘅。果然，磨左一陣，見佢有口，然後一抽就要比返一兩下就魚嘅姿勢，咁我諗都係大約磅頭魚吧，果然條魚上水唔駛用撈箕直接扯上黎，磅頭細鱗一條。我就話唔怪得輝哥你叫我唔好轉企頭啦，佢就話咪係囉就係想係度搵下細鱗之嘛，唔係我做乜轉埋釣波子壓底呢，哈哈。所以又再可以係度同一些釣魚新手講，經驗艇家會幾熟佢地釣開嘅地頭，一般會知咩時候、係邊度有咩目標魚，有時唔怕問多句，又或者跟住佢地既釣組，會對你釣到魚嘅機率應該有所提升。唔係講笑架，因為磨磨下，到我終於有口，明顯感覺到條魚唔係一口食餌就走而係索落去吞既感覺，等佢吞多兩口我就抽繩，中魚！亦都有走水嘅感覺，不過就唔強，心諗都係剛剛阿輝果條細鱗大細既細鱗咁啦；由於我揸四號碳絲，條魚又唔係大條，所以基本都無諗過要同條魚妥協，直頭係一手都唔放咁收上黎；收到上黎見到魚影之際唔知係咪條魚見光反爆定點啦，突然輕哂，然後就見到條魚向返深水游返落去... 我真係百思不得其解點解會斷魚，阿輝話我收得過急喎，可能係我太輕敵掛，平時幼點繩中兩三斤那些細鱗我都基本未斷過，今次真係老貓燒鬚了！可能係魚絲有些披口位比魚界斷左也不定，唯有提醒自己以後釣魚每次落餌都檢查一下架生完整度同埋上魚謹慎點吧。既然條魚無死運，咁就等佢再長大下次先黎再搵過佢啦。

綁完架生重新上路，釣多一陣，聽到前面阿毛話終於到我有口啦，然後佢一抽，中魚，又係有少許力水，不過佢用竿中，所以會比手繩玩得耐少少，阿濤當然就係準備好做魚僮啦。點知條魚一見光，已經媽聲四起，但係鬼叫今日係比賽咩，唯有撈條魚上黎，斤裝白鬚公一條！點難食點腥都好，都叫做係「可食用魚」，亦都係我艇暫時第一條可以拎出去計分既「大魚」。不過條魚實在腥了，平時阿濤撈完魚都會幫手掟埋條魚入生倉，但係今次佢就叫阿毛自己搞掂。嘩，條魚真係腥到經過我地面前掟入生倉合返個生倉蓋都有浸腥味供返上黎呢！講到算係「可食用魚」，但我地全部人都叫阿毛掉鬼左條魚就算，不過阿毛話會叫喺酒家做既老豆去處置條魚，務求令佢唔好變成惡臭魚，我地於是叫佢煮完條魚一定要影相比我地睇同埋提供食譜，哈哈。

望過去拍住我地、係不遠處既隊友艇，呢個時候都終於有動靜，只見到阿哩中魚，上到黎都見到係細鱗，我短訊問華仔係乜佢話係大約半斤細鱗一條喎；都好丫，起碼有得爽下。果邊爽完無耐，又到我地呢邊艇家輝哥有口了，今次呢條睇輝哥既動作就應該大條少少，不過都係上得好輕鬆，亦都見輝哥無諗住要拎撈箕，見光睇到都係細鱗，輝哥又係直接彈條魚上黎，目測斤裝；真係無得講，前面有四個在努力，但都係要食落去輝哥度，睇黎我地今日都係有魚分，無獎金呢。車多一陣，亦都再無口了，輝哥就話過去汲水門橋果面試下，睇下有無紅鮪，牛廣仔搵下。本身我地就在靠馬灣果面釣嘅，但水流仍然湍急，釣左一寨輝哥就話先過對面試下，等細流一點再過返黎呢面釣。不過果邊有人係橋底果面打沉底，所以無得如輝哥所願咁駛埋一點石駁位搵紅鮪，只可以在外圍搵下有無其他魚種。呢度雖然都有石位，但始終唔係輝哥話較多魚聚集嘅果堆卡石，所以魚就未有咬口，但石頭就先來咬了。而其中有一塊大石我地艇在上面一過時，朗奴同阿毛就應該同時中伏，見佢兩個即時係度嘗試扯斷，點知可能朗奴掛住彈竿，注意唔到布線繞左竿頭，跟住一扯，結果當然就係炸竿啦，全艇即時沉默左。釣多一寨輝哥話反正埋唔到石駁排口位，都係過返靠馬灣果面橋底試下喎。但係過到黎呢面，車出車入，車前車後，返左寨好幾次，係度磨左成個鐘都係無口，輝哥就叫我地又再繞繩，往青洲灣、散石果面搵魚。

車緊過去時我就例牌打開個生倉睇下啦，都係大約得十條魚，如果唔係有架大火車，戰果都真係幾悲慘咁。同埋呢個時候我就見到頭先上水無放到壓既果條斤裝細鱗已死，相反條大細鱗就都仍然叫做立直係個生倉入面，輝哥就解釋話佢中條大細鱗果陣其實特登收得快一點，等條魚無咁易死喎。加上沙倉果面水又唔深，所以條魚好其實都好快就上到黎，如果水深一點，相信條魚早已歸天了。原來如果水夠深、上魚又收得夠慢，條魚反而會更加易死；收得快上黎中左壓但你幫佢處理左放左壓之後佢反而仲可以擺得仲耐仲襟生，真係長知識了。

到左釣點，我諗住揸左大餌都咁耐，本身已經拎起支竿準備波子壓底架啦，點知佢見到就叫我勾返頭蝦，話呢度目標魚係要釣企頭喎。咁既然有艇家教路，當然聽佢支笛啦。釣左無耐，就聽到阿濤話有魚踢餌，咁我梗係即時望過去，見到佢扎哂馬做好哂準備動作咁，等條魚一食餌，佢就大大力一抽，收左一手佢就話撈箕都唔駛，再加上水淺，十秒都唔駛就輕鬆上魚，磅頭火點一條。係度我問左一個技術研究問題，我話點解食餌果陣你做個咁大既準備動作既，之前有幾口你話有口都唔見你咁大反應，佢就話因為條魚突餌(試餌而踢餌)果下好猛，個勢度令佢以為條魚有返咁上下，所以就扎行馬黎抽魚，不過一上手頂一下當然就知咩事啦。同偶像去釣魚果然又有野落袋學到帶返屋企了，哈哈。釣多一陣無再有口我地就車左去上次我和男神於青馬有個約會 https://yy08.pixnet.net/blog/post/106450939
阿恆中火點果個散石位度搵魚。咁我諗住都係釣下火點仔咪又拎副波子壓底嘅手繩出黎囉，不過阿輝同我講叫我繼續企頭，我當然係繼續勾頭蝦啦。今日比上次其實無咁緊流，係度都唔會話釣到落唔到底咁，不過就磨到下午茶時間都磨唔到半條魚。

阿輝見都無口咪諗住試下最後既辦法，去汀九果面搵下放生紅魚、黑鮪釣下黎盡最後力量衝擊下個比賽，始終我地拎得出黎見人既過斤魚就只有一條白鬚公。如果一個唔覺意執到兩條斤零紅魚咁分分鐘真係有得扭轉形勢，反敗為勝都唔定架。不過隊友艇就話唔跟我地過去啦，原來佢地呢個時候已經得返唔夠廿隻蝦仔，咁過去都無意思，就係咁樣我地黎到呢度終於分道揚鑣了。我地就直奔汀九，佢地就係度磨埋餘下嘅釣餌。過到黎既然係諗住搵放生紅魚，阿輝就叫我波子壓底釣蝦仔，因為放生魚其實鍾意食壓底蝦仁多過企頭飄蝦，咁我梗係聽話照做啦。其實佢釣左一陣都放低左支勾頭蝦既竿轉釣波子，不過我諗下面真係好多小型瓜衫係度食餌所以我地一路都無料到但又無魚可以抽到。轉頭無耐四點唔夠就收到電話話隊友艇玩哂魚餌提早埋街食下午茶算了。不過其實都無乜所謂啦，畢竟下晝釣況其實都真係幾差下，我地全艇都真係釣得多一兩條魚咁。我轉頭係起多條烏絲仔，阿輝就中多條5、6兩火點，但係說好的放生魚就完全唔見蹤影。阿濤都悶到又拎返支朝早去沙倉時綁定嘅鐵板架生出黎玩，當然都係無料啦。一路係度磨，磨到大約五點，我地都只係磨多三條放生左嘅小牛秋，跟手收到阿恆果面電話話佢地都埋左街我地就亦都叫阿輝打道回府。我地都非常好奇究竟阿恆佢地兩艇嘅收穫，會唔會真係同我地差唔多定係會大勝我地。不過既然佢地有兩隻艇，應該點都有一隻唔會太差嘅。結果埋到青龍頭，我地自己撈魚並秤下條細鱗同埋打下卡之後就上岸了。話時話，條魚過磅足足有八斤十一兩，真係非常誇張，佢就一定係我自己同艇以來見過最大嘅一架火車了。

埋到岸，係青龍頭碼頭個亭度，大家都等住我地最後一艇返黎。而我地又托住條鬼死咁大條既細鱗，不過我地就毫無勝利既氣氛係度，所以佢地一睇都知條細鱗唔係我地釣架啦。阿恆問我地會唔會拎魚出黎秤，阿濤話唔駛啦，如果佢地果面有人會拎出黎，咁就睇下有幾多就係了。其實我地艇未埋街果陣都已經講好唔揀魚出黎獻醜了，直接課金比大會就得了。咁結果就係阿恆既朋友，即上次爆釣石狗公既艾力得到大魚獎，而佢地隻艇亦都有三條細鱗交到出黎，所以都係最佳釣艇獎嘅得主。
其餘艇嘅戰績：
阿恆艇 – 全艇夾埋總共得四斤幾魚。有一條艇家釣到嘅兩斤幾紅魚。另外斷左條四、五斤打上嘅魚
隊殺艇 – 全艇大約得十條魚。有一條艇家釣到兩斤幾嘅法國馬友。另外阿哩條半斤細鱗