妙高雲海與天門結界

路線: 川龍-> 川龍林中-> 響石脊-> 妙高台-> 相思石林-> 禾秧山-> 石天門 -> 下山路線 -> 爆林路段 -> 普光園 -> 三棟屋村 -> 荃灣金坊泰國美食

登山之友: 細表妹、YY

是咁的，早個星期喺外國網站見到有個山鞋牌子做緊大特價，即時同細表妹入手左一人一對山鞋，基於香港就幾乎無見過有鋪頭入過呢隻牌子，所以試鞋嘅機會是零，而網上都搵唔到乜野用中文寫嘅評測；再加上買左新玩具要好想快點開黎玩是常識吧，於是就想週末立即上山去了。不過隊長超級因為一早有約未能同行，所以就只有我同細表妹兩個人出發了，咁我地一於就兩個人組成新鞋小隊上山開鞋去。

路線方面，由於隊長唔去，加上都係旨在試下新鞋，而且天氣都一直不穩，所以我地都只係揀返啲大路、非危險性路線。而且都唔係想去得太遠嘅郊外，萬一有咩風風雨雨都可以方便撤退丫嘛，咁九龍區附近我就比左針草同埋妙高台石天門細表妹揀。咁結果表妹就話感覺妙高台禾秧山呢條路線啡路得黎又唔太容易亦不太難，好似唔錯，咁就一於呢條路線啦。

我地兩個坐地鐵去到荃灣，食個快晏之後睇下個鐘都成兩點半，即時走去坐小巴上川龍。天陰好處就係基本上去到起點落車之後唔駛上裝就可以即時出發。由於係新鞋，亦都知道轉頭行多陣對鞋都一定會污糟哂，所以就係起點川龍村公所度同對鞋仔影返幾張沙龍照先，然之後我地就正式起行了。

由於出發時間晏，我地又唔想行咁多，所以表妹就話不如將是日行程可縮短嘅都縮短，睇下個地圖，就將原本要行嘅川龍林道改為直接行啡路穿林而上，而我地亦將石天門落山之後原本經相思行徑過城門水塘菠蘿壩一段直接砍掉、改為直接沿啡路下山至三棟屋村，藉此希望追回時間、同埋換來多點時間在山上打卡影相。一開始呢段啡路其實又真係唔難嘅，只不過就係個樹林入面咁，有些位就再窄點好似爆林位咁，但其實就路線相當清晰嘅，不過就真係一行就要向上攀仙成200米，不過還好就唔算好直好斜，再加上在林中唔會好曬所以都行得算輕鬆嘅，不過就係因為唔係開揚地方所以就唔通風，無左果種清爽嘅感覺咁囉。另外由於今日都係枕住會有點毛毛雨就黎落出嘅煙霞嘅模樣；走在林中，真係好有一種仙氣，置身幻景之中嘅感覺咁樣。喺呢度趁對鞋仲未算係好污糟又有樹林嘅感覺，當然再同我地兩個嘅鞋影多幾張寫真啦。之後我地就繼續慢慢向上行，終於比我地從林中走了出來，來到了一段石屎路。由於從樹林中走了出來，頓時感覺空揚了很多，多了流動的空氣之下感覺呼吸也暢順了不少。

係度匆匆打過卡之後我地就繼續上路，不過我地就已經唔駛再走進樹林了，取而代之嘅就係響石脊呢條開揚的上山路徑，而走起上來也算是輕鬆。再很多一段，路就算是越來越開闊。路段唔再係窄窄的一條山徑而其實好多位都可以隨你自己喜好而行，我同表妹講同青山差唔多不過青山就係浮沙碎石、呢度就係草泥路任揀咁樣。因為呢個時後我地都開始叫做黎左一大片草坡了，不過由於空氣濕度實在有夠高，所以視野就唔會好開闊，上望妙高台都未望到標誌性的瞭望台小石屋，向下望又見唔到山下荃灣一帶景色。不過行下行下，天色竟然愈來愈好喎，我地竟然開始可以在雲霧中隱約又望到下山嘅景色，而山頂小屋也時而清晰，時而又暫時消失。再行多陣，天色愈見開朗，喺見得到陽光既情況之下同時真都見到一習濃濃嘅雲海在半空之中，配住漸見清晰的遠景，可謂壯麗非常。我地都比眼前呢片迷人景色吸引住，舉起手機不停東拍拍、西拍拍咁樣乜都影一餐，反正呢個時刻能影到的都是美景。影一影，又向上走一走，又再影一影，真的連人流連忘返，不過我地都知道時間唔太容許我地咁樣，如果唔係，喺呢度嘅景色再加上咁嘅天氣，真係留係度成個鐘都無問題呀。

邊打卡邊行之下，我地終於都上到了妙高台嘅著名景點山火瞭望台小屋。啱啱上到黎影相既時候仲見到天色尚算可以，視野還算清楚，不過要知道大自然嘅轉變可謂迅間即變，影多兩張相之後只見天色已經變哂，眼前都開始是雲霧了，而且風也起了。還好我的影的是眼前這個小屋，而不是身後已經看不見的遠景了。不過我地都慶幸剛才在山腰、最需要影大景的時候，上天竟然做好心，天道籌勤天氣麻麻都出黎上山嘅人，比左個短暫的美好時光我地。跟住落黎既天氣基本上都唔再見到有清天了，都只係天陰陰之餘再加上疾風勁霧了。我地都感到驚奇同感嘆個天真係變得好快，同埋我地可以影左一大堆相比朋友仔睇我地今日黎行山真係好好天咁樣，但其實其餘80個巴仙既時間個天都係陰陰的。

從妙高台的小屋離開之後我地就要繼續出發往禾秧山了。由於天色麻麻，加上玩下影下而「耽誤」了不少時間之下已經都差唔多成5點了，所以我就同表妹講話不如提速，唔到靚點又或者係天色好起來時就一直的走吧；咁一向只係怕熱同曬而唔怕腳程嘅表妹當然欣然答應啦，反正佢嘅天敵太陽伯伯一早已經走左頭唔知去左邊度了。咁樣我地一路走呀走呀，過左一陣就過左大圓石澗嘅頂部了，由於天氣關係一路走來都怕會跣倒，所以都有點小心，點知小心行嘅就無事，過完石澗位上返山泥小徑位一時大意我睇漏眼之下，右腳一腳就踩左入去以為係實路的泥氹入面！原本新簇簇的鞋子當堂就變為泥鞋了，而且仲要腳都濕埋，真係餘下路程都要濕住腳黎行了。不過你以為呢一刻會覺得緊要嘅事情咩？行到後來就已經唔再重要了，不過呢個就之後再講了。踩完氹之後繼續趕路，我地一路在草叢中穿插而過，不久之後相信就經過了相思石林，不過因為天色關係吧，出面嘅景色都睇唔到，所以我地都只係繼續專注趕路，一心諗住快點去到下個重點位置禾秧山。不過呢一段路著實在草叢中，而且相信咁嘅天氣都無人上來行山，所以一段咁普及嘅路線竟然沿途我地都不斷食蛛網！雖然一路已經手持小樹枝去掃蕩，但快速行走再加上都要不時注意路面濕滑嘅情況之下，難免都會食番幾塊網絲。而有一下較深刻嘅就係我在草叢快步前進一路專注緊避水氹、抬頭時忽然先察覺到有一塊蛛網差點就迎面撞埋來之際，我下意色哇了一聲並急速烏低身走過；而跟住身後的表妹以為我是不小心滑倒而走上來之時，佢才驚覺呢塊蛛網，於是今次又到去慘叫了！不過我真的沒辦法可以提醒到佢呢，因為當我發覺個網時我都只能高速閃避並哇出來了，然之後我都未定到神去提佢有蛛網佢就已經埋到黎了，唯有當佢唔好彩啦。就在我地在草叢中不停掛住避網之際，再加上天色有點昏暗同埋分岔小路不明顯之下，我地應該就錯過了原本前往禾秧山的路了。不過都唔打緊嘅，反正我地可以從另一條小徑往上走嘅。不過呢，禾秧山就無正式路段嘅，所以我地上到去咁上下其實都要摸索點樣上山頂，而另外一個問題就係呢度手機信號極其微弱、時有時無，所以我地都基本唔太能夠定到位；唯有繼續沿石塊摸索而上。由於天色認真麻麻，基本上視野都好低，所以我地都無乜意欲再繼續尋找，都係諗住留待以後好天氣嘅時候再次來臨吧，所以雙三角石室都係下次再搵佢打卡吧。

匆匆搵個位打張卡象徵式代表黎過之後我地就沿住小徑離開禾秧山，前進往今日最後一個設定好的打卡點石天門去了。行左一陣我地就見到一些分岔路，咁由於未黎過，所以我地都需要一些時間去搵路，咁其實沿住山邊慢慢走落去就可以見到「石天門」三隻大字就寫在石上了。其實我上網睇人地嘅片就見啲人都會走入去石縫中，然後在另一端走出來。不過今日咁嘅天氣，同埋時間關係，我地嘅心思都係諗住打左卡到此一遊就算，其餘嘅都係等好天再來時慢慢發掘。就係咁樣，打完卡之後我地就沿小路上返大路，不過我地因為手機無信號就唔係好搵到方向，而在我眼前呢個時候就只得一頭正在吃草的牛。咁唯有跟住山路走啦，不過我又覺得好似走錯方向，彷彿我地就走入左一個結界咁樣。正當我地喺度猶豫之際，呢個時候好神奇地竟然見到一個人從山路走出來！無錯，今日行左咁耐一個山友都無見過，但竟然就係我地有點迷茫之際，山上竟然冒出了一個山友！而呢個山友亦都係我地全日唯一喺山上見到嘅人了。即時向哥哥仔問路，佢就話我地對住嘅果個方向，即係佢黎既果度就係大帽山既，咁即係我地行錯啦，咁佢就話佢都係落去城門水塘嘅，咁其實只要係落山都係行果條路嘅就啱架啦，最多係落到相思行徑先至再有分岔路了。於是我地就跟住小哥哥一齊行了。有人一齊行，心裡都會踏實返唔少，所以呢段下山路我同表妹就玩起試鞋了；就係揀一些山泥路快步向下走睇下對鞋嘅抓地能力，結果發現對鞋行山泥路真係唔錯，就只有行濕滑嘅石面有點跣呢。一路走，終於就走到了相思林徑的分岔路了。小哥哥就喺呢度轉彎轉入相思林徑往城門水塘出發，而我同表妹則打算繼續落山往三棟屋方向，因為睇落路程短左大約有一公里多，而且不用在波蘿壩坐車走，也是方便很多。於是我地就同小哥哥道別了。當然接下來就慢慢會開始發覺我地呢個決定真係令我地有點後悔呢。

過了相思行徑呢個分岔路之後繼續走，地圖上顯示一直去到終點前都只係啡色路段，所以我地都不以為意，而且雖然話天色都開始暗起來要趕落山，但係段路都尚算開揚，而且行左一陣我地開始已經見到山下景色同埋在左手邊不遠處既城門水塘了。所以我地都「鬆懈」起來，放慢腳步、甚至乎係停低拎個飯團出黎邊食邊打卡。食完野繼續行，天色又再暗了點，而路況開始就變為草叢路徑，對於著短褲嘅我地黎講我地只好慢慢向前行，因為怕一不小心就會卡到帶刺的榭葉或樹枝而弄損雙腳。由於前進速度都緩慢，所以很快就已經天黑了，呢個時候當然要開燈了，呢個真係比我地當初預計話咩喺山上面難行時就慢慢行，到後面落山去到大路時天黑就慢慢行都唔怕嘅設想距離了三千八百萬里遠。我地只好繼續小心翼翼的慢慢向下行，而呢個時候基本都是天黑了，而我地亦都開始進入了樹林的路段了。走著走著，可能由於附近有咩佛堂定祠堂嘅關係啦，我地就聽到有唸佛經嘅聲音。喺農曆七月份仲要已經入黑嘅時份係山上面聽到呢啲咁嘅聲音又真係令人有點唔自在，可能就係咁啦，表妹呢個時候都拎左部手機出黎播音樂，話行得咁辛苦進度又慢，不如聽下歌放鬆點。我就半開玩笑咁同表妹講，其實我地會唔會已經又再進入左另外一個結界呢，定係其實今日我地喺響石脊上妙高台果段藍天白雲嘅短暫時光先至係真正咁入左結界呢？表妹就一於無我咁好氣喇；點都好啦，就係咁樣我地一路聽住歌一邊在小心翼翼的在走，盡量就唔好整損腳同埋踩空跣親；至於什麼整污糟對鞋呀，同埋食蛛網這些事，根本就已經不當一回事，放在腦後了。表妹事後都話，每個時間我地都會有唔同嘅心思同埋界限，上一段時間仲覺得整污糟對新鞋好麻煩？之前仲覺得食蛛網好慘？我可以話你知呢一秒你都只係會想盡快行完個路程離開左個山，什麼什麼的其他都已經不緊要了，最緊要係就係安全同盡快就離開左個山返回現實世界。行下行下，喺樹林中不斷往下探嘅我地終於都走到了城門引水道呢個路口位了，在地圖上看都只係得返好少距離，我地都不禁感到無比欣慰。老實講，一路走落黎條路其實唔係真係難，佢路面情況其實又真係算係啡外路段架，不過加埋佢野草叢生，同埋天黑又濕路嘅關係，成件事就令人有點唔自在咁。而我地都喺度話其實如果一早知道路況係咁，我地根本就唔會揀呢條路行而同左小哥哥一齊往城門水塘方向果面走，畢竟果條路會更多人行更為普及，一定唔會咁多野草咁囉。而我地行過左引水道之後其實再往下走就已經係有石屎梯級了，即時非常感動！雖然感覺依舊係無乜人會行咁但至少比剛才一路走下來的感覺優良得多。

一路沿石級往下走，走了一段之後甚至路上有了路燈，再走多一會我地已經從普光園旁邊走出來，走道象徵我地重回人間的石屎路上了！沿住石屎路一路往下走我地就來到了三棟屋村了。本身從諗住研究坐咩車之際，忽然就見到有架紅色小巴駛過，見到係往荃灣嘅諗都唔駛諗就舉手截車上車了。喺車上我地除左研究等陣食乜之外，就係檢討我地嘅行程，然後我地得出嘅結論就係，由於啡色路段嘅定義範圍都好廣闊，以後我地揀選下山離開路線時，最好都揀一些地圖上有名字賦予的路段比如什麼相思林徑、大城石澗徑咁，總比今次走時落山呢條不知名的路徑要好。唔係話條路難行，但去到天黑，同埋意志力同專注力都開始減弱嘅時候，行番一啲較為輕鬆嘅路段就會比較自在同安全咁。就好似今日咁，其實我地認為雖然我地路線上好似行少左小哥哥往城門菠蘿壩大約一公里多一點，但時間上其實我覺得我地反而用多左，因為我地路況同埋唔識路既情況令我地前進速度相對緩慢得多。不過又咁講啦，唔係行完今日咁，我地又唔會再增長左經驗啦。不過無論係點樣行，唉，結果我地都係一樣要玩到天黑，不過今次總算比行青山好，起碼早左落山同埋近市區，真係一落山就有野食，不過去食飯之前我地就先去左商場度梳洗一番，同埋最緊要就係清理一下早已經被泥濘所「污衊」左鞋子，如果唔係入到人地鋪頭就真係不得了呢，哈哈。而我地今日嘅行程就喺我地喺金坊泰國美食度飲飽食醉之後正式結束了。希望好快我地又可以趁好天上山去再試一下我地對鞋行浮沙碎石嘅性能啦，畢竟今日其他方面都試過了，但係就仲未知佢可唔可以在類似青山般的浮沙碎石路況上應付自如呢。

出發前拉筋