長洲尋倉巧遇多樣性魚種

日期: 07/12/2022
農曆: 六月十四
地點: 長洲外
艇家: 濠仔
釣友: 阿濤、阿恆、艾迪、師兄、華仔、YY
天氣: 天晴酷熱、東南風三級
水流: 中速流、水質一般
釣穫: 、細鱗x1 (斤半x 1)、芝麻斑x 1(斤裝x 1) 、沙立x 1(斤裝x 1) 、黃立鯧 (斤半x 1、幾両x n) 、䱛魚幾斤、什魚一袋埋單20斤

是咁的，話說釣魚界消息指上星期打風時，珠海果面有魚排受到颱風摧殘因而走籠左十萬計條黃立倉出海，而又有為數不少嘅份量隨水流而游到香港南面水域，主要分佈於蒲台島、長洲外一帶；亦因為咁樣就引來釣魚界一片狂熱，因為基本每日每隻艇都有過百條倉倉子釣到，所以人人都趕住跟上這個釣黃立倉熱潮。

另外，早兩三個星期阿濤都有在其專頁招人一同出海釣魚，本身我見咁耐無同濤子釣魚都有興趣加入，仲想叫埋華仔一齊去添，因為呢位哥仔最近放暑假比較得閒，成日問我有無魚釣，話有魚釣就搵埋佢；我見阿濤招人就問佢，不過佢又見話要同另外啲唔係咁識既人去怕尷尬都係留翻同啲識嘅人先去喎，咁我見佢唔去我都留待下一次啦，反正我都仲有櫃底團要同另外朋友仔去玩。

然而，機會真係可一又可再架！星期日晚食完飯睇緊網大漁小魚嘅最新出釣魚片時，電話傳來了一條訊息：「阿Y，星期二行唔行? 濠仔艇。」一見到係濠仔艇，我其他資訊都未問之後就即刻答阿濤子話羔羔羔，我去！畢竟上濠仔艇永遠都是歡樂笑聲嘅保證。跟手我問阿濤可唔可以叫埋華仔去，佢就話好呀。咁我即刻打比華仔問佢，佢聽到有得上濠仔艇都係乜都唔問就話去，始於佢一次都未上過呢架傳說中嘅快樂小艇，今次機會實屬難得，若不再抓住機會，就唔好怪人地了。

本身濤子話會釣大細蝦，咁我聽到有得勾頭蝦，就去搵翻支BJS-H100出來，仲順便執埋支S100 頭芯，諗住釣蝦仔時可以試下呢支買左咁耐都未用過嘅頭芯，並將佢同我支A-Britz S145 比較。

不過第二朝阿濤傳訊息過來話只係釣蝦仔同埋南極蝦仁，咁我就諗住試下我另一支未開過光嘅A-Britz M150。點知可能買左返來擺埋一面一路都無搞過佢，發覺支竿嘅筍位入得有點困難唔可以輕鬆接駁同拆卸；喺避免做柒姑碌嘅情況之下，我最後都係決定拎返 A-Britz S145 同埋 M165 呢個孖寶組合。反正我支S145都未中過撈箕魚，一於睇下今次有無運仔開翻個靚光呢。

出發當日我地當然就係約好筲箕灣同埋三家村兩邊上艇啦，而阿濤朝早打黎話佢坐緊紅色跑車過來筲箕灣上艇，問我可唔可以幫手買死蝦，咁我就未到，而華仔就已經到左咁我就同濤子講不如搵華仔幫手，咁我就話叫佢地兩個聯絡啦，唔駛我做中間傳話人。唔講由自可，一講就發現左單笑料；原來佢以為我搵嘅華仔係同我釣開魚嘅阿丹，所以講左咁耐都係我做中間人講話要買乜買乜，但係我叫左華仔直接搵佢之後先發現，原來呢個華仔並唔係華仔2號華仔3號，而係正正佢認識嘅華仔，真係笑鬼死我。

點都好啦，搞笑完畢，大家喺碼頭集合好，等埋濠仔黎到我地就落艇過三家村接埋隊殺，跟住就出發了！本來我以為今日係車去東龍島對出嘅蒲台島度搵倉倉子嘅，點知隻艇嘅方向唔係往東，而係往西環方向駛去，咁即係車長洲啦。雖然路程有返咁上下，不過我同華仔都係佛系，唔會咁趕係車艇途中就急不及待咁綁架餐。反正都係果句，有就有，無就無架啦。但係睇黎真係有時心急少少又可能好啲。

點解咁講呢，因為去到釣點，我仲同華仔慢條斯理綁緊架餐嘅時候，阿恆同阿濤佢地已經綁好架餐率先落餌了，跟住喺我仲未綁好個天秤嘅時候，首先已經見到阿恆有食餌同埋中魚了。雖然話係蝦仔餌，係會較頭蝦快食餌，不過都未免太快了吧，而跟住上到水一睇，原來係今日嘅目標魚之一，良型花䱛一條添呢！正當係度羨慕緊之時，企阿恆隔離嘅阿濤都抽魚了，上水一睇，又係同剛才差唔多大小嘅花䱛呢，霎時間覺得充滿希望，好似今日會執返唔少花䱛做過開心仔呢。阿濤仲講笑咁話，啱啦，下面睇黎有一磯花䱛喎，一於釣返佢一百幾十條，收工之時可以鋪在地上影；佢仲邊講邊用手比劃住個大範圍，我都笑笑口話邊有咁理想架。點知呢一群花䱛，原來就係得兩條！話說我見佢地咁爽有花䱛釣到，梗係即刻開行手勢，快速綁完架餐即刻落餌啦，等左一陣又真係有魚食餌喎，食落黎果下都已經知道係䱛魚了，不過一抽，唔夠實底，明顯無阿恆佢地剛才果兩條良型花䱛咁樣嘅大細。上到水面，果然唔係花䱛，只係一條白䱛仔，即時講話點解人地就釣呢啲(花䱛)，我就釣果啲(白䱛)，真係落餌唔夠快輸哂。不過最主要都係”埋怨”阿濤中完花䱛咁快就囂張起來，搞到而家即刻無料到。

釣左一陣都係無料，只係得幾條䱛仔，仲要唔密口，咁一於又走位睇下有咩野釣。不過放眼四周，都唔見有半隻釣艇，我諗都係因為啲艇都去哂釣黃立倉吧。呔多一陣都無乜料到，濠仔就同朋友仔溝通完都收到風話石鼓外果面都有得釣下黃立倉，雖然唔夠前幾日大條同密口，但都叫做有得釣下，於是我地就繞繩，然後直往石鼓外車。好快就嚟到釣點了，因為老遠已經見到有十多隻艇聚集在一隻躉船旁，明顯都係喺度釣黃立倉。於是我地都搵個位攝到喺堆艇入面就開始作釣了，但係可能唔係咁熟悉個流程係點，再加上水流幾急行哂斜繩，所以一開始我地都唔係好掌握到點釣，但就不停落完餌落去轉過頭好似無感覺咁但收翻繩上來就幾隻勾嘅魚餌都無哂；反觀旁隻有兩三隻艇就不時見到有起到黃立倉，仲要有時起到雙飛添。至於我地，再釣多陣，魚唔係釣唔到嘅，不過我同華仔接連兩三口都係中到雞泡咁囉！所以就咁睇黎應該就真係我地未係好掌握到點釣呢。

不過只要有魚喺度又肯開口，就總會釣到嘅，終於隔左一陣，船頭嘅艾迪終於有口似樣嘅食餌同埋走水，果然上水就係黃立倉仔一條，大約就是手掌般大細吧，如果幼繩玩嘅都叫有少少樂趣嘅。不過佢就話比起前幾日佢釣嘅細左一個碼咁。原來佢早幾日已經喺收到風有黃立倉釣時即刻出左散團去玩，當日佢都有十零口咁，體型有大有細，但都比而家呢條大。而食餌時間都係一浸浸咁，全日分左幾段時間食餌咁。照咁睇，我地暫時未釣到，都只係因為流水未到而魚較疏口，雖然方法都係一個問題，所以隔離艇會中多啲，但係我相信只要流水到就點都有得中到啦，我就唔信散團果啲人爆釣係因為個個都高手吧。果然隔左無耐，船頭師兄都有食餌，上水嘅都係同剛才差唔多大細嘅黃立倉；咁既然有一，就不會離二架啦，隔左幾分鐘之後又係艾迪中倉倉子。雖然有口，但係點解都只係前面果兩個中架呢? 究竟邊個會成位第三位呢? 我地剩低未中到倉倉子嘅幾位，就係度吶喊住，話只要中到一條，而且係先過阿濤中到就已經收貨了，不過叫住叫住，今次中魚既都係師兄中魚。佢仲要跟手再中多條，搞到我同阿恆都即時問下佢個心得究竟係點，又對比下大家嘅釣組，最主要應該都係師兄會放哂口比啲倉倉子食餌。但其實我地又唔係唔做呀，不過我地係食左餌都唔知同埋收繩返來就已經無哂餌咁咋，所以我地都係度邊釣邊思考住點樣應對呢個情況。我見落到成百二克重鉛唔係好感覺到食餌，一於試下偷輕少少到九十克鉛，感覺又真係好似好左啲咁，終於感覺到雞泡以外嘅食餌，不過一抽中魚上來都係釘公一條，但係感覺距離倉倉子又近左一步。前面艾迪同師兄都相繼再中多一兩條，而天氣確實係太熱了，所以佢兩個都入返來有頂嘅位置休息，而阿濤就調整左釣組之後，走去船頭搵佢嘅第一條倉魚去了。

不過呢個時候開到齋嘅，唔係佢，而係華仔。而華仔好快又中多一條，跟住佢就開始忽發奇想諗下就咁用仕掛可唔可以釣到黃立倉呢，於是佢就走去換釣組了。其實因為唔係好密口，所以有幾隻艇都走左，包括長洲進；但係我地就決定係度玩多一陣先，咁空間大左，我地可以再用輕少少鉛，同埋可以將隻艇用繩綁到去躉船度，咁阿濠仔就唔駛候艇可以玩埋一份。用左輕鉛果然好啲，今次阿恆都終於中到條，佢用筏仔中到就算細條，手感點都比我地好玩嘅。上到魚之後佢就笑笑口話好野，可以係阿濤子之前中到倉倉子，目標達成。而阿濠都好快就中到黃立倉，跟手再中埋青磯、油立，連咪、釘公等其他什魚。黎到呢度，仲未有倉倉子嘅就只得我同阿濤了；然後，返左入黎抖涼加釣魚嘅阿濤，呢個時候竟然有魚中喎，抽完仲話會走會郁喎，到見到魚影時仲話似啦似啦，黃色架黃色架，點知條魚再上啲未上到水，我就聽見濠仔嘅笑聲：係呀係呀，黃色架，雞泡啲旗都係黃色架嘛！哈哈哈，霎時笑死我地全部人。跟住中魚嘅又係繼續作釣嘅艾迪同師兄；然之後，連只用仕掛唔落餌嘅華仔都中到倉倉子，咁我都已經唔知講咩好，只好繼續守候。而可能倉倉子都跟住其他同伴搵食，阿華中完果一下跟手到我都有食餌，一抽竿就已經知道似係比我中到目標魚了，果然一見魚影，望穿秋水嘅倉倉子終於出現了。就係咁樣，我都終於宣告開齋了，而暫時又真係剩低阿濤一個仍然在苦苦等待緊佢嘅第一條倉魚。

阿濤繼續調整釣組務求開齋，我地就繼續咁釣。今次就到我同華仔一齊中，而收完魚上來之後，另一邊嘅濤子亦都有魚食餌，抽完魚之後都幾乎肯定是小倉子了，上到水，正式宣告全船人倉倉子尋找目標達成！咁話就話目標係每人都釣到，咁達成目標又唔駛即刻走人嘅，睇下個鐘都係12點半左右，於是濠仔就話玩多陣，1點再轉位去釣下其他魚咁。走左去船頭釣嘅阿濤呢個時候又中倉倉子，不過就細得可憐，手板都無，咁當然係放返落海由佢地繼續生長啦。之後大家繼續釣都有中到倉子，雖然未細到阿濤果條放生級別，但亦都唔係大條得幾多；玩多陣，濠仔收到朋友電話話不遠處另一釣點都會有啲䱛仔釣下，咁我地就決定繞繩轉陣，去釣䱛魚了。

好快嚟到釣點，大家知道係釣䱛仔，所以都開兩門勾用蝦仁、南極蝦做餌。我好快有魚食餌，不過一食一抽就知道唔係䱛仔，因為真係好輕；果然上水見魚，扯旗鱲仔一條，當然就係放回大海啦。我又釣扯旗仔，船頭師兄同艾迪就同時雙雙有雞蛋䱛起到，真係同人唔同命。不過又真係證明到濠仔朋友報過嚟嘅消息有料到。咁釣得䱛仔又唔會話賴低邊個既，只係邊個先邊個遲少少咁嘅啫；雖然食餌唔算好密，但係都叫隔一陣就有一條上手，好快就已經人人有雞蛋䱛同埋啲白䱛起到；呢個執一條、果個又執一條，好快就已經有幾斤古惑仔呔到。再釣多陣，濠仔朋友又電話到，話另一個位有雞魚仔釣下，不過我地就無乜興趣，反正䱛仔同雞魚都係咁玩，又唔係話特別密口，所以無轉到位。不過轉頭朋友仔又打黎話另一個位倉倉子又再密口食餌同埋大條翻啲唔再係細過手板果啲放生級別，咁我地又見都已經叫做爽完䱛仔，係時候又過去爽下黃立倉了。

話咁快就車到嚟釣點了，呢度好易認，其實今朝喺躉船果邊釣黃立倉時都已經望到呢邊了，因為呢度已經比釣友們起左個名叫港版油井了。呢度係新起嘅海上建設，睇黎都應該好聚魚，冬天應該都將會係一個釣百花鱸嘅好釣點。釣友們等濠仔候艇就即時落餌作釣，不過我就仲喺度綁緊釣組，因為頭先釣古惑仔個釣組都已經上左氣，再加上倉倉子釣組其實佢地多數用馬騮吊頸嘅樣式，所以我就係度繼續綁架餐同睇下周圍嘅艇起唔起到倉倉子同埋有幾大。見到隔離艇手繩又真係起到一兩條磅頭喎，即時加快手腳綁好架餐落餌作釣。點知釣左都無十分鐘，黃立倉都未起到一條，就見到有船管出來趕艇了。咁所有艇都只好離開「油井」範圍，有啲就駛遠少少落餌釣住先，諗住等船管走左就返去釣；而我地其實都對釣倉倉子嘅熱情不大，主要係真係堆倉魚唔夠大，所以濠仔決定叫大家繞繩，車返去長洲外果面，睇下會唔會撞到花惑又好，定條頭魚又好。既然話車返去長洲外，咁即係目標魚唔係黃立倉啦，咁我個馬騮吊頸釣組又要再作改動了，不過都唔麻煩，兩門仕掛下面剪走粒子彈鉛，穿返粒輕啲嘅波子鉛壓底出多隻2號勾就搞掂，而家我嘅目標魚就變成花惑同細鱗了。

嚟到釣點，我就試下上面兩門南極蝦，波子壓住果門就係南極熟蝦仁，睇下會唔會有雞魚、惑魚定細鱗啦，不過首先中魚嘅係艇頭師兄，不過就只係油立仔一條。然後過左陣就到後面艾迪中魚，支竿有微彎，唔知會係咩白身魚定花䱛呢? 見到魚影竟然又係手板黃立倉一條，真係唔搵佢地、佢地都會出現咁喎。跟住釣多陣，大家都有各自執到幾條魚仔嘅，但係魚訊唔算密，而且又少少起左風，咁濠仔就叫收繩轉位。

話咁快就嚟到釣點，好快我就有食餌喎，一食一抽，上水，白䱛一條，雖然唔係什麼好野，都叫做有魚釣到。跟住好快前面師巳又上條雞魚，然後到我都執返一條。不過什麼似樣既食餌就未見。釣多一陣，艇已離寨，濠仔就叫收繩返寨。不過我就話有魚食緊餌，等我抽埋先，跟住條魚一食我一抽，都叫有少少重量，收到上水面，見魚影，原來係條牛揪，不過上水果下就比佢揈甩左跌返落海跑掉了。咁上唔到魚，濠仔等我收埋繩就開艇，不過應該就唔係返寨而係駛過少少去附近寨口作釣。

一去到呢個釣點，濠仔竟然開口提我地、叫我地尾門果口餌可以試下用蝦仔，咁我梗係即劑揀隻沙蝦仔勾落去底門勾度，將隻熟蝦仁勾左上去上面果門仕掛度啦。佢仲話呢度可能會有啲牙點食餌添喎，仲講話如果呢個位都無魚食餌咁今日呢個海域都應該無魚食餌咁喎，真係誇張！不過聽到咁樣真係即時對呢個位置充滿遐想！果然呢頭講完無耐，果頭就睇見船頭師兄支竿一野就炸落去然而佢一頂一收跟住就聽到爆粗既聲音因為已經斷左！但係佢句粗口嘆氣聲都未完，隔離既華仔支竿又係自動行繩，即時滿弓！正當我掛住望既時候我支竿都一野就炸左落去我自然反應一提就已經即時要頂魚！跟住只見嘩聲四氣，然後我同華仔一齊頂魚同收魚，但係華仔收頂左幾下之後就甩埋，即時得返我一個！全船目光都聚集喺我身上，我除左機械性動作收頂魚之外，我淨係諗到真係唔好甩，個天比三口我地，點都要拎到一口；咁收多幾下都已經見到魚影，火車頭一條，我再將竿頭帶去華仔果面，華仔金睛火眼睇實條魚一埋到就用撈箕將魚撈上來，就係咁樣，是日第一條撈箕魚正式上艇！諗返起剛才果個情況，大家喺度估下另外果兩條魚之外，都仲係度驚嘆緊港水排口位竟然咁犀利可以同時三口食餌，真係不得不佩服濠仔呢個排口，可以事先預告中魚。

跟住無耐已經過左寨我地又要返寨，我就仕掛中條釘公，後面又中條烏絲，總之都係什魚咁，但又唔同款咁，然之後就係突然之間又見船頭師兄中魚，然後頂左下，又甩左。真係學阿恆話齋，只係聽到中魚，然後就係哎呀，打個冷震咁就無左。完全好似以前我同鬼仔嘅「中、甩、頂」。問下師兄用幾號絲，佢話4主2腳，真係唔怪得之甩、斷得咁快。我見佢連續兩口都起唔到都有開口叫佢用粗啲子線，等拎到起碼一條到手先至再玩返幼、慢慢嘆魚都未遲。呢面甩左條，後面艾迪又有魚食餌，一逗一抽，支竿微微一彎又係咁震，睇落似雞魚、沙立果個款，點知上到水，原來係良型石祟一條，真係生物多樣性，樣樣有一條咁。

跟住過寨我地又再返寨，都有啲什魚食呔到，然之後聽到船頭師兄嘩一聲，跟住睇到佢支竿又滿左弓，然後頂左兩手，點知都係要甩，已經連走三口，真係唔知點講好喇。佢話已經轉左賴腳，用緊3號，可能因為咁樣所以今次頂到兩野先甩吧。講真，師兄真係時候要再提升賴腳號數了，時間無多啦。一日真係無幾多口食餌，唔好再甩啦。咁佢有佢甩，今次到我隔離嘅華仔有食餌啦，見佢一逗就彎啦支竿，跟住輕輕鬆鬆咁收頂，上到嚟，原來係佢嘅老朋友 – 芝麻斑喎。驟眼睇，啱啱好斤裝，呢啲玩就無力架啦，但食味就真係剛剛好。咁就好啦，黎到呢度，起碼唔係淨係得我一個有條頭魚啦；同埋呢個位真係無限可能性之生物多樣性，咩魚都好似中得一兩條，而我地又真係估唔到會係芝麻斑呢。

點都好，釣多陣，又已經係返寨既時候了，唔知阿師兄今次會唔會有口呢? 之前三寨佢每寨都有一口食埋來，希望佢可以點都拎翻一口吧。就喺我地都釣緊啲唔同種類嘅什魚仔時，阿師兄又有食餌，見佢支竿彎哂但係今次就可以慢慢收到，咁樣收到幾手都應該無問題了，上到嚟一睇，斤裝沙立一條，又係另一種類嘅條頭魚，真係好鬼垃什呢。點都好，嚟到第四口，今次真係終於都上到啦，恭喜哂阿師兄，佢條4號賴腳今次真係輕輕鬆鬆啦。佢邊解魚邊講話呢條就細條過最先甩果兩口，點都好啦，上到魚就係好啦。釣到嚟呢度，今日三條撈箕魚全部都係由艇嘅右邊三位人仔中，真係幾有趣。咁阿濤子係艇頭釣，即時扮搞笑咁樣由左邊出竿就變左去右邊出竿落繩，真係笑死我地。

跟住我地又再返寨了，我又喺度諗，阿師兄會唔會咁犀利繼續每寨有一口呢? 不過首先有食餌嘅艾迪，不過就唔算好大條，但見到支竿都會震下，上到嚟，原來係手板黃腳立一條，又多一種魚種，真係估佢唔到喎。之後大家繼續偶有魚仔中到，而阿恆就換緊攝錄機電池時忽然支竿就自動波炸左落去佢一逗起就已經條絲自動拉行哂，佢用緊支船筏即時滿弓，真係視覺享受。守左全日咁滯，難得有魚中，玩左一陣起左條魚離水底又覺得基本穩攞，當然就係享受收魚時間，收兩手就放一手咁樣。一路收，都大家都估下係咩魚，一開始就覺得係細鱗嘅，不過玩多陣睇落又覺得係黃立倉，咁當然唔係朝早中果啲大細啦；繼續玩，阿恆就話感覺倒左繩，華仔就話佢都感覺到應該係繞左繩，不過見阿恆中魚，梗係讓比阿恆玩啦。繼續收，阿濠就話唔係黃立倉就係細鱗，跟手阿濤係船頭就爆左一句話「都係白鬚公果類嘢嚟」，全船人即時笑到唔停，真係比佢督中哂個笑點。點都好，一邊笑一邊睇收魚，見到魚影啦，真係黃立倉喎，仲要唔止一條而係有兩條添喎！但係奇就奇怪在點解會有兩條倉倉子嘅? 阿恆明明只係得一門勾作釣架喎? 咁睇佢一路收，另一條魚又好有規律咁平行住跟住走，點睇都似係中埋魚，咁阿華仔就話應該佢都係有食餌時未抽但阿恆已經中魚，而條魚可能都自動波中埋，但佢就讓哂比阿恆收繩玩魚，所以而家就見到有兩條魚同時現魚影；咁即係阿恆係爽住咁享受哂兩條魚嘅力道，唔怪得之咁墜手支竿又滿弓得咁犀利啦。頂多兩手，阿恆條魚埋左船邊，阿師兄即時撈魚上水，然後阿恆都即時再用手拎埋阿華仔果條繩，諗住快快趣趣收埋條魚上嚟，不過揸住副繩收左兩手又發現條繩鬆哂，條魚已經唔係度了，無辦法啦，始終可能剛才係華仔有食餌時但無好實底咁抽魚，所以隻魚勾並無好好咁打入條魚嘴度掛。不過點都好，至少我地又多一位師兄中到撈箕魚，而阿華仔都叫之前已經中左魚，而家派彩比阿恆，人人有得爽就仲開心啦。睇返條黃立倉，都有成斤半重，真係比今朝釣到果啲大好多，當然至少有呢啲級數先好玩啦。

釣到呢個時候，全艇都叫有啲似樣嘅魚仔起到，唯獨就係賴低左阿濤，不過釣魚嘅野就係咁架啦，今日你威、下次可能又龜嘅啫；況且一日未完場，一日都仲有補時入球嘅機會嘅呢。濠仔就話釣多一寨就收工，睇下阿濤可唔可以把握得到啦，咁我地都希望人人有魚中架嘛，不過睇嚟佢今日都係注定要同撈箕魚擦身而過喇。大家呢一寨都係有啲什魚仔釣到，不過就終於都再無撈箕魚出現；最後就係由今日比較旺食餌嘅船頭師兄以一條良型石釘埋齋作結。

今日都真係算係魚穫不錯嘅一日，但絕對就係歡笑聲滿載的一天。大家嘻嘻哈哈又一天，本身都無諗住話要釣到乜乜物物，都係諗住出黎試下釣下磯頭黃立倉嘅感覺，同埋咁耐無見當出嚟聚下舊咁都夠了，有魚釣、有水吹，有歡樂，大滿足！不過話就話釣乜都好啦、有魚釣就好，但都希望下次再釣時可以人人都有派彩啦。

黃立倉