尋點覓埋青斑鱗

尋點覓埋青斑鱗

日期: 09/11/2023

農曆: 七月二十七
地點: 維港西面一帶
艇家: 朗仔自駕
釣友: 朗仔、朗爸、華仔、YY
天氣: 全日天陰有大驟雨、東南風4級
水流: 慢流、水質一般
釣穫: 青斑 x 1 (三斤x 1) 、細鱗 x 6 (斤頭x 1、磅頭x 3、6両x 1) 、火點、什魚幾斤，埋單十二、三斤

是咁的，話說星期日朗仔同班前輩釣友出去釣維港，收穫甚豐，又大細鱗又黑沙仲有成箕火點，全日埋單成三十幾四十斤魚。佢話呢箕火點都唔細、埋左埗無耐未比其他人釣走好多所以執左成50條，仲叫我同埋華仔講話快啲出嚟釣返次，又講到包釣到又話如果出去釣輕鬆過二十斤咁，又話如果連十斤都釣唔到就切喎；既然講到咁美好，我同華仔就話釣唔到都無所謂、都係想睇你切，就係咁樣我地就決定快閃維港尋覓火點團。

既然講到去搵火點，咁我今次就唔買大蝦釣頭蝦了，一於全日就碌波子壓底，專心釣目標魚。所以我都就咁約左朗仔上環落艇而唔駛去到北角炮台山果面買蝦落艇。不過朝早由於藍田果面係咁落魚，所以華仔同朗仔佢地都遲左些少先可以出發，總之嚟到上環時都差唔多十點呢，但係呢啲都可能係劇本嚟．．．

喺等佢地隻艇來時我都已經綁定釣組諗住一落艇就可以隨時釣魚，因為基本落艇車兩分鐘就會到達我地通常的釣點。好了，等到朗仔佢地來到，本身都係諗住釣返幾寨先至去搵火點離魚，但係到埗一落繩都唔夠兩分鐘就見到遠處有海事處的巡邏艇；既然要走鬼，不如就索性先去西環尾青洲對開一帶釣雜魚，留返下晝轉流之後臨收工之前再返上環搏一兩寨睇下有無牛廣細鱗吧。

到達釣點，望返個上環果邊已經落緊雨，我地都話如果唔係要走鬼可能我地呢一刻已經要雨戰了，而家可以暫時避開雨雲，未嘗唔係一件好事。釣左一陣，首先開齋嘅係朗仔，雖然呢個位唔係今日嘅重點搵火點位，不過上水嘅都係一條火點。睇嚟今日可能真係會釣到唔少火點喎。車多寨都無口我地就移過少少去另一個排口繼續了。一路釣一路掃底，又唔覺得個底好鞋，但係都似係碎沙石底，但係呢個時候朗爸竟然上了一條瓜衫做為開齋魚，我見到咁都即刻話嘩呢度竟然有瓜衫，有點出奇喎，定係我地已經過左排口出左沙石底呀。朗仔就話呢度排口都係咁上下，尋日佢釣嘅魚種都係好混雜、乜都有啲。

咁就一於繼續釣啦，不過呢個時候剛才還在遠處的雨雲已經差不多飄到過來，咁我地梗係即刻拎啲雨褸嚟著先至繼續釣。我又懶喎，就咁笠住係身上，無穿好兩邊手袖，咁岩呢個時候有魚食餌，我右手舉起想抽魚但幅度不大，左手還在雨褸之下，想補抽一下也未能接手，結果當然就係走魚啦。不過走條魚仔就由佢，好彩唔係食口勁嘅埋黎唔係就真係揼心口。即時穿返好兩個手位繼續釣，雨亦都繼續落，不過就有收細嘅跡象。釣著釣著，只見坐我對面嘅華仔聽完繩一抽，中魚，然後就見到彈性要就魚，見到條繩向前走、佢就邊就邊收，口裡都講住話應該似係細鱗，而且都應該有返啲份量，因為條魚都枕住慢慢向前游，而華仔雖然揸住5號繩，但因為勾細，佢都唔敢硬砌，怕條魚會爆嘴甩勾；一路慢慢咁收，我見落住雨就費事拎手機出來拍片了，一於專心拎住撈箕做魚童算了。繼續見華仔一下一下咁收，係度估緊條細鱗會幾大，等緊白身魚影出現之際，點知，慢慢由水裡面上升出現在眼前嘅卻係一個深色的魚影，唔理啦，照兜魚啦梗係，然之後，一條近三斤嘅青斑就上水了！乜料呢個位會有青斑？！乜料條青斑由食餌、到掙扎走水，都唔似係青斑、而會令到華仔覺得係中左細鱗架？真係神奇。經過我同華仔推測，應該就係平時青斑兇猛的地方就係佢地會由大石的竇口衝出來食餌然後再衝回大石；但係呢度水下面應該就無所謂嘅大石排口，而只係碎沙石，所以條斑就無左所謂嘅衝擊力，無論係出擊，到食完餌後都無果種想衝回竇口嘅力量；再加上魚餌係沙蝦仔而唔係大蝦，亦都無刺激到條青斑嘅強烈捕食心態而係輕輕咁索隻蝦入去，所以中完魚條魚都只係斯斯文文咁樣慢慢向前游而唔係往下衝。咁當然呢個都只係我地嘅推想啦，但係青斑咁斯文就真係少有。而呢個時候我亦都講話中呢條魚其實都係有劇本嘅，一切皆由我地本身想喺上環釣，卻因為要走鬼而直接過左黎呢面作釣而起。如果我地唔係咁早就過左黎釣，華仔亦都可能就咁樣錯過左呢條「咁啱路過沙石底、只不過係出嚟曬下太陽嘅青斑」喇，哈哈。

中到青斑確實喜出望外，一於繼續釣下又睇下會有咩魚。無耐就到朗仔又有魚訊，一抽中魚，少少掙扎，再將魚收服，上水一條小細鱗，跟住無耐朗爸亦都中魚，石狗一條。生倉呢個時候5條魚，同時亦都已經有5款魚。對比返上星期維港不能解釋劇本釣行我地全日先至有5款魚，今日真係可謂完全唔同。我地都數緊轉頭大家仲會有咩新魚種可以釣到。過左一陣終於到我有魚訊，不過中左好似無中咁，上到黎，梳蘿魚一條，真係對面就大青斑，我就魚餌都嫌未夠大嘅梳蘿魚，不過又咁講，又係一種新魚種，真係完全魚種開花。繼續掃排口，朗仔又執多條濃湯寶 - 牛秋，跟住見有啲疏口，又開始落雨，朗仔就話不如繞繩去火點位強攻火點順便避雨。

一邊繞繩，一邊已經開始灑起雨粉來，收好繩就即時開艇，直奔昂船洲那邊的釣點駛去。朗仔話尋日就係喺呢一帶排口爆火點了。排口比較淺水，而朗仔就話要圍住個排頂附近釣，要先將群魚搵到，然後再集中攻擊。掃左幾分鐘，首先有食餌嘅係朗爸，見佢一逗、中魚，再輕輕鬆鬆收魚，一條火點首先上水；喂呀，係個好開始呀。照咁樣個勢釣落去，真係會釣到一堆火點喎。點知中完一條之後，掃左一陣都未有魚食餌，唯有車去排口嘅另一邊繼續掃。呢個時候雨雲又黎到，不過無阻我地搵火點嘅決心。驟雨收細左，朗仔就先中一口，火點。然後隔左幾分鐘，佢再中多一口，又係火點。嘩、距離我設定二十條火點嘅目標又再邁進左一步了。雨停左，而我地亦都貌似搵到箕火點嘅蹤跡了，只見朗仔接連有幾口食餌不過就逗唔中，我同華仔都話有無搞錯呀，幾分鐘就有幾口食餌，我地前面卻一口都無，朗兌就講笑話艇佬梗係車到個排口對正自己有利位置比自己釣架啦，所以先食艇佬係正常架，咁我地知梗係知講笑啦，而係朗仔比較掌握到釣佢地嘅方法。佢話佢尋日都釣得三兩條，其餘嘅都係斑前輩釣，佢都用左唔少時間睇班前輩釣先至揣摩得到，而家就活用出黎咁喎。咁我都明，尋日佢同班高手釣，咪比高手中哂囉；今日佢同我地釣，佢就成為左我地眾人中嘅高手咁囉。終於抽唔中幾口之後都比佢中返條。然後過左一陣到華仔都有食餌同埋抽中埋，釣到呢度個時候，就係剩下我一個未有火點了。

圍住排口繼續掃，又見到華仔抽魚，跟住只係見到副絲彈繩，然後華仔想補多手去頂，但係跣手未來得及揸實副繩，跟住就見到佢甩左魚了；我同佢都覺得呢條唔似火點，佢話似鱲，而我就覺得有機會係細鱗，但至少唔會係火點，因為個份量絕對起碼都過磅頭呢，不過點都好，上唔到黎既魚永遠大條，哈哈。跟住轉頭到朗仔抽魚，見佢中左，但係唔知條魚絲係咪掂到船身，竟然斷埋，咁就蝕左一條。跟住無耐又係朗仔中魚，收到上水見到又係火點，但就係佢揸住條魚拎入黎艇時，條魚掙扎反抗然後彈兩彈竟然比佢喺朗仔手中彈左出黎跌返落水！我同華仔即時笑佢話喂，釣得多都唔駛咁樣放返落海嘅，有人中未到到架。之後朗爸同朗仔都有中多一條火點，跟住又再開始無口。睇黎佢地又隨水流游左去排口嘅另一方。不過雖然火點疏左口，但其實就仲有其他魚食餌；掉返轉諗，可能就係火點唔食餌，咁其他魚就多左機會食餌啦，因為呢個時候我地有啲魚訊但食餌嘅方式就唔似火點，而且比較難到釣抽得中，我地都好奇緊究竟會係咩魚黎。其中一個答案好快就揭曉，因為呢個時候華仔中魚了，然後上水嘅係一條絲立，我地又收獲多一種魚了。然後朗爸中魚，上來的是今日又一款新魚種的沙鑽，仲要短時間之內再起多一條，真係原來排口另一邊就係碎沙地，會係有沙鑽、絲立等來覓食的，咁另一種大熱沙立幾時會出現呢？而我有幾時會中魚呢？

釣下釣下，我都好似變左係觀眾咁樣睇住其他人食餌、中魚咁，彷彿今天魚兒就是不會找上我一樣；今次又係朗爸有魚訊，抽完魚見條魚會走下水，即係唔會係火點啦，上到黎，又一條磅頭細鱗，真係原來呢度都有細鱗釣，咁真係幾好，唔駛下下走去上環、中山果邊搵細鱗，呢面起碼無果面走鬼走得咁利害呢，所以除非流水啱哂，如果唔係以後都唔駛長磨果面嘅釣場呢。釣完條細鱗，跟住華仔又起條火點，我睇住其他人中魚時，睇到我都好似唔識釣魚咁了。不過發下呆之際，今次終於有一下明顯嘅食餌走埋來，跟手我一逗、中魚，但睇個勢完全唔似火點，咁究竟係乜呢？原來係一條良型絲立，不過雖然係良型、而且係我久違了的中魚，不過我還是希望能找到的是火點，始終我地今日黎呢度係想搵火點嘛，而家就只有我還在苦苦掙扎、等待目標魚的上釣，其餘的朋友仔都已經找到屬於他們的火點了。

就係我仍然等待火點來襲之時，只見朗仔先係聽繩，然後一抽，跟住就彈性同埋就魚，但同一時間喺遠處我地亦都見到有海事處的巡邏艇出現，令本身諗住可以慢慢就魚的朗仔呢個時候都心急起來，即刻用尾機加速來提升就魚的速度，然後亦加快上魚的手勢，好在條魚亦唔算好大、好快就好聽話咁樣跟住朗仔一手一手咁樣游上水面，而我亦一早已經拎定撈箕在旁準備，魚影一出現，我睇住一兜，一條斤裝細鱗就咁上水了！而呢個時候再望下隻巡邏艇，亦都沒有向我們這邊的方向駛來，咁樣我地就連位都唔駛走、可以繼續釣呢。

雖然唔密口、但見佢地都隔一陣就起到一兩條火點，跟住釣釣下，仲見朗爸起條沙立添，而我就繼續發呆睇住大家釣，好似自己唔係釣咁魚咁。然後唔知幾時有一下，我見好似副繩卡卡地石咁然後我一扯，吖，又有點重量喎，上到水，係一條良型火點，都成七、八両，就係咁樣，我都終於搵到我今日嘅第一條火點喇。雖然唔係好知點樣釣到，但總算都叫釣到先啦，一於睇下會唔會有機會釣多一兩條先。不過我就執唔到了，佢地就執到幾條火點同雜魚，眼見都差唔多成三點，流水都轉緊，火點都有十幾條，唔算好但又唔太差，不如車返出去中山、上環果邊搵下有無驚喜。

即刻繞繩，然後直車去中山細鱗位，我就話睇下邊個又可以好似朗仔上星期咁樣係度執條細鱗呢，不過可能潮水啱啱轉流水未起哂，所以都未係好搵到食餌。掃完一寨返流，釣釣下我就有一下都幾大力嘅食餌，下意識一扯，跟手中魚都覺得似係沙立了，果然上到水又係一條手板沙立仔，唔錯唔錯。繼續跟住流水掃寨，見華仔有動作，上水則係一條良型火點，佢都話呢度啲魚食餌無剛才位置咁精口，很清脆。我即時笑笑口話入面啲魚太難釣，呢度果啲魚食餌會大力啲所以我先識釣，哈哈。不過釣完呢兩條魚就靜左，於是我地就就繞繩往上環另一帶排口前進。

釣左無耐，我就有一口魚訊，佢一食我一抽就中魚，上到水又係一條沙立。不過抽魚時可能整到手指之前個傷口，所以中完魚之後我就開始係度「玩手指」、睇傷口。不過釣魚嘅野往往都係咁架啦，當你玩手機呀，食野飲野嘅時候，啲魚就會忽然之間搵上你。就喺我右手扣坐副繩但其實同時用緊隻右手去玩左手手指尾嘅傷口時，忽然感覺到一下拉扯，然後等我枇得及反應揸實副繩時，已經感覺到條魚在走水了；換言之，即係條見我唔得閒理佢，自己食埋黎再怕會甩口就一於食大力啲同埋咬中隻勾，所以即使我無抽魚只係揸住副繩，條魚都中到實一實，而剩低交比我嘅就只係一手一手咁收佢返黎。就係咁樣，一條磅頭細鱗就出現喺大家面前了。

有魚梗伙繼續係度掃，轉頭就到朗爸上條石狗了。跟住返寨再釣，無耐我又感覺到魚訊，等到魚絲往下一沉，我一逗、中魚，然後又係一輪掙扎，我就叫朗仔話撈箕，然後朗仔就話細鱗姐，唔駛心急啦，我話撈啦撈啦，唔撈唔的佢上來架，跟手朗仔就斯斯然走去拎撈箕，然後到條魚上到水面時，佢就講話條魚咁細條，自己的上黎啦，於是一頭接近斤頭的細鱗就比我彈左上艇了。朗爸見到都講笑話啲魚喺入面排口時都唔理我，但係而家出返來就彷彿都識路嚟哂探老朋友了。咁又真喎，釣左大半日都係得果三口魚，出返來個零鐘我反而執左5口魚，而佢地其他人夾埋反而都無5口魚，真係算係「可憐下我」、比個機會我找尋返釣魚嘅感覺。釣多陣，流水就有但係又無乜食餌，我地就再車前啲去牛廣位睇下會唔會搏到一口半口刺激的食餌，不過之後都係得朗仔釣到一口巨狗同埋我再執多一條石狗，然後就有無口。

既然無乜口，朗仔可能已經連釣左兩日釣到飽哂，再加上今日不時就落驟雨，搞到戰意都唔係好旺盛，於是佢就提議話反正無口，不如早點收工埋岸，反正都叫搵到火點釣下、而且魚獲又過左十斤唔駛切，都叫交到差呢。而華仔則話釣咁多次算係第一次未夠5點鐘就提早收工走人，不過今日有條大老青，真係咩差都夠哂交，唔旨在釣多果一口半口魚仔啦。

就係咁樣，我地今日嘅尋覓火點之旅就完結了，除左搵到目標魚火點外，今日最驚喜當然就是條青斑啦，要知道同朗仔釣左咁多次維港，斑科魚已經少釣到，青斑更是第一次呢，因為我地多數都係用蝦仔釣，所以愛食大餌嘅石斑魚真係會比較少碰到。而今日比我地釣到仲要有成差唔多三斤野，雖未至於不可思議，但都叫係喜出望外啦。而就喺我地撈魚影魚獲照同埋補返同條青斑打卡時，我同華仔已經計劃緊下次出維港會買返一斤大蝦落艇，釣下蝦仔時亦都勾下頭蝦，睇下會唔會又再比我地遇到多一口開心大青斑啦。

尋點覓埋青斑鱗
早晨呀

華仔的青斑

#青斑