霧鎖維港齊爆狗

日期: 03/19/2016
農曆: 二月十一
地點: 維港鯉魚門一帶
艇家: B記
釣友: 鯊魚、大表妹、細表妹、饞嘴力高、YY
天氣: 全日大霧，相對濕度達百份百、能見度<200米東南風 3級
水流: 慢速流、水質良好
釣穫: 爆狗全日埋單 12、3斤

是咁的，其實上次玩完老表歡聚樂悠遊 https://yy08.pixnet.net/blog/post/106144873 之後呀大、細表妹話要搞返個老表歡聚維港續集就講左都好一陣子啦，不過由於今年香港的冬天天氣持續寒冷，所以一直我地都係只能夠保持觀望、得個講字。而本來黎到三月大家又係百忙之中揀左上一個星期的3月12日的，不惜最後又突然出現了一個冷峰變成寒流襲港，咁大家出去玩都係求舒舒服服地開心享受釣魚樂嘛，於是唯有再度改期，呀，難得見到之後個星期6竟然暖暖地又唔落魚，於是再度呼召眾人；不過由於臨時改動，所以今次就唔再係原班人馬，但卻造就左有新血加入，為以後我地嘅釣魚活動加添活力！

出發前都一直流意住天氣，好好彩咁樣到最後都只係話大風少少同埋會有霧，但溫度就由之前星期得果13、4度回升到有20度以上，所以已經非常感恩。而作為活動搞手的我，今次要預備的東西可謂更多，因為今次的團友基本上平時都係唔算點樣釣魚，而且亦都無私伙架餐，所以落實左真係會成團之後我就去漁具店張羅釣具。然後今次講明係輕鬆閒釣，所以除左釣魚，梗係仲要準備飲飲食食啦。不過呢樣野就要大家負責啦，事關一來我已經要買魚餌、仲要帶哂咁多人份的魚具已經好多野拎，所以最後我只係負責三文治。而其他嘅零食呀、糖呀、生果呀、飲料呀，則由我可愛的團友們負責。而鯊魚大哥本來話仲想帶埋紅酒同雪茄上船嘆，不過由於佢臨出發前一兩天有點唔太舒服，想食清淡一點，所以最後就打消左呢個念頭了。

出發日子終於黎到，朝早起身一如天文台所預測一樣，大霧非常，但好彩真係唔凍，我薄薄地就咁著件風褸就已經夠哂；而且偶爾仲有一點點陽光添，相對於之前一直又寒冷又有雨粉的天氣，我覺得上天已經待我地不薄了。今次大細表妹非常準時，所以我地亦都好快就過到三家村對出海面等待仲係七仔食緊早餐的鯊魚哥哥喇。不過其實佢好快就落到碼頭，因為佢係踩單車黎！而當B記車到隻艇埋碼頭見到鯊魚要拎埋架單車上艇時都覺得非常驚訝，不過為左節省地方同埋等架車唔容易東倒西歪，所以上艇後鯊魚就把單車前輪拆下，就如同平時我們帶單車坐港鐵一樣。不過咁樣已經夠哂新奇，B記也話佢車左客咁多年都未見過有客人會帶埋單車上艇呢，哈哈。

不過新奇嘅事都唔係得咁少，不過講返一上艇B記見到今日個陣容就同我講話「阿Y，你今呢個陣容會唔會弱左一點呀」，我就話無咩所謂啦，其實同阿備仔佢地出去都係咁上下咋嘛，跟住佢話咁起碼阿備阿賢仔佢地識得自己綁架生，唔駛每次都要你幫手綁嘛，如果係咁樣，你咪好忙唔得閒釣? 事後證明唔單止綁勾架，仲係要一齊勾石、一齊要我幫佢地扯斷、再綁勾，甚至係魚絲糾纏，無一不是都要我出動，所以我肯定係繼B記之後全日最忙果個。點解話B記好忙? 因為能見度咁低，其實開艇真係好需要提高注意力、極度集中，以致耳聽八方，眼自四方，所以係好傷神，而B記仲要一路開住艇一路釣，所以佢又點會唔係好忙碌呢全日都。而最優閒果個，咪就係讓佢好新奇的鯊魚哥囉。事關我地一到釣點當B記話可以落艇時，正常人都係會拎架生去釣魚，但係鯊魚哥就係等我地其他釣友坐哂出去出面釣魚之後佢就立即獨佔艇內橫櫈，然後立即就躺下並休息起來！真係看到B記傻眼了。因為佢比之前鬼仔釣到一半要訓返個晏晝覺更來得不進取同殆惰。

講返我地釣魚情況啦都係。咁樣由於今日實在太大霧啦，基本上能見度係好差，所以對航行船隻其實或多或少都有潛在危險，再加上其實吹東風就點都唔會話好溫和，所以最後B記都決定留守維港，不過就車到出去鯉魚門對開海面一帶搵下狗狗同埋睇下撞唔撞到之前一日佢釣到的那些沙立。不過咁大霧，始終都唔係好敢車到航道正中心作釣，但係釣狗狗又唔係真係要求咁大啦，所以從三家村車出黎都唔駛10分鐘，就已經到達我地是日第一個釣點了，跟住B記一話可以開始，我就即刻幫眾人綁架生了。不過佢地可能覺得一馬當先有點尷尬，所以你又等下我，我又等下你，咁卒之都等我綁好哂先至開工。咁樣佢地就錯失左食頭糊嘅機會了，事關我係用竿的，論方便程度同速度都係比佢地用手繩快，所以好快我就先拔頭籌了，當然就係今日嘅目標魚狗狗啦。不過好快就又見到稍為有經驗的大表妹都有動作、開齋了。咁鯊魚就訓左覺，我見大家無咩問題我就繼續釣，好快又上多幾條狗狗啦，而嚷著今次要比上次叻、目標係從要釣一條魚提升到話要釣一條大條一點的魚嘅細表妹未幾亦都宣告開齋了，雖然仍然唔太掌握到魚訊要抽魚的時機、以及試底、有無中魚等等，但係點樣講都叫做係開左齋呢。講咁耐都唔見B記話有魚掟出黎，其實唔係囉，只不過佢見我地出面成班人坐左係度佢廢事每次有魚都掟出黎，所以佢中左魚其實都係先把牠們放到小水兜入面養住再等儲到有一小堆才拿出來倒進生倉的。至於坐我對面嘅力高，可能比細表妹更加缺乏經驗，所以一開始基本我係由頭講解一次最基本的技術和動作比佢聽，但係釣魚呢家野始終真係要靠自己慢慢練習同掌握，所以初頭可以見到佢不時一臉迷惑、一時又帶點沮喪，因為佢不時見到身邊的團友(當然除左訓緊覺的鯊魚哥哥)輪流起魚，尤其是用竿的我，更加是密密手、密密有，但係自己就因為仲有點生疏同埋未知道抽魚及中魚的感覺是怎樣而屢誤戎機，但係釣魚都係果句啦，好波不如好運，尤其石狗有唔太難釣，所以終於係唔知過左幾耐之後力高妹妹終於係唔知中左魚嘅情況之下釣上左去是日嘅第一條石狗公了。但係可能由於係自動上釣、無乜成功感嘅關係，所以她只是鬆了一口氣的表示終於都開齋了，但就沒半點雀躍之情。反而食野就立即可以牽動佢神經，不過這是後話。

其實釣狗狗的時間真係過得特別快，因為都可算是不斷有魚訊，枕住有魚起；加上水又深，一上一落仲要抽魚、解魚，所以都真係好充實；而我就當然更加忙啦，佢地幾個有時中完魚我又會幫佢地解，而最忙都係架艇一車到那些高低起伏一點的釣點之後佢地就會齊齊勾石，然後我又要續一幫佢地扯斷魚絲，然後仲要幫佢地穿鉛綁勾，所以我真係忙到不可開交，有時甚至乎等佢地都開始釣左一陣我睇見無問題我先再歸位作釣。但係睇到佢地又有魚釣，又有野食又真係幾開心；因為釣狗，所以心情輕鬆，本住全日悠閒嘅態度，我地準備左好多不同零食，所以大家開完齋無耐我地就已經開始「野餐」起來，然後又釣釣、又食食，根本就無所謂的食晏時間！因為全日都在食、食、同食！尤其係果位饞嘴鬼力高小妹，真係令人大開眼界，如果佢釣魚嘅能力有佢為食的能力值嘅十分之一我諗佢都應該會係今日最為爆釣的那一位了，哈哈。
而我地隻艇就周遊於鯉魚門兩岸之間，同埋三家村、大都會遊輪一帶；有時看似車艇車左幾遠咁，但係等霧散之後又見到原來根本又是在維港口一帶周圍作釣。至於霧況基本上就無咩改變，釣足全日都係咁大霧。反而係鯊魚哥，訓到中午過後終於肯起來釣魚；但係佢見到人人用手繩，而我就拎住支竿咁爽歪歪咁快上快落中魚，於是就聲都唔聲就將魚竿從我手中搶來開始作釣，而我只好拿出原本買給他的新魚絲上碌再作釣。

不過很搞笑，有時明明魚訊比較疏落，但係只要鯊魚哥一認真釣魚起來，我們其他人都能夠有魚中，當然除了他以外啦。又或者其他人中的石狗都屬良型狗狗，但偏偏佢釣上黎的果條就係放生大小。所以我地幾個都好開心佢肯比心機拎住支魚竿釣魚，因為咁樣代表我地有機會中好野。

果然，大約兩點鐘島嘅時候，鯊魚哥食完三文治又如舊拎起支竿係島釣啦，咁呢個時候坐係艇入面嘅大表妹就同坐出面嘅細表妹一齊有所反應起來喎；原來呢，阿細表妹就好似勾左石，另外呀大表妹就中魚，之但係佢地兩條絲就疊埋糾纏左在一起喎，而又因為條魚會走水會掙扎喎，咁所以佢地就緊張起黎；於是我就走過去阿大表妹度問佢駛唔駛幫手啦，但係佢就好似上次新手帶挈爆波叔魚場中大星鱸咁樣，話係中左魚不過佢自己已經可以駕馭到，唔駛我幫手，佢話要盡情享受中魚的感覺喎；咁我見條魚絲又唔係走得好利害，要麼就是花惑、要麼就是磅頭以下的沙立，所以我都只係走返出生倉度拎左那個平時撈魚穫的那個小撈簊而唔係一般中魚用的那個插在艇天花的那個撈簊，守候在阿大表妹旁邊；而好快就見到魚影了，黃黃地身，表妹話似係立魚喎，但係我係後面睇就見到係雞魚呢，於是叫佢將條魚慢慢收埋黎然後我就輕輕一兜就將魚撈上來了。雖然只係磅頭小雞雞，但我就同佢講話對於全日都只係釣到狗狗的情況下呢條魚足以成為今日的大魚獎了。咁由於上左條魚上黎時其實大表妹的魚絲仲係同細表妹果副繩係糾纏住的，所以我解左條雞魚出黎之後就索性剪左大表妹副繩，準備幫細表妹扯完魚絲之後再幫佢地一次過綁返哂。咁好啦，搞掂左阿大表妹果面就出返外面諗住幫阿細表妹扯繩啦，一接左副繩過黎準備扯繩啦，點知扯落去係收得到架喎，收多兩收直頭感覺到有反應喎，仲會走水，咁我即時由扯繩模式變左做收魚模式，一手一手慢慢咁收，不過條魚可能係下面已經中左好鬼耐、掙扎左一排都甩唔到而無乜力，所以佢都只係爆左我兩手之後就已經投哂降、毫無反擊能力了。咁一路收我一路已經叫住話撈簊，但係好似無乜人聽得明我講乜，跟手我見就黎收到條魚上黎就急住咁大叫話「撈簊呀，插左係艇蓬頂上面個大撈簊呀」，但係我親愛嘅團友們可謂真係毫無經驗同埋毫無心理準備，所以呀大表妹見抽左幾下都抽唔到個大撈簊出黎時，竟然就在地上拿起剛剛我幫佢撈小雞雞的那個生倉撈簊比我！真係睇到我眼突，眼見魚都收到見哂魚影，我唯有盡量控住條魚然後話「唔係呢個撈簊呀姐姐，呢個太細啦！」，好彩突然之間B記從後連同大撈簊一併殺出，並二話不說、快、狠、準的一擊將魚迎頭撈上！其實係水入面已經有好多時間比我睇到條魚係石玤了，而且仲差唔多有成兩斤添！真係唔明點解阿細表妹會話係勾石或者勾左垃圾或斷麻繩，可能佢一來估唔到自己會中到咁大條魚，二來咁岩佢同大表妹疊左絲而大表妹又真係收緊魚所以佢唔會意自己係中左魚，三來之前我地不時釣到一些垃圾都係幾重但又拉到上黎，所以佢又以為係廢物咁。所以其實岩岩的情況就係佢地兩個同時中魚，然後上面兩位的魚絲就糾纏在一起，而大表妹感覺到激烈的掙扎係細表妹果條大石玤再加佢條雞雞的力，而細表妹則當然就算以為自己中魚但見大表妹中左魚所以變相就以為自己唔係中魚而係中垃圾喇！大家見到大魚即時歡呼同埋大叫細表妹有食神，而我同B記講話更加睇得出今日細表妹注定有運行係因為一來條魚中到入哂扣所以在水底下面虛左咁耐繩(即係等大表妹收完魚我再幫佢剪哂魚絲)都走唔甩；二來就係喺條魚入哂扣嘅情況下以條魚咁鋒利的牙齒都竟然可以無界斷到條魚絲而輕鬆將佢收服黎睇，今日注定晨早落艇就話今日要釣一條大一點嘅魚嘅細表妹有運行兼贏哂！而好明顯佢果個「希望大一點」唔止係大一點點啦，而係真係名正言順中返條「撈簊魚」了！而剛剛三分鐘前果條本應係今日大魚獎的雞雞即時要讓位比大石玤！而細表妹表示其實佢希望中嘅「大一點」都只係諗住係大約阿大表妹果條磅頭雞雞，點知食神一埋黎就送條差唔多成兩斤嘅大石玤比佢，真係可謂超級大贈送呢！至於鯊魚哥哥見狀又即時黑色自嘲咁話佢又成功造就左身邊的人中魚了，而且今次仲係中大魚添。所以我地幾個即時叫佢唔好停唔好去訓覺，要一直繼續釣魚，因為咁樣先可以令大家保持住強烈的中魚希望，哈哈。

大家就係一路抱住會再中大魚的希望咁樣釣落去，而好快地首先就見到B記掟左條巨狗出黎，嘩，目測超過25厘米，絕對有4兩以上，真係算係近一年釣行暫時見過最大的狗狗了。而過不了一會，又係食神眷顧嘅細表妹中魚呀，不過呢次就重質不重量咁中返條石釘仔，雖比巨狗略小和瘦身一點，不過已經夠佢再度興奮起來了；而大表妹又竟然記得上次我跟她說這魚比較好吃，所以嚷著又要中返條石釘咁喎。至於鯊魚哥哥，則在人地中雞魚呀、石玤呀、大狗呀、釘釘時，繼續釣到石狗公咁囉，咁起碼都係中魚丫嘛，已經好好架啦。(笑)

不過送完條釘釘比我地艇之後食神就好似離開左我地喇，事關之後我地就真係再搵唔到狗狗以外嘅魚了。但係在全日都幾密手嘅情況之下除左訓左半晝的鯊魚哥哥之外其餘所有人都能夠有雙位數以上的進帳！就算連超新手的力高小妹都一樣達標，因為佢其實不斷邊釣邊進步、慢慢地對釣技有了較多的了解。咁連新手都有運行，咁有食神眷顧嘅細表妹同埋都算係半老手兼且最勤奮又專注的大表妹就梗係更加無問題啦。

而大家維持住呢個一路食野一路嘻哈吹水一路釣魚的狀態又真係夠哂爽歪歪，尤其果位為食鬼呢，更加係除左無時停咁進食之外仲可以兩手都拿著食物咁左邊一口水果、右邊又一口麵包，真係好佩服佢嘅食量同埋食極都唔肥兼算得上苗條的身型呢。咁當然睇見佢又食又玩咁開心我都好開心啦。畢竟上艇黎玩最緊要就係要開心。而歡樂嘅時光往往係過得特別快，所以好快咁樣我地又黎到收工嘅時間了。撈魚的時候我地忽發奇想咁決定數一數今日總共釣到幾條魚，結果足足有超過一百五十條！不過對於有一些比較細條而又仍然生猛和良好狀態的我們就把牠們放生了，始終保育其實是每個有品釣魚人都應該做的本份。而大家都非常滿意今日嘅釣行，首先天氣又算係唔錯，雖然濕度很高但總算是舒服和暖，其次大家又食又玩足成日，絕對係同時間好好享受左釣魚同埋野餐的樂趣。而細表妹更加係超出左目標預期地收納左佢第一條艇釣撈簊魚呢；至於我，雖然全日都很忙碌地照顧全部團友的釣魚狀況，有時甚至忙到要暫停自己釣魚好一陣子咁逐一幫佢地解決麻煩，但係能夠看到大家都釣得開開心心又滿足，獨樂樂不如眾樂樂，絕對覺得係值得同埋心滿意足呢！！希望好快又可以有機會再釣過，如果唔係就下年見喇各位團友！