YY08的部落格

是咁的，今次釣行念頭源自之前兩次釣魚活動，(一)新手帶挈爆波叔 https://yy08.pixnet.net/blog/post/106144657： 因為首帶同大細表妹去完波叔魚場之後覺得好玩可以再去釣魚，然後亦想挑戰艇釣；(二) 紅雨不減親子樂 https://yy08.pixnet.net/blog/post/106144726：卻因為臨時有事和第體不適原故她倆並未一同參加是次艇釣；所以今次嘅釣行可謂是對上兩個釣行嘅延續篇呢！

講返天氣，上次就紅雨，今次出發之前睇千人台預告都話係會有局部地區性驟雨同雷暴，所以大表妹就笑我話我招惹風雨，唉，雨就有招到，魚，今年我都仲未招到條夠看頭的，真的要發奮呢，所以星期5出發前打比B記問下佢釣況以方便預算魚餌時聽到佢當日釣到成4條沙立一條細鱗全日廿斤野有多時真係精神為之一震、一心想著星期6要強勢破龜呢。

咁好啦，今次釣行出發前阿細表妹就表明前一晚佢要通宵行夜山完再立即趕來釣魚，所以我們將集合時間改為9點。不過細表妹在努力盡趕的情況之下還是免不了要讓我們先在西灣河斷駁出面釣住等她；不過由於流水太急，所以都無咩釣到，因為都好難釣。

好了，終於也和她們集合了，於是直奔前一天B記大爆釣的釣點 - 白石對開外一帶。講開又講，之前經過白石角咁多次，都無人提問為何白石角是白色的，而且油漆還要是人工畫上去的；好吧，既然今天表妹們問了，就順便在此解答吧，原因就是因為以前科技無咁先進唔似而家大部份船隻都有雷達、電子海圖等電子航行儀器，咁當晚上船隻駛過白石附近時就可看到反光而知道該處是白石角，一來有定位作用、二來更是安全地指示船隻那邊是陸地而不要駛近。所以白石角可以說是用人手油白漆上去以作安全標示的指示標一樣呢。而再講開又講丫，在碼頭到達釣點之前的這段時間，可以說係給細表妹短暫充電補眠的救命時段呢。

好啦，終於可以作釣啦，不過開齋嘅都唔係我地前面幾個，因為B記其實在西灣河斷駁果陣已經釣左第一條亦係果邊唯一的一條魚，不過只是要計白石這邊的話，其實還是靠她。事關我仲要幫我的兩位好表妹和表哥搞釣組的時候佢已經落繩作釣並好快就起左魚了，亦都預示左今日其實係佢嘅天下。咁但係佢開完齋之後我地左邊的三位釣友都相繼發市，只剩下右邊的朱爸爸和細表妹還在努力找尋佢地嘅開齋魚。未幾朱爸爸也加入到我們已發市釣友揮手區了，我就開玩笑的咁同阿細表妹講話：「喂，如果你今日釣唔到魚呢，咁你今日就係算係黎遊船河架，但如果釣到一條魚咁你都叫做算係黎左釣魚架啦。」跟住佢就話佢以佢今日咁嘅狀態，佢嘅目標都係好似上次去波叔咁樣 - 釣到一條就達標了。跟住於是就敷生左我今日嘅金句 - 「提升念力、意志，増長釣運」咁樣不停呼籲各隊友。不過好明顯幸運之神係繼續落左喺我老表小朱身上，佢上魚嘅數目除B記外，全日皆領先作為「魚仔殺手」的我和其他一眾隊友，認真估佢唔到。

今日水流算做頗急，平時釣開嘅3號波子鉛都唔係好夠重，要再加多粒小鉛，所以唔算好釣。而呢個都唔係問題，魚唔多開口先係問題，釣到12點，個倉都係得大約兩斤野，同上次我地已經成5, 6 斤野真係無得比，不過當然又要公平些講我地比上次遲左差唔多成個半鐘先開始作釣又係真嘅。之但係魚唔多開口就係真嘅，而且石狗公比上次那些巨狗都細小很多，所以可能咁樣影響左市況。不過今日嘅魚種又同上次有些許分別，除左石狗呢種例牌魚，今次主要出現嘅係瓜衫同石釘，仲有幾條狗棍同沙立，而上次釣到我手軟嘅池魚則幾乎絕跡，只在最後階段才執返幾條，我早上用左毛勾仕掛試左幾個釣點卻一條都無食埋黎呢；淨係咁樣，都已經唔見左成5斤幾魚穫呢！

咁講返釣況，開完齋之後都幾靜，而且仲周不時釣到下綱的魚線，再加上水深有成百尺，搞到我無哂心機索性轉用魚竿作釣，咁就一定唔及我平時用手繩的收穫了。而係我地釣時，旁邊就駛隻艇埋黎收綱，眼目都比佢收成幾條斤裝沙立，再加上我地不時中伏勾綱斷線，所以都搞到B記躁躁地底。於是唯有駛過少少離開下綱範圍，呀不過咁樣又比我地執返幾條瓜衫喎，而小朱仲連續幾左幾條石釘添，令我即時幫佢改左個「幸運男孩」以外的稱號 - 「釘釘寶貝」。而朱爸爸亦唔執輸又釣返幾條魚，仲要整條得一條嘅雞旦惑。至於大細表妹，阿大表妹仍然維持住中魚數係「一」，而細表妹的念力仲未開得夠勁，所以仲依舊為打開中魚之門而苦苦掙扎中。

不過釣況雖然麻麻，水流亦頗急而比較難作釣，但對於天氣方面，今日真係無得挑剔，雨水就無一滴，無陽光曬、陰天之餘仲有風，真係極為舒服。釣魚遇著這種天氣就最好了，不過愈舒服釣況通常就愈瀨野，哈哈。但係有得舒舒服服咁釣，的確又係幾悠閒忘憂嘅。魚唔開口咪我開口囉，咁咪食下三文治呀，水果呀，同埋零食囉，都咪話唔爽。我有我食，細表妹就繼續努力，而努力又真係有回報嘅，點半過左無耐終於見到佢有收繩動作，而且明顯係有魚嘅，上到黎又真係中條石釘終於開齋，不過條魚係比佢勾住個腮咁樣上左黎，真係行過都無辜中伏；之不過唔好理係點釣上黎，起碼都叫做開左齋，而細表妹即時生龍活現咁同我講話佢係黎釣魚而唔係遊船河的呢，哈哈，我唯有同佢講話既然係咁，就證明比我睇係釣魚而唔係勾魚啦。咁轉頭隔左唔係好耐佢終於迎黎正掛的第一條魚，而中魚總數仲超越左大表妹呢，是為「二比一」。無錯，大表妹朝早開完齋之後就一直都無再有進帳，原來唔係「等埋發叔」而係等埋表妹呢！之後佢地兩個都終於又再中魚了，直到打成4比4平手之後又轉趨平靜了。

就係咁樣大家偶爾執下一條，又執下一條，平平靜靜釣到下午茶時分，大家食埋個下午茶之後我見個釣況都仲更加水靜河飛，於是終於少有地主動開口同阿B記講話不如唔好再係度搏，改為開去永遠都令人有無限幻想、有無限可能的白石角果邊試下啦，真係就係咁嘅嘗試，又改變左今日嘅戰果了。車到去望下個鐘，都成4點鐘了，於是趕緊下餌作釣，都唔夠半鐘我就已經有魚訊，跟手一抽中魚上水，沙鑽一條，朱爸爸見到即時精神抖擻咁話「沙鑽，正呀，好食！」，跟住小朱又中返條石狗，而B記又飛條紅衫出黎，阿細表妹則中條池魚，在中魚數上終於成功反超細表妹了。我見有池魚，即時轉用毛勾仕掛試下，玩左幾分鐘又真係比我一抽連中三條，即時心諗池魚終於返黎啦。朱爸爸見狀亦都話好啦，可以有池魚玩啦，我就同佢講話等我試多幾分鐘，如果再連中就即刻幫佢換特地為今次可能會好似上次咁爆釣池魚而準備好幾套嘅仕掛，可惜結果就真係得果三條。但係正當眾人都將集中力放左係艇頭同埋各自努力搵魚釣之時，坐後面、今日枕住都有魚起嘅B記忽然唔聲唔聲咁掟左條沙立出黎，仲要係斤頭！真係睇到我地即時情緒高漲，我仲即時大叫佢嘅稱號「爆釣天使」！！呢個情況簡直就係全日嘅高潮位，咁我見有立搏梗係即刻唔用池魚仕掛改而用生蝦釣手繩啦，仲要揀D最大隻嘅沙蝦添，不過今日真係唔係我嘅日子，所以釣到完場都係中唔到沙立，而B記都係只有再執多一兩條手掌大的，斤裝以上嘅佢就話感覺到有好幾次只係游埋去碰下佢的沙蝦然後就走頭了，所以最後我地都真係只係得一條斤頭魚收；但係咁樣其實已經算係喜出望外了，因為本身由轉位果陣、甚至乎更早的時候，都係諗住無料到、平平淡淡今日咁就一天，而家結尾時段可以有個小高潮作結，仲唔係叫賺左？！

就係咁樣，今日嘅釣行就係我同小朱磨爛蓆之下中多一條池魚之下結束。總觀今日，魚訊和魚穫雖然唔夠上次，可能只得一半，而我中魚數更加只係上次嘅大約四份之一；但係是日天公造美，全日都舒舒服服咁樣比我地玩左一日，忙裡偷閒放鬆放鬆，真係已經好感恩了。而且人人都叫中到魚，細表妹亦唔駛只達最低要求中一條嘅目標而係都中到幾條魚，大表妹更加中條牙帶有返些許手感添，已經乎合佢地嘅期望了。當然，作為搞手嘅我就梗係希望滿足到眾人要求之外仲可以帶給大家更多歡樂同驚喜咁，不過今日亦已經收貨了，希望下次大家可以喺有足夠精神力同念力之下再次一齊出黎挑戰中更多和更大的魚啦。

 
終於等到了

睡褲黨孖寶兄弟一齊中魚

打鐵立

 
我唔係黎遊船河架

牙帶好食又好玩

撈魚


 　
有人話下次除左牙帶仲要釣沙立、細鱗


又有人話下次儲夠戰鬥力同念力再黎挑戰表姐

 

睡褲黨孖寶兄弟曬冷

　
朱爸爸都讚好

 
分魚

 　　
是日鴻福晚餐


　
全魚宴！ (注. 魚湯無得輸！！)

 
細表妹食完條手掌沙立先記得影條爪衫