初探櫃底撞爆石

日期: 12/27/2020
農曆: 十一月十三
地點: 櫃底
艇家: 阿鴻自駕
釣友: 阿鴻、阿勝、YY
天氣: 天晴、東風三級
水流: 慢流、水質尚可
釣穫: 龍占x1 (四斤半x 1)、青鱸x 3(斤半x 3)、紅鮪(斤半x 1 )、芝麻斑(斤裝x 1 )、火點(磅頭x 1 )、沙巴躉、黑沙各一埋單13斤

是咁的，真係好耐無釣魚了，尤其疫情關係，令到好多人都情願減少外出留在家中。不過慶幸今年認識了一班新朋友，所以如果想釣魚真係比以往容易成行得多。其中有一兩個特別啱傾，而且佢亦都十分爛釣，基本上叫得都成行，再唔係的話佢亦會主動叫人一齊玩，所以真係已經為今次出發埋下引子了。其實上次恆濤二對二決戰青龍頭 https://yy08.pixnet.net/blog/post/106451245 之後，阿鴻同我傾開就話佢不時都會自駕入櫃底玩，問我有無興趣，我就話我未去過呀，所以都想去下呢個聽聞不時有怪獸、又幾好魚嘅夢幻釣場。咁佢話有機會夾啱時間就帶我入櫃底玩，仲話佢都係呢頭釣到都幾熟，所以都算知道那些位置會較聚魚，而佢亦不時帶同群組入面的朋友仔入去一齊玩，而放出來的魚獲照都總是幾吸引，尤其進入十二月之後佢更加話呢排食餌多左，搞到我都心郁郁。更加有趣的是，佢總係成日都會斷魚的，次次入完去釣魚總係會在群組裡面講話又斷幾多口，其他人我就唔係點信，但係佢的話我又真係信喎，因為佢仲會拍埋視頻，無得厄人，哈哈。就係最近幾次佢都話斷得唔少，令到我更加心動，再加上知道聖誕節假期比較得閒，於是月中已經同佢講話同佢講左咁耐終於可以成行。由於釣點係櫃底，作釣的地方是有高度限制的，所以進入釣點是絕對需要睇潮水漲退的時間和幅度，因此作釣的日子係要因應這些條件而定的。縱觀幾日聖誕假期，再加上天氣預測，星期天是最和暖和微風的，於是二話不說就把日子定了。

出發當日未出發就已經發生左段小插曲了。話說小弟太耐無釣魚啦，雖然心理準備係接受左隨時可能打龜，但係潛意識可能仍然係對咁耐無釣魚終於可以釣魚喇嘅果種期待充滿興奮，所以出發前一晚又再次失眠、夜夜都訓唔著，結果成4點幾5點先至訓得著；但係7點半要起身嘅我，雖然已經較了兩個鬧鐘，但係可能真係太過眼訓，竟然完全無意識個鬧鐘曾經響過，相信極有可能係比我迷糊之中撳熄了個鬧鐘。就係咁樣直到8點零阿鴻打黎問我去到邊度之時我先起身趕出門口，終於搞到成9點零先去到青衣碼頭落艇，然後就打算直車釣點了。

不過車左幾分鐘，第二段小插曲就又來了。話說阿鴻就負責車艇啦，咁我同阿勝就係前面吹下水咁啦，跟住突然阿鴻就叫話前面水面好條魚浮左係水面附近，咁我就即刻遞個撈箕比阿勝，然後隻艇駛到埋條魚度一睇，原來係條沙巴躉仔，仲係無受傷無爛身幾精神的，只不過係游上黎曬下太陽；咁就啱哂啦，阿勝輕易的就將沙巴仔一撈入網，就係咁樣我地未開始釣就已經先有條沙巴仔壓倉了，睇黎今日真係可能有點運仔行咁喎…

魚就撈完，當然繼續直車櫃底。阿鴻話今日水大，入唔到八號果面釣，所以我地只好入去能容納我地嘅九號櫃底了。入到黎，更加唔受風浪影響，加上水又唔深，流水又唔大，所以我地都係用到好輕鉛就已經夠哂。由於今日一心諗住係入黎搏粗野搵魚斷，所以阿鴻都只係準備左大眼仔做餌，乜野沙蝦，青虫，蝦仁全部都無，所以我地三個都係勾頭蝦釣企頭。由於我係第一次黎，初時都以為阿鴻會揀支莊綁住繩就咁釣，不過原來佢就唔會綁死一個地點釣而係熄左車由得隻艇慢慢飄，再用手同埋勾棍不時隊住那些莊柱等隻艇唔好靠得太埋條柱咁樣釣。由於櫃底較唔受風浪影響，再加上是日唔係大生流，所以隻艇都飄得幾慢。

由於係勾頭蝦，所以都係得個等字，再加上阿鴻話頭一段釣點都比較滑底唔算多石同埋多斜莊係下面，所以我地每個人都開多支竿又或者綁多副手繩釣；於是三個人就總共釣六隻蝦，務求比下面嘅魚見到群蝦而埋黎開餐。阿鴻話呢度嘅魚通常就係要先搵到第一條，然後如果有食餌，就會定係果度附近再砌，通常仲會再多一兩口食餌的，所以大家都係靜心等待第一口食餌嘅來臨。釣下釣下，肚仔餓添，梗係啦，都未食早餐就仆出來，於是就放低支竿收起副繩，拎份早餐出黎邊食邊用眼神睇竿頭釣魚，雖然話係滑底，不過都會怕卡到個底，無論係勾石同埋甩蝦都無謂啦；所以學阿鴻話齋，到底再收起一米，情願釣得無咁貼底，都唔想老是勾石又話者中魚都好難拎。

食完早餐，隻手得閒返我就落返到手繩繼續釣。不過始終手繩我比較有信心，覺得更直感，力度又更強，所以我就釣得比較貼底，基本都係到底貼住釣，最多拉起一尺，順便當係同支竿釣嘅泳層唔一樣咁。雖然都會不時試底，不過就比波子壓底輕鬆得多，所以釣釣下我諗起食完早餐都未飲野唔怪得有點口渴，就摷支水出黎飲，單手繼續釣。飲飲下水，頂，勾石喎，心諗真係放係前面支竿釣高半淫就無事，我釣貼底就出事！點知我跟手一扯繩，就真係出事啦！因為呢個時候我已經知道唔係勾左石而係魚黎，佢比我咁樣扯一扯即時比反應，不過我唔理啦，恃住自己揸住副十號繩，梗係扯得就扯一手都唔放，但係我表面就好平靜咁樣收；不過始終用得大眼仔食埋黎都應該係過斤魚，所以阿鴻見我起手收魚都問我駛唔駛撈箕；咁我見點樣都係全日第一條魚，條魚計落都有兩斤走唔甩，就好平淡咁答佢話要呀，「撈箕、唔該」。收多兩收，條魚黎料，佢真係交足貨咁樣想反爆我，我見都應該已經將條魚抽離左水底，同埋應該佢都埋唔到附近嘅莊柱，所以我就一於就一就魚，唔同佢黎硬既，但係都係照樣全力揸實副繩同佢玩。就係咁樣來回又收又頂，我都差點唔記得左我隔離仲有支魚竿釣緊未收線，於是就單手遞起支竿比阿鴻叫佢幫我收左繩先費事魚絲同我呢面條魚糾纏，而我亦盡量將條魚控制將佢帶去另一邊游；阿鴻呢邊啱啱幫我收起支竿，大家就見到魚影喇，阿鴻好似仲興奮過我咁係咁係度叫，又問係乜野魚黎，我一開始見條魚個影咁長身就以為係百花鱸啦，但係睇真一點原來係連尖！跟手我就同隔離準備好撈魚嘅阿勝講話係連尖黎架，準備撈魚，然後就帶條魚過去比阿勝撈，不過個撈箕確實有點細，而且阿勝又事先將個撈箕放左入水，所以條魚見到個撈箕都調頭走仲跳哂水，好在又無比佢跳甩同埋比牙𠝹斷魚絲喎，最後都係比阿勝第二下補中撈到條魚，順利上水！上到黎睇一睇，嘩個魚頭真係好鬼大好鬼長，條魚食到正哂掛，我就咁用手解勾都解唔到要用小魚鉗幫手先至得，真係注定佢無運行。初初睇唔覺大條我估得三斤零，但係阿勝同阿鴻就話唔駛諗條魚四斤起跳，跟住影埋相放落生倉咁睇就真係愈睇愈覺得佢都幾大條，應該有四斤以上呢。最搞笑係事後睇返阿鴻拍嘅中魚片段，我中完魚上黎將條魚放左喺艇內之後第一時間係搵返個水樽蓋將剛才釣釣下魚飲緊水未趕得切關返樽蓋只好將支水放腳邊，而家中完魚第一時間就係關水樽蓋，呢個畫面真係幾有喜感呢，哈哈。

中完魚諗下可能就真係差左果一米所以條魚就揀食我到手繩唔食高左一米嘅魚竿；如果佢食埋黎我支竿度我諗我未必可以咁輕易起到佢上黎又或者甚至會斷魚都未定，不過唔駛諗咁多啦，既然佢揀得食我到手繩咁佢就真係注定無運行！上完魚跟住有咩做，梗係即刻繼續釣魚啦，尤其阿鴻話呢度係搵到第一條魚通常都會有多一兩口丫嘛。於是勾隻大眼仔就繼續作釣了；然後都換埋支竿隻大眼仔之後都繼續釣了。大家見到有魚仲要咁大餅都即時士氣大振。本來釣得都幾隨意、兩支竿都放在艇邊等食餌既阿勝都拎起一支竿認真起來。由於中左魚，所以我地就無好似之前咁等隻艇一路向前慢慢飄咁樣而係飄左幾野之後就著返部機車返前少少「返寨」再飄，希望係剛才中魚個位附近再搵多一口半口食餌。

飄多兩飄，可能都有比剛才中魚個位有溜前到嘅，不過呢個時候我又感覺到有魚食餌了，今次真係實實在在嘅食餌感覺呢。只感覺到係輕輕吸左一下之，我將隻蝦定住之後條魚就直接索餌了，跟手我一逗，再加一聲「中！」，然後實實在在感覺到中魚之後，嘗試收左一下繩之後，忽然全部輕哂，然後就沒有然後了。斷魚的竟然唔係阿鴻而係我！收返副繩上黎一睇，繩尾花哂，應該就唔係剛才中完魚之後無檢查過魚絲有批口就繼續釣魚之類嘅果種大意而係食完餌中魚之後純純粹粹的過．石．斷！既然過石斷，咁十號繩斷都可謂非戰之罪，咁梗係快快趣趣換條賴腳，綁過隻勾就繼續釣啦！難得真係短時間有連續有兩口食餌，應該真係除左位置啱，流水都啱時候啦吧。

之後我地都係有返一下寨又繼續向前溜既，阿鴻都有魚食餌但係就唔到釣，至於阿勝就未有動靜，佢隻蝦大大話話浸左成個鐘都無魚掂過，覺得唔老黎於是就換過條蝦繼續釣。不過運氣嘅野，話黎就黎；無錯，呢個時候又係我有食餌喎，今次都食得好清脆，直頭連試餌又或者吸餌都無，而係直接埋黎就索，真係唔駛比我考慮咁多，直接一抽就中魚，再頂一下已經感覺到條魚雖然有掙扎但最對同之前果兩口係唔同級數；不過阿鴻佢地可能見我條連尖中左都咁平靜所以都問我駛唔駛要撈箕，咁既然都係斤頭魚，唔好浪費啦，有勝於無，所以都叫阿勝準備一下。條魚就無乜交功課架啦，好快咁就上左黎，阿鴻係艇尾睇唔清楚問我係咪青鱸，我邊叫阿勝幫手撈魚之際邊答話唔係呀，係班黎，芝麻！咪就係因為見係芝麻斑所以我先叫撈箕囉，如果係青班、沙巴之類，得個斤頭魚我肯定就咁將條魚彈左上黎啦。嘩嘩嘩，中埋呢口我真係有點驚，真係乜野事咁誇張，一個鐘唔夠連食三口仲要都係食我，無食其他兩個人，係咪真係有運到咁樣，好似有點驚喎。不過唔理啦，釣得魚，唔通驚爆釣咩，驚都驚無魚食餌好過啦，係咪先。

喺我連中兩口之後，更加激發左阿鴻鬥志，佢更加勤力咁試底，同埋釣到都企起身黎釣，至於我就真係抖一抖先，因為佢見到我咁樣都同我講笑咁話喂阿丫你抖一抖先，再咁落去我地今日兩個唔駛釣。雖然佢係講笑，不過我都真係當係抖一抖先，一於放低手繩只放支竿係度釣，如果咁都係有魚食我餌唔食佢地咁就真係終於誇張了。不過有什麼比連中幾口更誇？不是再中多口，而係連釣都唔駛，撈魚都可以梅開二度！無錯，呢個時候阿鴻同阿勝都見到船頭又有條魚游下浮下咁，本身阿鴻諗住開艇過去撈，但係我發覺條魚係跟住水流咁向我地艇浮游緊過黎，於是就叫阿勝就咁係艇頭拎住撈箕準備，等條魚一到，又係輕鬆入網。今次條魚細返些少，係條磅頭黑沙，但點都好，都真係好誇張咁樣今日已經撈左兩條魚了！

撈魚始終都係外道，而且我地係黎釣魚，我地想要嘅係中魚既感覺，就算係斷魚都起碼叫做有得爽，魚獲只係其次，釣魚既快感才是我地的目的。所以撈魚過後，繼續專心釣魚。由於隻船一路都向前慢飄緊，咁我地終於溜到去一些海床比較鞋底多石既位置，咁我見我都已經三口食餌中左兩口，唔駛求魚，既然個底咁鞋，都係專心揸返一副繩就夠了。本身想收起副手繩釣竿的，但係諗下下面咁鞋而且都有高有低，都係釣返手繩穩陣少少，於是就把魚竿和魚餌拎返上黎，剩係釣手繩算了。繼續飄繼續釣，今次見到阿鴻支竿有魚食餌啦，不過係咁係度震都好似無乜邊下可以起手抽，但係等等下佢都係終於起手了，一逗一抽中魚，仲見支竿個孤度唔錯，佢頂左兩野就叫撈箕準備，咁我咪拎起撈箕化身小漁童囉；啱哂啦，中左幾口魚，係時候做返老本行幫人撈下魚啦。佢玩左幾下就話呢條魚應該都有成兩斤野，咁好？一於睇下你係乜先，見阿鴻又無乜特別需要就魚，不過都要控下魚咁，好快就見到魚影喇，不過條魚就肯定無兩斤啦，火點仔一條，快快趣趣幫佢撈左上黎一睇之下原來係勾中左條魚個身上黎，唔怪得比到錯覺阿鴻係大條魚啦，咁阻水。不過點都好，始終都係開齋魚丫，兩斤就無啦，磅頭倒是絕對夠哂斤兩呢，呵呵。

中完魚，有咩好做？咪就係繼續勾蝦釣魚囉。勤力既係阿鴻，我同阿勝倒是有點放鬆了起來；魚雖然要釣，不過都唔好虧待了自己嘛，所以我同阿勝就開餐食午飯了，阿鴻就繼續作戰狀態，雄心勃勃。而所謂天道酬勤，呢句說話真係都靠譜架，就係我倆係度食緊野吹水既時候，阿鴻又話有魚食餌，然後一抽又中魚了！跟手又係叫我拎撈箕，我就問佢開左佢掛係頸嘅攝錄機未，佢話開左啦，準備撈魚啦，咁作為專業小漁童既我梗係已經埋位準備好隨時兜魚啦，見佢玩左幾手條魚都跟住升水上好快就見魚影了。跟手佢帶條魚過我果面我輕輕一兜，一條斤半紅鮪就咁上左水喇。我就話嘩紅鮪喎，都有返少少重量丫，完全都未見佢有交貨就比你搞掂左既阿鴻，佢就話係喎佢一中就快快手將條魚收起，條魚都未開尾未爆就已經比佢帶到跟住上然後上到黎都無掙扎就比我地搞掂左，真係好鬼快手。望下個鐘，啱啱好一點，其實亦係我地今日釣行嘅半場劃分點。

睇下個生倉，都已經算係幾唔錯啦，有條連尖，有條紅鮪、有條芝麻、有條火點，仲有條沙巴仔同黑沙，真係半日黎講算係非常唔錯了。阿鴻見都有幾條魚壓倉，就話想去繼續開發下呢個每一條柱都可能係聚魚之點嘅夢幻釣場。咁我地就繞繩起行，一野就車到差唔多櫃底的另一端，睇下會唔會有魚搵到咁。不過呢面個底鞋就幾鞋，但係一路係度飄都係無魚食餌，係呢面飄左成個鐘都係無魚起過，所以我地又決定車去另一個位度睇下有無景況，於是又再繞繩起行車前多一兩百米再搵下魚，睇下有無牛廣仔執到。不過唔好話牛廣啦，乜魚都無食過餌，係度玩多半個鐘我地就決定繞繩返翻去最後起魚嘅位置果度開始往我地今日起點飄。今日一路阿鴻其實都話睇下會唔會搵到磯青鱸，事關佢地之前個星期一搵到就半個鐘唔夠連執幾口有得爽，所以佢今日都話想搵下佢地，但係到而家為止都未有，我就話可能已經走散左、又或者離開左呢度，甚至比人釣左唔少去。

由中紅鮪之後釣到成兩點半我地都係好平淡咁樣就度過左，大家都好似無發生過任何野咁，不過阿鴻其實都一直好勤力咁樣釣，絕對係釣魂在燃燒。而我同阿勝則非常淡然，基本上都有點恰眼訓嘅意味。終於等等下阿鴻忽然就話有魚食餌，似係青鱸、跟住忍手比條魚試餌，吸實在咬佢一抽，掂哂，中魚。收左兩手阿鴻都已經好肯定咁話係青鱸了，咁本身恰緊眼訓嘅我地梗係醒左，即時我就走去拎起個撈箕喺旁邊等做撈魚小漁童。玩多兩手條魚已經見影，果然係青鱸，不過又唔算細喎，兜左佢上黎之後目測都過斤半接近兩斤。見到有青鱸，大家都即刻醒哂，因為學阿鴻話齋通常都會一不離二咁樣有第二口，所以大家都即時打醒十二分精神，迎接食餌嘅時刻。不過上完呢條，係原地唔飄咁兜左兩個圈都無食餌喎，我地就諗堆魚會唔會有機會係跟水流又向左前流呢，於是我地都唔在原地守候，開始慢慢往前移。

由於阿鴻中左魚，燃起大家既鬥志，所以我地三個都企左起身釣魚；阿勝仲話，輸人都唔輸陣，一於大家鬥企起身釣，睇下條魚食邊個。點知跟住又係阿鴻有魚食餌啦喎，只見佢同我地講話喂睇下，有魚食緊餌呀睇唔睇到，我地望過去，見到佢個竿頭係咁震，噠噠、噠噠、咁樣食，跟住我話，嘩咁細口，好難到釣喎，你都係抽得到中左魚先叫我幫手撈魚啦，然後我就回頭繼續釣魚啦。跟手就聽到阿鴻起手抽魚然後叫話哎呀抽唔中添，正當大家以為條魚細條得滯所以抽唔中之際，跟住隔左唔夠十秒就聽到阿鴻話條魚仲係度，然後今次一食落黎就好清脆，直接一野就埋黎擔走隻蝦，阿鴻梗係唔放過佢啦，一抽即中，跟住已經見到支竿開始展現漂亮孤度，我問佢開左機拍片未佢話唔谚閒開唔切機呀，呢條唔野少呀，聽下個磅頂嘅聲音，較左九成緊都要出絲呀，跟手我見佢都只能夠就魚，我唯有提下佢盡量頂起條魚再追收落去，佢玩左幾手，條魚都係不停咁去，佢又可能有點驚鬥頂會斷所以唯有就一就魚，就係咁樣就左兩就，然後就再沒有然後了… 無錯，係我等左大半日嘅斷．魚！收返上黎睇隻勾都無左，魚絲有披口，應該都係過石斷。以我估計就係條魚本身抽起左離開水底架啦已經，但係因為阿鴻要就魚讓佢，所以比佢有機會爆返落去下面嘅石位定暗柱位𠝹斷左，如果佢唔怯的話，頭兩淫同條魚鬥爆我諗有機會拎到條魚，始終佢都揸住8號繩唔係幼繩。與其讓條魚比佢有機會落返水底過石斷不如實實在在同佢鬥砌，真係頂斷都叫做曾經對抗過丫嘛。就係咁樣，比我講笑講左大半日話要見證到斷魚的故事終於都上演了。哈哈哈。有怪獸斷，大家更加醒神，阿勝仲話大家都企係度，我仲要同阿鴻支竿個落點唔夠兩米，都係要食阿鴻，真係今日唔夠你黎啦。阿鴻就話無辦法啦，上星期可能阿勝你用筏仔五號絲起完條四斤幾紅魚之後用得幾盡你嘅運氣，所以今日注定要抖抖，讓比其他人中魚。

大家呢個時候都企哂係度釣魚，金睛火眼，因為估唔到好似魚仔食餌嘅模樣都可以食條怪獸級別埋黎。等等下，我就感覺到有魚食餌嘅，又係吸下吸下咁，即時揸實條魚絲帶起少少，佢再索落黎咁我就唔該一聲然後一逗一抽，搞掂，有得爽兩手，阿鴻估計都係青鱸黎，我就輕輕鬆鬆咁收，跟手見到魚影就叫阿勝幫手撈個魚咁，就係咁樣，大約斤半島嘅青鱸就咁上水了。望下個鐘，差5分鐘三點三，距離我上一口魚都差唔多有成四個鐘咁滯呢。不過成個下半場基本上都係較靜的，所以無辦法，最無奈嘅都係阿勝，長期兩支竿，但係都係無一口餌食過埋黎，所以佢都話今日唔係佢行運，在餘下所剩不多嘅生猛大眼仔的情況下都係留返生猛大蝦比我地主力攻勢就得，比些無咁生猛嘅佢用就可以了，真係灰左少少。釣魚嘅野真係無辦法，好多時都剩低一個半個，今日睇黎都有機會剩低佢；不過佢都好樂觀同正面，都話一日未完場一日都仲有希望，佢都望有口餌食下咬下佢嘅魚餌，因為釣左大半日佢嘅蝦都係由無咬口、純游水到「浸死」再換蝦咁樣係度循環。

飄多一陣，又係阿鴻有魚食餌，我地一路吹水之際佢示意一下個竿頭話有魚食餌跟住忍左兩下，帶一帶條絲、等條絲一緊佢就起手抽魚，然後佢話都係青鱸，咁又係我再一次做小漁童，等條魚一見光，輕鬆一兜，又一條斤半青鱸上水。睇下個生倉，都算非常滿意，再望一望個蝦箱，得返十隻蝦唔夠，生猛嘅一隻手數得哂。阿勝就話是但拎隻比佢得啦，好野留返比阿鴻同我；咁我就是但抽左隻無咁生猛、個殼仲有點軟身嘅比佢；不過如果有魚食埋黎，真係勾粒蝦仁佢都食埋黎喇。呢個世界就係咁樣嘅，當你無哂期望、磁場有點混亂嘅時候，命運之神就會找上你，只係視乎你有無好好準備同把握了。雖然阿勝係用隻好唔生猛嘅大眼仔，但係成日用足生猛大眼仔都無魚訊既佢竟然呢個時候有料到喎。只聽到佢咦咗一聲，然後佢即時拎起支竿帶緊少少條魚絲，竿頭震左兩震跟住就拉落去，阿勝等左全日嘅起手機會終於都到了！只見佢揸實支竿再緊緊一抽，支竿即時起左弧度，中魚！然後佢收左一下，跟住竟然全部野鬆哂，所有弧度無哂，即係條魚無左！發生乜事？唔通又係過石斷？收返條繩上黎，唔見魚絲有披口，亦都唔似係比魚嘅牙磨斷喎，睇多兩睇，似係隻勾綁得唔實就咁甩左。咩話，竟然有咁嘅事？其實真係有可能，事關剛才我同阿勝係一個位同時比條暗莊搞到勾左石，之後我綁勾時佢亦都係度綁，但係我就見到佢果個綁勾方法有點奇怪，不過當時我就無出聲，始終唔知係咪人地嘅綁勾方法黎，如果出聲又好似有點尷尬咁。估唔到竟然真係每個人最後嘅一隻蝦時就食埋黎阿勝度，但係佢就可能已經沉寂左全日所以磁場都已經亂亂地，所以搞到綁隻勾都綁唔穩。佢都話真係整定，全日勾左咁多次石次次都要死頂爛頂先可以整得斷，但係到最後一口係魚食埋黎就竟然出事一頂就鬆哂，真係注定佢今日只可以做漁童了。不過都可以當係交個學費嘅，就係每次綁完架餐最好都檢查一下實唔實淨先至勾餌作釣，如果唔係真係就好似阿勝今次咁浪費左全日唯一嘅一次機會了。

得返一隻蝦，我同阿勝都收工了，比阿鴻釣埋呢口餌，最後都係無料我地就收工了，今日用得哂所有蝦我諗同我地上晝開六支竿釣之餘再加上不時都卡地甩蝦有關，真正食餌或者有魚搞過下嘅數埋都係十零口，不過以自駕遊三個人入黎有咁嘅成績已經非常不錯了。個人覺得就比想像中好好多，我本身都抱住可能全日得一口甚至乎要打龜嘅心態而來，點知十點幾我就已經達標，仲要執多條芝麻班即時已經無哂壓力。連阿鴻都話今日算係近呢一兩個月以黎最爆釣嘅一次了，睇黎我嘅第一次櫃底探秘之行又幾旺場咁喎，畢竟淨係撈水面魚都撈左兩條呢！而唔計撈魚嘅果兩條我地都有七條魚攞到，全日就食十口、斷三、拎七，都算係唔錯了，稍為可惜嘅係本來阿勝唔係做今日爆釣行漏低左嘅果個，不過真係一時迷糊就咁失執左一個黃金機會，希望佢吸收到經驗，以後都會好好記住今日上嘅一課啦。最後我地撈埋魚打哂卡之後我地就埋街正式完結左是日釣行。總括黎講真係幾好玩，個釣場望落去已經係充滿無限可能嘅模樣，估唔到釣落去都真係執到幾條，算係好滿足了。集到新郵票大連尖之餘我亦累積左一些新的經驗，透過各人嘅斷魚背後嘅故事我都得出左一些小教訓，令到自己以後可以盡量減低犯錯機會，從而增進釣技。總的來說，今日真係好好玩，嘻嘻哈哈又一天之餘又有魚釣到幾條，令我2020今年最後一釣有個完美的結局。

第一口就中條過足手癮嘅大連尖，爽呀！