日期: 08/01/2023
農曆: 六月十五
地點: 櫃底
艇家: 自駕
釣友: 朗仔、妹豬、華仔、YY
天氣: 天晴驟雨、西風二、三級風
水流: 生流、水質不俗
釣穫: 牛屎鱲x1 (兩斤半x 1)、青斑x1(斤半x1)、 埋單4斤
是咁的，早在幾個月前朗仔仲喺外國未返嚟香港時講起約釣魚就已經講過話會同佢入下櫃底玩，事關佢好多地方都釣過但就一路都未入過呢個帶有神秘色彩嘅釣場；既然係咁，就梗係約定等佢返嚟之後搵個日子夾到潮水嘅就同埋華仔入去走返轉啦。咁終於等啲不穩天氣過左同埋潮水漲退許可既情況之後，終於我地就揀左八月的第一天出發。
咁話哂朗仔都算係小網紅，佢都有朋友仔有睇佢個釣魚頻道，亦覺得釣魚好似幾好玩有啲興趣想試下，咁反正輕輕鬆鬆入櫃底，一於就叫埋佢嚟感受下真正嘅釣魚體驗同網上睇到嘅係有咩分別、同埋感受一下果個氣氛咁。就係咁樣，四人小隊伍就成型了。
其實未出發我就已經同阿朗仔講左話今時今日嘅櫃底已經係今非昔比，同早兩三年我同華仔跟阿鴻入去嘅時候係差左好遠，所以真係隨時打龜，以佢釣開蝦仔次次都有十斤八斤魚仔釣到嘅情況係好唔同，真係要有啲心理準備。不過阿朗仔都唔係怕龜之人，佢亦都想試下一啲新嘅體驗，一來新釣場、二來佢都好少揸粗繩勾頭蝦，所以都當係感受一下喎。不過我都有講話，櫃底係一個好有趣嘅釣場，有種吸引力、分分鐘就會入坑。咁如果一個唔覺意中到派彩，咁就真係一試難忘啦，咁可能朗仔或者佢個朋友仔就會中毒入坑了。
由於潮水其實都唔係一朝早取艇就可以直入櫃底、而令我地要喺青衣多近一帶釣返一兩個鐘先入得，再加上有新手加入怕佢全日揸大餌會悶到直接對釣魚喪失興趣，所以我地都決定買返幾両沙蝦仔作釣。咁朗仔朝早喺寶盈買完蝦仔就過嚟荃灣同我會合揀大蝦。街市可能朝早未返齊貨，所以都唔係全部魚檔有蝦賣；我地之前講嘅花竹仔一檔都無，係得幾檔有啲激素基圍蝦同埋草蝦，睇完覺得草蝦會襟生啲於是執左斤半就出發往汀九取艇了。
攞完艇，就按我同朗仔計劃嘅路線出發，第一站就係青衣油庫一帶，呢度水唔深，又有啲石口位，要執番幾條石狗公應該唔難嘅；而對新手黎講就真係好壞參半嘅，好處就係石狗真係肯食餌就有得釣到，而壞處就係咁鞋底石口位對新手嚟講真係幾難掌握，分分鐘魚都未釣到幾耐就已經不停勾石而覺得沮喪了。不過新手妹豬算係咁，都唔係勾左好多次石，但據我觀察亦都可能係佢勾左幾次之後有啲驚，所以到底時就自然抽起幾尺，但係對於波子壓底釣法嚟講就可能威力大減。
果邊妹豬仲喺步步為營、學緊試底，呢邊朗仔就率先開齋一條小石狗。釣左陣，我都搵到條石狗開齋了。掃左陣都無咩料我地就轉位，本身我地有個排口想釣，但果度有船泊左係度，我地唯有再附近試下。喺我執多條石狗嘅情況之下，望下個天開始有舊烏雲係山邊果面飄緊過來，即時收繩開船避雨；要知道我地今日諗住入櫃，所以隻艇係無天遮的，一落雨就唯有人人硬食了。初時我地都仲比舊雨雲行得快，但係呢個時候起了陣風，海面都有點浪，令到我地不能全速前盡，所以都開始有點濕身。可幸我地就搵到橋位，勉強算是避了一陣子。雨稍停，我地又再係橋邊作釣，但係釣左一陣，另一舊雨雲又再殺到，唯有再度繞繩向前駛，不過今次都係避唔到，係風雨吹襲下，雨粉、浪花都令我地濕了，尤其係坐前面的我同埋華仔，更加硬食左幾個浪花打到上艇的水，頓時濕了一大片。我地呢個時候都無咩所以做，就只有向前駛、同埋苦中作樂，就係同阿妹豬講話，網上睇到釣到好多雨嘅歡樂影片都只係假象，到你親自落艇釣，就會發現魚又釣唔到、但係又不停勾石同埋仲要好似而家咁淋哂雨，所以都係睇少啲網上影片啦。咁當然都係搞笑啦，而好彩妹豬都仲未比雨水淋濕佢嘅鬥志同熱情，之後都繼續作釣。
本身我地有另外一個位想釣，但係眼見遠處烏雲又有出現，咁睇下時間都十一點多，同我預計十一點半至十二點可以入櫃嘅時候差少少，一於搏下可唔可以早少少入去避雨同埋開始今日真正嘅釣行。於是我地安就直接向櫃底駛去，好彩既係時間都算係預得幾準，我地只要烏低身少少就入到櫃底了，只要小心一點唔開太快，同埋注意頭上方有無水筒和其他突出物會扑到頭，基本上就已經係可以安心釣魚了。我見岩岩入到去水位都有點高，不如車多五到十分鐘往櫃底另一方向去，一來果面我地熟啲地型、二來水位又再退多丁點，釣得就更加安心，唔駛下下睇住頭頂了。
於是就帶佢地去到我上次 初次入櫃時開齋撞爆牙 https://yy08.pixnet.net/blog/post/106451761 嘅排口位，不過果度水深左少少，而且幾容易勾地同柱邊平台，所以釣左幾分鐘，考慮到妹豬可能唔係咁容易適應嘅情況之後，我地決定駛入少少艇淺水一啲嘅「航道」作戰。呢個時候係得我同華仔勾頭蝦，朗仔諗住同阿妹豬繼續試下蝦仔睇下搵唔搵到啲石狗、火點、立仔又或者放生魚之類嘅魚釣；而我就目標好明確，十號繩、三零勾、草蝦。基本上早排同朗仔講櫃底時我就已經講話同佢入櫃我都只係會勾頭蝦，咁當然佢可以蝦仔、頭蝦都試下啦，話哂都係體驗嘛，釣魚呢家野，人地點講，都只係建議同經驗，自己親身感受過先知真正體驗係點嘅。咁佢同妹豬就釣下蝦仔先啦，我同華仔兩個就揸住副繩係度等運到啦，尤其啱啱先係出面個世界入黎，個身都仲未乾，都係個肉身揸住繩但個神就仲未定哂落黎咁囉。但係釣魚嘅野就係咁，你愈係唔專注、又或者分心做緊其他嘢時、條魚就會偷襲你。只見到華仔玩玩下手機，突然有一下想揸實副繩起手抽魚之際，下一秒已經聽到佢飲恨嘅聲音，一切來得太快，只怪條魚餌都唔試唔碰一下直接就食埋嚟、亦只怪剛才落大雨令到華仔手濕揸唔實副繩，所以條魚一野轟埋黎，華仔抽繩抽唔實手一滑，餌就被偷走了。呢種食餌方式，九成係石斑，而且可以食隻草蝦食得咁清脆，起碼都兩斤幾三斤起跳！難得第一口就有食餌，真係難怪會被偷襲成功。但係偷襲呢啲行為，真係點會比你可以再有下一次呢。既然知道起碼有條魚喺水下面，咁梗係即刻精神起來，同時亦都同大家講要揸緊副繩，以防再度偷襲。睇條魚食餌食得咁爽快，好可能會再繼續食餌，咁梗係換隻生猛啲草蝦落去，然後叫朗仔定住隻艇係果個位附近搜索啦。我同華仔一落餌，只見華仔話一落即刻有魚接餌，但係就唔係剛才果種強暴式食法，只係碰左口餌一兩下，跟住見佢輕輕拉高左副繩少少，嘗試逗一逗隻蝦，然後就話隻蝦已經被偷去了。嘩，既然一落即接，但又唔係即刻啪啪啪，即係又係另一條魚啦，咁即是代理下面唔止一條魚係個排口度，咁我梗係更加打醒十二分精神、揸到副繩實一實啦。真係過左唔夠兩分鐘、我就感覺到一下清脆嘅索餌，忍一忍手再擺低啲隻手做好抽繩準備，等到條魚一下強拉，我就即刻起手抽魚，頂左一手、就已經感覺到條魚唔似係華仔果條咁大條，然後輕輕鬆鬆一手一手咁收，上到水面見到魚影，連朗仔個撈箕都唔等就直接彈魚上艇，於是乎一條青斑就咁就隊左上來了。雖然唔係咩大條嘢，目測約斤半，但係氣氛都即時熾熱起來。我仲係咁多謝華仔，唔係因為佢被魚強搶完再偷餌，我都唔會一路揸到副繩咁實，等條魚偷襲嘅機會係零。上到魚係雀躍啲，於是問阿妹豬有咩反應或者感想，佢都話好震撼，咁大條魚(對於新手而言)喺佢前面炸左上黎。咁都好，有魚上到，起碼會係知道仲有生機，等個氣氛無咁沉悶，唔會打沉左妹豬嘅士氣。
咁早就開齋，真係士氣大振，大家都即時好有期待。而且見到上嚟果條唔係華仔走失左果兩條，即係佢地仲喺水下面等緊我地，咁梗係換過隻蝦繼續作釣啦。阿朗見到有景，都即時加入，但係奈何我地圍住個排口砌多幾個字都無再食餌，咁於是只好往另一個釣點出發。不過釣左陣都唔再無食餌，於是我地決定上岸買飯順便來個中場休息。
出海釣魚能夠食到新鮮熱辣午餐係好珍貴幸福嘅事嚟，能夠係櫃底食飯則係一種好新鮮嘅體驗啦。我地買完飯就直駛另一面嘅櫃底，因為我地諗住呢面平時是比較少人釣，所以搵到魚嘅機會可能會高啲。不過講咩都假，食左飯先，人開完口先睇下魚開唔開口。食完飯我地就開始掃釣場，不過今日係生流，潮水漲退快、高低差大，食完晏兩點幾個流都落左大半，釣埋邊航道已經唔係好夠水深，所以要釣出一條航道，但係我地掃左陣，就覺得個底好似唔多鞋；反正我地又唔多熟呢面嘅釣場，咁都係決定過返對面櫃底繼續搵魚。
一入櫃，就見到有隻艇係度釣緊，華仔一眼就睇到係大師隻艇嚟。打個招呼問下佢有無咩好嘢釣到，佢就話下晝先開始入黎釣，都係得幾條魚仔咁。(最後佢地係有紅鮋有細鱗同埋火點石狗)，咁既然佢係呢面釣緊，咁我地就一於車遠少少啦，一於又返去今朝發市果個位試下先，不過無論係果條航道、又或者試下出面嘅航道，都係無魚食餌，於是我地又車去另一個位釣。呢度較近出水位，希望多啲水流動會有魚食下餌啦。係就係有魚食餌啦，但係始終可能草蝦比較大隻，條魚輕輕拉左我隻蝦一兩下之後，就又無下文，睇黎條魚都係隊唔入隻蝦就放棄左走左了。
講左咁耐，無乜點提妹豬同朗仔，因為朗仔都仲係等緊條頭蝦開齋魚，而妹豬就係度熟習緊點樣試底同避石。其實佢已經好叻，事關佢真係全新手，聽朗仔講係未上落過艇釣魚，所以一切都要從新教起嘅。但係今朝朗仔可能又要典顧侯艇同釣魚，所以都無乜精力去教妹豬釣魚，只係簡簡單單講左呟大概。而妹豬又新手到嘅程度係都唔係好識發問，只係可以慢慢先試下掌握下咁樣。所以唔難見妹豬成日都仲係係度彈下彈下副繩咁。我見到咁，就嘗試用啲具體少少嘅例子同方法去教佢，咁樣佢又真係瞭解得到喎，於是乎就真係見佢開始知到左咩係到底、虛繩，試底，咁對於新手黎講，可以唔太勾石又釣到海床，其實已經係進步得好快了。都係果句，至於有無食餌，就係睇下個海有無魚同埋有無運了。不過櫃底我釣咁耐，魚仔真係唔多，再加上放生魚又少左，所以佢嘅艇釣首魚都仲係「熱切等待」中。
車左出水位多近幾寨都無，水又再退左，搞到最埋航道得果五、六尺水、甚至更淺，咁我地唯有駛開一條航道，順便轉位再戰。我就叫阿朗車左去我之前同肥仔佢地入黎時斷魚嘅釣點，睇下會唔會有「奇蹟」出現。望下隻錶，已經四點多了，真係時間愈來愈少了。我就真係希望其餘嘅人可以有得派下彩，不過靜左咁耐，大家嘅士氣都高漲不再了。大家都係揸住副繩、碌下手機等運到。咁係唯獨釣波子壓底嘅妹豬要繼續專心試底、跳石啦。但係釣魚都係果句啦，你睇上去越唔專心、啲魚就越會係呢個時候出擊嘅；就喺大家都「混混噩噩、唔知做乜嘅時候」，忽然見到碌緊手機囓華仔放低左部手機，然後再擺低左隻手做準備，跟住接下來就見到佢大力一抽，然之後揸實副繩後、剩低嘅就係一頂一收，睇到咁就已經知道唔係石斑、應該都係白身魚；只等華仔繼續收多幾手，一個白身魚影出現，條魚見光又嘗試爆返落水底，但係華仔又點會比呢件事發生呢？佢揸到副繩實一實，輕輕帶住條魚游過嚟揸住撈箕嘅我嘅方向，然後收多兩下繩，條魚到水面我就對準魚頭一兜，一條肥仔牛屎正式上水！「嘩，好大餅牛屎呀」，大家即時都興奮起來，華仔更加搞笑地扮哂要做蠟頭嘅動作，然後就話條魚食餌之前仲會轉一下口先重擊，即係擺明話比華仔知要做好揸繩抽魚準備，咁樣好難唔中架喎。就咁睇條牛屎都成兩斤幾，又再刷新左華仔釣牛屎重量嘅紀錄呢。
大家即時比呢條大肥牛燃點左，全部醒哂，而且見到時間無多，所以朗仔亦都幫妹豬換埋頭蝦架餐，希望四個人可以是但再搵多一口食餌，不過接下來返流左幾次都再無食餌，我地就決定試下去另一個位做我地今日嘅最後希望。雖然都係無食餌，但朗仔就話終於點咩叫釣到唔願走，事關呢度釣場真係夠哂大，而且望上去每一個位都好似會有希望咁，對於找尋緊希望嘅朗仔黎講真係有著非常大嘅吸引力。睇住時間無多，我同華仔就話等我地執野同埋撈魚影相同放血，朗仔你繼續搏多陣啦。可惜釣到最後，朗仔同妹豬都無魚食餌，咁我地就只好鳴金收兵，而朗仔同妹豬嘅新手首試櫃底釣之行就可謂黎到尾聲了，我地跟住就車艇返汀九，阿譚仲好好人咁幫我地劏埋條牛屎鱲添。就係咁樣，我地嘅釣行都終於完結了。
回程嘅時候，阿朗仔就已經話要再約日子覆桌，而我地問阿妹豬今日係咪好悶，以後係咪唔再跟我地出去釣魚時，點知佢又話可以再試下喎，咁希望下次佢地再入櫃時，可以搵到佢地喺櫃底、甚至係艇釣嘅第一條魚啦。
友聯船塢
青斑與草蝦
久違的青斑
櫃底開餐另有一番風味
肥仔牛屎
得咁多
牛屎鱲
放血
秤魚
清蒸青斑仔
請先 登入 以發表留言。