眾人皆中我櫃龜

眾人皆中我櫃龜

日期: 08/28/2023
農曆: 七月十三
地點: 櫃底
艇家: 自駕
釣友: 朗仔、妹豬、華仔、YY
天氣: 天晴、西南風二級
水流: 靜流、水質一般
釣穫: 紅魚x2 (磅頭x 2)、埋單2斤

是咁的，月頭同阿朗仔等仔嚟左次「新人入櫃旺舊人」

※ 延伸閱讀 ※

嘗試左初次入櫃底釣魚，然後由於妹豬同朗仔呢兩位新人未嘗櫃底中魚滋味，所以當日其實我地已經決定咗要原班人馬擇日再戰。咁由於入櫃底釣魚都要睇潮汐漲退，於是我地就揀左幾日是漲盡時是大約日出時份，咁等到個潮水落得差唔多就可以入櫃的日子，然後再夾時間就定左是日農曆七月十三出發。呢一釣，應該會係朗仔同妹豬今年最後一次入櫃了，因為妹豬九月頭就要飛回英國開學了，而朗仔就應該會先釣住其他釣點，比如維港，因為細鱗差唔多喺呢個時候又會入維港呢；所以，是日一戰就係睇下佢地今年可唔可以嚟個櫃底的埋齋了。

朗仔由於早前已經取得艇仔駕照，所以自行於汀九取艇，所以我地大家就決定分工合作；佢同妹豬就直奔汀九取艇，而我同華仔就去楊屋道街市買蝦，然後喺荃灣西碼頭等佢地，咁樣就是最有效率，可以爭取更多作釣時間。咁於是我就同華仔喺街市揀左一些體型上較細隻的棕蝦，同另一款比較大少少的南美白對蝦(又名偽基圍蝦)。今次放棄草蝦，係因為我地都覺得雖然上次用草蝦中到石斑同鱲魚，但草蝦其實比較大隻，殼又較硬而且都唔算生猛，唯一好處就係尚算粗生，比基圍蝦襟生。不過我地今日既然有棕蝦，就一於試下細隻一點的棕蝦，睇下可唔可以搵到一些較細條約斤零的魚；而基圍蝦的大小則較草蝦小一點，如果我地想搏大魚，則可以用基圍蝦；所以我地可以話係叫哂兩飛！當然，除左街市蝦，仲有朗仔買嘅沙蝦仔，因為佢話今次要繼續用沙蝦仔作釣，一來想試下櫃底係咪真係得大魚無細魚，二來亦都因為蝦仔較易可以有魚食餌同中魚，所以想比妹豬一次人生釣魚開齋的機會。

三樣蝦都有齊，我地亦於荃灣西會合左，然後就直奔櫃底！今日目標明確，只會釣九號櫃底，而唔會好次上次咁樣用一段時間過對面一至八號搵魚，目的就係想用更多時間釣我地較熟悉嘅釣場，而且我地亦都打算上半場較漲水時先釣最入面的「航道」，而到晏啲甚至係下半場就釣出一條航道，咁樣我地就可以掃哂兩條航道較熟悉的位置而又唔怕水位唔夠高而釣唔到。

一入到櫃我地首站當然就係揀上次我中青斑的位置掃一陣先再往埋面航道釣啦。但係個青斑位鞋就夠哂鞋啦，唯獨就係無大魚食餌，我地圍住果幾條柱車左兩三次之後都係無食餌，就決定駛入一行搵下魚仔，睇下朗仔同妹豬可唔可以藉更多石口位的最入航道而開齋。

車埋左一條航道，水淺左，石口位又好似多左少少，但似樣啲嘅食餌都仲係未有，只係得阿朗仔不時話有些魚毛在咬餌，細細條咁，但又抽唔到，搞到朗仔又拍手又嘆息咁，我地咪同妹豬講笑話平時你喺Youtube睇到嘅都係佢上魚嘅片段，而家睇到嘅先係真實嘅情況，所以唔好睇咁多網上短片呀，假架，壞腦架，哈哈。

掃左一陣都係無，我地就繞繩轉位，走去一些出水位附近的位置，睇下有水流帶動之下會唔會搵到一兩口魚食餌，但係車左兩三次返寨都係無料，於是唯有再去另一個出水位附近搵魚。一路咁掃寨，不過呢面好似仲靜過今朝嘅位置，起碼朗仔無再係咁話有魚食餌又無得抽咁樣，但係呢，佢又見到妹豬條繩有食餌彈左幾下，不過等左一陣都無再有動靜，問阿妹豬有無一下明確食餌拉扯嘅動作佢又話唔覺有，於是阿朗就叫妹豬收繩上黎睇下舊餌係咪已經比魚食哂而無再有反應；點知妹豬收繩收到上水面，居然見到有一條石狗在勾上！即係話，妹豬已經釣到佢係海釣嘅第一條魚喇，啪啪啪！雖然妹豬對於如何中魚嘅過程還是不知怎麼發生的，不過都已經好開心了，所以立即叫朗仔幫佢同條石狗公合照。有魚中梗係開心，不過我地就講笑話未得架，妹豬，你嘅任務仲未完架，雖然係叫你釣魚上黎，但係都想你係在有意識同埋在理解嘅情況之下，有動作抽魚咁再去釣條魚上黎。而家只係知道有食餌，然後乜都無做又唔知中左魚，隔左一陣收繩上黎見到魚先至知道中左魚，其實就未算合格嘅，所以都係要繼室努力落去呢。咁雖然口裡對佢嚴厲，但都戥佢高興嘅，始終都想新手中到魚唔會對釣魚失去興趣。而且都想睇住佢有進步同埋知道釣到魚係點樣一回事。

中完呢條，諗住會唔會朗仔同妹豬會執多一兩條石狗仔呢，但係又真係無口喎，眼見水又退左唔少，華仔就提議釣返出一條航道，睇下深水返啲會唔會多返幾口食餌。即時駛返開去，呢個位同上次中牛屎鱲嘅位差左幾條柱位，即管就係度開始掃吧。由於朗仔釣波子壓底蝦仔，所以佢會比我地勾頭蝦嘅更容易了解海床情況，所以今日我都係一路問佢個底鞋唔難咁樣，大約了解下啲位置，好等日後入黎知道大約釣邊啲位會多啲石位咁。掟落去掃一掃底，覺得同牛屎位果邊都差唔多鞋，即係呢一帶都係唔錯嘅釣場，然後突然就見華仔揸住副繩聽繩，跟住就係一下抽擊，中魚！睇佢頂左一下再收魚，都已經知道條魚唔大條，佢收左手都話唔大條，於是我就同佢講話唔掟撈箕了，你自己飛條魚上來吧。幾秒之後，見到魚影，華仔再一彈，一條磅頭紅魚就咁樣飛左上艇了。佢就話啱啱見到魚影時見係白身魚又有少少紅橙，心裡閃過一絲希望會係牙點，不過幻想隨住條魚出水見樣而破滅，真身結果就係放生紅魚一條。不過點都好啦，總算都叫係有條磅頭魚，「能破龜就是好事」了。華仔就話好彩有車返開一條航道，果然個心血來潮嘅念頭係有料到。

既然有魚中，咁我地都係繼續掃，掃完一段距離，就返寨再掃。呢頭係鞋底，但係朗仔就話魚仔食餌情況唔夠今朝入來第一個位時多食餌，但係唔理啦，下半場我地先過果面掃啦，反正距離食晏時間唔係好多，一於掃多一陣呢面就再作打算。掃掃下，到我忽然感覺到條繩有反應，係比條魚慢慢拉住，我即時揸住副繩，跟住感覺到條魚再慢慢向下拉左一下，但就係沒有激烈的食餌走繩動作，我等多成十秒都係無反應，唯有收繩上來。只見棕蝦已被剪尾，呢個情況真係無辦法，唔倒釣始終無得起手。比你剪到是你好彩，如果食得再深一點，不走運的就是你了。而有咁嘅食餌方式，我同華仔講過之後都認為基本是鱲魚之流，而且也大約不會超過斤裝之流。所以就姑且放佢一馬等佢長大之後再來找我們吧。有魚食餌，咁梗係圍住個位來回掃多幾次，不過都係搵唔到食餌。咁唯有就「沿路」繼續掃落去，由於中魚前通常我地都係玩緊電話又或者恰緊眼訓時中，所以朗仔都開始玩起電話來，試下我地講嘅不專心中魚大法。果然釣釣下又真係突然聽到朗仔慘叫一聲然後又拍哂手咁，然後只聽到佢話中左魚但係打唔實甩左！原來佢係落左繩之後感覺到好似有魚好細口咁食，佢就諗住等待機會，點知條魚原來已經係食左餌中左，所以佢揚一揚繩時條魚就走，跟住佢只好收魚，但就其實無抽魚動作所以打條魚唔實，走左兩下條魚就甩左，認真飲恨！點知飲恨嘅野今日原來係一不離二喎，就係朗仔甩魚無耐，今次又見到朗仔有所動作啦。今次見佢有哂起手動作，點知收左一手，然後就沒有然後了！原來係斷魚！咁點解一秒就斷架？朗仔就話佢其實感覺到條魚食餌，但條魚食得好斯文好細力，所以佢一路比佢食諗住比佢食深啲、入哂嘴先至抽魚咁就萬無一失穩陣唔甩，但係就係可能條魚食左咁耐，隻蝦仔都入哂嘴裡面去，所以佢一抽條魚一掙扎時，深至嘴裡的魚絲就被魚的牙齒𠝹斷了，真係喊都無謂。釣魚嘅野真係有時係講運，中到上唔到都係輸左運數，唯有寄望下一條魚可以順利攞到吧。來回甩魚、斷魚附近位置掃多一兩次都搵唔到條魚，車前啲位置再掃多一寨都無口我地就決定先上岸買飯，有咩都等食完飯先再算。

上到青衣我同華仔妹豬就上岸買老麥，華仔買餐時仲話中左魚，一於買多個新地筒獎勵一下自己先。而喺我地等完緊外賣嘅時候，朗仔傳左個訊息過嚟，竟然係一條火點！原來佢係等我地買野既時候，自己就喺碼頭對開掃排口，都唔夠十分鐘，就竟然比佢搵到一條良型火點，睇上去都有成6両重，我同華仔見訊息咪即時笑左話，喺入面三個鐘都無口，出到黎碼頭邊三個字就有條魚執到，都唔知係咪風水唔夾、定係條魚係碼頭呟阿叔釣到然後佢拎黎影相嘅。咁梗係講笑啦，不過釣魚嘅野就係咁，係你嘅就係你唔係你嘅都無得強求，今朝磨左櫃底咁耐都無條魚仔釣到，出黎一陣就執返條都叫見得下人嘅魚仔，真係講咩都假，好波好如好運。

買完午餐梗係落艇直駛櫃底開餐啦，除左正餐，華仔同我都買左蘋果批，不過我地都話要等到中魚先可以食，一於就睇下個批會唔會擺到收工走人都仲未發市，哈哈。一路食，其實我同朗仔都有落住繩釣，不過佢就係繼續用手揸繩，而我就係綁過另一副繩，唔落陀而係直出勾頭蝦，再加粒夾鉛同埋掛個大浮波後就拋落海等食餌，用視覺去釣魚。不過到食完晏，我同朗仔都係無魚食餌。既然食完飯，咁就車去遠啲櫃底另一端釣，不過路經青斑位都係決定釣佢一兩寨先，可惜底就夠哂鞋，但魚就唔見有，咁於是我地就繞繩再車去前面位置作釣。作釣位置係上次入黎時經過見到大師喺果一帶作釣的，所以今日就黎試下，啊，又真係幾鞋底喎，跟住釣下釣下，阿朗都有向埋面航道拋下繩嘅，然後忽然見佢抽魚，然後就上來一條花頭梅了。雖然唔及今朝甩斷果兩口大，但總算櫃底有條開齋魚仔呢。既然甩、斷係一不離二，咁中魚又可可以呢？答案係可以嘅，因為釣多一陣，就見到又係朗仔抽魚了，不過今次就明顯細口，上來係一條石狗公仔，但有魚中點都好過無魚中呢。既然有食餌，咪來回掃多幾寨囉，今次有食餌嘅係輪到妹豬，但係見佢條繩震左兩下之後就無左反應，咁佢等左一陣就收上黎，然後就見到一條石狗公已經勾在鉤上，跟住佢就話我又釣到魚啦，哈哈。但係呢條魚同上一條魚一樣，都係喺佢無釣魚意識之下釣上來的，所以我地都係同佢講話呢條都唔算架，你都仍然係未感覺到有魚食餌到要抽魚果一下，然後亦都唔知咩為之抽魚時機同埋抽魚係點樣，所以要繼續努力呀。不過釣到魚已經好叻，所以都要比個讚佢，啪啪啪。

諗住連續釣到幾口魚有啲起色，但掃左陣都再無食餌，於是我提議不如試下去轉角位生流啲地方釣下，話唔定有啲意想不到嘅情況出現呢。落繩作釣，繼續掃寨，我就一如既往咁問朗仔個底鞋唔鞋，佢就話唔夠我地之前釣嘅點鞋，但係華仔就話唔係喎，佢啱啱釣緊果個位係高低位嚟喎，跟住都唔夠幾分鐘，就見到華仔話有魚食餌，但係咬左一口就無再翻口，等左陣都唔見動靜，拎隻蝦上黎一睇，明顯有個咬痕，可惜佢地就係唔肯大大口食埋嚟；無得抽魚，可謂非戰之罪。既然有魚訊，咁就一於圍住個位再掃，不過又無反應，咁就繼續前進掃寨，但釣緊最裡面嘅航道開始淺水位，所以我地就決定駛開一行。跟手掃左都唔夠幾分鐘，今次見到朗仔有哂準備動作，然後抽魚，跟住見佢要頂一下魚喎，即係唔係石狗仔之流啦，跟住見佢硬砌收繩，然後又一條磅頭金身紅魚上水了！見佢上得咁輕鬆，我問佢點解你揸蝦仔幼繩唔駛就魚嘅？跟住佢就話經過今朝斷魚嘅教訓，佢決定唔要輸比啲魚，所以係5號繩釣蝦仔，所以中魚可以一手都唔讓、死頂條魚上黎。比著平時釣維港佢中呢啲大細嘅魚，揸得果5磅魚絲，又點可能唔就魚呢。睇黎呢位師兄開左竅喎，明白到櫃底魚，不能嬉嘅「硬砌道理」。釣到呢個時候，朗仔都終於係櫃底搵到條似樣少少嘅魚喇，而頭蝦組同蝦仔組別呢個時候就打成一比一。睇下到完場時可唔可以分到勝負啦。

釣多一陣又無口，望下個鐘都四點幾，於是朗仔決定去返一些佢覺得較有信心嘅位置作釣，睇下大家會唔會有尾運行。於是佢就車左去大出水位附近作釣，不過大口嘅就未搵到，石狗仔就比佢執多一條。而釣到呢個時候，佢地準備嘅沙蝦仔都已經消耗得八八九九，時間亦都剩返唔夠一個鐘，於是我就幫阿妹豬改釣組，幫佢轉成勾頭蝦；而朗仔都換埋釣組，於是我地一行四個人就變成全員釣企頭了，一於試下搵個大茶飯食下。釣左陣，到我感覺到魚訊啦，只感覺到條魚埋黎噠噠咁樣拍左口餌兩下，我即時又揸緊副繩同埋都開口講話有魚食餌，然後朗仔華仔都睇住我副繩跟住又嚟多兩下噠噠、噠噠咁樣隆哂繩，然後就沒有然後了。收返繩上來，又係見到棕蝦被剪，而我亦只可嘆句奈何，今日睇黎就係不是到我中魚的日子了。

釣多一陣都無口，我地就決定返去牛屎位附近試多陣，有就有，無就收工。釣釣下，突然又見朗仔有動作，跟住又係拍哂頭，蹬哂腳咁，佢話有魚訊食餌，但係就抽唔到；跟手收繩上黎，只見蝦又仲喺度，同埋隻蝦係完好無缺、並無咬痕；我同華仔又笑佢釣魚釣出幻覺來，華仔又同妹豬講返上次釣魚時嘅笑話，就係唔好睇咁多釣魚短片，會壞腦同埋出現幻覺架，你睇下而家乜事都無發生，隻蝦仲好地地係度，但係朗仔就拍哂手話有食餌又話抽唔到；佢仲拎住剛來佢比魚咬過嘅果隻蝦同我被剪尾嘅果隻蝦一齊比妹豬睇，話呢啲先叫食餌，而唔係朗仔果啲呀；所以你朋友已經釣魚釣到出現幻覺，要好好關懷一下佢喇，真係笑死。笑還笑，仲要繼續釣、繼續搵魚，可惜一路釣都係無口，一路磨到5點半都再無魚訊，就係咁樣我地今日嘅櫃底探魚活動就正式結束啦。朗仔雖然比我地笑，但係佢都叫執到紅魚、花頭梅，同埋火點算係唔錯。而華仔都叫有一口，起碼唔駛龜。至於妹豬都叫係唔知做緊咩剩係知有魚食餌嘅情況下執到兩條石狗公，都叫達到有魚中嘅目標。而我就真係今日漏低左嘅一個，只有兩口唔倒釣嘅食餌，魚就沒有起到一條，不過釣魚嘅野，結果都唔係最重要嘅，享受過程先係最緊要。雖然起手都無機會，不過可以同到三個朋友仔嘻嘻哈哈咁樣過一日都真係幾寫意。

係回程嘅時候，我地亦都發生左一段小插曲。話說華仔約左人，所以係青衣就上岸走人先，咁我又唔係趕時間，就梗係同朗仔妹豬一齊返汀九再走人啦。就係架艇仔駛到近水灣對開時，阿朗仔話感覺到架艇好似唔夠油，條油喉好似有啲唔暢順咁樣疾下疾下，再車多兩下部機就熄左了。於是我地只好同部機加油，然後再試下開機，但都係未有反應。再試下唔同方法搞下個入風口啊，又試下用個泵，唔知點樣搞搞下部機又著返喇；最後我地總算有驚無險咁樣返到汀九灣，而我地嘅釣行終於完結。雖然今次釣行並無一條炸烈性式食餌嘅魚，不過能夠開心玩左一日都好好了。而且就算今日得兩口魚仔，妹豬都好似並未灰心，同埋對釣魚失去興趣。希望出年佢返黎可能跟朗仔去維港定邊度釣魚時可以找到釣魚感覺同上多幾條魚仔啦。至於朗仔我就應該會係佢走之前再搵佢去釣魚嘅，事關維港有等住我地去征服嘅任務。

眾人皆中我櫃龜
早晨啊