轉機趕搭尾班火車

日期: 12/11/2015
農曆: 十一月初一
地點: 維港鯉魚門一帶
艇家: B記
釣友: 鬼仔、彼得、YY
天氣: 天晴、北風 3, 4級
水流: 生流、水質不俗
釣穫: 細鱗 x6 (3斤x1、2斤x1、斤半x2、半斤x2)，什魚幾斤埋單12~13斤

是咁的，今次釣魚之旅可謂早有安排卻又曲折奇情。原本應該是出現在西水機場的我們最後卻竟然去左維港趕搭尾班火車。事源今次的主角- 鬼仔，早在兩三個月之前就已經告知我他將會在十二月份的這幾天從新西蘭坐飛機經香港停留兩、三天再轉機到奧地利探親。而趁這空檔當然就是把握機會釣魚啦，所以早兩個月我已經預先向艇家山歌仔留了11號這天的釣期；而左期右盼的又終於來到這天的前一天中午，當我打電話給山歌仔詢問有關釣具準備及上艇時間時，山歌仔卻說機場無魚釣、佢是日出艇仲龜緊，而呢幾個月最少魚就係呢兩個星期，不如取消以免我地再龜。咁我問佢夜水會唔會好些少，佢話有機會，但由於鬼仔今次檔期太急趕編排得密麻麻，所以晚上已經擠不出時間了。咁既然山歌仔自己都話對釣況無信心，咁唯有同佢講話等鬼仔農曆年返來香港過年時再找佢打大鱸了。今次都真係釣左山歌仔咁耐第一次佢會同我地講唔想龜而索性取消釣行的。
原本以為釣行就咁樣就取消左，但係天無絕人之路，我呢個時候即刻打比B記問下佢會唔會有檔期比到我地而竟然又咁好彩佢有空，於是二話不說就約實左佢，而我地拼命的戰場就由機場一帶轉陣去到維港了！而山歌仔平常會幫我地準備好釣餌，但釣B記就則要我地自己預備魚餌。咁呢排上臉書仲見到有火車頭釣，雖然規模已經不及中秋時分，但今年細鱗卻真的大規模侵襲維港，可算是「大造」，不過最近已經有減產及往外移的跡象。講返買魚餌，臉書上的師兄們都話要釣維港細鱗，紅蟲是絕對較其他釣餌得食、優勝，但奈何供應不穩，所以唔係隨時隨地都買得到。不過還好在我住的那區的魚餌店還是有的，本來我和鬼仔打算叫店鋪幫我們預留然後等釣魚當天出發時才去店鋪取餌，可是該店鋪開門的時間比較晚，我們出發時它還未開門，於是我就立即同他們講我在他們關門前先到他們店去取蟲，就係咁，我就突登坐小艇過去取餌然後再返屋企放入雪櫃的生果格保存跟住先再出街同朋友食飯，而事實又證明、積極唔放棄係總會有回報的。

講返今次釣行個陣容先，原本呢就係有芒生嘅，不過就係去釣山歌仔的話佢就會出現；但由於轉左陣，佢對大頭艇的興趣不大所以佢就沒有加入是次追趕尾班火車大行動喇。咁B記愛將阿備呢，佢話呢個月對釣魚的慾望大減，提不起興趣，咁既然係咁就由得佢吧，勉強無幸福嘛。而新加入的則是我學弟的全新手彼得。佢不時見我在臉書等社交網絡上發佈釣魚照片，咁佢又有點興趣，於是就同我講話如果再去釣魚的話就把他帶上吧。；所以今次就是「機會黎喇，飛雲。」至於鬼仔就梗係今次主角啦，而且佢更提議玩返我地以前都有玩開的「大魚獎」 - 就是每人都在上艇後綁架生前，先籌集大獎基金，放到「寶箱」入面，待全日旅程完結後，除艇家外釣得最大一尾魚的那一位就把獎金一併拿走！其實獎金事小，最緊要都係牙較之戰，並且提高大家動力及熱情，增加樂趣為大。當然我亦事情同彼得小弟提及，佢亦都對呢個額外加設的遊戲表示感興趣呢！

好喇，講返今日釣魚行程了，一早和鬼仔在漁舍集合並拿了預先訂好的生蝦之後就坐巴士出發了，打給第一次出發的彼得亦確認他已起床出門了。而我同鬼仔亦非常準時的到達西灣河碼頭，並且還有空隙時間毛去麥當奴買個早餐再去七．十一買好飲料呢。不過在三家村上船的彼得可能第一次參加的關係，對三家村碼頭有點不熟路，以致我們等了他差不多半個小時呢，不過就趁這空檔和B記聊聊天吧，而她亦問起為什麼阿備今天不出現呢，那我只好回答阿備今天要加班來不了，難道告訴B記她阿備B已經熱情減退了嗎?!

好吧，終於都接到彼得小弟了，亦從他手中接過了先前從淘寶一起購買的筏竿，不過今天是初一大流再加上釣深上的地方，所以也沒打算派它上場；所以看了一看新玩具之後就把它放在一旁等待作釣，至於架生，則在等待彼得到來時老早都綁好了，我還連他的那一份也綁好了呢，事關他是新手，今次就先由我把他的那份架生都準備好吧，而且事先綁好則不用作為新手的他費時失事浪費時間失去釣魚時間。而從三家村到我們今天的第一個釣點其實也不過大約十分鐘船程就到達了，就只不過是經經過了鯉魚門口的、杏花村對出航道一帶的地方作釣。上艇昤其實已立即問B記呢幾日釣況，不過她說有兩三天沒有車客人了，但這一期細鱗其實已經由維港內港逐漸往外移到今天第一個釣點這一帶了，所以雖然呢兩日無車艇，不過還是過來嘗試一下找尋火車頭及雞魚、惑魚的踪影。

一來到是日第一個釣點，大家已經急不及待的落繩作釣，雖然之前一晚特登買左紅虫來作為搜獵火車頭的特別武器，但係一向率性而行又隨和的鬼仔則選用了沙蝦作餌，只於我則一絲兩勾、紅虫、生蝦各一門，沙蝦壓波子掃底勾，紅虫則勾較上一門那勾，至於彼得因為是新手關係，我不敢為他綁一絲雙勾的釣組，而且也怕他會不斷勾石，所以幫他綁了子彈鉛的釣組；雖然可能對釣魚仔或者細鱗的命中率有點影響，但畢竟可以大量減低勾石次數，也算是一種折衷方法吧。而且B記也告訴我們就算要釣波子壓底，也要在波子鉛之下穿一個零圈(八字環)，再加一條大約半隻長的子線為佳；不過我則用太空豆解決。好吧，講返釣魚。其實在剛停定第一個釣點時，B記就同我地講話而家到10點係乾流尾，釣細鱗就係呢個時間最佳，過左就要到下晝三、四點先再有另一次轉流尾水，而我根據手機安裝的釣魚流水程式查看也看到大約10點和下午4點是黃金時份，所以未落繩都時就已經充滿鬥志。而大家落繩後都唔知夠唔夠5分定10分鐘，魚仔都未有條，坐我對面的鬼仔忽然話勾了石，點知收一兩手竟然拉得郁，跟住再扯多兩手我直頭見佢手魚絲向下爆，跟住我都唔等佢講野我就起身拎撈基了；畢竟，我可是習慣了為別人撈魚的專業魚童YY呢。不過佢呢條魚真係象徵式咁交左果兩下貨之後我就只見鬼仔不斷收絲一路將魚收上來了，由中魚到見光都係差唔多兩分鐘唔駛；咁至於係咩魚? 其實未上黎都基本上肯定佢係火車頭架啦，不過睇唔出條魚貨仔唔交但係都差唔多有成兩斤野喎。咁幫鬼仔撈完魚之後除左好驚嘆以往一向無甚佳作的鬼仔竟然釣到撈基魚外，亦都恭喜一下佢不枉千里迢迢返黎香港兩日都搵到班尾班火車搭下；不過跟住就到我同紅衫彼得係度慘叫了，事關一諗起佢條細鱗有成兩斤時，再諗諗個大魚獎... 唉... 我同彼得即時係度講話駛唔駛咁快打沉我地呀，今日個大魚獎晨早流流第一口魚就已經知道花落誰家了，認真唔過癮。當然鬼仔亦都認定自己可以憑住呢條細鱗將大魚獎收歸所有，畢竟就算再有細鱗上釣都未必夠佢呢條45厘米級別份量呢。
撈完魚影完相返寨再釣，正當佢仲沉醉係呢份勝利的感覺之時，我副繩忽然感覺到一口重擊食埋黎我順勢反應一抽、即中；都未開始扯佢兩手條魚已經開尾走；咁岩岩睇見鬼仔果條收得咁容易，咁斷估我呢條都比佢大掛? 於是乎在我一收一放咁收到條魚幾手、基本肯定條魚走唔甩之後我就同鬼仔講：「得啦，你已經輸左啦，你去攞撈基啦」；但係又估唔到呢條魚真係段段有，雖然未去收唔到、要放比佢走的地步，但都只係能夠收幾手就停一停、就一就，又再收幾手，就兩就咁樣，總之就過足手癮啦。咁話哂釣場都有成差唔多成百尺深，架火車頭既然段段有，縱使收左頭幾手已經感覺到是囊中之物了，但都仍然不可輕敵，不可心急、要慢慢的、保持住道氣地收繩，以及同時盡情享受這久違了的中魚手感；就在如此複雜的心情和情況之下，站在我旁邊做魚僮幫返我撈魚的鬼仔大約等了5分鐘之後終於把被我收復了的火車撈上來了！目測兩斤半多一點(事後過磅差不多3斤)，就當兩斤半吧，反正已經足夠我把大魚獎重新從鬼仔手裡搶過來了！科科。
有兩條魚壓倉，頓時無哂壓力，而我就更加半個袋袋住個大魚獎了，哈哈；今日估唔到頭兩口魚就已經夠哂份量，真係喜出望外；而更為神奇的是，基本上我同鬼仔係未試過同時中撈簊魚的，次次唔係一係佢中我唔中、就係我中佢唔中，而更常發生的就是 - 我倆都無得中！但今天奇事竟然發生了，還是在B記艇上而不是原本要釣的山歌仔艇上，真可謂塞翁失馬、焉知非福！除此之外，亦都慶幸昨天特地過鋪頭一趟買紅蟲的努力沒有白費。而證實左紅虫係得食之後，我即時拿了條紅蟲給B記，並告訴她今天釣魚之前我已經在網上看過很多師兄都說維港的細鱗要用紅虫釣才得食，所以著她也跟我一樣，兩門勾一門用沙蝦、一門用紅蟲，索性叫哂兩飛，增加機會。

而雖然無哂壓力，但我地就梗係想趁住B記所講嘅乾流尾完結、轉流之前盡量搵多一條半條細鱗啦，但係呢個時候、第三寨都未釣完之際，不幸的事情發生了！只見遠處忽然這速駛來了一架水警輪，而今次是不像往時般由我們集合好各人的證件傳上水警輪，而是一個較高級的「雞仔餅」水警阿哥帶住兩個「散仔」直接走落我們的小艇，給予口頭警告，說我們作釣的位置是處於航道中央，妨礙其他船隻經過。我們當然「認低威」好讓警察大哥在不被刺激的情況下盡快了事離開，咁最後佢地都係登記左B記的船隻資料就離開了，但由於口頭警告講話比佢地隻水警輪再見到我地隻艇係航道中心釣魚就即時發告票，咁即係表示我地已經唔可以再係呢個爆釣位置逗留落去了；咁B記只好把艇開到偏離航道中心，比較靠岸一帶的地方作釣。但係如果那些地方係好魚的話，咁樣B記一早就唔駛冒險駛出航道那邊搵魚釣啦！睇住乾流尾就咁樣白白浪費掉，真的讓我們都感到無比可惜。
冬天吹東北風所以基本上係出唔到打浪排對開的海域作釣，咁所以我們唯有先繼續靠在近岸一帶找尋失魂魚吧，但係釣魚就係咁樣，好睇流水同位置；由於最佳流水時間已過，再加上位置偏離比較聚魚的地方，縱使我們在航道兩旁、比較近岸的地方都嘗試過，但係都可謂無功而還，只有小狗三、四條。而彼得仔釣到呢個時候都仲未開齋，咁我梗係叫佢唔好勾大沙蝦改而用紅虫試下啦，但係佢諗住用大隻一點的沙蝦搏下，一係唔中、一中就要用撈簊喎，咁有志氣，咁我梗係唔阻止佢呢團火繼續燃燒啦。但係紅蟲仲有好處就係魚仔都較容易吸引到佢地食埋黎，所以我都一直疏疏落落地偶爾釣上小魚，仲比我撞到條成3兩重的沙鑽呢！而其實B記亦都在轉陣一門紅虫一門沙蝦作釣之後已經都執返幾條狗仔同埋一條和我釣上那條差不多大小的沙鑽呢。而鬼仔亦都轉左陣用紅蟲，不過就無我同B記中得咁頻；但係已經在釣風流魚的他則一副上左岸的心態，所以都沒所謂了。
就係咁樣一直平靜到成12點幾釣況都無甚進展，咁我見彼得仲未開齋，於是就趁佢勾石斷勾之際同佢講話不如你用紅蟲開左齋先再搏大魚啦，跟手我就幫佢綁完勾再勾埋紅虫比佢叫佢試下，果然都唔夠15分鐘就比佢釣到佢的開齋魚石狗公一條。不過佢話咁樣就算釣到50條魚仔都頂唔到我同鬼仔果一條，所以釣多一陣紅蟲之後佢又轉返用沙蝦了。
而其實我地雖然話叫做係釣比較靠岸的位置，但其實我地邊釣邊睇水，睇下搵唔搵到架水警，而只要見唔到佢的蹤影，B記就會慢慢的愈駛愈開，不過可能由於時段不是朝早那一段流水尾，所以雖然已經慢慢的駛進了火車軌，但卻找不到火車的蹤跡。咁B記都話呢段時間係比較靜局，都係唯有等到下晝兩三點打後再搏一段時間，咁於是佢就從航道中心的釣點改為駛到嶺南中學對出一帶話搵下古惑仔喎。不過古惑仔就搵唔到啦，反而一條半斤重的火車頭就盲踪踪咁衝左埋B記度；而我呢，則用同一粒紅蟲餌連起了八、九條石狗公，至於鬼仔，則在風流魚模式下，拿了他的釣魚冰箱放到艇頭，放低魚絲，一把躺下，曬起太陽來個小午睡了。看來，佢都已經對大魚獎這事睇得很淡了。也對的，畢竟剛上艇的時候我介紹他讓B記認識的時候就已經告訴B記鬼仔和準備仔是睡覺孖寶，而當中又以鬼仔為大佬級別，意思即比準備仔的卒仔級更為強大，可以為了懶洋洋的睡著而完全不理其他人釣果，全心全意的去睡。這是準備仔作為卒仔級別沒可能達到的境界呢！
而果然，鬼仔他一睡就睡了個多小時，直到我地隻艇又再駛到另一個釣點 - 海防博物館對出一帶作釣時都仍然未願意醒來。而即使過了不久到我找到了另一條大約半斤重的火車頭並把牠收了上來、叫彼得幫我拍個照留念之時，他還是無動於衷，繼續他有他睡，我們有我們拍照。真的不得不寫一個「服」字給他呢。不過鬼叫他一早就中了交差魚無哂壓力可以大釣風流魚睡風流覺呢。反而彼得就一直都好有耐性，雖然釣不到魚，卻仍然沒有放棄，不斷嘗試，所以難怪到釣旅完結之後、回程之時B記都大讚彼得話欣賞佢咁有毅力嘅態度。中完魚望下個鐘，都成2點半，按B記話齋個流水距離流尾都只不過差個零鐘唔到，咁我梗係叫鬼仔好快點起來釣魚啦。

而此時B記又再把我們的釣點往維港港內移動，駛到筲箕灣避風塘對出、對著鯉魚門燈塔的那一帶作釣。呢個時候已經係下午茶「三點三」時分了；趁著早上那架水警輪已經交更、接更的那一架還未出動掃蕩之際，B記又犯險的把艇駛到距駁較開位置，並著我們快點把握機會，因為流水又差唔多慢下來了，而水警又唔知幾時殺到，所以希望趁呢個空檔再搵多一架半架火車咁話喎。
而我都趁車艇時間幫彼得更換釣組，由子彈鉛直出子線改為波子鉛壓零圈駁子線；至於我自己則照舊三爪零圈下門波子壓底外加太空豆同另一門勾、繼續上虫下蝦叫兩飛啦。貪心一點回報唔一定多，但係唔算上運氣的話機會應該多一半吧。
其實星哥隻艇比我地更早黎到呢個釣點，不過今日星哥隻艇就認真無食神啦，早上我地兩艇一齊到「火車站」但係結果就我地隻艇趕到兩班火車佢地就送車尾。而就算佢地而家下晝黃金時分比我地先來亦都食唔到頭啖湯，反之係佢釣完一寨車緊返寨頭時，我副繩突然就一口魚訊食埋黎、拉都唔駛拉就直接走頭了，跟住餘下來的時間就只係比我慢慢將佢收復，因為雖然條魚有衝力，但一上手就已經知道唔夠上晝果條嘅份量，於是即刻叫鬼仔拎撈簊在旁預備幫手，然後一手一手的收條魚上黎，都唔駛三分鐘條魚就應聲入網了，目測斤半吧，歡呼的除了我還有彼得，因為有魚打底返屋企交差呢。眾人一見到我中魚，立即戰意又再返哂黎，鬼仔都終於認真返一點了，立即換了一截紅虫做餌，不過我就話今次呢條細鱗係食沙蝦，仲要唔係大隻的，因為我本身都係諗住釣下古惑仔或者石狗的，而B記同彼得則無奈咁話佢地都用左大隻的沙蝦但係呢架火車竟然係「妹仔肚」、要細唔要大。但係彼得為左一鋪返身所以繼續選用大沙蝦，而B記和我繼續叫兩飛。我見有兩條魚，趁入去艇內拎豬柳旦漢堡開餐時咪同B記講話叫佢快點整返條魚用撈簊但我幫佢撈返條咁囉，不過B記話今日佢就無食神，叫我趁勢旺好快快手釣多一條半條喎，不過可能見遠處開始有水警出動巡邏，我們隻艇又開始靠石駁駛埋一點作釣了。雖然感覺機會好似細左，但係食神嘅野真係話黎就黎，今日都注定食神睇中左我，就係大家都無乜動靜之際，又係我有魚訊了；而且今次魚訊非常明顯，不像之前兩條細鱗那樣一口就衝埋來，而是先感覺到牠碰一下餌，我就揸返緊副絲並講話「黎啦，繼續食啦」，而佢又真係好似聽到咁又繼續啜埋黎，我又再忍多手叫佢繼續食；呀，又估唔到佢又真係咁聽話即刻就索落去啦喎，咁我呢個時候就梗係多謝都無句就起手抽繩啦，跟住又係同之前果條一樣咁，爆左兩三手，比我控定左之後我就叫鬼仔又去拎撈簊了準備撈魚了。玩左又係三兩分鐘，同無耐之前起上黎的那條差唔多大細嘅細鱗又再應聲入網了，亦都宣告左我今日「撈簊裝火車頭帽子戲法」上演成功！認真前所未有，連鬼仔都即時有點妒忌的模樣咁話比我中兩條都仲算無乜感覺，因為佢自己都有一條，但係比我中夠三條但係B記同彼得都無就真係「唔能夠接受囉」，哈哈。B記問我今次條魚食乜，我話佢又係食蝦仔，因為我一直都係用沙蝦仔同紅蟲，咁B記即刻講笑咁話我衰仔包自己就用沙蝦仔，但係就比較大隻的沙蝦彼得做餌，所以搞到彼得今日無食神。我就話其實唔係無食神架，今日彼得嘅出現絕對係好有功用架；事關今年我釣左幾次B記都無中過撈簊魚，但係佢一上艇我就刻有料到；更甚者係我同鬼仔都未試過齊齊有得中撈簊魚，所以彼得絕對係功不可沒的！而B記亦都笑住咁話阿Y你一係唔黎料，一黎料今日就一次過比你釣返哂之前咁多次份量嘅撈簊魚。雖然好哈皮，不過都係唔講咁多住啦，梗係趁下晝呢段「黃金時間」未完繼續搏大霧啦，之不過之後釣多幾寨都再搵唔到火車要埋站了。而B記見到我地三個人仔都叫做有魚分返屋企咁於是就話提早些少收工反正流水又開始湍急起來很難再釣了，於是今日嘅慶祝鬼仔路經香港幾日釣魚之旅就係咁樣完結了。
而隨住釣行完結，大魚獎得主亦都知道花落誰家了... 哈哈哈哈哈.....
講返今日個釣行，雖然今日魚訊唔密甚至間中有點疏口，但總觀全日其實真係絕對收得貨了，起碼人人有魚分！而我趁收艇回程時就解釋比阿彼得同鬼仔知話點解以前最初是先識隔離星哥艇先的，後尾卻隨住釣魚會班朋友一齊轉左會過檔B記的；因為一來釣魚會有女釣手，咁B記作為女艇家當然令女釣友更親切安心；二來更重要的是B記往往更有食神，上佢隻艇就基本上都會見到撈簊魚，只係差在是釣友中還是B記自己中咁話姐；而且B記親切可人，照顧周到，令一眾釣友都滿意非常；就以今次鬼仔為例，佢只係第一次上B記隻艇釣(佢以前都釣過星哥)，就已經深深喜歡上跟B記艇出海釣魚了。所以話，好魚難求，好艇家更加難求，有遇到嘅，真係要好好珍惜呢！