路線: 柏架山道> 大風坳> 天梯> 畢拿山頂> 小馬山礦場> 陽明山莊/ 完成港島徑第5段
登山之友: 超級氏伉儷、YY
是咁的，之前一晚同陳車、超級等老死一齊睇完英超紐卡素輸比般尼矛夫之後，臨散水之前講起第二天天氣唔錯，不如搵個戶外活動一齊玩下，咁呢原來陳車就唔得閒，而阿超級兄呢就話佢同女朋友一齊打算去郊遊，咁梗係即時加入啦。至於路線我地最後就揀左出發點在阿超級兄家附近的那條柏架山徑，然後打算上到大風坳那分岔點再作打算。
咁出發之前買好食物同水然後就直入柏架山徑了；這條小徑之前同陳車已經行過，所以都有記憶；至於超級兄因為條山徑極近佢屋企，所以佢之前不時都會得閒就上去走返轉咁，所以對這路線都算熟悉。我地就係咁三個人一邊吹水一邊行，好快咁就已經上到要作路線抉擇的大風坳了。咁講返有咩揀啦，第一就是最容易的、往大潭水塘走的，亦即我之前同陳車走過的那一條路；第二條是往東區最高點、並且有個雷達發射站的柏架山山頂；第三條則是經由599級直上石級所組成的「天梯」到達畢拿山頂然後一直走往陽明山莊的港島徑第五段；而最後我地都想今日有點行山的感覺，所以就選擇了有點體力消弭需要的天梯了。
好不容易一口氣走完600級石級(其實係怕停低休息意志就會有所減弱)之後就來到了畢拿山頂，豁然開朗，看到這兒漂亮的景色，之前大腿那疲憊酸軟的感覺頓時消失得無影無蹤。這裡不但可以望到維港兩岸景色，另一面也能看到大潭水塘、龍脊、石澳等地，再望過一點就看到陽明山莊、海洋公園以及鴨脷洲；總之360度全景都是漂亮景色！而且今日上到黎仲有意外驚喜，由龍脊那邊一路望過南區，都是煙霞和雲海，認真浪漫，咁我當然就係影風景相之外就係幫阿超級氏伉儷影返幾張閃光蛋照片先啦。不過其實由於我地今日上黎的時間比較晏，我地唔想搞到天黑哂先行完，所以我地採取左影相就停，唔影就一路走的策略，以節省時間。
其實上到天梯之後要走的路都算舒服，因為我地已經到了其中一個最高點，所以接下來的路暫時都是往下走的路，直至走過了小馬山的那個礦場之後，又再度需要往上爬了，走到了山頂之後，這裡看維港的景色可謂更加漂亮，而且我們來到這裡的時間可以剛剛好，因為此時正值日落，所以下面一帶是維港，上面就是日落的景色，簡直係浪漫到爆炸。所以我又再化作電燈膽替他們拍照好了。拍好照、稍作休息補充點水份之後我們就往下走了，這邊可以看到南區和對出的海域，這時由於已是黃昏，所以海洋公園那邊的纜車以及海上的船隻都已經亮了燈，再配上薄薄的雲海和霧霞，亦都有如仙境一樣。而陽明山莊作為唯一一棟束立在黃泥涌峽上的大型豪宅屋苑，從遠處看它更顯地靈人傑，絕對是理想風水居所。而我地亦都因為想趕在天累齊前走完山徑，所以怱怱影過幾張照片就一直走到港島徑出口來。不過出了出口之後還要走一段路才能走到大路的巴士站去，而隨住我們坐巴士離開往中學時期的「飯堂」中記吃飯，今天這一趟路程不算長，但極有行山感覺而且風景又秀麗、再加上我做足全程電燈膽的郊遊之旅亦完結了。我地都相約好下次又要再搵個好天氣的日子再度出發郊遊呢，畢竟再不把握這些天氣好好郊遊，難道要等遲些天氣濕、熱、時才行咩...
雲海與大潭水塘
上到黎山頂梗係要嚟返張合照兼打卡啦
陽明山莊真係正到核爆
上完自然要落
靚
小馬山礦場
浪漫
能迴避嘛我怕了當那電燈膽...
海洋公園纜車都亮了燈
港島徑... [完]
請先 登入 以發表留言。