路線: 黃竹坑地鐵站> 南朗山道> 南朗山道休憩花園> 南朗亭> 直升機坪> 南朗山頂及天線塔> 沿路返回黃竹坑
登山之友: 超級 與 YY
是咁的，閒日放假的超級，今天白天不用忙，於是就問我有什麼短程路線可以走一走；上星期剛同佢行完山頂至香港仔下山道的一段，於是今天就選擇了可以回望這條路線，位於它對面的南朗山，貪它路程短又唔難行，而且又可以飽覽鴨脷洲避風塘、海洋公園、以及淺水灣一帶的景色，真的是路程簡單但景色絕不簡單，再者我地仲有一個目的就係考察從這邊山可以看到對面的那個鴨脷洲玉桂山，因為我們打算不久將來就去征服這條比較需要手腳並用的路線，因為從網上資料得知，玉桂山路程雖短但是有些路段較為陡峭，需要沿路扶著繩子上落，所以今次我們就走到對面看看，咁結果當然就只係見到個山但係佢有幾難行就真係睇唔到啦，哈哈。不過當日的天氣又真係幾舒服，唔算太熱，而且無乜霧氣，所以視野不俗，所以無論南區的香港仔、鴨鴨島、較遠的南丫島都盡入眼簾，而走到另一邊亦能將深、淺水灣甚至南灣、舂坎角都一一望到；而最搞笑的當然就是邊登山邊聽到位於南朗山端的海洋公園的遊人玩著機動遊戲的尖叫聲，認真搞鬼。
走到南朗亭除左休息，超級還拿出他從日本買回來的蛋黃哥面具帶上自拍，然後我們就再拾級而上，很快經過直升機坪，超級開玩笑的講話下次來時可以帶沙灘蓆來這裡曬太陽，不過今次我地梗係未有準備啦，而且佢又約左女朋友食晚飯，所以我地梗係快快趣趣登頂睇下咩環境再算，咁我地上到去南朗山頂，看到的當然就是那堆天線塔啦，而其實繞過它們走去另一個點，那兒就更能看到海洋公園的纜車們除除地從山底駛去遠端的那一邊；另外亦能更清楚的看到淺水灣一帶的風景，所以登頂雖然都是梯級，但絕對建議第一次來的話怎樣都要走上來，雖然有些人說會怕天線塔的輻射喎，但人一世物一世，就由它射我幾分鐘吧，應該沒問題的，哈哈。拍過照後就沿路回去了。 這條路線真的短得黎但風景不錯，如果有時食完下午茶想散個步，我覺得行它大約兩小時一定乜都行得完呢！
請先 登入 以發表留言。