路線: 萬宜水庫東壩> 浪茄灣> 西灣山> 吹筒坳> 大浪西灣> 鹹田灣> 大浪坳大灣> 赤徑> 北潭凹
登山之友: 嘻嘻二寶
是咁的，今次行山之旅呢係由陳同學決定即興拿了一天假期而起的。而呢次夏至翌日行哂西貢麥徑二段四灣呢個決定真係其實可以話係又錯誤決定又後悔但最後又在終極磨練底下崩潰地完成的。點解咁講? 因為首先夏至翌日代表什麼? 即係話比你聽現在已經係夏天，而香港的夏天平均都已經有成32,3度，再加上你要在烈日當空之下行山，咁咪即係搵自己笨囉。所以話其實真係好傻仔。不過我地原本諗住呢，就唔係行好長途的，只不過係打算坐村巴去到西灣亭再走落浪茄灣然後上返萬宜東壩就召的士離開，全程只不過是大約9公里，而如果全日慢慢走，中間還可以在浪茄灣浸下水曬下太陽的話根本就唔會係煎熬；但係世事嘅野往往就係咁出乎我地計劃之外了，而這意外就係因為源自上個月連連大雨以致西貢那邊的山頭多處出現山泥傾瀉，而其中一處山泥崩塌處，更直接影響到接連前往西灣亭的一段山路，致令該段行車道路封閉，就連那村巴，也連帶暫時停止服務了。呢個就係我地去到西貢市中心當日在村巴站前特到的資訊了，但係一場黎到我地梗係決定繼續前往啦。而由於村巴服務取消，咁令到有些想搭村巴去西灣亭如我倆的，都呆在村巴站前，計劃著新的行程。咁就岩啦，一於同佢地搭訕，睇下會唔會可以一齊坐的士，分擔交通成本。而我地就揀左一對情侶，問佢地有無興趣一齊坐的士去西灣亭附近，因為佢地都係岩岩打完去村巴熱線並確認村巴服務已經取消了，咁我地就梗係即時同佢地講反正大家都想去西灣亭，不如一齊坐的士啦，果然一拍即合就找的士去了。
一上的士，阿司機叔叔就話西灣亭果邊山泥傾瀉所以車行唔到入西灣亭，不過人行到，所以如果要去西灣亭的入口就只可以在路口放低我們之後讓我們自己走大約一小時才能到達，而他於是建議我們不如我們坐車到東壩那邊，經浪茄、再到西灣、再過埋鹹田之後最後在北潭凹離開，這比我們原定的路線不過才多幾公里而矣，但沿途風景秀麗等等... 而最後我地梗係選擇左比司機叔叔老點啦，鬼叫山泥傾瀉搞到 這條行山路線的中間出入口沒有交通連接咁麻煩咩，所以話呢，一切野都係冥冥之中自有主宰...
一路坐車一路個的士司機就唔停咁吹水，乜都吹一餐，不過呢，同車果對男女就無咩點參與啦，可能唔習慣同生寶人傾偈掛，個女仔都仲好少少因為一開始都係佢同阿陳同學交涉一齊坐的士呢個提議的，至於男的就真係一句聲都無出過，可能怕講多兩句都餌比我地咁，亦都可能介意我地同個女仔講咁多野掛，哈哈。點都好啦，吹下吹下，就係咁樣我地終於黎到萬宜東壩呢個是日起點啦。睇左兩眼個東壩我就同陳名學去左睇下地圖板，大約再了解一下是日路線，然後就先走一步了，反正果對男女我估個男仔都唔想同我地咁接近掛。不過呢，今日真係好搞笑，所有人都可以超越我地，無論男女老幼一律都係超越我地，而我地又係永世都追唔返，不過呢個係後話喇。而睇完地圖出發首先係要上一段路的，而由於剛剛出發，所以就算係好熱，我地都覺得可以接受，不過就開始覺得是日個路線咁長可能真係一個錯誤的選擇...
走左半小時都唔夠就黎到今日第一個海灣 - 浪茄。真係好靚，而且仲有唔少人係度露營呢，而我地都係度稍作休息，本來我仲想浸水或者游水架，但係陳同學竟然係無打算浸水所以佢無帶游泳褲，所以最後我都只好打消浸水的念頭，改而係沙灘漫步，而有位泳客的狗狗又好友善咁樣走黎埋同我地玩，咁於是我地同佢玩左一陣先又再繼續上路了。其實未出發前做過下功課都知東壩到浪茄再到西灣山這一段其實會算係最辛苦，唔係因為佢段路有幾咁崎嶇，而係因為差唔多成段路都無瓦(樹蔭)遮頭，而且由浪茄沙灘往西灣山吹答坳的一段上山路段，則是和西灣往鹹田灣，鹹田灣往赤徑灣等不同，雖然都係又由山過山，但係由浪茄往西灣山係要由水平線走到上有成310米高的西灣山頂再往下再走到位於水平的大浪西灣，這是與另外兩個灣路之間只橫越山邊有所不同。就係一路要在無遮掩、完全暴露於猛烈的太陽底下的上山路徑走著，令到我地個意志受著極大的考驗，當然身體同時都係受到磨練啦，我地基本上行一陣就盡量找找有一點點陰位的位置抖一陣，然後商量著不如將是日路線縮短，即係從西灣亭那個出入口離開，雖然有山泥傾瀉而令到從西灣亭離開之後仲要再走多大約一小時、跨過了倒山泥的地方才能有的士可以截到，但係計落條數都係比我地唔係西灣山走、要行埋西灣至鹹田至大浪坳至赤徑至北潭凹為短吧；而我地計完數之後亦初步同意左呢個臨時提早收工計劃，因為無辦法，天氣實在太熱太曬了，雖然還好的我地有帶有足夠的飲用水，但係無論係陳同學定係我自己都覺得我地出黎郊遊都係為左爽歪歪享受一下大自然，我地唔係黎鍛鍊心志同身體的呢，何必要太過辛苦自己呢，哈哈。
好不容易我地行從沙灘走到山頂附近的涼亭，在那裡躺了好一會，吹夠風飲夠水之後我地先至繼續行，而本來我地真係打算行埋呢個山頭就在吹筒坳出返西灣亭離開的了，但係就在下山的一段路，可能因為往下走時較輕鬆意志立即回來了，二來又看到漂亮的風景而精神為之一振，我地最後係決定左逢亭就停一停休息，然後到大浪西或鹹田灣休息夠，等太陽收歛一下，天氣無咁熱之後再慢慢走到北潭凹離開，反正陳同學備有頭燈，就算天暗了我們還是可以走路，所以我地情願晚一點離開，也不願意在猛烈太陽底下煎熬自己，亦不太想「半途而廢」在西灣亭那邊的爛山路離開。
咁再次取擱置左提早離開的計劃後，我地就由吹筒坳往大浪西灣走了，途中亦經過好幾處山泥傾瀉影響到的地方，不過都係就咁跨過那些軟土就可以了，就係咁樣繼續行，在其中一個涼亭休息時，遇上一位獨行的行山客，他可是由北潭涌，即麥徑第一段開始走的，他本身是有同伴的，奈何天氣太氣下他同伴於東壩就搭的士先行離開，剩下他一個繼續努力了。於是我地就一齊行到落去大浪西的士多休息同埋補充水份。而在我地休息時，又看見一位獨行俠，他也是從北潭涌出發的，但是他真的走得非常快，因為他開始的時間和我與陳同學在東壩開始的時間基本上是差不多的，換言之他足足比我們走多了一倍的路!! 咁我同陳同學只係休閒型的，所以我地都無打算和佢地任何一位同行，所以我倆坐夠飲夠水就先行離開西灣往鹹田走了，咁當然好快就比果兩位人士超越啦，而之前已經講過話今日我地係行親都會比人超越同埋追唔返，而我地係往鹹田的途中的休息點又遇到另外一對情侶，但係唔好話追唔到，後來直頭見到佢地比我地早差不多成10分鐘先到達鹹田呢。而朝早果對男女真係自從佢地係浪茄比我地先行一步之後我地就無再見過佢地啦，當然又唔排除佢地可能係西灣或者鹹田就坐左水上的士離開啦，但係無所謂啦，我地能夠行完全程其實已經係一個創舉啦，對不?!
講返正題，好不容易黎到鹹田，我地梗係要去間士多好好坐低休息同埋叫野飲啦；點解話好不容易呢? 因為我地在分岔路選擇了一條遠路走，令到原本可以10分鐘不到就走到士多的路足足走多了20分鐘才到，這可是十分打擊士氣的嘛，當你原本一心諗住行多10分鐘就可以坐低好好休息，但係結果卻走左成30分鐘先到，真係頹然左架。不過點都好啦，我地最後都終於抵達士多，並叫左野飲就一邊享受透水涼的飲料，一邊享受大自然漂亮的海景和海風了。而坐在我地旁邊的兩位外籍人士更加是一邊享受著啤酒、薯片、一邊的在下國際象棋，真係夠哂生活品味呢。快樂不知時日過，坐坐下好快又差不多成6點了，咁我地計下條數出返市區都差唔多要成8點幾，咁於是又起行了，話就話希燈唔怕天黑姐，但係卻會怕肚餓的嘛，所以我地這段路走得挺快，雖然係上山，但係我地都無乜點休息就走到赤徑了，可能本身在鹹田差左電，二來太陽已經收歛哂，係我地黎到赤徑時，剛好就是夕陽西下的時分了，在碼頭又在休息一下，享受夠海風和寧靜的環境之後，我地就再度出發，並終於走完最後的一段路，並竟然在天完全黑齊前的8點完成全日的行山之旅。望望手錶一算，由天光出發的1145走到天黑的1945，足足折騰左8個鐘，而最後我地係竟然可以走畢全程，並無中途放棄，包括提早於西灣亭離開、以及在鹹田坐上水的士回來西貢碼頭等等。而其實一路行山的時候陳同學已經講話黎緊呢一頭兩個月佢都暫時唔會再行山住啦，因為今日真係夠哂皮啦；而同埋其實今日一落的士，我地就已經話今日決定黎行山係一個錯誤的決定，而選擇左走加上路線就更加係坐上加錯；不過無論點啦，最後我地都係完成左一個幾乎不可能的「創舉」，而且成日可以傾住偈，遠離市區，好好享受大自然和友誼，這或許也是促使我地完成全程的一個動能催化劑吧。
最後，希望山泥傾瀉影響到的路段可以快點修復好吧，咁樣我先會同友人再次前往西灣了，因為而家係無得選擇局住行哂由東壩走到北潭凹的全程，而沒有了西灣亭這個中間點呢。而且好耐無去探過雙鹿石澗了，而夏天又到來，所以下次行程都應該係在西灣亭走到雙鹿浸下水，享受一下大浪西的陽光與海灘就算了。畢竟，夏天真係唔係一個行山的季節喲!!!
出發!!
萬宜水庫
浪茄
和我倆玩耍的小狗
回望浪茄
牛...
西灣、鹹田、大灣，至及尖尖的蚺蛇尖
萬宜水庫至西灣、鹹田全景圖
其中一處通路都給堵了的山泥傾瀉現場
吹筒坳望大浪西灣
鹹田小橋
有咩幸福過夏日熱辣辣行到崩潰時嚟返杯 青檸梳打同埋涼粉菠蘿冰?!
爽呀!!
不過都係唔夠呢兩位外藉人仕的生活品味和態度
影呢咩?
陳同學咪就係咁影支燈標囉
赤征地標
夕陽，真美!!
天光行到天黑，終於完成!!!
請先 登入 以發表留言。