視察釣場在龍脊

路線: 土地灣> 打爛埕頂山> 龍脊> 大潭峽> 馬塘坳> 大浪灣

是咁的，尋日入左新界北搵朋友，順道呼吸一下新鮮空氣和探望古迪。飲到啤啤呼搞到今日訓到黃朝白晏，原本尋日諗住今日去行下一直想行嘅果條東涌救援徑，但係計下時間坐得車黎入到去再行，未行完都應該日落，咁就算趕得切日落前岩岩好行哂咁返到屋企都應該會好晏，咁就會錯過左天倫晚餐，所以決定揀返條近近地在港島區的路線走一轉。咁見都有好一陣子無行過龍脊，而且諗起幾日後我又將會跟B記出維港，近期天氣咁好肯定可以出到白石角，打浪排和石澳一帶；咁樣龍脊正好可以腑瞰哂石澳一帶景色，而以現時天氣狀況，更能飽覽由將軍澳對出海面再出到白石角再伸展至橫欄島、浦台島一帶的景色，簡直就係可以話係可以視察定幾日後我要釣魚的釣埸概況。咁如果果日有今日咁既天氣的話，咁肯定我地會享受著陽光之餘仲可以滿載而歸呢。

講返行山，咁既然決定左行龍脊，時間即時鬆動返。不過都係食埋早餐(其實已經成中午1點)再執埋野出門去。落到黎筲箕灣，梗係唔會直接坐車上去行山入口土地灣而係先去附近食返碗至愛魚旦粉啦。筲箕灣東大街最出名就有安利魚旦粉食架啦，隔離都有間唔錯嘅黃林記，所以鍾意食港式粉麵嘅朋友真係要好似我咁，黎食返碗先再上路郊遊去，咁樣心情就會更加滿足喇。食飽好上路，買多支水同埋零食以防萬一就坐巴士出發，好快就去到是次行程入口 - 土地灣落車了。換上防曬冰絲長袖再塗點防蚊水就立即上路了，今日天氣又唔算認真好熱，比上次行山貢來得要舒服得多，而且這條路線有樹蔭的位置較多，唔似得在浪茄山上完全無得躲避猛烈的陽光般無奈，所以不消一會已經上左龍脊。上到山，左邊是土地灣，紅灣半島，孖崗山等景色，而右邊就是石澳和對出的橫欄和涌台島。不過絕對要推介的是不要在這個位置拍拍照就繼續沿山徑走；這時你應該望到一塊寫著「千禧企業植林計劃」的牌子，而我今天就是抱住好奇的心走過去看個究竟，結果就賺到了更勝一籌的景色啦。究竟怎樣優勝，來過你便會立即明白我在說什麼了。在這個地方拍照，整個石澳盡入眼簾，就連新名勝「情人橋」也遠遠就已經看得出來呢。休息一會再繼續走就上到了龍脊頂部的那個地標柱。當然要在這裡打個卡啦，而且更趁天朗氣清，視野極為優良時欣欣對面清水灣哥爾夫球場，東龍島，和我的目標 - 白石角和打浪排的景色呢。過了龍脊觀景台之後，看到了我的目的地，大浪灣，亦顯示了我之後的路程就盡是下山路了。離開龍脊往下走，經過山林小徑走完打爛埕頂山之後，迎來了分岔路；而我當然不會就此想在山中那條路線離開，所以揀了以大浪灣為終結的那條路線繼續走。

然後是首先經過了一個涼亭，在這裡稍作休息並欣賞柴灣一帶的高樓大廈景觀，之後再經馬塘坳轉落林中小路再走一會就到大浪灣村了。來到這裡雖然應該到海灘吹陣海風抖返陣先走人，但係我怕日落時份要同其他人爭巴士、小巴坐，所以決定只是到此一遊式的看兩眼便離開，不過在這裡不難發現我是日沿途遇見過的不少郊遊人士呢，證明大家行完好一陣子的山路都決定來這邊再享受另一種的陽光與海灘呢。好吧，一於你地繼續慢慢享受，我就走人先啦。等埋小巴出到市區都差唔多成7點了，就係咁樣今日嘅龍脊之旅就在輕輕鬆鬆鄧梓峰嘅陪伴之下結束了，而視察釣場的任務亦都完滿達成。希望黎講今次維港之旅可以爆釣啦。