山系男孩犀牛石拆禮物

路線: 赤柱黃麻角道軍營> 斜炮碩> 犀牛石> 原路拆返> 皇室堡哈根大師
登山之友: 嘻嘻二寶

是咁的，今次行山之旅可謂計劃之中又帶點率性而行。事源我就在網上看到這個郊遊打卡新熱點之一的犀牛石的介紹文。之但係由於路線雖容易，但若果要為了上網打卡厄讚的話到最後就必須攀上犀牛頭然後爬到去「犀牛角尖」為佳；基於呢點我就認為一向安全至上的陳某人同學會保守地拒絕，而本身話會參加的三寶之一的超級某人就因臨時有事未能同行；所以本來諗住是日郊遊日的地點可能會因為最終由三寶變成二寶而另擇地點了，之但係我地又諗唔到有咩新地方路程短得黎又好去，於是最後我都係同陳寶講話不如照舊啦，最多去到打卡時就選擇較安全模式、亦即站在石前拍照就算，畢竟有不少人去到之後也選擇這種安全保守的打卡拍照方法呢。咁陳寶就話無所謂啦，一於羔羔羔，起行先算。
在巴士站附近怱怱吃過午餐之後就坐巴士直達是日的起點，赤柱的黃麻角道軍營。在巴士上我地已經將路線了解過了，而這篇山野女生犀牛石介紹的介紹文則是在一個集合愛郊遊的女生將她們的郊遊經歷投稿的網站上看到的，而這些郊遊女生在香港都有一個藝文青名字叫山系女生。咁我介紹比陳寶時就話今次重點係要爬石，而當佢見到網頁入面的山系女生都敢爬到犀牛角尖時，佢就話既然女仔都敢爬，而且只係女生程度的進階級別，咁作為「山系男孩」的我們當然就更加無任何退縮的理由了。
首先在軍營旁的小徑開始是日行程，卻一來就是達百幾米的石梯級，難得我倆今日都興致勃勃，竟然一口氣就登頂到達斜炮頂山頂。在那裡就見到標高處我倆就知道呢一程一日未到回程都唔駛再往上行了。由於今日係拆禮物日亦即假日，所以沿途都見到唔少郊遊人士。不過而家真係封郊遊就好似為左打卡咁，好多人根本裝備都係錯到離哂譜。走在我地後面的一對男女竟然都係穿著短褲，女的更只是著住人字拖就走上來。要知道呢條路唔係乜野康莊大道般的家樂徑，由標高處打後既路程都係小山坡路段，本身唔太難行，但係可能行人真的愈來愈多，搞到小徑都寸草不生，只有碎碎的沙石；所以走起上黎都有點跣，所以就算唔係好斜，我地都盡量保持低重心，必要時更會手腳並用。其實路線就係沿一絲郊遊人士自製的絲帶標記往下走就可以了，不過我倆一開始不太留意漏掉其中一段，所以就行錯左少少，但係都到達左一個好開揚，更好望住赤柱和對開一帶的海景；不過由於我地目標清晰明確 - 就係犀牛石，所以都無咩閒情逸志係度拍照逗留，而是快快趣趣就爬返上去分岔位繼續找回絲帶前進了。跟住好快就見到有回程的人，順便一問，就知道目的地在望了。
然後好快我地就終於黎到呢個名聞遐邇既犀牛石。就係因為出左名，所以雖然地方唔大，但係都聚數十幾二十人在排隊上石拍照或是就咁在石前打卡。咁我同陳寶就首先觀察一下其他人怎樣上石同埋爬到犀牛角尖啦，並順道用相機找找那個拍照角度為佳。一般人就算夠膽爬上去，都會小心翼翼地爬落犀牛角尖；但係有一位來自賓賓的她，卻可能係孫悟空托世，只見她兩三下手勢，就已經上了犀牛石，然後別人都是慢慢爬過去的犀牛角尖，她卻三五七步就直接走過去了，根本如入無人之境，視這懸崖邊上的石塊如無物。這還不止，只見她在石上好似雜技般的擺出不同姿態讓她的同伴拍照，不單有站在犀牛尖上這等小兒科的動作，之後更做出郭富城「唱這歌」的經典踢腿動作，接下來更是做出了單腳直立的瑜珈姿勢，簡直就是犀牛頭上的鶴立雞群呢。其他的人早就被這齊天大聖附身的賓賓吸引過去而停止拍照並為之驚嘆，而好快咁樣佢影完相又兩三下蹦蹦跳跳的就從石邊的另一個位置跳下來了，這也成為了之後我從石上面爬返落黎的參考。
之後再有幾組人要拍照，我地等左差唔多大約半個小時，就見前面淨返大約一對情侶同另一對嘻嘻情侶。咁首先阿嘻嘻一號可能就對郊遊比較熟性，所以好快就上石、拍照、落石；不過嘻嘻二號就要用比較多時間，而嘻嘻一號則在石下用心指導如何上石為佳，並跟另一對情侶的男生講解。咁我見等得咁耐，就先行試試可唔可以從石的另一邊，亦即孫悟空賓賓跳下來的地方爬上去，但係卻發覺好難找到著力點；於是我就嘗試先爬上石旁的小樹叢，但係可能該樹實在太幼，所以我一踩上去就已經軟倒，不能借力，而這時...問題來了！我地竟然係山上面呢度遇到彌患公主癌的 #世界級港女！首先我要自首呢係一開始係我唔啱的，因為我搵緊食力點、踩樹時無事先留意一下周圍，所以我踩上棵樹時由於唔食力所以棵樹就往後傾，搞到掃到果位小姐。咁我又係衰既，我就咁講左句對唔住、唔好意思整到你我就無理佢繼續爬了。點知我跟住又聽到慘叫話：「有無搞錯，你整到人喇」咁我咪話唔好意思囉。
跟住佢就喃喃自語咁話「整到人幾次啦，仲要唔識問下整到人有無事」
我心諗,：屈墮忽！你無腳架? 唔小心整到你一次我咪講左對唔住囉，見你無乜大礙，我咪繼續爬囉，但係你見住我爬，你又唔識會行開架喎，喂呀大姐，呢度山黎架，地方好大架，你怕人整到你，你行開少少已經無人會整到你啦；你都幾好野架喎，我可以掃到你三次，咁即係你次次都企係度比我掃，情願抱怨同黑我面都唔識得行開啦。喂，呢度無人服侍你架，當然你男朋仔係度，但佢都係度爬緊石呀，你又做乜硬膠膠咁企係度呀?
咁我就梗係費事同有病(患癌)既人多咀啦，而且一開始真係我唔著，我亦真係覺得唔好意思。之但係佢跟住落黎咁樣單單打打比說話我聽而唔係同我講呢，我就真係覺得我真係睬你都有問題。咁佢男朋友仔爬完石落返黎梗係第一時間呵返佢啦，仲同佢講唔開心既野就唔好諗，即時錫返佢。噢咁咪幾好囉，有個錫哂你既男朋友豬呵返，不過呢度係山野黎，你要耍港女脾氣你就落返去城市入面慢慢玩啦。唔係黎到山中心草叢入面咿咿呀呀囉；我明白你都係想上黎影張相打個卡上網厄個讚，我明。咁所以我整到你我咪對唔住囉。
由於氣氛突然因佢而尷尬左，咁所以陳寶決定取代本身諗住探路先上石的我而佢上先。咁阿嘻嘻1號亦都好好人好有耐心咁同陳寶講點樣上石會容易一點，而果然陳寶都好快就上左犀牛石，咁隨住公主癌患者同駙馬哥離開左，我地又再專注返係爬石同埋影相呢方面啦。咁陳寶從犀石頭慢慢探步落左犀牛角之後就當然擺出唔同姿勢啦，我就在下面幫佢影相同埋就話山系男孩終於唔駛輸比進階版山系女孩啦。咁當然同悟空賓賓就梗係無得比啦，但係起碼已經叫做，要贏人，先要處自己。事關我事前都覺得佢真係未必會上石架。始終佢既將來已經唔再係一個人咁簡單喇(順便係度恭喜埋佢啦)。咁幫佢影完之後，佢亦都選擇左行呀賓賓跳返落黎果個位落石，然後就輪到我喇。
咁我之前試過由落石位上去係失敗左，咁唯有就去返其他人上石果個位上去啦；咁陳寶就教我話最緊要踩住果度綁在樹上的黑繩借力再上，但係我埋到去發覺又其實真係唔係想像中的困難，總之我就唔知點樣憑住我平時周圍爬既經驗，不消半分鐘、繩都唔駛踩，就已經上左石頂、即犀牛頭了。跟住係果度往下望，除左牛角尖，就係開揚的景觀了，不過如果要飽覽下面大海的景色，則之前我地走錯路的果個位、甚至於路程剛開始無耐的那堆亂石上會更好。好喇，講返爬石，其實在石上面睇，條路往牛角尖又唔係想像中咁窄，至少我又真係唔駛慢慢探步向前，而係正常的行過去就已經到了牛角尖了。咁除左我都完成左山系男孩既使命之外，其實今日出發之前有段小插曲：就係我同我個好表妹講話我今日會黎犀牛石呢度，而佢上次黎呢就沒有爬上犀牛角，所以當佢知道我會黎時就問我敢唔敢爬，我諗都唔諗就答佢話梗係會；而佢就話：你去到睇下點先再講啦。咁我就答佢：「唔上正衰仔」，咁所謂古語有云：不到長城非好漢。而家有我YY 唔上牛角正衰仔。咁好明顯啦，雖然我又真係一個衰仔，但起碼呢個時刻做少一陣咁多先啦。
咁影相其間又有另一批山系中年人出現，一開始佢地就唔多敢上黎，但係見我影得咁過癮佢地其中一兩個都打起爬上來既念頭。咁我就在石上指示完佢地上黎既方法之後就跳返落石啦。咁呢堆人有大部分人都唔敢上石，於是就在石底下等待他們的同伴，咁佢地見我同陳寶得閒就叫我地幫手影相，咁我梗係將呢個神聖既任務交比出色既攝影師陳寶啦；而佢又真係影到果幾位姐姐靚一靚，搞到班姐姐好不開心，爭住要搵佢幫手。最後陳寶就教佢地如何攞個靚角度就可以影出心目中既靚相，之後陳寶就同我準備收拾離開，但其間仍然聽到其中一個姐姐話：都係阿哥仔幫我影果張係最靚既，阿邊個你記住返去傳返張相比我呀。足可見陳寶係幾咁得到果班姐姐既歡心呢。
咁佢地就有佢地繼續影，我地就決定要回程啦，因為我地其實今日係約左另外兩寶一齊食晚飯的，所以本來打算行完犀牛石有時間的話就從軍營行返落去赤柱先走，但係最後我地都係決定原路折返走到出去軍營口的巴士站就坐車出返市區同超級寶和高潮寶回合食飯就算了。
就係咁樣我地既拆禮物日山系嘻嘻爬犀牛石就完滿結束啦；之後我地食完飯，就四個麻甩仔一齊由灣仔行到去銅鑼灣皇室堡的哈根大師食雪糕火鍋。其他人眼中我地可能真係異數，因為成間鋪頭就真係淨係得我地四個麻甩佬，其餘既都係囡囡，又或者情侶，不過，這就是我們四個的情懷，我們才懶理別人的眼光呢。或許，這就更加證明了這份友誼是這麼的珍貴吧。