初五雞胸探望夫

路線: 黃大仙> 慈雲閣> 沙田坳> 麥五牌坊> 雞胸山> (滙合)麥徑北路> 上獅山頂路口> 獅山西路、木風雨亭> 97回歸亭> 望夫石> 紅梅谷路> 大圍新翠村麥當勞> 沙田河畔
登山之友: 準備與Y

是咁的，今次郊遊之行可謂有計劃得黎又即興，即係過年前一早就同準備仔約好年初五就去郊遊啟市，而即興呢就係講緊呢條行雞胸山呢條路線。因為準備長年不在香港，終於能夠有時間見到佢返黎香港短暫逗留，梗係相約要做我地「例行公事」- 郊遊啦。話說自從準備仔在釣魚界半隱退之後，我地既戶外活動基本上就只有郊遊、郊遊、同埋郊遊。但係呢，我同佢出親黎行，都一定最後會去到一個點就係，探訪麥當勞叔叔的餐廳。唔緊要丫，麥氏係香港擁有龐大勢力，去到邊度，都一定見其蹤影，所以無論行邊一條路線，都唔會阻礙到我地既「約定」。
咁新年大家都飲飽食醉，夜夜笙歌，所以我地出發前一晚就決定左都係唔好揀一些咁艱辛的路線黎搵自己教飛，一於輕輕鬆鬆開年發市就算了。本來我另外揀左幾條要去到較「郊外」感覺的路線，不過準備晚間有約，所以佢話不如揀返一些市區型路線，好似獅子山下的沙田古道果種就差唔多了；咁樣我上網睇一睇，見到有條路線都係附近，個名又唔錯，於是大家一致決定行雞胸山呢條路線然後落沙田搵間麥當勞作個完美結尾。
咁我地初五就在黃大仙地鐵站集合然後坐小巴上慈雲山開始我地既郊遊之旅。一貫熟悉既慈雲山村，一貫熟悉既迴旋型停車場，再一貫熟悉既慈雲閣之後，就又黎到沙田坳道了。沒有選擇經過士多果面，而係揀左麥五路徑直上雞胸山，我一行入呢條路徑先發現原來之前同嘻嘻三寶行獅山落山時原來就係行左呢條路返慈雲山的，不過今次只係倒返轉黎行。路線唔長，好快就已經行完雞胸山，不過因為原本雞胸山行完之後就會折回麥徑然後可取道回沙田坳走人，咁我地係分岔路口就有所猶豫，因為我地想落沙田而唔想返九龍區落山，也唔想落返沙田坳道經士多落沙田古道。咁正當我地猶豫緊既時候，有個阿叔搭嗲教路，雖然唔係好明，不過最後都知道原來走另一面條路，佢口中落九龍塘既路線，係可以出到大圍既，咁就岩哂啦，一於直行。就係咁樣我地好快就去到我本身打算經過既地方，97回歸亭，然後取道望夫石經獅子山隧道落大圍。其實一路直行、當經過上獅頂路口時，準備已經完全認得路，因為佢次次上完獅子山頂落黎時都會行返呢面走，而我次次落黎之後就會行往九龍方向，即係我來的方向。咁我地當然今日就唔上獅子山，於是繼續走，終於黎到回歸亭小休。
之後我地就取道往望夫石方向走；丫，話時話，行左咁多次獅山，走左好多不路的分岔路上落，竟然從來都未行過馳名地標之一的望夫石呢，今次終於有機會了。天朗氣清，黎到望夫石當然要打卡一番，我仲爬左出去較邊緣的大石上，一來打卡更好效果，二來感覺可以更能飽覽景色。天色咁好，直頭一路望到遠方馬料水出面大埔海了，真係身心舒暢。影完相我地繼續快步上路，因為剩下來目標只有一個，走出山林，回歸城市，找尋麥當勞叔叔。而話咁快我地就已經走到出口，沿獅山隧道旁小路落到黎紅梅谷路；然後左有隆亨，右有新翠；又唔知點解比我地是但二揀一之下誤打誤撞入左黎一間非常富有懷舊色彩，是九間尚有「古早風」之一的新翠村麥當勞。這裡有懷舊而又色彩豐富的麥當勞叔叔和朋友壁畫，而準備今日一身既打扮更係同畫上的漢堡神偷不謀而合呢，認真巧合！
啪完麥當勞，我地圍住新翠同隆亨行左個圈就出返大圍火車站，但係又唔想咁快分道揚鑣，於是諗返幾兩三年我地係大圍同沙田半夜漫遊同飲夜茶既時光，然後決定又再行返去沙田新城市先至講再見，好不痴纏(誤)。而隨住我地黎到沙田，梗係又要去探一探個麥當勞啦，但頭先已經食左個餐啦喎，邊度仲食得落呀? 仲唔係為食而食? 你可以咁講啦，但係我地有「為食卡」丫嘛！呢個買這送那的「為食卡」簡直可謂為我們而設。準備仔個餐而後唔駛餐飲可樂轉檸茶！因為我地可以照樣買個餐要可樂，然後用為食卡買檸茶再送兩個蘋果批或是麥旋風又或是黑牛！你話係咪爽歪歪呢? 就係咁樣係沙田我地又再啪多次麥當勞之後終於走到來火車站了。而今天的新年探望夫石啟市之旅就到此為止了；得悉準備仔過幾日又要飛往外地「工幹」，今日可算係呢幾個月既最後一行，咁唯有又再祝佢一路順風啦！

沙田坳道的猴子