驚險選擇爬玉桂

路線: 利東邨-> 配水庫-> 三揀一驚險-> 玉桂山-> 連島沙洲-> 鴨脷排-> 燈塔-> 原路回玉桂-> 遊繩落山-> 港島南線-> 中記

登山之友: 超級氏伉儷與Y

是咁的，呢個同超級兄弟既玉桂山之旅可謂萬眾期待終到來，因為自從上次登南塱視察玉桂 https://yy08.pixnet.net/blog/post/106355470時從南塱山上面同超級兄弟望住位於對面既玉桂山同鴨脷排時我地就已經講話有機會就要一齊去「開發」玉桂山之路。

點知一講就整整一年後先可以實現到我地當時既承諾；而今次同行的，則還有超級嫂。咁講返由於我就住附近的，所以我就告訴超級氏鄘孋我們一於就在是日郊遊之旅的入口 – 利東邨巴士站旁等候，而他們首先則先從香港島乘坐最近才通車的港鐵港島南線而進入位於鴨鴨島的利東邨；本來坐巴士更為直接，不過佢地話未試過全新無人駕駛的三卡港島南線，所以最後都係選擇左乘坐港鐵而來。

好了，集合左之後，我地卻唔係選擇往巴士站旁的叢林入口出發，反而改由往配水庫足球場的那條石屎路上山。然之後我地就黎到是日最為關鍵的地點- 三岔口指示標。點解佢叫做三岔口呢? 就係因為呢一個分岔路，按指示有三條路徑，而三條路徑都不約而同地可以到達玉桂山的山頂；不過雖然三條小路皆通玉桂，但係三條小路嘅難度則各有不同。分別為舒服、中等(需遊繩)、和驚險。之但係我想講既係，其實我地黎到呢個三岔口時我地並無留意到呢個提示牌，而我地睇那些郊遊介紹文時又無認真注意到呢三條路線既分別。所以當見到有分岔路口時我地就是但揀左一條上山，一路行我地一路係度奇怪：點解咁多山系女孩都可以黎到行，甚至有細路仔都可以行既? 呢度根本唔適合新手、亦唔適合一家大細喎，呢度根本係要手腳並用咁邊扶邊爬的上山喎? 好不容易終於上到玉桂山頂時，我地再望下其他分岔路我地就明白我地其實係揀左一條最為艱難的路線了。不過呢個時候我地仲未知原來有分三條，仍然只係以為有我地呢條上山驚險路線同遊繩的那一條中等路線，而仍未知道其實有更為舒服的路線。以致到最後回程離開的時候雖然已經好攰但係我地就都只係揀左中等難度既遊繩路線落山而唔係揀條舒舒服服既山徑離開。好喇呢個都已經係後話啦，不過想講既就係，以後郊遊，最好就真係做足事前準備工夫、了解左郊遊路線，同埋準備好相應工具。好彩今次記得提醒大家要帶手套，如果唔係都唔知點樣爬上呢條「驚險」上行路段同埋遊繩上落山了。

在玉桂山頂休息左一陣，三百六十度的飽覽完整整一圈的景色之後，我地就開始要下山遊繩往鴨脷排進發了。經歷左頭先既驚險上山之後，其實餘下既路程對我地黎講都已經唔在艱難，只要時刻保持小心就足夠了。就喺我地落到山坡一半既時候，我地超越左兩位年青小伙子，點解要特別提起佢地? 係因為其中一位年青人佢對落山好似好有困難咁；佢唔係好似我地咁樣捉住條繩就咁行落去，而係慢慢的坐住跣落去。噢賣葛，可想而知咁樣跣法就係要跣到何年何月先可以由山上跣到落山腳? 所以咪係跣到天荒地老囉。佢既朋友仔都無奈又無奈，只能夠望住自己個同件一腳一腳的慢慢伸，佢就唯有企係度望住等。咁我地見佢地其實又無咩危險於是就咁樣超越左佢地就算了，但係真係再印證左：下次出發前真係好好做事前準備同埋評估一下自己既能力先好起行吧。

爬左呢兩位年輕小伙子頭之後我地好快就落到黎連島沙洲，這裡就是兩個島中間的一個小沙洲，如果水漲時是會被海水所淹蓋的，而我地檢查過天文台潮汐漲退表時也得知再過多一個多兩個小時就會是水漲到頂的時份，而剛巧有在鴨脷排那邊往回走的行山客也提醒我們要注意時間回來，如果唔係到時就要澗水濕腳往回走了。蔥蔥謝過之後我地亦都繼續上路，終於好快就到達我的今日既打卡目的地 - 「鴨脷排燈塔」了。之前同鬼仔信跟艇出附近釣魚時，偶爾也會駛到這邊燈塔和碼頭一帶搏搏運氣，不過由陸路走來，卻是第一次！這裡風景和上頂上俯瞰的各有不同、各有特色，不過燈塔呢一點就肯定係鴨鴨島的最南點。從這裡也可以看到那些進進出出的大貨船、一艘一艘的，井然有序的。我當然要揀返隻靚靚的，拍到我與燈塔合照的背景裡呢，哈。

難得同超級仔終於黎到我地一年前的相約之地，梗係要黎返個合照啦；於是我地都爬到上燈塔上面去，好讓超級嫂為我們拍返幾張紀念友誼的相片。之後我梗係要幫返佢倆個係度影相留念啦，話哂咁辛苦，經「驚險」再遊繩才來到，日後點都會係一個好好的回憶嘅。

休息左好一陣子，計岩時間就準備起行回程，事關真係怕會日落天黑不好走，所以唔等夕陽到來我地就動身啟程了；情願到時在玉桂山頂時才看一個夕陽映照南丫島的景色吧。一路從燈塔往回走的時候我地都係度討論緊究竟剛才果兩個年青人仲會唔會卡左係玉桂山腰；而當我地到達連島沙洲時，真係仲見到佢地兩個先至岩岩動身回程，看來佢地真係喺山腰掙扎左好耐最後決定打消前進既念頭。咁都好，因為如果佢地繼續卡係果度，我同超級兄弟都講話到時我一定會開聲問佢地駛唔駛幫手又或者勸佢地及早回程，以免天黑被困山上到時見埋報就真係好無謂喇。而我地過左連島沙沖之後就繼續上山，而走到有繩的部分時，大家都拉著繩、借力就往上走。走著走著，先至上左一半，而可能超級兄弟身形比較健碩大隻，亦即身子較房，所以佢上山其實算係最吃力的一位；反而我同阿嫂則比較輕鬆。好不容易終於返回玉桂山頂，係度再次打卡之後，我地就決定繼續回程，畢竟呢個時候已經黃昏，我地怕再唔行天黑就麻煩。而又由於唔知到有「舒服」呢一條路可供選擇，所以我地揀左「遊繩」山到隨住繩索除除而下。咁其實有繩扶住的話，只要小人一點基本上都能輕鬆應對，只不過可能呢個時候大家都比較累了，而且亦都唔知這些繩子的堅固程度，所以我們都不敢怠慢，繼續保持謹慎，慢慢的扶著繩子往下走。而最後我地終於隨繩子黎到三岔口，並見到今朝錯過了的三岔口指示路標。大家則繼續邊慨嘆邊繼續往回走，最後則從巴士站旁的小徑出來，重回城市的懷抱。行到無哂電，第一時間即刻入七仔隊返支葡萄適，之後大家決定要食餐飽飽；於是就往我地既鐵竇 – 中記出發去了。而我地既驚險玉桂之旅黎到呢度亦都告一段落了。下次再來的話，我地還是選擇舒舒服服就好了，學阿陳車話齋，為什麼要這麼艱苦呢?! 哈哈

出發時的「驚險」而上