維港聚首齊做獎門人

日期: 04/07/2017
農曆: 三月十一
地點: 維港白石一帶、打浪排、石澳對開
艇家: B記
釣友: 鬼仔、YY、阿丹與舅仔費格斯x2
天氣: 全日有霧、西南風 2-3級
水流: 靜流、水質不俗
釣穫: 什魚一堆

是咁的，呢一次釣行可謂千呼萬喚始到來得黎又再帖上一點即興。千呼萬喚、萬眾期待的係講緊我同阿丹一早二月份時已經開始再計劃釣行，奈何不是佢唔得閒、就是我唔得閒、又或者係他的朋友唔得閒。等到大家都得閒時，天氣又唔好；所以終於比我地拖到四月，終於見到有幾日好天得黎我地幾隻釣腳都有空，於是即刻打電話問B記有無期，然後即刻約期，所以可算是計劃左行久但又即時約期的釣行。而且，本身我地就預左四個人去的，之不過鬼仔又咁岩從紐西蘭那邊回港渡假兩星期，咁樣梗係即刻問下佢會唔會加入到我地啦，畢竟而家想同佢釣魚都難左好多啦，佢已經變左身成為鬼佬，一年很多時間都不在港了；所以一見到佢返黎我梗係叫埋佢黎啦，雖然佢話屋企人有點微言因佢一回來第二日就同左我去釣魚，但係好彩佢地都明白約局釣魚係好困難，尤其我地大家都各有不同生活，所以最後鬼仔都係加入成為釣行第五人！

因為鬼仔之前一晚先至落機，所以釣具都要我幫手補給，不過唔緊要啦，我本身都要補給返一些波子鉛同子彈鉛。而且而家交通方便左好多，在家行兩步就到地鐵站，然後直達西灣河。咁有佢同我同行，即係可以分擔我一個人準備架生、魚餌既重量，所以買多一點其他東西都無所謂，最緊要上船玩得開心、食得開心、飲得開心！

咁我同佢買完餌就到西灣河上船地點集合，阿丹、費格斯同埋佢女朋友已經到達了，咁就好，即刻招手叫B記埋黎落艇出發！今次落艇格外興奮，除左可以同幾位好朋友一齊釣魚之外，咁我買左既新架生都終於可以玩啦。所以一上艇就急不及待將我新買既橫絞同埋槍柄竿拎出黎，首先要同我隻橫絞上布線，然之後再駁埋支竿咁就整裝待發了！然之後就再綁好手繩同埋幫同行朋友仔綁埋，然之後再用索帶扎好事先張揚要帶的動作攝錄機、較好角度之後咁就懷著興奮的心情等待到達釣點了。呢個時候，阿鬼仔竟然提醒我話我地以往都會每人夾錢出黎玩「大魚獎」，咁今日會唔會又有得玩? 咁我就梗係玩啦，阿丹聽到之後佢就話最近賭馬當旺點可以唔參加，一於加入咁話；於是我地就將我地既獎金都放進我放架生的膠箱並拍照立此存照，待是日賽事完結之後再拎返出黎頒獎。

終於到達我地必然既釣點 – 白石角，等B記一聲「落得」我地就立即落餌作釣。講返魚餌先，我同鬼仔、阿丹就梗係落生蝦仔作釣既，但係費格斯同埋佢女朋友就唔用生蝦的，所以佢地就選擇左一早已經染紅並醃製好的紅蝦仁做餌。至於費格斯自己秘製的試驗性武器 – 貓糧尤魚，無錯，係罐頭貓糧混合尤魚再加蝦汁而成的釣餌，則先備用留待晏點再作嘗試。

唔可以話天氣不似預期既，因為睇天文台天氣預測都知道是日會有霧，而岩岩到達時，雖然都有點霧，但係能見度都大約仲有一海里，所以我地都仲可以係白石呢度作釣，但係點知就愈釣愈大霧，搞到連邊度係白石都見唔到，再加上魚又唔係好開口，所以B記就提議我地暫時離開白石而轉至打浪排碰碰運氣了。呢個時候睇下個生倉既魚，真係兩隻手都數得哂，而且都仲要係細型石狗。咁一於就轉位吧，睇下去打浪排有無好轉啦；不過今日個海都唔知咩事，除左有大量「電報員」打電報之外，其餘既魚真係一律放假，搞到我地好多時根本無從起手，因為牠們都只係識得打電報，從未有認真一口令人振奮的魚訊。不過點樣不濟，都總有一條半條唔係石狗吧? 就係我地仲係釣緊石狗同埋梳蘿之際，B記終於都從艇內掟了一條手掌沙立出黎，咁大家都總叫做醒神返些少。但係暫時真係可一不可再，結果我地係度徘徊到中午，都仲係只得小貓三四隻，加上霧又未散，無奈地B記再度提議轉位，但就只有轉過石澳對出海面作釣。講真，以往如果白石、打浪排有魚，根本我地都唔會車到過黎呢面試下運氣，但係今日個海真係靜過乜，咁既然白石又仲未去得，打浪排又無咩料到，不如過黎呢面試下啦。

而由於今日到現時為止都仲係咁平淡，咁鬼仔就係度講話大魚獎都真係可能唔駛出現，咁我就加返句最緊網上都幾流行、節錄自經典電視節目「超級無敵獎門人」既用語：『既然大家都咁水皮，一於打和啦，SUPER！』於是乎呢句說話就成為左我地今日全日以後不斷重複既說話了。只要一中魚，但係知道又無料到只係魚仔既時候，喺魚未上水既時候我地就已經講定一句：「SUEPR！」來表示可以唔駛望過黎呢邊起緊咩魚了，哈哈，真係可算是無奈之中找回一點樂趣。石澳對出呢度都係碎石底多，所以中親基本上都係石狗，所以我地幾個既「SUPER」之聲都可以此起彼落了。不過就係我中緊石狗之際，阿丹竟然呢個時候就話中返條有小小重量既魚喎，上到水面一睇，又果然係一條良型手板石釘喎。雖然係比石狗要大，但係如果要將佢當做大魚獎得主黎睇，又真係其實算係好慘烈而且勝之不武呢。但點都好，總算都叫做除左B記掟出黎既沙立之外暫時成績最好既一條了，哈，都真係笑唔落啦。繼續釣多陣，本身白茫茫一片既海面逐漸消散了不少霧氣，能見度有所提升之下，我地就問B記可唔可以再車返過白石果面試下運氣，始終我地對呢個永遠充滿著無限可能既釣點都比較有信心同埋希望。

就係車緊過白石既期間，望下個鐘，都成兩點了，鬼仔今日竟然仲未「訓覺」，可謂極度出奇得黎又比面及認真，絕對令我「刮目相看」。佢最多都係喺車緊去白石既期間攤左一陣，比起平時釣左一陣、飲多兩罐、再食埋包薯片就一定攤係船頭「長眠」黎比較，咁樣根本就唔算訓覺！可以看得到今日佢既決心係幾大，奈何到而家佢同我都仲未有代表作。

到左白石，除左電報員之外，釣況仍然未有太大改善，咁呢個時候費格斯就拎左佢既秘密武器- 貓糧尤魚出黎作釣，但係好明顯，今次既試驗品係極唔成功既，因為連電報員都唔多識得欣賞呢個咁前衛既嘗試；反而一直在艇內默默耕耘既費格斯女友，卻靜靜起革命咁連起數條狗仔！雖然都只係小魚幾條，但已經燃起左費格斯既戰魂了，即時勾返兩粒大紅蝦仁落去，希望能夠突破停滯不前既戰績。吖，又真係比佢既鬥志感染到喎，竟然呢個時候比佢抽左我地今日第一條既古惑仔呢！真係好彩佢無加入我地既大魚獎行列，如果唔係呢條古惑仔已經可以拍得住阿丹的那條石釘仔了。講起石釘，終於係釣左咁耐石狗公之後比我中返條良型石釘，即時唔再剩係講「SUPER」，而係同阿丹講：「打和啦，SUPER」哈哈。咁我就話如果今日中既都只係呢種大細既魚的話，咁就真係只好宣佈全日打和，獎金撤回，擇日再戰了。其實，如果今日費格斯參加埋一份的話，佢真係都算做半個贏家架，因為呢個時候只見佢又中魚啦，而且佢話今次比之前都重一點，終於上水一睇，手掌雞雞一條！你話丫，佢中完古惑仔又中雞魚，係今日我地咁靜局既釣況之下能有如此收鑊，係咪已經贏左一半?! 咁但係佢唔參加我地既大魚獎比賽咁唯有忽略佢既「戰績」啦。然之後我地繼續就係白石呢度繼續作戰，但係今日魚真係唔多開口；我都算係叫做抽多兩條釘仔同古惑仔了，鬼仔果面直頭真係水靜鵝飛，除了狗狗、還是狗狗。所以我地之後都仍然只係「SUPER」之聲不絕，但驚喜欠奉，直至完場。而B記都只係掟多一條手掌沙立出黎之就沒有睇頭了，完場時同佢講起佢先至話今日就算沙立仔都食餌食得好精口，不是一啖就食埋黎而係拉下拉下咁試完餌先食；佢又一兩口感覺到係大約大條少少既沙立試餌，但係最終抽擊不成落空了，所以到最後今日都未有斤裝魚見面。唔駛講啦，由於成日無大魚，所以不單止無用過撈基，就連事先裝好的攝錄機都無功而還無野好錄呢！就係咁樣我地計劃已久，而又即興約艇同加入鬼仔既釣行終於都落幕了。宣告收繩起行走人一刻，我同鬼仔不約而同都大叫一聲「SUPER」，以示大家今日打和，人人都咁水皮，人人都係白石獎門人！「SUPER」！！