華嫂威名響白石

日期: 07/14/2017
農曆: 六月廿一
地點: 維港白石、鶴咀開外一帶
艇家: B記
釣友: 阿丹、舅仔、朱爸爸、YY
天氣: 天晴有驟雨、東南風 4級
水流: 慢流、水濁
釣穫: 沙立 x1 (磅頭)、細鱗 x1 (4斤x1)，石狗幾斤埋單8、9斤

是咁的，今次釣行我地出左東龍島外白石對開一帶，一見到「白石外一帶」呢幾隻字我幾可肯定準備仔又會在妒忌了。不過呢個都係後話呢；講返是次釣行，之前其實六月果陣都已經想釣了，但基本上成個六、七月都在下雨，難得前兩日回港時見天文台話黎緊兩三日都大致天晴，間中再驟雨而風又唔算大，於是短訊都唔發立即打電話搵阿丹問佢有無興趣去釣魚；本身諗住如果搵唔到其他人的話我地兩個就去玩四匹仔止痕的，不過阿丹竟然接電話就已經同我講話佢舅仔都得閒可以加入，咁我又問一問以往星期五都唔多得閒既朱爸爸，佢又話無問題喎，咁就梗係即刻打比B記約實星期五見啦！
唔好諗住準備活動到呢度就完結呀，其實就係落實左行程我地先開始忙住準備呢。首先阿丹就話由佢負責買同醃製蟹粉紅蝦仁；至於我就預定左生蝦，然後就約朱爸爸去睇魚竿了；事關上次同朱爸爸去釣魚他的魚竿因老化而壞掉了，而且那隻絞也到了該隱退的時候了。咁一諗到過兩日就要釣魚，於是就相約佢一同出去挑選「兵器」，畢竟釣具還是要自己心儀的才最合適，而且所謂工欲善其事、必先利其器呢。終於在左揀右揀之下，買了一套能夠短兵相接的小船竿和船絞，咁就萬事俱備、只欠東風了。

終於黎到出發的日子了，大家係碼頭集合好之後就立即上艇了。就喺大家綁架生準備緊既時候我就已經同阿丹說在參考過無敵黃金潮汐流水表之後，得知是日漲定時間大約是中午十一點半；換言之，漲定前的大約兩個小時之內開始會是黃金時間，之後到漲定之後等一陣又再在大約一小時的小水流，將會是我們全日最值得期待的兩個時段。這意味著我們一到達釣點就一定要立即進入作戰狀態，因為這將會是正值黃金潮水時段呢。

今日天氣唔錯，而且風勢亦都唔算太大，所以B記從避風塘一駛出黎就直劈白石角，絕對唔在其他釣點浪費時間，務求速戰速決。而我等左咁耐時間既兵器終於又可以再到上戰場了！上次維港聚首齊做獎門人 https://yy08.pixnet.net/blog/post/106358506 玩得唔夠喉，千等萬等到今日梗係要再試真一點我支神兵啦。所以一到釣點、聽到B記一聲「可以落得」之時，我隻絞杯已經同時鬆開出線了，這可是夾雜了希望與興奮的出線呢！一到底其實已經開始感覺到魚訊，不過，都是非常小口的「電報員」式魚訊，想要抽擊可謂無從入手；但係釣魚就係要考驗一個人既耐性同埋判斷力，只要耐心地等待並感覺到有可以抽擊的一刻就絕對要快、狠、準地抽竿，不能手軟。咁一來期待已久，二來知道早上呢兩個鐘係黃金時段，所以一開始就已經特別金精火眼，打足精神地的拿著竿等待魚兒來襲！咁這些小魚又點敵得過充滿戰意的魚仔殺手呢?! 所以好快我就先告開齋了！雖然係石狗一條，但係絕對係一個好開始。啊，係度順帶一講，其實由於我地都係坐在艇頭釣位，所以基本上都比較少留意得到在艇內候艇和作釣的B記的釣況的，尤其B記很多時都將釣到的小魚先放在小桶內儲夠一小堆才拿出來放生倉或入冰箱的。咁當然，如果佢係大手抽絲同埋收魚咁我多數都會睇到既，因為我是坐在艇頭並面向住艇倉的，所以如果B記需要幫手的時候往往我都會留意得到的，未等佢開聲我通常都已經問定佢駛唔駛幫手咁樣的。
但係今日，我真係留意唔到啦，因為呢一刻黎得實在太快！就喺我岩岩抽完第二條石狗，隻艇先返第一次寨都唔夠五分鐘，而我又特別專注於要抽竿起魚的時候，忽然艇來傳來B記的聲音：「阿Y，撈簊唔該」。我望一望入去，只見B記已經一手一手的、一收一放地在收線，好明顯條魚有返咁上下戰鬥力呢！咁我就即時企起身拎撈基，然後交低我支竿比旁邊的阿丹之後就直奔艇尾了。可能呢一刻對於其他人實在太過突然了，所以當我叫著是但搵個人來拎手機拍低B記上魚的精彩時刻時，竟然無人理我。咁我又唔可以呢個時候走左去拎手機，因為魚都差唔多見光了，所以只有打消拍攝上水精華的念頭了，只能專注於等待魚兒見光的一刻了。就在B記一手一手繼續收魚的時候佢就話條魚應該係火車頭，咁佢叫得撈基我都知起碼有兩斤，因為以往如果條魚無返斤半魚佢基本上都係就咁就彈條魚上來的，而家難得佢叫得撈基，我是絕對有所期待的！好啦，千呼萬喚咁終於等到白白的魚影出現了，果然係火車頭呢。但第一下插撈簊我竟然老貓燒鬚的落空左，要插第二下先成功將條魚收入網內；可能係見到條魚太過興奮所致呢！點解? 因為一切來得太快之餘條魚亦真係有點大餅，目測有成三斤半至四斤！咁將魚撈好上黎拎到出艇頭時，本來我就應該將條魚立即放入生倉既，但係一來諗住會有人拎黎影下相，二來我交比阿丹暫時看管的魚竿已經勾左石所以我要忙於處理，以致條魚竟然就仲係個撈簊入面就咁樣放左係艇頭幾分鐘都無人理會！睇黎原來除左我之外真係無乜人對見到呢條魚起到上黎有特別興奮、雀躍的感覺呢!喺果一刻我承認，真係有點感慨呢。

咁見到B記咁快就中魚，除左只有繼續驚嘆黃金流水表的準確威力之外，就梗係想自己都中返條好野啦，於是即刻精神抖擻咁揀左隻大沙蝦、然後落餌、期望趁住黃金流水完結之前，下一個叫撈簊的將會是自己。不過釣況之後就轉趨平靜，而大家見到咁快有魚壓倉之後可能感到無哂壓力，所以中魚進帳速度極為緩慢。我同阿丹都只有零星進帳，而坐在另一端的舅仔同朱爸爸更是尚未開齋；當然，其中時份舅仔是上過幾條雞泡的，但係食用魚卻是一條都尚未入帳，可能同佢有少少暈船浪、欠缺戰鬥力有關吧。不過都唔可以睇少佢既貢獻架，因為係得佢先釣到雞泡，我同阿丹都無事，所以佢可能真係幫我地其他人吸引哂所有雞泡都去哂佢果度而令到我地可以繼續相安無事地釣魚呢，哈哈。
就喺佢暈船浪唔係咁舒服咁休息左一陣、重新投入作戰之下，終於比佢孖勾中魚了 – 一雞泡一石狗，亦即終於開齋啦。咁通常只要一開齋，就是陸續有黎了，不過此時可能流水已經差唔多漲定，所以魚訊亦變得稀疏。咁B記見呢面無乜料到，於是決定叫大家繞繩，一於試下轉位、車過對面的石澳對開一帶睇下有無轉機；就係咁樣，我地就離開呢個永遠都充滿無限可能、而今日又再度展示出佢威力既白石角了。

車到過鶴咀對開作釣，呢個時候望返過東龍島果面，雖然仲係晴空，但中間卻殺出一舊大雨雲並下著傾盆大驟雨，都不禁慶幸我地及時抽身而退。講返釣魚，呢面既排口比白色出面的沙石底更為岩蠶一點，比較多粹石位，雖然勾石機會大一點，但係中石口魚既機會估計亦相對多一點。喺我中返一兩條石狗時，坐在對面的朱爸爸終於發市了！雖然也只是石狗一條，但總算守得雲開，算是個好開始吧。而阿舅仔亦都不再只是雞泡魚為伴，也有一兩條石狗上水。阿丹雖然一邊喊著紅衫，但係上來的仍只有石狗。咁究竟呢度係咪得石狗呢? 答案係否定既? 因為呢個時候只見B記忽然又從艇內行出黎，手中拿著的是一條磅頭沙立！絕對係比我們話這裡只有石狗公的最應棍打臉！咁之後再釣多陣，我就仍然係石狗，但係阿舅仔，阿丹都釣到五蚊銀扯旗。但係我就仍然堅持用生蝦，所以就與五蚊銀暫時無緣，而B記則有幾條較似樣的手心扯旗釣到。釣多陣，佢仲彈左條手板大芝麻班上黎添，真係繼續今日叻叻豬既戰績。
而本來都仲諗住係度繼續釣既，但係呢個時候雞泡忽然殺到，連殺B記同阿舅仔幾個措手不及，鉛勾損失幾套；加上流水又開始轉變，而咁岩另外隻艇星哥又去左打浪排果邊釣，咁B記就提議繞繩往打浪排試下運氣了。通常轉左新地方都總會有人有些少運仔行既，今次終於輪到朱爸爸了。就係我仲係煩緊比那些五蚊銀電報員攻擊既時候，突然聽到對面既朱爸爸話；終於到我喇。望下佢支竿，又真係有返少少重量喎，咁佢一路收、一路收，終於上到水面，良型黃釘一條！朱爸爸叫我幫一幫手，於是我就用個蝦撈簊將條黃釘撈上黎，目測都有成六兩，認真唔錯，真係真正既守得雲開呢！新出現品種除左黃釘，仲偶有池仔追勾上釣。至於我，黃釘同池仔就遇唔到啦，不過釣釣下突然都有一下較似樣魚訊，一抽即中亦有少少重量，上水一看，手板石釘一條，即刻同佢打返個卡先啦。諗住可能會有第二條釘釘出現，可惜之後都只係得返狗仔上釣，咁無乜景之下B記又再決定轉位，到是日最後一個釣點了。

喺呢個釣點我基本上一勾生蝦一勾蝦仁的釣組往往蝦仁被吃得清光，而沙蝦仔就腳仔全被吃掉淨返個身，一看就知道是扯旗仔所為。咁所以大家都用多左蝦仁作戰，只淨返朱爸爸繼續用生蝦等大野。咁我地偶爾中下石狗仔、同埋扯旗。我就邊釣邊同阿丹講話今日都仲未見到半條惑魚同紅衫，而阿丹就更是口中唸唸有詞話好想中紅衫，那怕只是一條也好。講講下我忽然有魚訊，一食一抽，會游兩下，上水一睇，古惑仔一條，即時為我地今日既釣魚集郵薄再添一員。諗住古惑仔通常都起碼有幾條釣下，但係又真係只係得佢一條出現。而呢個時候集郵薄又要在出動了，因為阿丹又抽中一條烏絲；真係好似每樣魚種除左石狗同埋扯旗之外，樣樣都係得一條咁滯呢。就係我地又上下狗仔，又上下扯旗仔，又邊吹水時，忽然我支竿被猛拉了一下，我輕輕一逗，即中！條魚仲會走水，但力量不大，而且仲會跟水上，所以收得相對輕鬆，不過我也估計不是什麼大魚，但係上水一看，卻是阿丹千呼萬喚，夢寐以求既良型紅衫一條！在阿丹帶點羨慕既目光既同時，佢亦即刻講話，我今日其他魚都唔駛要，我淨係要一條紅衫就夠啦。咁我最後當然係成仁之美啦，不過當時未完場我梗係同佢講話叫佢自己釣一條返去食不如仲好過啦；但係集郵薄加左紅衫呢個名字之後佢地就無再出現過啦。而我之後都只係繼續再中狗仔同埋扯旗仔直至完場，反而阿丹竟然而以一條大伯父-蔬蘿來為集郵簿作結，而佢當然到最後都無釣到佢叫左全日既紅衫啦。佢完場後亦有問B記究竟想釣紅衫要車到去邊度搵，其實講真如果啱時候，啱流水，白石果邊往往我地都釣到唔少紅衫呢，奈何今日真係只可當佢郵票咁收歸左係集郵簿度就無再出現過了。

總括黎講，今日除左扯旗仔同小型石狗之外，其餘魚仔都唔算密口；不過魚種算係豐富，基本上平時能見到的常見魚種我地都有一條，無錯，係真係一條咁大把。另外，今日真係要頒返個獎比B記，因為B記真係由頭威到落尾：晨早流流中條火車頭令到大家無哂壓力，跟住魚仔又係密密上，然後又抽多條磅頭沙立，喺今日咁既釣況之下，認真係交足貨有突呢。相對於附近幾隻同B記保持住聯繫既艇釣，我地艇既收穫可謂完勝。就咁聽B記講話隔離星哥艇全日都無過斤甚至磅頭魚，至叻都係得幾條雞魚同條6兩三鬚咁大把，其餘艇亦都咩無料到，咁你話我地B記今日仲唔係叻盡全場，威名震白石嗎！？