超人女俠騎犀牛

路線: 赤柱黃麻角道軍營> 斜炮碩> 犀牛石> 原路拆返> 赤柱市集及星巴克
登山之友: 打姐、YY

是咁的，之前同打姐傾開偈，講起郊遊就講開話一齊去行時就話約埋佢班同事一齊行沙田古道既，點知由於呢個月份都算係非常炎熱既夏天，雖然叫做立左秋，但係仍然熱到無人有，所以佢就算係公司群組度吹雞都無人響應，個個都話不如等到九月後期天氣無咁熱先再算；咁我就約左佢，反正佢係班同事唔得唔係佢唔得，既然係咁，仲好啦，唔駛就住就住，因為始終如果大班人出去玩係要考慮哂所有人既實力同體能情況而再選擇路線，而因此佢班同事朋友都唔係山系朋友，所以如果選擇都只能選擇柴娃娃新手路線，就如上述所講過既沙田古道咁樣。

不過難有難挑戰，易有易舒服，無話一定要次次都搵些充滿挑戰性既路線既，容易路線都可以有漂亮景色的，不過今次我見唔駛一大班人，天氣又熱，一於搵條路線唔太長但難度上又唔太容易既路線，咁之前比左張我訓係犀牛石尖上影既相比打姐睇佢都幾有興趣，於是提議行完犀牛石再散步落赤柱吹下海風，打姐一聽就讚好，於是我地既路線同日子都已經訂好哂啦，就等出發了！

為左唔想太熱、選擇避開正午，所以已經揀左早上出發，所以十點已經係地鐵站等，不過我同打姐原來都鍾意食魚旦粉，所以出發前還是決定先到就近又馳名既安利魚旦粉啦。啪完魚旦粉我再補給埋支電解水就坐巴士直撲赤柱黃麻角炮台總站了。
巴士總站旁邊是解放軍駐軍軍營，我地在門口發生了一段小插曲。就係我地本身諗住就企係度噴防曬噴霧既，不過一來由於我地腳踏進了佢地門口既禁區標誌，二來噴霧是屬於可疑危險品，所以有位兵大哥一見打姐幫我係度噴防曬時立即從更亭走到大閘口叫停我地。咁我同打姐於是行出幾步，離開左地面標誌住禁區的範圍，再噴防曬，阿兵大哥就無再阻止我地喇。今次真係長知識了。

整色整水完我地就拾級而上了，開頭的路段雖短，但卻是在樹林中，所以走起上來，特別索氣；唯有慢慢行住上，始終唔想行下停下，咁樣感覺反而仲會卡住卡住唔順暢添。上到山頂準備進入叢林之前，我就提醒打姐要戴上手套，而我則加穿防曬手袖，這當然都是為了做好保護措施啦，因為之後的路段都需要時不是就用手攀扶或撥開樹枝前進，當然小心為上。

打姐的實力絕對超出我預計，唔好睇佢人仔細細粒，身手還是非常不錯的，根本就是一條女漢子。唔好話沿路的山路同草叢路，就算係我地既目標 - 犀牛石，佢都輕輕鬆鬆就征服左，絕對比一般所謂山系女生更強更敏捷。開開心心打完卡諗住走人啦，就見到有個(應該是印尼藉)的外藉傭工趁放假走黎郊遊仲特登換左套超人女俠既服飾上身爬上犀牛石影相。咁我地見狀，咪問下佢可唔可以影張相啦，佢好爽快答應之餘，仲肯同我地合照，仲做埋我同打姐既佈景板添，可真謂今日另一意外收穫喇！

打完卡就梗係起錨走人，回程時遇見一些行山大哥為他的同伴介紹著不同的石頭和名稱，才知道原來除了最出名的犀牛石之外，還有豬仔石啦，馬騮石啦，鯉魚石等等。由於已經將近正我，我地都已經熱到大汗淋漓，所以已經唔想再多留半分鐘，於是匆匆回程，離開這段在太陽底下的山徑。好快咁就出返大路，回到巴士總站了；不過我地是日行程終點係赤柱市集，所以沒有坐上在站上開著門等待乘客的巴士，而是繼續慢步走下山。走著走著，舒舒服服就黎到赤柱的中心了，不過可能由於感覺終於行完了，意志力一停下，感覺就崩潰了，立時感到又累又熱。所以最後選擇走進地標美利樓旁邊的星巴克、涼住冷氣飲住咖啡咁睇返剛剛在山上同打姐影的靚相咁為今日既旅程劃上一個句號。認真黎講，今日郊遊既天氣，連一向唔多怕熱既我都汗流浹背，更莫講話其他正常人如打姐般早已濕到濕無可濕了。所以我睇暫時呢個月份都係先擱置一下較辛苦既路線了，就算要行，也只適宜揀些家樂徑「散步」一下就算呢，所以，打姐既朋友同事們，我諗我地最快都要下個月先見面嚕。