力奇之友維港無火車坐

日期: 10/11/2017
農曆: 八月廿二
地點: 維港東隧頂一帶
艇家: B記
釣友: 力奇x2、肥肥、朱爸爸、YY
天氣: 天晴、、東北風4、五級
水流: 慢流、水質麻麻
釣穫: 什魚一堆

是咁的，今次釣行係延續上次力奇艇釣初體驗 https://yy08.pixnet.net/blog/post/106401784 既，因為同力奇玩完四匹仔之後佢好興奮咁問我幾時有下次我就話我唔係好想玩四匹仔喎因為要我全日都負責做艇長我覺得好累同埋無得專心釣魚，如果真係想玩，咁就一於跟我出艇啦。就係咁樣好明顯力奇就已經自動落入左呢個「陷阱」啦。而佢今次帶埋佢朋友黎其實原意亦都係一樣 - 誘導佢朋友中艇釣毒同埋買竿毒。至於肥肥，則咁岩前排聚餐食飯時講起話好耐無釣魚不如玩下，咁肥肥終於就由9月頭開始請假請到今時今日終於老細批到假，就係咁樣我地幾個就夾左幾日大家都得閒既日子比B記，最後就揀左今日啦。咁朱爸爸這隻萬能釣腳亦都當然一拍即合啦。咁樣我地就揀左今日出發啦，而睇返天文台既天氣預告其實又比我地之前預想既星期一、二都來得要好，所以已經要感恩天公造美了。

由於其實我地釣期已經係一改再改，所以力奇支魚竿早就買好了。點解會買魚竿既? 咪就係因為上次四匹仔時佢體會到原來佢帶來果支、佢平時用開岸釣既竿係唔適合艇釣用既，之後再試過我借比佢用既船竿仔之後就決定要在上艇作釣之時就先買好魚竿；咁於是我地就搵左日過去佐敦一帶逛釣具鋪，終於揀到佢既兵器了。咁訂好日子出發既佢就更加興奮啦，一來有得試新玩具，二來佢又未落過艇、成日淨係聽我講睇我比佢睇既魚穫照；咁今次終於搞得成，唔興奮唔期待就假喇。另外佢又要為佢既朋友買多一個手碌以及我不嬲都要提早一兩日就去街市搵定蝦去準備做蝦仁，所以呢幾日都不時討論住呢個話題，再加上我地亦講起上次可以食住西瓜咁釣咁開心所以佢亦都決定今次要買定啤酒汽水薯片來延續上次既快樂釣行。講起事前準備，真係不得不提一下幸好我沒有放棄醃製紅蝦仁而唔係就咁買完堆赤米就咁放入冰箱拎黎釣，如果唔係今日釣果可能會仲暗淡...

好啦，終於出發喇，由於力奇朋友以及肥肥都是九龍幫，所以他們決定先約好一齊食個靚早餐再一起上船；而我和朱爸爸就先在香港島這邊上艇再過九龍去接他們。其實一落艇我就已經叫朱爸爸準備綁架生了，因為釣點就在附近，一過完三家村接過佢地之後車多唔駛十分鐘就到，同平時車出東龍島白石外差唔多有成個鐘頭可以慢慢準備唔同，呢度可說是即到、即釣。咁當然其實心急都係無用，好多時釣魚既野我地都講緊係魚釣人。咁但係你早點落餌又真係係機會率既角度黎講係大左既。但都係果句啦，情願慢工出細貨綁好架生，都唔好求求其其綁完又算。

講返釣魚，我就好快開齌既，基本上落餌就已經好多電報員接餌了，所以唔夠五分鐘就終於等到一口似樣少少既電報員電報，一抽即上，都未於細到放生大細既。不過如果換著平時多魚穫時，我諗撈魚時間我都會大量放掉這些小黃釘。話咁快我就砌左幾口啦，但係其他人就乜動靜都未有，可能係比較陌生吧，一時未適應。當然B記係例外既，佢雖然未有魚掟出黎，但其實我見佢亦都中左幾條魚仔放左係小桶入面等一次過多點先拎出黎。坐係出面既四個人，即除左力奇朋友阿朱之外，都係揸竿既。而阿朱用手繩所以就坐入面，以讓比用竿既我地可以在外面教多空間作釣。好心有好報，終於繼我之後，開齌既就係佢。雖然只係一條小瓜衫，但係都叫做好開始。跟住無耐到我都中返一兩條瓜衫仔仔，但係呢個時候B記就掟左條手板沙立出黎，果然真係人地就釣這些，我就釣那些；不過，我早就已經習慣，亦都化左啦，所以無問題架，只需要繼續做好自己本份就得了。咁其實我中魚機率高過肥肥佢地係因為佢地只釣單勾，而我就上下兩門勾、上面蝦仁，下面生蝦，叫足兩飛，所以機會理論上係大一點；不過今日既魚大多數都係食我秘製既蝦仁，對生蝦好似不太感興趣。其實我中的幾條夠都係食上門勾，咁當然貪吃鬼小釘釘就真係無分魚餌，乜都吃一餐就真既，但係由於佢地仲未長大，要準備抽佢地上來也唔太容易，而且你都唔多會想抽佢地，因為大部分都真係細得有點那過。但係食埋黎又真係無辦法，所以阿肥既開齌魚同埋之後幾條中到既，都係一些細到不能再細條既小釘釘，有一條差唔多就只有我姆指般大，真係絕對中左都唔會感覺到。而係佢中埋哂小黃釘既時候，B記就掟左條石三蘇出黎，而跟住我就中條手板大唱歌婆，用竿玩又真係段段都走水，幾好玩架。跟住無幾耐B記又掟多條沙立出黎，然後到阿朱啦，佢都有沙立，而且上面隻勾仲中多條小黃釘添，我即時同力奇講話：「你又話諗住今日黎誘導阿朱以後買竿玩，但係而家人地就中左魚，你就乜都未有，咁大反差，點導到佢玩竿呀！」力奇只能無耐的髶髶肩、繼續作釣。好在，終於唔知過左幾耐，係無數咁多次唔知有無魚食餌同中魚既情況之下佢感覺到了一口清脆既魚餌，然後使勁絞上來，我一睇都知唔會係小電報員，一來佢竿既弧度唔會係小黃釘，二來更簡單，睇佢面部表情扭曲左就知佢都有感覺啦。果然上水一睇，係一條比我果條更大一點既良型歌婆呢，好野，終於開齋了！

咁又講下，其實今日我地既釣點雖然都係維港東隧頂果一帶，但其實有幾個位會比較聚魚的，不過果個位就比較近航道，水警如見到你係果度釣魚係會黎驅趕同查牌的，所以我地一路都只能「走鬼」咁釣，佢駛遠左去第二度時，堆釣艇就會衝埋去，到見到隻水警有駛返黎附近既跡象呢，大家就會散水。如是者其實今日全日都係咁樣玩法架啦。咁又唔知釣左幾耐啦，忽然見阿肥肥抽魚然後頂魚喎，雖然佢支竿係超短竿仔得一米，但見佢頂竿既情況都應該會係撈箕魚啦；再加上佢邊頂邊怪叫，應該係有在爽了，點知頂頂下可能佢之前勾完石鬆磅頂唔記得較返緊，所以頂頂下鬆得滯比條魚走左！真係只能徒嘆奈何了。其實磅頂唔緊既情況都有發生係我身上，因為我都仲係唔係完全掌握隻橫絞既操控方法，所以我錯誤地將個磅頂較鬆左唔少，所以有時抽魚時卻未能鎖死隻杯，搞到抽唔到魚，而經過肥仔呢單野之後，我即時再一次調整返我隻絞，之後情況果然有所好轉。不過磅頂就雖然調較好左啦，但係由於我對我部攝錄機操控尚未熟練，所以有幾次中魚時一邊掛住開機拍攝一邊又要慢慢頂魚搞到最後條魚走埋，所以今日其實都走左唔少魚呢。

如是者又繼續釣啦，咁阿肥肥又無無聊同阿力奇講話不如調下位啦，跟住調左位之後，肥肥率先中魚，然後阿力奇呢個時候都中魚，仲要係條大大碌既沙鑽，真係有時不得不迷信一下。但係玩左一陣大家又再靜局了，咁阿力奇就想趁機導下阿朱玩竿，於是就提議同阿朱交換架生，由力奇玩手繩而阿朱玩魚竿了。而阿朱對槍柄橫絞竿又真係新手，而阿力奇又無同阿朱交代過點樣使用，就係咁樣，之後就出了點小意外了。此話何解呢? 只見釣釣下魚忽然見阿朱就係咁收，而其實佢就係同阿力奇疊左絲，但係阿力奇又無出聲自己係另外一邊解緊，咁阿朱就覺得有東西再扯佢，於是佢就不停咁收，而佢又唔識鬆個磅頂，就係我反應都來不及制止之時就已經聽到「啪」的一聲然後支竿就炸左一分為二啦！我同阿肥見到都只覺驚訝，反而身在艇內忙於解絲既力奇仲未有所發現。而呢個時候阿朱先發現原來佢既魚絲係比力奇拎住左黎解緊，真係認真奧賣葛啦。咁炸左竿點算呢? 阿朱就整返前面斷左果截出來然後繼續用剩下既果一截繼續釣啦，但係效果就梗係唔好啦。所以趁小休食西瓜時阿肥就幫阿力奇修剪一下支斷左既果截魚竿，然後再將佢地兩支插返埋，果然真係可以臨時繼續作釣！阿朱就用返手繩，而阿力奇就用返重新修復好既魚竿作釣啦。

講時講，阿B記明明前一日問佢呢幾日有咩釣到時話最近都有些惑魚釣下，點解咁耐中午都到喇都只係見阿B記釣到一條，而其他人都仲未釣到既? 就算我地埋唔到去需要「走鬼」既排口度，個海咁大都仲有多幾條釣到掛? 咁終於首先為我地打破惑魚荒既就係朱爸爸了，而過左無耐我都宣告古惑仔開齌了，真係久違左一食即沉即抽即走水既果種感覺，認真爽歪歪。而係夾雜住中下小黃釘既同時，肥肥亦都尋獲古惑仔了。暫時只有力奇與力奇朋友阿朱未有；不過今日阿朱運氣都認真唔差，好快佢亦都釣到惑魚，仲短時間來再搵多一條。我同肥肥都即時講笑咁話，古惑仔朋友隊又多一員，大家一齊做朋友吧，聽得力奇有點不是味兒呢，哈哈。之後更誇張的一幕係在艇內的阿朱先中一條上黎，然後即刻到佢隔離的肥肥支竿有反應，又肯定係古惑仔黎，跟住肥肥都未收到條魚上黎已經到我亦有魚訊，唔駛諗即刻抽就又中，所以同時間我同肥肥都收緊魚，而當然好快就見到兩條古惑仔都上黎水啦。當然要黎返個三人合照啦，絕對係古惑仔朋友隊呢！可惜咁熱鬧既景象只係可一、不可再，之後我地都無再合照既機會了；當然惑魚都依舊疏落地偶爾會中，但係就無再試過有隊友同一時間再中了。而到最後完場之時，力奇都係無能力加入古惑仔朋友行列，看來佢份人係真係絕對心地善良，不能古惑呢。

全日我地就係咁樣平靜地度過了，魚仔疏疏落落的咁上釣，惑魚群未有成功追尋到；而另一目標 – 中秋後維港日水細鱗都仍然未能找到，而且其他撈箕魚亦都追擊失敗，但係大家還是熱熱鬧鬧的玩了一天，所以亦都算係滿足。其實今日釣魚時都見到好多釣艇堆在附近等待「走鬼」，當中有不少係「散團」，睇到佢地都只係各自各釣，雖然能解釣魚手痕之症，但係歡樂之聲絕對唔夠我地果幾隻包艇既大，而其中又梗係以我地為最嘈既釣艇啦。所以話，出去釣魚就已經好開心，魚鑊之說都不是最重要，有當然最好，但係唔豐富既時候，亦都不用沮喪，因為大家已經樂在過程，開開心心的享受左一天了！

魚餌鋪的看門小狗