快閃紫崗攀天梯

路線: 黃泥涌水塘公園> 紫羅蘭山> 紫崗橋 (淺水灣坳)> 孖崗山天梯> 孖崗山> 赤柱峽道

是咁的，今次郊遊叫得做快閃就梗係好即興啦，但係其實即興得黎又有計劃喎；就係之前已經諗定今次既郊遊目的地係要揀紫羅蘭山孖崗山，之不過幾時出發就無定到咁囉。咁趁住今日幾好天於是就出發喇。未出發又發生一段小插曲啦咁，就係喺小巴站等緊車未上車玩緊手機之際無啦啦有人拍我膊頭，抬頭之際就諗住係有熟人見到我咁啦，點知望到果個人係唔識架喎；咁究竟係咩事呢? 只見佢指一指我著住對跑山鞋，然後問：「先生唔好意思，我想搵你著緊對鞋既果隻牌子，但街好少見到有人著，請問你係邊度買架」咁我咪答個鋪名囉，跟手講話灣仔果頭都有間鋪代理左呢隻牌子黎做，我一講間鋪佢仲話知係邊不過只係估唔到睇落咁唔起眼咁老套既行山用具店會有得賣呢隻牌子。我即時答佢，係呀，你唔去呢間連鎖店就無架啦，佢代理左黎做呀。咁果位人兄道謝左之後離開左啦，而我架小巴都終於黎喇。

今日只係自己一個人行，時間控制更容易掌握。未到巴士站就已經開定網上資料網頁同埋谷歌地圖指引去黃泥涌水塘公園入口，始終第一次行怕會搵錯過左個入口。好在上完一輪斜路就見到個水塘公園，同埋執邊個路牌，才不至於錯走冤枉路。按照網頁指示就找到了登紫羅蘭山徑既石級，而從呢度開始基本上全日往後9成既路段都係上級同埋落級喇！經過一輪上級既路段，終於見到條座標柱啦，係度真係景觀開揚，近既就見到陽明山莊，望遠既又見到柏架山同埋渣甸山，更可俯瞰到大潭水塘(不過再行多一陣既位置會更佳)，另外一面又望到遠方的南丫島，總之360度都有唔同景色啦。飲左兩啖水我就繼續上路啦，之後走過相信係全日唯一一段既平緩小徑，邊欣賞住係遠處既大潭水塘，我發了一張照片給我的朋友，佢仲話水塘果一帶有點似熱帶森林河流之感呢！之後黎到石級開始下山，然後到達山坳、連接紫羅蘭山同孖崗山既交滙點 - 紫崗橋。

其實如果選擇唔登孖崗山頂呢，係可以唔過橋，就咁係引水道果度沿住山腰一路走就會去到終點架啦，但係心諗第一次黎，咪咁無魄力啦，一於挑戰一下呢條馳名既天梯吧，咪就係咁，賴哂野啦，哈哈。之後我既雙眼望到既就只再係無窮無盡、筆直的石級，而雙腳其實就應該係行丁無乜感覺啦。不過我都堅持一步一步咁行，唔想停低落黎休息，好鍛鍊一下意志。終於行左唔知幾多級之後就登上左孖崗山既第一個山峰啦！黎到天庭，甚是感動，係度補充返少少保礦力，主要係等對腳有返些少感覺之後，就繼續往前走，並再落一段山並再度往上走並登上孖崗山的主峰了。雖是再度登頂，還是霎時感動！同埋係呢度我都終於叫做可以抖返口大氣同稍作休息。不過冬天日照較短的關係，我唔想喺口落前仲係山上面，所以都係抖左兩三分鐘就情願邊行邊抖咁樣行啦。但其實落山都唔係舒服架。不過呢度落山既路段都唔係一無是處架，唔計可以睇到遠處既龍脊及柏架山等同埋俯瞰就在前方既赤柱半島之外，講緊既係佢落山時既路段都比教深，路兩透的小樹叢都差唔多到頭的路份，所以就算其實天氣是吹著寒風，但我身在小徑中卻完全感覺唔到這股寒風，算係全日除左登頂之外最令人感動既一件事了。不停咁樣落著石級，就會到達孖崗山觀景台，不過我落到黎時太陽都開始除除而下，所以我都只係匆匆影過相，飲啖水就繼續落山了。呢度開始都已經係水泥石級了，都算係好行既，不過我其實都已經無乜感覺啦，淨係諗住快點完成行程。終於黎到終點前既一個小分叉路，呢度其實就係如果之前係紫崗橋唔上山而走引水道經山腰過來的出口呢，真係下次我如果再黎都應該會選擇行呢度算數喇，哈哈。咁經過呢個分岔口再走多唔夠幾分鐘，就會黎到呢條路段既終點 - 赤柱峽道啦。咁我就過對面等巴士啦，但係真係太累同埋吹得有點冷了，所以我根本無等到我要坐的那一路巴士、只是一見到有巴士靠站就上左先算了，反正有位可以坐我就已經覺得係人間美事了！而當然我最後亦都係要再轉一程車先可以返到家啦，但係今日本身個行程就係隨意而行，咁搭個巴士隨意一點，咪夠哂貼合主題囉，哈哈。

黃泥涌水塘公園