初試藍旗遇著紅

日期: 03/23/2018
農曆: 二月初七
地點: 南水大海位
艇家: 藍旗志雄
領銜釣友: 阿丹、YY
天氣: 晴，全日東至東北風4級

釣穫: 紅魚 x1 (三斤)、石狗什魚兩斤埋單五斤

是咁的，踏入2018年之後一路都就然未有機會出海釣魚，朋友各自都在忙再加上新年，所以成三月都仲係未出過艇。咁岩上星期阿丹問起話好耐無釣魚咁就擇日不如撞日，咁佢係百忙之中只可以抽到今日一日出黎，唔駛諗啦，就揀今日出發啦。不過我地其他隊友都仲未有空，所以我地決定參加近年在香港開到「成行成市」既散團。而我地今次核試新野，所以無好似之前咁__搵馬生，而係揀左一架叫藍旗既艇。一於試下佢同馬生既分別。

出發前一日我同阿丹都分別在準備醃製蝦仁，呢個工序真係不能忽視，同埋其實都係幾有趣既一個部分。我既蝦仁就一貫只係用鹽出左水之後再加酒同雞粉調味同埋染紅就大功告成了；但係阿丹呢佢就對呢個醃製蝦仁呢方面有著更高既要求，所以佢特登買左幾條虱目魚，然後將內臟取出，再將內臟攪碎並加落蝦仁度，形成極度腥味既蝦仁，再加上之前已經染紅左既顏色，可謂色腥味俱全了。

好了到了出發既一天，早上發覺風起了一點；之前天文台預報係話大約三至四級東至東北風，但係我基本上未落艇係碼頭都已經感覺到明顯至少有四級風了。落艇一出左避風塘就已經見到有少少的白頭浪，所以風勢可以話係坐四望五既東北風呢。呢個都係為令我暈船既埋下左伏線。

藍旗同馬生艇最大既分別就係馬生係唔會拋錨既，而我地今日就一到埗就拋錨。咁我對拋錨缺乏好感係因為一來佢既「攻擊」範圍細好多，二來咁樣係需要用重好多既鉛先可以落底，從而令感覺減弱。但係拋錨既好處就係如果遇上魚群例如雞魚同惑魚咁既話就可以更加有效地「進攻」了。

不過今日既釣況其實基本上都可以話係乏善可陳的…咁一開始我仲未適應拋錨既釣法，所以用鉛相對地輕，所以又唔係好落到底又或者同隔離繞繩，咁繞左幾次同埋勾左地球之後我又決定轉玩手繩算啦。係我仲掙扎緊既時候，其他人就已經開始中魚了，有石狗仔又有雞魚仔，就係無古惑仔。好似話最近唔多惑仔釣所以船長志雄就決定唔車去平時釣惑既位置而試下這些沙石底搵下石狗同埋雞魚仔咁喎。不過好明顯我地生手唔及其他上慣黎呢條船釣開既各位師兄師姐啦。佢地個個都好快就中魚，淨得我同阿丹都仲未發市；而終於阿丹都以一條烏絲開齋既時候，我卻在綁緊釣組…好喇終於落得手繩啦，竟然又即刻有魚中喎，仲有少少走水添，一上到黎，原來就係同旁邊剛上一樣–雞魚仔一條。咁又幾好玩喎，不過真係唔夠其他人釣呢，所以上晝我都只係搵到一條雞魚。

時間過得好快，轉左幾次位，但釣況都係咁上下，我既中魚數字仍然應該係全船最低地一路維持到中午。呢度好處係佢有一個杯麵附送，所以釣到午飯時間就可以有個暖笠笠杯麵落肚了；但係，咁樣咪出事囉… 食完個杯麵係暖哂身好舒服，尤其今日係吹住風都有點涼意，不過就係已經吹到暈暈地，隻船又拋到我暈暈地，而家食完個杯麵又頂住哂我搞到我暈暈地，所以下半場基本上我都係一直處於暈眩狀態中度過的。但係唔緊要丫，是日主角又唔係我，而係坐我隔離既阿丹。

其實食完杯麵過左陣我見暈暈地，咁我見坐我對面果度有些人去左船頭釣，咁我就過左對面作釣，貪佢果面有陽光照射住可以暖下身同埋最緊要係流水下風位，所以魚絲唔駛過艇底；淨係呢一點都已經抵返哂啦。而阿丹就坐左去艇尾，貪果度夠寬敞開揚，而且魚絲可以順流沿船尾出，唔會繞到其他人，甚為方便。至於原本坐呢個位的那幾個師兄則去左船頭同志雄哥等一同釣雞魚，好不熱鬧。我都一邊暈眩一邊作釣，雖然雞魚我就唔似隔離咁樣上到幾條，但係又比我執返幾條石狗喎，已經算係唔錯了。

釣多一陣我地就轉位車去浦台背面，呢個時候我都叫做狀態回復了不少，而我亦重新拿起我支魚竿作釣。見到阿丹坐係船尾釣得咁舒服，於是我又走埋過去「曬太陽」，釣左兩三條狗仔之後突然食左一條會走水既魚埋黎，上黎又係一條小雞雞。睇返今日到現時為止大部分魚我中的都係食上門勾的南極蝦，反而蝦仁同生蝦都係無咁得食；但係阿丹就對佢既秘製蝦仁非常有信心，佢無用南極蝦之餘亦甚少使用生蝦，因為佢反而最得食既魚餌就係蝦仁，至於佢既尤魚、豬心等等都得不到魚兒既青睞。但係蝦仁就已經係皇道啦，而且好波不如好運，縱使坐我地隔離既果位師兄不停地上魚，但係魚要食埋黎真係避都無得避。就係我同阿丹嘻嘻哈哈吹水爽住釣魚既時候，突然之間佢好似勾石咁樣有野卡實左，起初佢都以為係勾石，但係收左一兩下佢就話係中魚，不過佢個磅頂竟然較得好鬆，我見狀即刻過去幫佢調緊個磅頂而佢就繼續收絲絞魚；旁邊既師兄見狀即刻話呢條魚要用撈箕啦，並叫船長志雄拎撈箕幫手撈魚，至於其他人也圍過來你一言佢一語咁估係乜野魚，呢個話係黃立鯧，果個又話可能係細鱗，我就本來想用手機拍攝起魚影片，不過志雄就叫我收左我既魚絲先，話如果我唔收絲，如果阿丹條魚一路上一路迴游就會同我既魚絲打哂圈繞埋哂之後就會好亂了，於是我唯有快快地把魚絲絞起；到我終於可以埋位準備拍攝時，阿丹條魚都已經接近上到水面，咁我唯有拍照就算了。埋位準備左幾秒就見到大大餅既紅魚升水了，然後志雄立刻將魚兒一撈入網，就係咁樣，一條接近三斤既紅魚就比阿丹順利入手了！真係魚唔駛多，一條夠哂數！而呢條魚亦都係全日成船唯一的一條撈箕魚了。

就係阿丹上完條紅魚之後到完場我地一路都只係只有石狗既進帳了；不過唔緊要啦，反正中完魚收夠籌之後我同阿丹都係釣風流魚了，而旁邊的師兄亦係度邊釣邊教路話應該點食條魚；佢建議我地一係食刺身，一係打邊爐，而魚既頭、骨、腩那些部為就用來做椒鹽碎炸。真係聽到都已經流口水了。不過如果要做刺身咁就一定要做好保鮮工作，所以就係我地完結是日釣程之後，阿丹就開始照住師兄教路下將魚放血並放進冰箱保鮮了。搞掂條魚之後阿丹即刻打電話比佢屋企人約食飯，事關要做好食既刺身或者薄切打邊爐，除非本身你是做廚之外，否則還是出外找食店加工處理來得有保證吧。阿丹就有大魚食，而我亦都有鮮味無窮既石狗拎返屋企煲湯；至於小雞雞，一於就睇睇下面既照片吧，哈哈哈。總括黎講，今日都係抱住旨在試新艇既心態來釣魚，所以有咁既成績絕對係喜出望外了。但係如果要給我選擇，除非是雞魚季節，否則我仍然會選擇上馬生的船多一點，原因只有一個，就係馬生唔．拋．錨！不過如果講坐得舒服，艇身較低同埋空間感較大既藍旗則贏返一個回合。不過比較完之後，我都係果句啦，有得揀，我都係選擇自己人包艇出海釣魚；只係到左別無選擇既情況而又釣癮發作到好痕既地步之下，散團至係暫時既解毒之選了。畢竟，能夠同一班朋友出去嘻嘻哈哈，總比只在乎釣魚過程更加值得回憶同細味呢！

阿丹秘製紅蝦仁