驚險穿林踏紅石

路線: 烏蛟騰> 苗三古道> 九担租> 上苗田> 下苗田> 大峒> 觀音峒> 紅石門坳> 紅石門> 鹹魚埕>牛角涌> 迷椏走廊(黃竹涌、馬尿河)> 苗三古道> 原路返回烏蛟騰
登山之友: 超級嘻嘻、YY

是咁的，今次行程我地已經想行好一陣子了，但之前一直夾唔到時間，因為呢條路線同我地居住地區可謂天南地北，而且呢條路線距離較長、所以我地都一直等到大家有足夠休息時間先至起行。咁岩超級又有兩日連假，即時揀左第一日出發，貪其之後可以有一整天「休養生息」回血補充體力先至再返工。

睇返網頁介紹，一般預計都要走六七小時，計埋影相、休息時間我們預計要成八個鐘走唔甩，而我地都想在太陽落山或天黑齊之前完成行程，所以計劃好十點就要在大埔墟火車站坐小巴到烏蛟騰出發。不過我同超級都習慣左較夜上床睡覺，搞到起得身黎去到大埔墟都已經十點半了。問題唔係呢度，問題係，我地跟住去左買補給品同埋食早餐，而我地又無事先睇清楚小巴既班次時間，結果食完早餐去到小巴站一睇時間，十一點十分；再睇睇最接近的那班小巴到站時間是 – 十二點二十分！咁當然無可能等到果個時間先出發啦，如果唔係未行完都一定天黑，對於今日呢條比較有挑戰性既路線黎講係會更加麻煩。於是我地即刻見到有的士就上車，誓要追返失去既光陰。

坐左大約半個鐘車，終於黎到烏蛟騰了。搵到起步點之後就立即出發，在分岔路口那邊見到指往三椏涌的指示牌我地就上路去了。經過了九担租村，我們進入了苗三古道，然後再快步走，就經過了上、下苗田，在到往上大峒的分岔口。這段路可說是全日最平坦最易走的一段路了，基本上都是鋪得很好的石屎路和小徑，而且都沒有高低起伏，如果一直都係咁樣既路段，今日呢條路線又點會係網頁裡頭話到難度達八星既路線呢? 所以當在分岔路旁的苗三石澗稍作休息同睇人釣下魚仔之後，我地就開始要登山上大峒了。其實如果唔上山而選擇繼續直行的話就會接上迷椏走廊那邊到達我地今日既目的地紅石門；不過由於我地打算回程時先至從紅石門經迷椏走廊返來苗三古道，所以我地選擇盡量唔會有相同路段既路線、即先上山再落山到紅石門、再經迷椏走廊、兜一圈回去。話就話係上山，但其實一路走上去都是登山小徑，也不算太難走，就只是一直緩緩上升的路段了。不過一下直要爬升到近二百八十米的山頂也是有夠索氣的。不過由爬升上山的這段路中我地可能望到那遠遠的、位於大陸的鹽田港，和山下的印洲塘海峽，絕對是風光明媚。今日既天氣其實已經算是非常理想，唔太熱亦濕度唔算高，而且還有一點微風，真的令我地行起上黎舒服得多了。咁樣仲有好處就係我地可以比天熱時帶少一點水，少一點負荷；同埋、影起相黎更加清楚。大峒並唔係我地是日最高點，不過佢同我地跟住要到既觀音峒其實都只係差多廿零三十米，所以走起上黎都並唔辛苦。而且呢度風景極為優美，往左邊看可以繼續望到印沖塘海岸公園等地和大陸鹽田港，而往右邊看呢，卻又可以望到整個船灣淡水湖、大尾督堤壩、馬鞍山、甚至遠遠的科學園和城門河等等。簡直是美極了！一條山徑，兩種風光，真的很爽。再向前行多一會更可回望山勢優美的觀音峒。所以我同超級都不約而同咁話，走上黎呢一段係絕對需要同值得的。沿路慢行打卡當休息之後，我地終於黎到一個小徑位既分岔口了。由呢一刻開始到回程從迷椏走廊出黎為止，再沒有容易輕鬆的路段了。我們不再沿船灣淡水湖郊遊徑走，而是退出大路抄紅石門坳小徑而開始爆林路段下山了。一路走落黎雖然叫做爆林路，但其實路都已經比前人踏得算是暢通。基本上我都只是偶爾用手撥撥前方的草叢就可以了，只不過基本上草叢都是高過人的；我邊走也邊跟超級講話，咁樣行山真的很有感覺，不過就未到達之前「驚險」既級數，但其實好戲先在後頭...

一路下來，邊欣賞住海岸公園既景色，我地終於黎到配水庫了。望下個鐘，兩點鐘，剛好係我設定比自己食第一個金拱門包包的時候了。吃過包包繼續上路，雖然仲係叢林小徑入面但都已經知道離目的地不遠了，因為我地已經嗅到了海水的氣息了。果然過不了多久我地就黎到紅石門村，再走多幾步，終於見到了這裡因地貌而命名的紅石和沙灘了！不止是岩石是紅的，就連沙灘的沙也是紅的呢！真的若非早在網頁和視頻上看過這裡的介紹，絕對是會給它震撼到的。除左沙灘岩石優美，海水也極為清澈呢，要數唯一的小小遺憾就係呢個時候既陽光都跑掉了，但我地亦都明白不能又要馬兒好又要馬兒不吃草的；因為唔想行山行得太辛苦而選擇了沒有太過陽光猛烈的日子出發，唔通又要呢個時候要求上天給予強勁的陽光射到上去紅石和海水嗎? 所以拍照的效果是就是稍遜了一點，但係如果放下相機，用眼睛去旅行，今次絕對也是大飽眼福了。

休息加影相過後我地就要繼續上路、準備回程了，畢竟都已經成三點，得返三個鐘就日落，我地雖然有夜行裝備的頭燈和電筒，但畢竟回程全程都是爆林路，有得揀，梗係有日光好過只得電筒等照明設備照路前行吧。問題黎了，我地回程又有個選擇既。一當然是沿剛才下來的爆林路往回走去返紅石門坳經郊遊徑回烏蛟騰；二我地可以往回走一小段，在當中的一個分岔路接上通往迷椏走廊的爆林小徑走回苗三古道；三則是先沿紅石門沙灘綑邊行到近鹹魚埕那邊再找絲帶路撤出海邊、爆林往上接回迷椏走廊。咁難得黎到紅石海灣，當然希望盡情睇過夠啦，所以我地決定選擇沿海邊綑邊行的第三選擇，不過呢個選擇則應該是三條路線入面難度最高的一條，而且網頁介紹也沒明確指示退出的小路，所以我地都係諗住如果搵唔到出路可能要退回其他的選擇離去。由於唔知道邊度係退出的小路，所以我地一路綑邊一路搵路，終於比我係其中一個貌似小徑入口位看到一條粉紅絲帶，但係往裡面望上去的小徑卻是比之前更隱蔽更難走。不過我地覺得如果唔搏一搏，萬一錯過左可能就只可以一直綑邊走多一大段路、兜過整個鹹魚埕先至可以離開。睇下隻錶，已經成四點，一於搏一搏，單車變摩托，話哂佢都係有絲帶綁住的「路口」，和之前其他幾個路經貌似入口但又沒有絲帶綁著樹叢的不同。

一走進去就其實已經要手腳並用的往上爬了，而且仲要左穿右插，攀高擒低咁樣穿插樹叢堆。終於幾經艱苦，邊爬邊搵絲帶之下，我地終於從密林中走出來，去到像之前一路在山上爆林下來的那些草叢小徑。再走多一陣，終於來到一個分岔口綁著很多絲帶，這時我們知道我們終於接上了迷椏走廊了！接下來的兩個小時，我們都是在這條走到痴迷的迷椏走廊中前進著；感覺就如網頁介紹般的，不停的爆林、蜘蛛網，爆林、蜘蛛網，爆林、蜘蛛網... 途中偶爾仲要過澗，幸好呢個季節雨量比較少，溪澗水量較細，所以我地都尚可勉強不濕鞋而過。而喺我地行呢條迷椏走廊既時候，其實我地既體力都已經消耗得七七八八，所以除左基本技術上既溝通之外，都已經比較少傾談吹水了，絕對真係行到迷哂。我還算好一點，身型比較瘦削，唔似得超級咁大隻，負磅較重，走起長途路程尤其辛苦，絕對係對佢體力要求既一個挑戰。終於我地走呀走呀走，終於都離開左迷椏走廊，接回像一般郊遊徑的苗三古道。當我地走出呢個出口時，不期然有一種感動。但係路還是要繼續走，距離日落不到一小時，雖說已經完成全日最艱辛路程，但係都唔想掉以輕心之餘，亦想夾岩時間去到小巴站；因為如果錯過左七點十五分那一班，就只能等多一小時坐八時十五分那班尾班車了。

走著走著，逐漸又聽到流水聲了，就是旁邊的那條苗三石澗呢；亦即意味住我地好快又可以行到去今朝睇下釣魚、登山上大峒的那個分岔路了。黎到呢度我由於以為差唔多完成行程，只需往回走就能回到烏蛟騰，所以情不自禁地吶喊出來。當然，在繼續上路之前，我地還是係度稍作休息，同埋啪埋第二個魚柳包補充體力。呢個時候已經夕陽西下，仲有十分鐘就日落、距離七時十五分小巴大約還有五十分鐘，但由於我地今朝係坐的士來而唔係搭小巴，所以我地仲要預算一小段時間出村口找小巴；算起上來，由係時候要趕路了。唔行唔覺，原來由呢個休息位往回走，雖然都係算容易既石屎路佔大多數，但都竟然足足行左我地成半個鐘有多；終於千辛萬苦、歷盡艱辛、排除萬難咁樣我地終於經過見到有路燈的九担租而返到黎烏蛟騰啦，霎時頓感「孝感動天」。行左出去馬路，搵左個村民問完小巴站係邊之後就索性坐左係村口的涼亭，因為佢話咁夜都唔會有人呢個時候坐車出返大埔，所以我地就算唔係在村入面的總站上車都無問題喎。

換左衫坐左一陣，就見到架小巴徐徐駛來，上左車之後就盡情攤抖，讓原本麻目了的雙腿休息一會。係車去我地打比住新界既高高搵佢食飯，所以我地今日最後既目的地就係沙田禾輋既陳根記大排檔喇！而我地既驚險爆林紅石門之旅亦都隨住飲飽食醉而告一段落啦；經此一役，我同超級既行山經驗值又再提高了，之但係，我地今日發現，有我地兩個出發，就會有「驚險」的旅程了；我諗，呢個係基於我地唔安份，愛挑戰的性格吧，哈哈哈。