尋雞搵著聖誕樹園

日期: 05/29/2018
農曆: 四月十五
地點: 南水大海位
艇家: 藍旗志雄
領銜釣友: 阿丹、YY
天氣: 晴，全日南至西南三、四級

釣穫: 近全石狗什魚埋單三斤

「是咁的，石狗日。」呢個看似係是日我同阿丹魚穫既寫照。但係其實，仲有一樣野比呢個更能反映出我地今日釣行既景況。

是咁的，講返今次行程，其實真係黎得又真係有點快、準備有點少。咁本身我同阿丹同肥肥佢地原本諗住六月份第一個星期就出艇釣魚既，點知而家B記閒日又暫時唔對外開放；咁諗住搵九叔啦但係佢又竟然由四月份講話暫停開工要整架艇大約到六月份啦，但係上星期打去佢話要延期所以我地個團最後都搞唔成。咁一係唔好講，一講起左就勾起我地條癮，咁睇返天氣，呢個星期都好好，天文台九天預測都見丁係話南至西南風兩至三級，咁梗係唔駛諗想即刻起行啦。咁得我同阿丹，止痕既方法唔係散團就係四匹仔啦，但係睇返四匹仔最近又無乜景，咁我地最後都係決定輕輕鬆鬆釣返日散團就算。睇睇日子，大家決定揀星期二，即係得返一日準備；其實你話如果係硬件上既準備係足夠既，但係個心情上既果種準備則好似黎得太快咁，畢竟次次知道有得去釣魚之前通常都會期待返一陣子咁。但係今次就得一日，未免有點短，哈哈。

點都好啦，最後我地都係揀左藍旗，雖然我唔太鍾意佢拋錨釣而唔係侯艇釣，但係佢首艇又真係比我地之前搵開既馬生艇釣得舒服一點既；咁樣對於我地黎講都係好重要架，因為我地出散團，其實釣唔釣到魚都係其次家嘛，最緊要就係開心舒服。只係估唔今次既拋錨之釣行又有小問題出現咁嗜...亦都引證左我本人點解對拋錨釣法抱有一定既保留...

咁其實5月份就已經踏入左休魚期架啦，所以基本上就好難有非飼養類海產既；而我地平常用黎做蝦仁釣餌既赤米、紅蝦等都基本絕跡，有得見到既、都只係基圍蝦、花竹蝦等養蝦和飛機蝦。咁所以我就選擇左放棄唔買蝦仁轉而買袋南極蝦、再做簡單醃製出水就算；始終我對養野既鮮味同生猛程度都覺得佢同海蝦差太太太遠了。而阿丹果邊佢亦就咁買左些基圍蝦返去搵花紅粉染左色就算了，並未有好似之前咁大費周章的搵虱目魚再劏開佢拎佢既內臟出黎壓碎再醃落蝦仁入面呢。點都好，始終個心理準備上我覺得係差咁少少。不過唔理啦，有得爽就爽左先算啦！

朝早起床，已經感覺到好鬼死熱，望下個天，雲都無滴，真係不得了。執好野就出發去拎前一日已經預留左既生蝦，而阿丹已經一早到達要上船的碼頭，因為佢要去果度「霸位」，務必可以上船之後第一時間佔據船尾最寬敞最寫野既位置。終於等到藍旗船來了，各人有秩序咁上左船之後我地就去左船尾擺好行李，雪好釣餌，等埋其他人都到齊就出發了！只見眾人都立即開始綁架生，得我一個仲悠閒地吹陣海風，飲下野先斯斯然地開始綁野。心諗亦唔想太複雜，於是就用返上次上黎釣完之後放係個細冰箱既入而果抽野就算。一開波萬利無雲，風平浪靜，好快就到左是日第一個釣點蒲台島附近了。勾餌、一門南極蝦一門神仙蝦，睇下水底的魚兒鍾意食乜就食乜，而阿丹就首先選用佢嘅紅蝦仁。

有人話過，純南風會比東風、北風們較好收鑊，今日初時無乜風，我都唔知點算了，但係好快就已經有魚食餌，一逗一抽，良型狗狗一條。跟手無耐都係狗狗，總之神仙蝦今日都叫做得食，不時都有魚訊；反而阿丹既基圍蝦仁今日就真係麻麻，咁但係總有石狗會開口既，所以佢無耐之後都開齋了。魚鑊既野已經唔係好太記得，因為我地基本上都淨係釣到石狗，所以阿丹先會話：上次就黃釘日，今次就石狗日，咁下次我地釣魚又唔知咩日呢? 我話最好就比你恨到瓜衫日啦好無，哈哈。

吹住吹住水，附近的人就開始搵到雞魚的踪影，阿丹問佢隔離個釣客雞魚點食先好食，大家都出聲話，其實雞魚真係好玩唔好食，所以佢就唔太有興致去釣，繼續用蝦仁搵佢想搵既紅衫魚。而我本身已有一門勾係勾緊雞魚至愛既南極蝦了，所以都希望中返三幾條過下手癮啦；奈何人地就用仕掛，幾門毛毛勾再狗南極蝦，我就得一門係南極蝦，所以雞魚總是與我倆擦身而過，食其他釣客既魚勾、而陸陸續續咁係我地旁邊甘不多所有釣客既魚竿和手繩度上釣。除左雞魚，仲有人釣到條石碼頭添，真係可遇不可求。不過釣唔釣到魚都唔係問題，問題係我地船尾個位置下面不停都有會有野卡住，估計唔係咩海草呀就係珊瑚同礁石咁；但係因為船就拋左錨既，咁即係我地船尾就硬食呢個魚就未有釣到得別多，但係勾石就基本上次次都會勾到既位置啦。我淨係呢個位已經唔見左我三抽天秤釣組，搞到後來我都已經唔多想釣，只係轉左做單勾釣住先，希望等之後架船走位、情況好點先再轉返左兩門勾的天秤釣組。

終於等到轉位開船，咁我即刻換釣組綁多一門勾上去。呢度我地都係繼續釣石狗，而其他人都似係石狗居多，所以釣左一陣，又再開艇諗住駛出一點的大海位釣。但係呢個點流速較大，再加埋是日係十五生流，所以加埋就係極速飛機流，魚勾唔好話根本到唔到地，基本上就係等待到清杯都唔會有得釣咁滯。呢個時候我就同阿丹講啦，你點落鉛都唔會有用，因為船係拋左錨，大流只會不停咁推個釣組，而如果我地落重鉛而船頭既其他釣客係唔夠我地重，咁到最後只會係佢地既釣組都飄哂埋黎同我地果抽野糾纏。而呢個亦係點解一我唔多鍾意釣散團，二我唔鍾意釣拋錨既船既問題了。拋左錨，一來主動攻擊海底位置就少，二來就係岩岩呢個描述既情況啦，硬食水流，呢個係候艇釣魚較少遇到既問題，因為侯艇釣魚就係挨住個水流一直隨流而釣，咁所以用既鉛就相對輕，魚絲既敏感對亦會高好多。如果唔係要釣定點魚好似落錨落誘餌籠釣雞魚咁，拋錨釣真係其實係我比較唔鍾意既釣法黎。不過既然選擇左，就輕輕鬆鬆釣一日吧。

因為太大流既關係，艇家都知根本釣唔到所以五分鐘唔夠佢就又叫大家繞繩、換位再戰。可能今日十五，再加上風勢其實不停的在增加，所以估計能釣的位置其實比平日一定少好多；但係估唔到兜兜轉轉艇家竟然選擇去返是日我地第一個位，即係令我損失左好幾個釣組既釣點，而超不幸地我同阿丹一落絲，又再發現，令人不停勾石的珊瑚、礁石又再次再我地下面！可以話艇佬個衛星定位加佢拋錨真係準到無朋友！平時少怨言的阿丹都忍不住抱怨話乜成個海咁大真係無第二個位可以釣? 而如果就算無咩位可以釣，又真係可唔可以移前移後都十米八米等我地唔駛不停咁勾中下面那些佢稱為聖誕樹的珊瑚呢。又由於下面滿佈聖誕樹，所以佢又叫呢度做為聖誕樹園。就係咁樣，我地兩個既興致已經大減，所以我又再換返單勾釣組、再次等待艇家換位先再作打算。

終於又唔知過左幾耐，反正我都無乜理會啦，都係吹住水是但釣下魚就算咁之下，艇家決定轉位車去再遠一點既橫瀾島附近，呢頭我地終於可以暫時擺脫聖誕樹既困擾，我仲除左石狗之外執到條白頸添，算係喜出望外。不過魚訊唔算密之下，艇家決定去是日最後一個釣點就係轉到去宋崗後面的位置。其實呢個釣點就是上一次初試藍旗遇著紅 https://yy08.pixnet.net/blog/post/106406620 時的第一個釣點呢。一黎到已經見到有架艇仔拋左錨係度作釣，不過岩岩黎到都唔見佢地有咩好野釣到。不過釣著釣著，就見到佢地不時都有雞魚釣到，仲要唔細條添呢，估計佢地都係落左錨之餘仲落埋誘餌籠，所以先至我地就小雞一兩條，佢地就雞雞密密手呢。其實有無雞釣到我都唔係真係話太渴求，咁有又梗係比無好啦，不過無亦都唔係咩壞事；但係再度座落另一個聖誕樹園呢，就真係一件唔多令人開心既事囉。我已經唔理前而船頭釣到咩魚，雖然佢地又分別有人釣到腳板大既大石祟，又或者大雞蛋惑等等，我只係想到收工之前都唔好再勾到聖誕樹，同埋有返幾條石狗比我砌到咁我就已經好安落啦。餘下既時間我都嘗試繼續避開聖誕樹，隔離個釣客就落左小誘餌籠就執返幾條小雞，終於我都係執多幾條石狗就收工。全日基本上我九成魚都係石狗、仲有幾條疏蘿同埋石釘。其他人則基本上都有幾條雞仔咁囉，無辦法，今日船尾就係聖誕樹園林景區，所以令人興致大減。釣唔釣到魚其實我又唔係看得太重，尤其上散團船都係諗住開開心心有得釣下魚就可以了；不過老是勾石就真係有點令人沮喪既。不過正如阿丹話齋，就算係最差既一個釣魚日，都總比一個工作人來得好。所以可以出到黎享受左一日就已經唔錯啦，如果有魚就更加係錦上添花呢。不過就咁講既，下次應該我都係會揀返一架唔拋錨、而係候艇釣既散團比如話係馬生艇咁，因為在我個人而言我總係未係好接受到拋錨釣法既呢種概念呢。

碼頭準備出發