日期: 10/13/2018
農曆: 九月初五
地點: 維港 黑角頭對開藍塘海峽
艇家: B記
釣友: 大大表妹、大表妹、細表妹、阿丹、YY
天氣: 天晴清涼、東至東北風四至五級
水流: 快流、水質不俗
釣穫: 黃釘 x1 (半斤)，什魚一堆 埋單8、9斤
「是咁的，釣魚就係要釣流水。」一句話就總結左今日既釣況了。
是咁的，釣開魚既睇個標題大約都估到，釣得惑魚都係要流水，啱流時，佢地就開口；唔啱流時，就真係磨爛蓆都無。不過呢個黃金時段都係留返一陣先講啦。話說好耐已經無出過海啦同表妹地，於是又再組團出動了。今次仲要邀請到從來都未同我地出過艇既大大表妹出征，令到我地B記表妹戰隊更為強大！本身諗住9月就已經出發既，但一來B記星期六日唔係咁多檔期，二來大家又忙未有空檔，三來又想等中秋過後睇下有無機會釣到維港細鱗，所以最後就定左呢個時候啦。
一如既往，出發前當然又要準備好魚餌，除左生蝦之外，阿丹秘製蝦仁當然唔少得。所以今次我就唔搞蝦仁，等佢主力醃製赤米蝦仁；而我自己則專心搞好特製風乾南極蝦。估唔到，呢兩樣魚餌都成為今日艇釣既秘密武器呢。至於天氣，早一個月預訂釣魚日期既唔好處就係不能預計到當日既天氣，好唔好天除左打風大雨之外都係要硬食出發。今次出發前一星期睇天氣預告一路都講緊話會吹四至五級東至東北甚至離岸六級，所以一早對可以出到白石已經沒抱任何期望，反而憧憬住索性留係維港入面來個尋找細鱗的故事呢。
咁今日我地八點半就已經喺嘉亨灣集合好哂啦，上艇之後隻艇未出避風塘都已經感受到不斷吹來嘅東風了。所以B記都係車到我地去藍塘海峽、黑角頭對出一帶就開始作釣啦。三種魚餌，梗係樣樣都試下用，連B記都問我地要一點蝦仁，點知佢見到我地包特製蝦仁已經耍哂手，另哂頭咁樣，事關其實真係賣相就好唔吸引，不過今日已經好一點了，平時阿丹有空的話更加會去買虱目魚，取其內臟再壓碎來給蝦仁調味，咁就真係臭腥無比了。咁大大表妹同阿丹就主攻蝦仁，大細表妹就用生蝦，而我就兩門勾，上南極蝦下生蝦咁樣叫兩飛。
首先有魚訊既係細表妹，中魚既佢都話手感不俗、面露歡顏，直到見魚影上水既一刻，哈哈，雞泡魚一條！即時滿滿的失落感湧現臉上。跟住阿丹又上一條，搞到B記即刻叫我地收繩車過一些再釣，以避開雞泡魚攻擊。至於以食用魚黎計，我就係最快開齋既一個了；呢個就係叫兩飛既好處喇，因為可以大細通吃囉，所以好快我就有扯旗立食餌上釣了。奇就奇在用蝦仁的那兩位卻沒怎麼被扯旗立攻擊喎，更加惶論生蝦了。生蝦可以話在頭段時間內毫無作為，我中魚的都是用南極蝦來中的，就算係扯旗以外既沙鑽，沙立，甚至瓜衫同梳蘿，都係統統食我南極蝦那門勾。所以只用生蝦的那兩位表妹都一直未有發市。至於阿丹則沒問題，蝦仁也慢慢開始有魚問津，所以他接連也釣上這些小魚，丫，還有一條角魚呢！但其實除左扯旗仔之外，其實魚訊到現時為止今天真係極為疏落，就連一向暗地起革命既B記都只係得小魚幾條。
車左兩寨無甚起色，B記就試下車近岸邊少少，即時有幾口石口魚上到，我就上返條石狗，而細表妹亦終於以一條黃釘開齋了，但還是剩低了坐在艇內的兩位...就係咁樣一直車，其實生蝦一直都真係無咩魚掂過，所以釣況都無咩起色。不過大表妹亦都終於應住一條較良型既黃釘，在中午以前開齋了，只剩低了可能是魚竿不比較重火的大大表妹。大大表妹平時比較多在岸邊釣魚，尤以小西灣、柴灣及北角作釣點為多，今日我地上半場就係一直對住小灣西，所以我就講笑咁話，平時表妹就會在小西灣碼頭一帶拋竿出來釣魚，而現在我地則在海上對返靠岸邊既方向拋過去，咁咪即係無分別囉，哈哈。其實我又何嘗唔想佢快點中魚呢，畢竟是第一次上來B記艇，梗係想佢有個美好的回憶啦，奈何今日既上半場本身真係魚訊稀疏，同埋佢又用生蝦，所以也不會對上今日對生蝦不甚感冒的扯旗立了。
係鯉魚門外的藍塘海峽不停走位，不過都係小魚幾條，雖然最終大大表妹喺我地不知情既情況之外終於憑住換左用蝦仁做餌而釣上一條扯旗立而宣告開齋，但也阻止不了我地要返維港塘內碰運氣的決心，因為望下個鐘，呢個時候已經係兩點了，但係我地既收獲真係算係幾唔理想下，再係咁落去真係坐以待斃架喇。心動不如行動，即刻繞繩起行。入到維港，本來就在筲箕灣避風塘對出石駁作釣，正當眾人陸續有魚訊之際，B記就話見列水警從遠處除除駛來，所以我地要即刻走位，認真可惜。在艇東隧頂一帶駛去，見到有不下十隻釣艇聚集作釣，幾乎肯定在這一帶水域下有一大箕魚開口了，所以我地亦不甘後人，立即加入。見到隔離艇上既係惑魚，本身用開南極蝦同生蝦既我呢個時候亦將上門勾改為蝦仁，而阿丹亦都兩門勾都改為蝦仁，而我亦都叫表妹們改用蝦仁作餌。即時很快的，阿丹同細表妹都已經中魚，可說是餌一到底就已經有魚接餌，真係霎時為我地鬱悶了一整天的氣氛注入了新動力。跟住到我都有魚上啦，然之後艇內的兩位表妹都不甘示弱，紛紛中魚。總之就係人人有份，有身份證嘅都可以有魚釣到。不過雖然係人人都釣到，但阿丹同細表妹既中魚頻率最高，而其中又尤以用竿釣既阿丹上魚更快更密；無辦法啦，細表妹就只係靠一雙手，又點可以同魚竿魚絞比較呢。
就係咁樣各人都忙住中魚，而據我地既觀察，比起其他艇，我地眾人中魚頻率應該係算係較高既一艇，呢個絕對係因為我地係有秘製蝦仁既關係！因為最明顯睇到原因既就係我兩門勾既生蝦果一門一直都無惑魚上過，只係靠上門勾蝦仁的那門勾中魚，所以如果其他艇係只用生蝦而無蝦仁的話，佢地應該都真係只能對惑魚望門興嘆同埋最多只係偶有砍鑊，而唔係好似我地咁樣中魚之聲此起彼落，忙過不停。但既然講到蝦仁咁得食，生蝦又乏魚問津，點解我仍然要留一門生蝦呢? 咪就係因為惑魚我地人人都在釣，但我卻希望可以有其他魚又或者更大一點的惑魚會對生蝦感興趣，所以始終保留住這門生蝦。不過又真係一直都係以蝦仁中魚為主。就係咁樣大家大約興奮左一個小時，本來打算一直咁樣繼續玩落去，點知走鬼既時間又到啦，因為水警又再出動了，所以一眾釣艇呢個時候只好四散，打算稍為避過水警之後，再返去搏殺過。我地走鬼由航道中心、駛往九龍區那邊的東隧入口頂附近一帶，諗住只係作為過渡，本身就無咩特別期望既，殊不知世事冥冥之中自有主宰；落左餌都唔夠兩分鐘，我仲同阿細表妹講緊話釣左咁耐都係惑，魚仔其實都叫收夠籌，而家我地最需要既就係一點驚喜，句野啱啱講完我連口水尾都未吞返落肚，就已經見大表妹呢個時候有明顯的抽魚動作，而且節奏同表情都不同，肯定魚的份量較之前既惑魚都不同；本身諗住問佢駛唔駛撈箕，不過見佢既手勢同起魚速度，又應該可以應付得到，再加上我都有魚食餌同抽中左，於是就同佢講聱話「慢慢上魚，唔好心急，真係有需要撈箕就再通知我，唔好夾硬的條魚上黎」。結果大表妹輕輕鬆鬆，應付自如，一野就的左條魚上黎，原來係良型大黃釘一條，足足半斤有多！眾人都來聲歡呼，齊說全靠水警來驅趕，我地就會係適當時候出現係適當既位置，遇上呢條魚呢！不過中完呢條魚之後，我地就只有其他小魚釣到，所以當見到水警離開，開始有艇釣往航道中心駛去，我地又再收繩往剛才爆惑的航道釣點駛去，希望食住頭先個勢，再釣多一浸惑魚黎個完美收官。
但係正如我呢篇釣行遊記開首所講，釣魚就係要睇流水，尤其釣惑魚這些箕頭魚，更加重耍。同一個釣點，同一釣組，同一種魚餌，只係前後差左都唔夠半個鐘，就已經係一個天、一個地了。雖然我地都有釣到惑魚，但係都只係小貓兩三條，絕對不是剛才那段爆釣黃金一小時的那一回事！咁雖然魚訊就靜左，不過唔等如我就好空閒；因為今日下半場開始我已經開始逐漸指導細表妹如何操控小船竿來作釣，甚至在走鬼之時，大表妹中大黃釘之際，已經把船竿借她讓她體驗一下。因為佢地次次出黎艇釣都用手繩，但又見到我同阿丹等都用竿作釣，好不休閒，而且更不會有魚線被風或被人搞得亂作一團，免受救線之苦，從來萌生了買返支竿傍身既念頭；咁我咪趁今日唔算密口既情況，可以較為分心既情況下，一邊示範一邊講解一些基本操作小知識，並等佢實習一下，來點了解之後先再決定下次買唔買支魚竿上黎代替手繩作釣。所以最後既果段時間就係可算是對細表妹既特訓了；而可能由於今日一整日我都間歇地同細表妹來個實地船竿操作基礎小課堂，所以佢出奇難得地係無訓過覺，亦都算係咁多次上黎狀態最好的一次呢！
而最後我地就係因為黃金水流時間已過，魚訊轉趨平靜之後，平平淡淡咁完結左是日釣行了。
總的來說，今日釣況真係好一般，如果唔係有果算黃金一小時的大逆轉，應該可以破到我地上B記艇釣魚咁耐以黎最差既紀錄了。不過就恰恰有呢段小高潮，我地又唔算得上釣況慘淡呢，哈哈。而且今日全日都有講有笑，絕對係身心都得到解放，而且大家難得一聚，所以我都已經滿足了。始終釣魚最重要都係享受過程，而家仲可以同幾位好表妹同埋好朋友出來釣魚，真係已經夠哂哈皮了。希望下次釣魚之行唔駛相隔得太過耐大家又可以出發享受釣魚樂啦。
南極蝦醃製中
出完水風乾
又係你呀，阿寶
又大隻左又好玩左
雞泡
小休睇跑馬
大表妹與黃釘
活潑的黃釘
今日至叻係你喇！
得咁多，仲有一小袋係冰箱雪起左無影
四老表團隊大合照
有蒸有煎，實有一條啱食嘅
精華之湯，養顏有益
請先 登入 以發表留言。