嘻嘻快閃千島湖紅葉

路線: 掃管笏-> 掃管笏村路-> 麥里浩徑第十段-> 大欖涌水塘小壩-> 千島湖清景台-> 大棠伯公廟-> 佛祖廟-> 大欖自然教育徑-> 大棠楓香林->
大棠山路-> 大棠巴士站-> 元朗發記雞粥
登山之友: 陳車嘻嘻、YY

是咁的，今年又唔係郊遊過嘅，不過認真一諗又真係無同嘻嘻團隊出發過呢，所以襯住年尾點樣都想黎返次快閃遊。可惜嘅係隨住大家年歲漸長，所要顧及的事物就愈來愈多，亦都較以往更難分身；所以本身諗住黎個嘻嘻三人行，但最後因為超級嘻嘻有公務在身不在港所以只得我同陳車可以出發。而對於路線既選擇我地亦都唔係一下子就選擇好呢條的。因為陳車話佢亦有公務在身，所以電話訊號要好，而且隨時有可能要從郊外「撤退」，所以我地曾經有打算方便一點只在港島的路線上選擇的，不過時值大棠看紅葉的好季節，在漁謢處的網頁上亦都可以看到紅葉指數達乙級，即「已紅」的級別，是絕對的好時機，再加上本身也想去看一看今年在千島湖新加建的觀景台，看看會否有更好的景觀感覺；所以，在陳車上了香港通訊管理局的網站檢查了一下路線沿途的電話信號都是普遍能夠接收的情況下，我地最終還是決定選擇這條路線。所以話現在郊遊的資訊真的比以前的都豐富很多了，我地亦都應該善用一下資源呢，畢竟這也關係到自身的安全和方便性呢。

我地兩個都係港島人，所以就約埋一齊食完早餐先搭車出發；於是陳車就介紹左去一間相信係上環區最抵食既快餐店食早餐，然之後我地再坐巴士直達黃金海岸的老麥買多兩個漢堡包、魚柳包以備不時之需，然後就正式起行，步行入去是日的起點掃管笏村了。喺村口士多買完朱古力雪糕餅之後我地就往麥徑十段走去，行左陣就見到堆山羊，我仲話比陳車知養到咁上下呢堆黑草羊就會比人拎出市區賣，當然就係賣黎食啦，其實係香港新界區都算係幾普遍既。咁影完羊就繼續行，呢段路就算係比較無乜風景睇，咁當然就係全力吹水啦我地；講起呢條路線睇紅葉，陳車話佢老婆知道我地兩個黎嘻嘻郊遊睇紅葉咁浪漫都會有丁點兒妒忌喎，不過無辦法啦，阿嫂運動能力係比較弱一點，所以都係安坐家中等陳車影多幾張靚相返去交差睇下好過啦，哈哈。

一路繼續行，過左大欖涌水塘小壩我地繼續上，一直上到半山分岔路兼第一個賞湖好景點我地先至停落黎休息一陣兼影相。打完卡，從行山程度對一對個地圖之後，再望一望指示牌就繼續出發；畢竟都係大眾路線，指示非常清楚易明。好快就去到千島湖清景台的指示牌，再走幾分鐘就嚟到今年先至加建的觀景台，果然比以往我黎時有一個更寬廣、更安全的觀景台可以比我地遊人好好的欣賞這個漂亮景色。望住咁開揚既千島湖景色，真係令人心鄘神怡。

離開左觀景台之後我地繼續上路，基本上就係普通山路，這段麥徑景色也一般，所以我地都係一路行一路吹水仲有目及女，直至我地抵達大棠楓香林。雖然係星期六，但係遊人都唔算多，唔知係咪受社會運動的影響(後來才記起是日元朗地鐵站因社會運動全日關閉)，同以往紅葉季節比起黎真係少左好多年輕人黎賞紅葉呢。咁我地兩個都麻甩嘻嘻，又無一部好相機，所以主要都係欣賞下現場景色同氣氛，影返幾張相就往下一堆楓樹走去，唔似那些妹妹仔同情侶咁，一個位置都要擺幾萬個姿勢、影萬幾張相先至滿意咁。不過行行下都見到有個外傭都係自己一個黎，帶左相機係度影影影，見佢影得幾靚咁，佢又一個人，就同佢搭下訕，叫佢幫手影返幾張合照咁。另外亦都見到一個貌似宅男既人士帶埋布偶公仔黎，再整好成個架、同反光布等黎幫兩個公仔影相，真係不得了呢。點都好啦，山中各態，只要唔係破壞環境，周圍掉垃圾同喧嘩就已經無問題了。而我地怱怱走完一圈楓香林之後我地就沿住大棠山路下山去了。到達馬路之後坐上巴上出到元朗之後，再帶陳車黎我去親元朗如果無咩特別想食時都一定會去既發記食埋個沙鍋靚雞粥之後，我地就襯住天未黑，示威運動未轉激烈之際離開元朗，往市區旺角一帶去睇行山裝備，並完結今次快閃千島湖紅葉嘻嘻行了。希望出年大家可以有多一點時間一同上山吧。

村口士多啪返個朱古力雪糕餅先上山，爽呀！