YY08的部落格

路線: 香港仔水塘道-> 香港仔下水塘-> 松鶴亭-> 香港仔水塘道-> 港島徑第四段-> 中峽-> 布力徑-> 黃泥涌水塘公園-> 大潭水塘道-> 陽明山莊-> 港島徑第五段-> 渣甸山-> 爆炸品處理基地-> 畢拿山天梯-> 大風坳-> 柏架山道-> 鰂魚涌樹木研習徑-> 康柏徑-> 南豐新邨-> 海山樓(怪獸大廈)-> 力奇火鍋
登山之友: 陳車嘻嘻、YY

是咁的，新一年嘅第一行，又係同嘻嘻同伴出發。超級嘻嘻繼續在外地，於是就只係得番我同陳車嘻嘻出動。本身我想遠征的，不過陳車說想早上先回公司辦一下工再出發，於是決定下一次才遠征探索新路線。呢一次就完全由佢話事，咁我話又唔想行得太短，於是佢就話不如行港島徑的三四五段，既然有人決定好路線咁就一於咁話啦。

不過因為陳車辦工完都都差唔多中午，所以我地食完晏晝之後決定省去田灣山的那一段，畢竟我們想追回一點時間而且該段風光亦只算一般，所以最後我們就由香港仔的水塘道開始了是日的港島徑小遊了。一去到香港仔郊野公園入口，就已經看見幾隻小野豬在遊蕩覓食了；就只看見小野豬而不見豬媽媽，不過佢地明顯已經習慣了見遊人的生活，其中一隻看見我靠近影相，甚至擺著尾走過來，彷彿以為我是想餵牠呢。我可不是會隨便餵飼這些野生動物的，不過旁邊倒是有位遊人走到豬豬附近放下一根香蕉就行開了，而豬豬看到香蕉，頓時走過去，熟練的咬開了蕉皮，先吃其肉，再吃其皮，總之就邊食邊擺味，很是滋味。我地影完相之後就正式起行，亦都在附近見到多幾隻小野豬，都是在開心愉快地覓食。不過我地就無再停下，而是繼續前行。

首先嚟到是日第一個分岔口，香港仔下水塘水壩，一邊是接往上水塘和港島徑的，另一邊則是接金夫人馳馬徑繞著黃竹坑外圍再接上布力徑的；咁今日其實我就無乜好好理解過條路線，因為陳車話其實就係行大部份的港島徑的三四五段，所以我就跟住陳車就可以了。咁如果要接上港島徑，梗係往上水塘那邊行啦，雖然事後我地發覺其實往右行會更快捷風景也可能更佳，不過這是後話了；誰叫我又唔睇清楚哂成段行程就直接起行呢，哈！不過又咁講，我地都係旨在邊行邊吹水，所以其實行多左遠路同行少左快左又唔係真係咁緊要，始終這些路線很多支點，隨時加減路程都沒問題的，不過如果以後要玩長征或去一些唔熟悉的路線就真係唔應該係咁了。好啦，返黎講返路程先，揀左行下水塘接上水塘呢一段咁樣我就真係熟到不得了，因為平時我自己行上水塘上灣仔峽落灣仔都係行呢條路線的，所以可以講話係完全唔駛睇路牌(哈哈，最需要一開始走的那個分岔反而無行到仲係度認叻)都知道點樣行，於是我地就一路行呀呀，好快就走完下水塘再接上水塘路段，沿住香港仔水塘道一路走，終於黎到港島徑三、四段的交接點和繼續能通往灣仔峽的水塘道，咁話明今日行港島徑嘛，當然就同我平時熟悉的水塘道講再見，轉入港島徑四段的路口繼續行程啦。

香港仔水塘道係真正家樂徑，所以基本上都係良好石屎路，而家港島徑，即刻都變返小徑路，以我所著的越野鞋，其實走起來更為舒服，這段路都在山中走著，所以都幾舒服，然後一路行我地又黎到一個分岔路，但係我地仍然係無選擇到更快捷的金夫人馳馬徑，而係繼續選擇走港島徑至中峽接布力徑的原有路線，講真呢條路真係最為轉折，明明可以有更多短路可以行，偏偏要整條咁樣嘅路，不過我唔係讀地理呀，漁謢，我唔知佢地點設計啦，不過我發現如果要去中峽，我仲可以上左灣仔峽再經超豪宅地段的中峽道繞過金馬倫山就可以到達中峽，也比走這條迂迴曲折的港島徑四段為簡單。咁點都好啦我地就沿住港島徑四段黎到聶高信山，咁我就同陳車講話我有個舊朋友屋企就住呢頭嘅，而當第一次我知道個朋友仔係住呢頭時我就同佢講笑咁話『吓,你住呢頭? 呢頭係我行山先會經過既富貴地方黎架喎』，而果個朋友仔只係會話都唔係丫，呢度起碼有巴士小巴到達，比以前住陽明山莊下下都要坐的士出入方便多了，哈哈。不過呢，我地路經既呢面聶高信山就唔係我朋友仔住既果一面，呢面感覺好似再豪宅多一點咁；當然比起中峽上面果堆，都仲差一兩個級別既。邊行邊睇桶，咁好快過左「睇樓地段」我地就黎到黃泥涌峽、網球中心隔離既油站做點小補給同小休了。啪左幾粒糖，啪多支佳得樂，我地又再繼續上路啦。一路沿住大潭水塘道往上走，拜會了一下黃泥涌水塘公園過廁所之後，我地亦繼續上斜，然後黎到衛奕信徑的出入口，又見到一堆小野豬跟住一隻豬媽媽係度搵野食，同佢地影多兩張相之後我地就繼續上路，因為我地仲有一大半路程要走，而呢個時候已經係三點幾，雖然話有帶侑頭燈，不過都想盡量天黑之前可以下山完成呢。咁黎到陽明山莊港島徑五段加衛奕信徑入口，我同陳車都決定選擇呢條路而唔行另一條舒服得多、都是石屎大路的大潭水塘道前往大風坳/柏架山。

揀定左，就無得後悔。講笑啦。行左唔夠十分鐘，都係一直咁上，已經係咁喘住氣咁講笑話好後悔，不過其實都係辛苦一段路，上左渣甸山之後其實都無乜問題。上一次行我就同超級嘻嘻由對面路線走過來，今次則是倒轉走，所以其實這路線都是走過好幾次了。路線既然黎黎去去都係咁，都係講返小插曲啦咁；話說近年行山都愈趨流行，男女都多左行山，行山時尚都是潮流。而女裝一般都是修身束腳運動服，上身就運動小背心加件薄風褸咁。好多女生都愛行山打卡放上網的，都是類似這種打扮的，而其中一個我們幾個嘻嘻兄弟都有追蹤開的、叫紫晴的，更是常常都是以這打扮示人。而今天其實也碰見好幾個女生都是類似這樣的穿著的，而其中尤以我們上山這段路所遇見的一位，則甚似紫晴。所以我同陳車一路往上走，我都一路笑著喊叫紫晴，當然其他人是不會明白我們笑什麼啦。哈哈。經過小馬旁的爆炸品處理基地，邊往上邊跟著紫晴和她的同伴後面走，我們終於來到畢拿山頂了。係呢度我同陳車就稍休一會，而紫晴則繼續前進，所以我們只有目送她的背影逐漸消失於我們的視線。不過呢個時候亦有另一段有趣的小插曲：本身走到這裡其實是沒有分岔路的，路牌的一邊就是往渣甸山，而另一邊就是經天梯落大風坳，但係呢個時候忽然聽到兩把聲、繼而係兩個人影係我們休息的觀景台旁的叢林中走出來，帶頭的是一位山界師姐，另一位跟住的則是師兄；原來他們是在山下大潭水塘沿住一條之前已經有唔少山者爆林行過的小路穿梭而上而到達山頂。而最好的是上到黎山頂佢地傾左幾句，師姐問阿師兄一唔一齊食飯然後師兄話要返屋企食飯之後佢地竟然就係呢度分道揚鑣，師兄就往渣甸山那邊的路走，而師姐則沿天梯下山去，這真的是非常有趣的「散隊」形式呢，陳車用兩個字形容得幾貼切 - 「瀟灑」。

咁我地休息左一陣之後亦繼續起行啦，咁我地其實是日晚上則約左嘻嘻高高一同食飯聚舊的，所以我地餘下既行程其實就係取決於高高幾時可以收工然後同我地會合食飯，咁打過電話比佢之後佢話預計可以如常收工，於是我同陳車決定沿天梯落到大風坳之後唔過原本的目的地大潭，而沿住柏架山道往鰂魚涌方向走。不過去到之後的一個分岔路時，我地則決定走港島林道往康山方向走而唔係行平時那條在鰂魚涌街完結的那一條康莊大道。最後這一段其實相對十分輕鬆，我地好快已經下了山到達南豐新邨，而我見仲有時間，就帶陳車去這邊附近一個港式建築打卡聖地 – 怪獸大廈又名海山樓及益昌大廈參觀一下。之後，本來打算坐搭地鐵的我們因為都叫做行左成日，對腳仔有點軟，而搭地鐵就一定無得坐，所以我地就選擇左有得舒舒服服坐住過海的巴士，往九龍的飯聚地點和高高會合，並渡過一個充滿歡笑聲與慨嘆聲的火鍋之夜了。希望下一次，超級嘻嘻可以一同出席，令我地好久都不齊人的嘻嘻四人團再度整齊會合吧。

 
豬豬
  
來~
 

 
快樂開餐


 
仲有幾隻啖左近

香港仔下水塘水壩

 
港島徑四段內的迷你瀑布

  

 
遠眺壽臣山深水灣一帶
 
布力徑回望南塱山黃竹坑
    

 
離開香港仔郊野公園範圍 繼續上路
 
聶高信山睇樓團、加遠望陽山莊


 
野豬媽媽與小豬

 
陽明山莊 
  
有示意牌反而無豬豬

 
回望陽明山莊

 
渣甸山

 
 
遠望大潭上水塘
 
小馬山加爆炸品理課基地
 
大潭水塘

   


  
畢拿山頂、右面就是沿天梯落大風坳
 
我影嘻嘻陳車
 
嘻嘻陳車影我與畢拿山標測柱合照
 
大風坳邊經分岔位
 
選擇落康柏果邊而唔係落海山樓後面個出口就要從呢個路牌呢面走
 
 
完
  
計埋由香港仔出發到鰂魚涌巴士站總計大約走了18公里
真的很夠皮的一天呢!! 



  
  
力奇馳名蕃茄粟米豬骨湯底火鍋


嘻嘻嘻歡聚力奇火鍋 - 開心的一晚