嘻嘻出鞘大刀屻

路線: 嘉道理農場-> 大刀屻-> 北大刀屻->箕勒仔-> 蝴蝶山-> 粉嶺火車站-> 沙嗲王
登山之友: 陳車嘻嘻、YY

是咁的，上星期同超級行嘻嘻復出小試機槍堡 https://yy08.pixnet.net/blog/post/106434115 時，話說陳車咪係屋企訓緊覺無黎嘅，然而佢就話今個星期行動補返數，咁就一於咁話啦。出發前一日，我地就係度研究路線，我都係果句啦，家樂徑就免諗；咁仲有咩係唔會行呢？咁啱早兩日馬鞍山上面就有山火，剛剛起完無耐，雖然有好幾條路線都想係果面出發，但都係暫時唔去住，留返下次先；本身想行太墩但又怕天色一般影響海景，左諗右諗無咩好主意，我就提議不如照住香港山峰(高度)排名嘅山峰名字黎睇，睇下會唔會有想去嘅地方。我建議係由低玩到高，所以先睇排三十左右的，結果陳車就揀左位於新界西北的大刀屻，睇簡介話呢度山脊兩側都是懸崖斜坡，因其山勢薄如刀刃而得名。而在山頂一帶更可飽覽八鄉、錦田、石崗、林村及大帽山一帶的景色。睇落都幾吸引，路程又可長可短，因為行完大刀屻如果仲有足夠時間同體力，仲可以上埋對面嘅雞公嶺添！真係幾有彈性，又有點挑戰性架。路線鎖定，就約好集合時間地點。

出發之日，約好在火車站集合再一同乘火車到大埔墟站。選擇大約十點半到達大埔墟是有原因的。因為早餐可以先在金拱門坐定定堂食，嘆埋杯咖啡之後夠十一點就再買埋十一點後才供應的午餐或補給漢堡包。由於剛剛食完早晨全餐，心諗又唔會行到天荒地老，一於買兩個魚柳包打底就夠了。於是我地就去巴士站坐64K，去到嘉道理農場站下車，找到路徑入口就正式展開今日行山之旅。

睇介紹話大約九公里，有點對體能的消耗但同時唔算難度太高，正好適合陳車，因為這幾年佢都有跑開步，體能比早幾年好，體能消耗呢方面佢絕對可以應付到；但係如果行山難度較高的話，作為並非資深玩家既佢就真係需要再多點嘅磨練先可以應付自如。咁條路線真係好簡單易明，一條路基本上就已經行哂大刀屻的山脊；而其實呢條路線如果由嘉道理農場出發的話，可以算是「先苦後甜」，因為由嘉道理車站對面的入口開始，基本上就是直上，不斷攀升五百多米，經過好些山峰、直至到達大刀屻主峰。其實睇風反而主峰都唔算一定係最靚，因為大刀屻呢條路線本身位於這個新甲西北中心，周圍望到是唔同地方既景色，一邊是大埔甚至是更遠的船灣淡水湖、一邊是大帽山、川龍和石出、再另一邊則是橫台山、錦田元朗，而最後一邊則是落馬洲、新田和更遠的深圳呢；所以要睇哂這些位的最佳位置不應集中在一點，而是應該隨住走在這些山峰時都有不同的角度去睇唔同既風景，所以這一段就算是全段路線最辛苦的一段，但倒也是最多野睇，風光最好的一段，所以走起來也是挺有動力的，再加上有美景分心，其實都忘記了那份辛苦了。

上到黎主峰梗係要影下個高度牌和等高測量柱，然後我地又再繼續起行，因為這裡一直都是山峰接山峰，一個又一個的，所以也不算是在上了一個山峰頂之後就沿住山脊走一段平路直至下山的。所以走完一個山峰好自然就會是想接住又再上落下一個山峰了，在山中穿插，又不是在山脊行走，終於我地又黎個另一個打卡位- 北大刀屻了。其實主峰那邊的大刀屻可以叫做南大刀屻的，因為大刀屻主峰就是相對這個北大刀屻為南面一點、再高多大約八十米吧。剛來到北大刀屻時，還看見一位年青人坐在測量柱那邊在做冥想，咁後生就會做這種對生命追求的行動，相算是經歷了一些人生吧。既然人地係度修行，我地梗係唔會阻住啦，於是拍個照，飲多啖水就又繼續上路了；不過由呢度開始就比較偏向落山了，但係其實亦都算係路線較悶一段的開始，因為基本上由開始落斜到箕勒仔，跟住到之後落到蝴蝶山，雖然路程都係不斷下降高度，理應走得舒服的。不過也是無甚風光，陳車都話就算佢黎呢度跑，呢段都會算係比較悶，所以大刀屻的重遊值唔算好高，第一次黎睇過確實值得既，不過以佢風光欣賞度同美景飽覽指數做對比的話，絕對唔算物超所值果種，畢竟難度有一定係度嘛。

基本上落緊既時候風景就已經無甚特別，我地亦無注意太多，反而想講一下就係標示牌；其實本身就無乜野既，不過自從落到箕勒仔附近一帶開始，到蝴蝶山徑之後的那些指示牌都由山徑傳統用的木色牌轉了做類似街道名牌般的金屬指示牌，成個感覺即刻好唔山野；我唔知係咪新界而家既山野都多左轉用這種金屬指示牌，本身又無咩問題，不過品味既野…

點都好啦，一路由箕勒仔再到蝴蝶山再到達終點，即粉嶺火車站對面的蝴蝶山徑口，我地都係快步走過，因為打卡位真的欠奉，然後我地又覺得今日已經夠皮，同埋陳車都係時候要返去市區交人、咁我地一於就咁離開粉嶺、完成今日既郊遊行，並出去同埋嫂子食晚飯。至於雞公嶺，都係等以後行多幾轉唔同地方之後再過黎挑戰一下，順便再「重溫」和比較一下這邊的景色，於大刀屻上以及於雞公嶺上，會是一個怎樣的分別呢。

總括而言，大刀屻這路線是值得一走的，尤其由嘉道理農場至大刀屻一段風景最美；可惜由北大刀屻至港鐵粉嶺站一段，是沒風景的連場梯級和水泥路，沉悶外亦令人疲累加上疲累，大打折扣。還好的是整條路線的指示清晰，路不難走亦不需攀爬，只是遊走大刀屻及北大刀屻和之間的山頭要不斷上上落落，甚需體力；如果是新手，真的不要因此行山郊遊漸成潮流而又未做資料搜集和有一定基礎就走黎挑戰，畢竟山水都莫欺，最緊要安全，這才是對自己對其他人都應有的負責任山野態度。