雙管齊下城門峽

路線: 大圍火車站-> 大圍新村-> 下城門道->下城門水塘水壩-> 林務馬路-> 城門隧道行車橋橋底-> 城門峽->上城門水塘出水隧道-> 上城門水塘主壩-> 城門道-> 上城門水塘草壩-> 城門亭->梨木樹->荃灣金坊泰國美食
登山之友: 超級嘻嘻、YY

是咁的，早兩日見超級係我地嘻嘻群發短訊話得閒可出發，咁我見週末天氣不錯，於是問佢星期六黎唔黎返個輕鬆行；佢就話無問題呀，咁路線好簡單啦，一於就揀返上次我地行左機槍堡而無揀到嗁下城門水塘啦。路線都定埋，再發訊息問陳車，不過有家室嘅男人就係有分別嘅；佢話想抽返些時間陪老婆同屋企人喎，另外佢都想去跑下步繼續操練，所以今個週末就先放過佢一馬咁喎。

其實揀呢條路線仲有一個原因就係我地因為係週末出發，如果揀一些較大路的路線，我諗以最近郊野多人過區嘅情況黎睇，分分鐘我地會在山上塞人，所以揀呢條低調一點既路線應該比較適合，事實以今日我地沿路既情況殷睇又真係證明我地既選擇係正確明智的。

咁講返行情啦，正式上山前，我基本都係會去金拱門度買定補給品架啦，咁準備好哂糧水，我地就正式出發啦。由大圍市中心行下行下好快就已經去到大圍新村，然後就見到我地條郊遊路線既入口道路 – 下城門道了。緩緩向上，原來就係會經過寶福紀念館同埋富山火葬場的。其實呢段路都係一路係馬路黎，佢又咁近大圍沙田，所以沿途我地邊行都邊有好多車經過，初時都以為佢地係去以上這些地方和住宅，但一路行，已經過了這些與先人有聯繫的地方，還是不時見到有車經過，才知道車子都是駛往下城門水塘主壩來遊玩的。想講一講既係，這些水塘、郊野公園，都有好多馬騮，而且這些馬騮長期住係呢度，佢地根本唔怕人。咁佢地肚餓會係點？咁高智商嘅佢地又點會肯去搵咩果子呀、其他雜食黎食吖；你睇而家連野豬都識得出黎搵野食，就知人類既食物係幾咁吸引得黎又容易得到。上到主壩之前果段路比較多樹，所以都有唔少馬騮在「潛仗」，監視住蒞臨既每一位遊人。我就醒唔起呢個問題，咁我上山其實就一路拎住袋金拱門吃，吃完了就想等到有垃圾桶才拋掉，所以就一路都拎住袋野；另一隻手就拎住個自拍棍和相機。咁好啦，行到上黎見到一些較細體型既馬醫都仲無咩特別，不過再行行下望上斜坡時，就見到一隻較大體型既馬騮，佢已經唔係對我虎視眈眈，而係根本見到我有袋時立即從斜坡上面衝落黎路面，而佢地係極度聰明，佢雖然唔怕我，但都無諗住同我正面衝突，於是佢就拗彎兜左去我後面，我相信佢係想趁我稍一唔留意就從後偷襲、搶我手上袋野。咁超級就係我旁邊既，佢就幫我守尾門啦，隻馬醫想埋黎我度時，超級就作狀兇隻馬騮，但隻野根本就唔怕唔會縮，反而仲擘大口想兇返超級傳頭，不過佢就停左一停，等超級行遠左幾步佢就又想繼續向我推進。我呢個時間就唯有將我支伸縮自拍棍拉長，扮做會打隻馬騮，但係佢地根本唔會逃走，就算我真係揮左支棍兩下，佢都只係停左無再前進，所以這些馬騮根本就係呢度既禍患！真係唔明點解仲有咁多人會餵佢地，真係痴線。搞到這堆馬騮覺得你比野食佢地係應份，佢搶你都無問題；反正你又唔會真係打佢地、消滅佢地。所以真係提醒大家要小心留意，同埋真係要將所有膠袋、紙袋都收好，真係食物和袋皆不可露眼。今次係我一時失策，先會搞到咁狼狽。

咁離開左隻仆街馬騮之後我地就黎到下水塘個主壩啦，呢度好多人係度遊玩。好多人特登開架車上黎，然後同埋志同道合既人係度玩遙控飛機啦，直昇機啦，又或者遙控車等，好不熱鬧。不過其實有些遙控飛機都真係好鬼嘈，絕對會打擾到附近既居民同遊人，所以都係希望玩的人可以自律點，改裝一下或者唔好喺些仲係人休息既時段玩咁啦。好快過左條主壩我地就再沿路上，下水塘係唔似上水塘咁有石屎路咁比你地圍圈走既，不過就算有我地今日都唔會圍住行；因為我地今日行程主要路線係想經由城門隧道在經過下城門水塘時會由隧道變為天橋的橋底下通過再經城門峽而再往上城門水塘去。所以先話呢條路線同我地以往睇既野係有點不同，有點新鮮感。黎到城隧行車橋橋底果種感覺真係幾有趣，究竟係我地係郊野地方有著這種繁忙的交通，還是在這個繁忙的鬧市中間我們覓得了一片靜土？我都唔識講，只不過果種反差既感覺真係幾特別。好像在點城市中既綠洲，又或者係荒蕪地區通往現實世界既驛站咁樣。

點都好啦，穿過左城隧橋底再行一小段路就唔再係大路了，不過都仲算係平坦道路既，不過就係比較狹窄的小鋼橋路線，一路在城門峽中穿梭著。一路行我地就黎到上水塘主壩的底部了。就咁望上去都已經感受到個氣勢，同埋條樓梯又長又斜咁；不過我地無即時就挑戰呢條小天梯，而係走左過去旁邊既上水塘出水隧道打卡。喺呢個出水隧道位都幾有探秘既味道架，尤其呢個時候佢無放水，我地仲可以走埋入去裡面睇下添，咁當然我地都無一直走到入去最深處，但係就相信水係如果相關當局開水閘的話，水就會從這深處湧出來了。

「探秘」完畢我地就返固主壩底部，沿住金屬梯來到了壩底、天梯的起點。這條天梯，可說是這條路線的除城隧架高橋底部路段以外另一「主菜」，而且有得你叫天梯，雖然同孖崗山果條絕對領域無得比、同畢拿山果條都仲差唔少，但係佢假假地都有成四百級、上升高度都有成100米架。不過佢好處呢就係個天梯雖然係一直過咁上四百級，但每一百多級佢就有一個平台位可以比我地休息下同埋影下相咁，所以其實我地都好輕鬆咁就上到壩頂，即係上城門水塘既城門道了。係度打左陣卡我地就繼續路程了。不過呢度呢我就好幾年前已經同準備仔上爬下碌城門壩 https://yy08.pixnet.net/blog/post/106051870 時黎過了，難怪一到達我就已經有種似曾相識既感覺呢。

打多兩張卡我地又繼續起行了，沿住條城門道咁行，經過那些燒烤區都有唔少人係度燒緊野食，咁有人有野食，即係就會有機會馬騮就係附近了。果然，行多幾步就已經見到有馬騮蹓躂著，而其中一隻仲跟住一個阿伯喎，點解呢？原來個阿伯邊行就邊餵隻馬騮，咁隻馬騮就「忽然」溫馴地跟住個阿伯同埋輕輕地仲佢手中接過花生；咁我雖然唔鼓勵人餵食馬騮，不過佢餵既話我又唔會話佢既，始終佢又唔係做緊一些殘害生命既野，只不過係助長緊馬騮既氣焰咁啫。佢餵緊就由自可，我行過，然後我拎住部相機影佢，佢就真係對我唔客氣啦，好似我相就影左佢，但係野食無比佢咁，所以非常不滿，於是佢就向我追過黎，咁我又唔想理佢咪令轉身囉，點知隻馬騮為左表示不滿，竟然仲拍打左我對鞋尾一下！真係咩世風日下！難怪事後同陳車講起佢都話支持我地應該小打那些馬騮，認為馬騮都該死，哈哈哈。所以我奉勸各位，如果有機會去到這些郊野公園和水塘，真係唔好諗住一定好安全就咩保護措施，裝備都唔準備，同埋唔對周圍保持警惕。尤其反正係行山，帶支行山杖傍下身，加對手套，同埋長衫長褲咁就穩陣好多了。就算隻馬騮真係走埋黎兇你又好，甚至想攻擊你、搶你野又好，起碼你都有保護裝備減低受傷害風險嘛，畢竟爪傷其實事少，染到咩破傷風呀，其他病菌就唔好啦。而有支行山枚喺身邊，唔主動攻擊，都叫做可以防守一下嘛。點都好啦，比隻衰野拍左我一下鞋底咁我就加速離開就算了，我唔係怕，我係唔想再咁落去我忍唔住打鑊果堆欺人太甚既馬騮精。

快步一路行到去草壩那邊；本來落梨木樹的分岔路就在左邊，但係我地就因為見到前面有堆牛牛所以就決定去睇下佢地先再走人。牛牛比馬騮馴良，唔多會襲擊人，所以我都走到好埋同佢地影相，佢地就自己係度玩，扮哂打交咁，都幾有趣架。同佢地影完相，坐低抖左陣，我地就在分岔口轉灣，一路往下走，到達梨木樹，完成左今日城門水塘既路線啦。不過我地就未有即時完結旅程，反之我地就繼續一路行，經和宜合道，落青山道再一路經大窩口行到去荃灣，最後再喺金坊泰國美食度食左個飽到飛起既晚餐之後，先至坐車離開，去找陳車嘻嘻食糖水，完成是日大滿足之行程。

呢條路線總括黎講，並唔算大路行線，所以撞正呢期周山都係人既時期，呢條路線都算避開好多山友。基本上佢好多段路都係非常易行，對體力需求都唔算大，唯一挑戰應該就係在主壩底部上到壩頂的果段小天梯了。景色方面都算係山林美景，仲有水塘，同埋城門峽既氣勢可以睇到，再加上可以睇到山中隧道的行車橋，所以呢條路線都算幾多唔同感覺既景觀可以欣賞，算係唔錯的選擇呢。不過睇到那些介紹此路線的網頁，原來仲有另外一條路線可以睇多一點城隧的行車橋，不過就會唔經壩底同埋小天梯咁啦；凡事都有取捨既，咁作為第一次黎，我又覺得壩底既出水隧道位、城門峽、同埋經小天梯上主壩頂係不錯既選擇，所以，剩餘那些未行的、可以睇到更多城門隧道行車橋的路線，下次就連同圍繞上城門水塘時的行程再順道走走它吧。

行程由此起