嘻嘻嘻重新出發走東洋賞飛鵝

路線: 井欄樹-> 衛奕信徑(三)-> 小夏威夷徑->小夏威夷水壩-> 往回走到井欄樹接衛徑(四)-> 黃麖仔-> 大藍湖->牛寮-> 東洋山-> 大老坳-> 東山-> 飛鵝山道-> 飛鵝山觀景台->扎山道歷史觀景台->沙田坳道-> 沙田坳-> 慈雲山觀音佛堂-> 慈雲山村-> 旺角第尾牛扒
登山之友: 超級嘻嘻、陳車嘻嘻、YY

是咁的，話說我地行山嘻嘻團竟然都好耐無試過一齊郊遊了，對上一次我們仨一齊出發，竟然已經係天朗氣清走獅山 https://yy08.pixnet.net/blog/post/106356493，差不多有四年了呢！之後每次郊遊我地都總是三欠一地出發著呢；所以今次終於有決心地要黎個三寶出遊，行邊度其實都唔緊要，最緊要就係大家一齊出黎、有講有笑，一齊嘻哈就係今次目的！最近疫情令香港人都由市區轉向郊野，所以週末香港的山野都非常多人，於是陳車就提議大家平日出發，從而避開「人潮」。最近幾次平日去郊遊都有機會遇見一次藝人，不過今次我地所選擇嘅路線就應該唔會有啦，畢竟都唔算有咩大景睇既熱門路線。其實陳車都好體力呢，我們預定在下午出發就是因為早上他還要回公司工作，中午回家換好裝束大家吃過午飯就要出發了；所以路線選擇也不會揀一些特別長或者對體力消耗較大的，始終今日休閒為主。不過最近大家各自都有在港島遊走，於是我就問下陳車不如行下九龍果面嘅路線啦咁；最後我地就揀左由井欄樹出發，然後經衛奕信徑四段，穿越東洋山，飛鵝山等去到沙田坳，並打算如果有時間的話就再接麥徑五段穿越雞胸山、獅子山、九龍坳等去到九龍水塘睇馬騮；呢條路線好處係退出路線位多，即行山時間長短豐儉由人，隨時可以退出，所以特別適合我們今次需要午後食埋飯先出發，體力又唔是特別充沛嘅情況了。

大家都係港島人，約好在鰂魚涌地鐵站集合，就一齊坐車去到彩虹站準備轉小巴到井欄樹。不過啱啱收工就立即返屋企換衫再出黎既陳車又邊會有時間食晏呢? 所以我地就其實已經計劃左會係呢頭食埋晏先出發嘅。本身陳車揀左個出口就通往坪石邨嘅，但係我地覺得呢面嗁商場係領展管理，毫無特色又貴，於是我提議過返牛池灣邨果面搵食，貪果面有一些小店同埋人情味；而結果我地揀果間英輝咖啡屋亦都無令我地失望！

食完晏晝我地就坐小巴，來到了井欄樹起點了。本身我地應該落車就左轉入衛徑第四段的，不過黎既時候睇地圖見到原來如果從井欄樹往衛徑三段走可以接上小夏威夷徑並到達小夏威夷瀑布；咁陳車就話如果就咁行平時又唔會揀條咁平凡咁短既路特登去個小夏威夷瀑布，咁難得黎到多近，行多少少就可以去埋，咁最多我地再調整一下之後路程就可以，再睇睇都係大約行多兩三公里就可以，於是就決定臨時加埋呢個小路段，去睇多呢個瀑布景點了。行左一陣已經去到了小夏威夷徑，再落埋一小段斜路已經見到有個流住水既地方同埋小水壩，我地卻以為已經到左小夏威夷瀑布，所以打個卡影過相之後我地就已經沿路往回走了，至於發現其實無去到個瀑布度，則已經係我地完了行程之後回家我再上網睇一下其他人的圖片才察覺得到呢，所以結果都係蝕左無睇到瀑布呢，哈哈。

點都好，往回走很快我地已經出返到井欄樹村口了，去過廁所之後我地就正式開始我地原本計劃好的路線、即走上衛徑第四段，其實喺條村度行左一陣，經過有一間屋時我已經認得我來過此地了，即時回帶諗下係幾時啦；啊，原來係同準備仔、廚房仔當年飛鵝、古道、探國母 https://yy08.pixnet.net/blog/post/106269772 時經過的呢，難怪之後走的這一段路我都很有印象呢。一路走到大藍湖道，到達牛寮那個上山前的點我當年都有走過，不過那次我們就一前往蠔涌走去，而這次我們則從牛寮開始拾級而上，並一次由過由約海拔一百米米攀升四百多米去到大約五百多米的東洋山！呢段路可以算係全程最辛苦既路段啦，因為除左上斜，還是上斜；上到了二百多三百米的時候，我們從樹林中走到了可以望到周圍的山坡，從而俯瞰蠔涌和西貢白沙灣三星灣一帶，亦都比我地喺不斷爬升嘅掙扎之中得到一點喘息既機會。短暫打卡過後我地就繼續向上走，但係愈往上走，再加上天氣有點驟變，四周的環境開始變得充滿霧氣，甚至有點白茫茫一片的，而我們就只有走在山中，其餘周圍的景觀都已經再看不見的感覺了。經過不斷掙扎，我地終於上到了這段東洋山路段的頂部；這當然不計還有一小段攻頂的路段才到達它真正的最高點啦，但這則已經不在我們規劃的路線了。但上到這裡已經有夠嗆了，因為如果閣下在場的話，一定可以聽到我們沿途不斷掙扎的吶喊呢，哈哈哈。

到左東洋山頂部路徑之後就開始是緩緩向下的路段，很是寫意。如果天朗氣清的話，風景應該唔錯，不過我地今日就答你唔到，因為我地一路行，一路都只係見到前而條路，四周都已經係白茫茫一片，直到行到去飛鵝山觀景台，望向周圍雖然仍然大霧，但俯瞰九龍的話，偶爾倒是可以等雲霧消減一下時，可以看得到的。而我地黎到觀景台時，亦都係啱啱日落既時份，真係再遲十分鐘都已經完全見唔到個咸蛋黃了。飛鵝山因為交通方便，所以我地黎到既時候，周圍都係揸車上黎影相同睇日落既人，我諗現場就淨係得我地幾個係行山而來的呢。霧氣濕重，不而久留，以免凍親同埋身體冷卻，所以影過日落之後我地就繼續前進了。黎到了大老山，本身我地見呢段衛徑枕住都係行石屎車路，不如繞道上去行麥理浩徑落沙田坳的；但係因為一來天開始黑，二來我地唔熟路，天黑仲要搵路真係搵黎搞，三黎我地都覺得狀態又唔係一流，所以最後我地都係決定繼續沿住車路行就算了；什麼探索的，還是留待下次大白天同埋好天氣時再算吧。沿住車路一路走，都唔係無景睇架，一路都可以睇住九龍甚至更遠的漂亮夜景，可能因為愈走已經化低海拔了，所以雲海同霧都已經相對的少了呢。

一直的向下走，終於黎到了沙田坳，望下個鐘都差唔多八點了；本身計劃的從沙田坳沿麥徑五段走到去九龍水塘則還要走多七、八公里，喺衡量過之後我地都係決定留返下次先去睇馬騮，今日就係呢度撤出，取道經慈雲山觀音佛堂再經慈愛苑黎到慈雲山道的巴士站。咁呢度就無野好食既，我地就決定坐車出返九龍區既中心點例如旺角太子油麻地等等再算。而我地本來打算見架巴士都會出到太子果頭我就話不如去陵發打冷嘅，不過坐車既時候陳車可能真係已經好累了，畢竟佢今日其實上晝係要返工既，而且之前一晚仲要做野做到好野無得好好休息，所以黎到太子之後我地都係叫佢快點返屋企休息，以免係呢個抗疫時期生病呢。咁得返我同超級兩個，打冷都係留返下次多幾個人先吧；結果我地就轉場去左附近嘅第尾牛扒食返個港式鋸扒，再嘆埋個紅豆冰就完結我地今日既事隔幾年之後、嘻嘻嘻重新出發山野之旅了。

先去小夏威夷徑