限聚搵雞搵著龜

日期: 04/04/2020
農曆: 三月十二
地點: 維港鯉魚門一帶
艇家: B記
釣友: 阿丹+ 女友、YY
天氣: 天陰、東至東北風四、五級
水流: 中速流、水質可以
釣穫: 非常恐怖，有等如無!

是咁的，最近武肺口疫情持續，政府最新仲推行左一條法例限制人群聚集，即4個以上集結活動即屬違法。違者有機會被票控人人罰兩千！咁我地其實自女將兵團初征夢幻釣場 https://yy08.pixnet.net/blog/post/106432006 之後，阿丹同表妹都吹緊雞話想再去釣魚嘅，而我地其實於呢條臨時既限聚令推出之前就已經約左B記艇期去釣魚了。不過新例一出，定義有點模糊，細表妹就問我釣魚會唔會受影響，我地仲可會唔會如期出發；咁呢個陋聚令就暫時只推十四天，咁我同佢講就話算啦，今次都係「取消」吧，等十四天的限聚令過左之後睇下咩情況我地先再去啦咁。咁喺少左兩位隊員既情況之下，我同阿丹商量過後，都決定繼續釣行，難得天氣唔太差，大家又咁耐無釣魚，手已經極痕；三個出發都應該無問題唔會犯法，咁一於唔取消行程，照去可也！

既然決定如期出發，咁就梗係繼續準備釣餌。我就負責醃南極蝦，而阿丹就想試驗佢支新紫色染液，所以佢就負責搞赤米蝦仁；咁當然我地都會準備生蝦仔啦。萬事都準備好，就希望釣魚果日可以試驗我地喺日本搜購返來既新魚竿喇。

約好八點半老地方集合，可能由於限聚令關係，很多散團都暫時休業，以往會見到在碼頭此處等候落艇的人堆都不見了，不過都有一些人應該好像我們一樣，是三個人落艇釣魚的；但熱鬧情況真的不復見了。一上艇同阿B記吹左兩句水，本身佢話今日會車我地去黑角頭釣魚，不過我早幾日網上睇完一些釣魚視頻講話去維港出鯉魚門附近都有些良型雞魚釣到，咁我咪問B記仲有得玩下咁；B記就話呢水雞魚其實都聚左係鯉魚門呢一帶都好一排啦，由舊年十一月中到而家咁，有時大、釣完到有堆細既，然後又長大咁，都玩左好幾個月；咁我聽到咪話好呀，咁今日就一於去搵下雞魚釣啦。B記話，咁要有南極蝦喎，我話無問題我地南極蝦同蝦仁都有準備好，一於咁話。

既然釣鯉魚門，即係喺上艇果度出左避風塘捌個彎就到，B記就催我地好快點綁好架生，因為真係車出去幾分鐘就到釣點了。一出一到去，時間可能算早吧，得一兩隻艇係度釣，大家都係你眼望我眼，都係睇下有無邊個中到雞魚咁就準備車近少少釣咁樣；果然釣左一陣，就見我地旁邊果隻艇有位釣友率先有所動作，睇佢支竿有哂孤度，應該中既就唔似係石狗咁細條啦，而佢地個艇佬就企係旁邊撈箕侍候，不過見魚時仍然見到石狗，不過下面果門就再中多條斤頭細鱗咁解，完全外道野黎。阿丹睇唔清楚條魚就直接問果位釣友啦，而佢都好開心咁講話自己未釣過咁大條魚，今日第一次跟朋友黎出艇，而家第一口餌就中到撈箕魚認真開心。可能新手係有點運的，我地隻艇釣極都好靜，連石狗都無食餌，但係只見果隻艇返寨之後，頭先中魚果位釣友，無錯又係佢，又有動作了；由於水深關係，我地睇佢起魚都睇左數十秒，終於等到條魚出水，腳板雞魚一條，真係好像我表妹成日掛口邊咁講，新手行魚運。對面就連中兩口，我地就仲係零魚訊；不過見到隔離有料，大家都打醒精神，始終雞魚都係群居魚類，佢地有魚中，即係果群魚係度之餘、又肯開口啦；咁只要耐心等待，下一口可能就到我地呢！

咁講返魚餌啦，我就兩門都係南極蝦既，而阿丹同佢女朋友則用阿丹新製嘅既紫色蝦仁；至於B記則是上面南極蝦，底勾生蝦叫兩飛的。而首先有魚訊的，則是阿丹；佢明顯感覺到一下較重的食餌，跟住就即抽，但係唔中；我就同佢講話雞魚咀比較細，加上佢粒蝦仁都幾大粒，所以要比多少少時間條魚索餌，最好唔好似平時咁樣一食就抽，而係比條魚索多少少，入左咀到哂先抽都唔遲；我仲叫佢呢下抽唔中都唔好收返條魚絲上黎住，而係要再放返落去比佢食；因為難得條魚已經埋左餌開口食野，只係唔到釣而已，並唔會嚇走條魚；條魚反而有機會因為食唔到口餌而返食搶餌，所以佢應該放返低口餌係度繼續等條魚翻食。而我見到都叫做有魚食餌，即刻走去背囊度拎返部運動相機出黎。其實平時我一路都有帶開部機落艇，但一般戴住時都未必有魚，又唔想戴足全日，所以好多時都不了了之；但係而家見到有魚食餌，附近都已經起到魚，即係機會較大，梗係拎定出黎傍身啦。拎完部機行返出黎坐低都未來得切穿戴在身上，就已經見到阿丹有食餌動作，開得切部機、按好拍攝制時阿丹已經等條魚索左口餌入去並抽魚同中魚了；只見阿丹一下、一下咁收，佢呢支新竿比佢之前支竿又再軟一些，所以個弧度出哂黎，視覺享受滿分；至於我，自從上次釣魚之後我已經話左我以後都要做攝影戰地記者，唔會再撈魚架啦，而今次我都真係完全無呢個概念，始終諗住雞魚都唔會好大條，阿丹絕對應付得黎。終於條魚收到上水面，毫無意外，雞魚一條，我有提議阿丹用小撈箕撈條魚上黎，不過阿丹就同我上次應付條馬友咁一樣，都係直接拉條魚出水就算！輕鬆彈左條魚上黎，良型，有腳板大細，認真唔錯呢。B記問我地做乜唔用撈箕，佢話雞魚個咀好薄，所以有返咁上下大細既最好都用撈箕幫一幫手逗住上；佢仲講笑咁話頭先阿丹起魚時旁邊艇既人見到佢無用撈箕，都暗地準備恥笑佢會爆咀甩魚；不過結果阿丹又輕輕鬆鬆彈左條魚上黎，除左條魚一心求死之外就係阿丹行魚運啦，話哂條魚食完第一口餌唔到釣之後再返食，係要搵到阿丹先至罷休。

見到阿丹上完魚，大家士氣大振，B記仲問我拎左些少紫色蝦仁試用，希望趁有流水時執多幾條雞魚。但係釣魚既野就係咁架啦，大家都知呢度有雞魚釣，就愈黎愈多艇聚集，然後就堆哂係鯉魚門呢面航度一帶，咁水警見狀，當然會被吸引而過來啦；B記老遠見到隻水警擺頭就已經叫我地收繩車返埋邊釣，但係仍然有幾隻艇闊佬懶理，即使水警車到埋黎都仲唔郁，係要水警開吁廣播驅趕同埋做樣搵一隻黎查牌佢地先至肯四散，真係玩串哂個派對。但係可能就係因為呢段時間係啱流水掛，所以佢地好似青馬釣馬友咁，要趕到最後一秒先走咁囉。係水警留守嘅呢段時間，我地車埋山邊時我終於都中條石狗為我支中竿開光，不過太細條了，所以我都即釣即放，我咪講笑話人地阿丹就雞魚開光，我就石狗仔開光，真係完全測試唔到我支竿既玩味。B記無耐都小石狗開齋了，但係整體魚訊是非常疏落的。B記就話而家水開始漲緊就到漲定，比多一個小時佢等到開始落流睇下情況會唔會有轉變啦咁。我見無乜食餌，就拎左近期開始學玩既假虫出黎試下，一於睇下佢地活動性咁低之下，用軟虫跳跳下會唔會吸引到佢地咁。丫，的左一陣又真係比我的到一條小狗上黎喎，算係完成左一個成就解鎖 – 艇釣軟虫的狗成功。不過魚訊著實疲弱，所以之後的左一陣都係無料到，我就轉返蝦仁同生蝦了。用生蝦係因為見雞魚都唔係太活躍，一於試下用生蝦睇下有無其他失魂魚撞埋黎。但係真係世事就係咁，水警黎既時候就係咁啱魚群開口的時候，就好似當年轉機趕搭尾班火車 https://yy08.pixnet.net/blog/post/106159129 果陣咁，不過今次就仲衰，真係之後我地返去果個位，即使再無水警驅逐，我地都係搵唔到半條雞魚；反而係眾多艇仔入面，係有一隻四匹仔個阿叔就執到兩三條，認真好野。

磨左半日都無料，個生倉就係得三四條魚，真係靜得可憐。B記見到咁既情況，就試下車去其他位置比如三家村對開位置同再出一點的中心位，但係都真係好靜。不過阿丹女友都終於係度開齋搵到小狗狗咁叫做全人類終於都開哂齋了。今日其實有點難釣，水深而且有點流水又有石，所以我今日無野多，就係勾石多，全日我都真係唔見左成十粒鉛，難怪都比阿B記笑話我都唔係黎釣魚的，其實係黎填海嘅。咁當然B記都唔見左幾粒鉛架，不過我就真係好誇張囉，好耐都未試過勾石甩鉛甩到懷疑人生。

我小休食緊野其間，聽到B記同阿丹吹水，原來B記剛剛有用紫色蝦仁中過一條小雞雞，大約有四五両重的，佢因為見咁細條就梗係無用小撈箕撈上黎啦，就係咁樣，條小雞魚就爆左咀甩返落海了，認真燒鬚。不過佢都話，無返十零両，又點會叫得郁佢用撈箕丫，哈哈。

雞魚搵唔到，但係真係靜到連其他魚都唔開口咁，我真係好少釣到懷疑人生，係全日無揸過大餌情況之下，到三點為止我自己應該大約只有五條小狗釣到，真係可算是近年之最了。雖然離開左鯉魚門雞魚位，但係呢個時候竟然阿丹女友又起左條四五両的小雞魚上黎，真係估你唔到。跟住更加估你唔到既係，轉頭我見B記有抽魚既動作，同埋應該唔會係石狗既重量，我咪問佢係乜魚、駛唔駛撈箕咁以防係容易爆咀的良型雞魚；不過B記竟然答我話唔知係乜魚，直頭好似拖緊垃圾咁，咁我梗係就唔拎撈箕啦，點知上到黎一睇，原來係一架小火車喎，仲要都有成半斤，所以我先話估唔到B記竟然會話唔知道係中魚喎。

中完呢條細鱗之後我地都係附近一帶繼續作釣，但係今日真係個海真係釣到我地全部人都懷疑人生，所以釣多一陣B記都話無謂再磨、都係收工走人算數。釣完全日，我中魚數都唔過雙位數，就算唔係歷史之最，應該都已經係近年個人新低。而到最後撈魚，數埋有兩條雞魚，一條小細鱗，同埋少於三十條什魚，為數唔夠三斤，幾乎肯定係破左咁耐以後既最低紀錄。不過又咁講，我地今日都係得三個人，總重量少左都係可理解，但係其實睇返我十口餌都無食過，就真係證實到今日個景況之差係誇張到一個點。但係其實能夠係抗疫期間，大家都長時間屈在家中、無比鬱悶的情況下，能夠出來戶外，吹吹海風，同朋友吹住水咁拎住支魚竿玩足一日，我都覺得好感恩了。希望疫情快點過去，限聚令又早點完結，我地下次出海時可以係之前既原班人馬咁樣五個人出去，安樂放心地釣多幾條魚啦。

好耐無見啦，B記