雙生兒復活遊城門

路線: 菠蘿壩-> 菠蘿壩自然教育徑-> 城門白千層->城門林道(水塘段)->小徑-> 城門林道(水塘段)-> 衛奕信徑(第七段)-> 上城門水塘主壩-> 衛奕信徑(第六段)-> 引水道及山路-> 下城門水塘主壩-> 下城門道-> 寶福紀念館 -> 大圍新村-> 大圍主中心-> 表哥屋企住家飯
登山之友: 細表妹、饞嘴力高、YY

是咁的，話說我之前好早就已經約左細表妹話要去郊遊的了，不過當時佢剛剛喺外地工幹回港，然後自律地實行了居家隔離，所以我們當時唯有選擇延期擇日再行。然之後本身又約左佢去釣魚，可惜因為限聚令嘅關係，所以最後只有我和阿丹等三人去了限聚搵雞搵著龜 https://yy08.pixnet.net/blog/post/106442053 以後限聚令只有十四天後我們就可以去釣魚，結果這個禁令又再延長了。但是復活節長假期就已經來到了，如果都不趁機出外走走，人未感染肺炎就心理可能先屈出病來了。於是就問細表妹假期出唔出動，佢又話好，咁睇完天氣預告就揀左假期的第一天出發。

日子定好左，路線就一路都未定，我本身心裡面都有幾條想行既路線，不過細表妹又話狀態一般唔想去得太盡，再加上佢又叫埋佢個朋友仔黎，咁就一於揀條相對輕鬆嘅路線吧。假期加抗疫期郊遊，野外一定會人山人海，所以都要避開熱門路線，咁最後我就揀左有一段是熱門但到後面則是相對冷門的上、下城門水塘合成路線，再用手機遠足程式一計算，大約十一、二公里，加上沒有太多攀升路段，亦又唔少打卡位，一於咁話。

因為大家都是港島人，本身我地約左十二點金鐘地鐵站集合，打算一齊坐車去荃灣食晏再上山兩點鬆少少開始行咁就時間非常鬆動了。不過我地去到荃灣食晏時就揀左我上次雙管齊下城門峽 https://yy08.pixnet.net/blog/post/106436824 同嘻嘻超級食晚飯果間金坊泰國餐館，結果連排隊再加慢慢食完去到小巴站都已經兩點半有多了，然後假期當然多人出街，城門水塘更是荃灣人非常近又適合郊遊及一家大細野餐的地點，所以等小巴都要等到第三架才輪到我們上車；結果到達我地嘅起點菠蘿壩時都三點半呢！即時起行！！

一開始我地就已經進入菠蘿壩自然教育徑而唔揀由石屎路鋪成的城門林道就係貪佢話哂都似小徑路同埋比林道更內環，方便我們隨時走落去城門水塘的水邊和草地，不過沿塘畔而行咁行左一陣我地就轉個靚彎接上車路了。上到黎就已經見到今日嘅第一堆馬騮了，但係我對馬騮從來無好感，所以都唔會刻意走埋去影相又或者揀一些落了單同埋體型較細小的才會過去。沿住石屎路行左一陣之後，我地嚟到城門水塘其中一個最熱門嘅打卡點 - 白千層路段。這裡景色怡人，而謝安琪『山林道』的音樂短片也到來呢度取景呢，可見真係非常唔錯架。咁我地當然唔會錯過打卡啦，亦遇到幾位穿了角色扮演服飾的少女也來到拍攝一番呢。打卡過後我地就繼續上路，行左幾分鐘就黎到城門白千層，呢度真係好多遊人，圍住白千層影相既又有，影水塘既又有，坐係度休息既又有，野餐既又有，甚至帶多兩件生果黎餵馬騮既都有；所以搵位影相都比較需時，往往佈景後面總會有遊人，所以都要有點耐性才可以。假日人多，如果唔係呢度都係一個幾好既休憩點，可以留多一陣的；不過我地由於出發時間遲左所以都唔會慢慢同佢磨，所以又再繼續起行了。

行了一小段石屎路，我地就轉入小徑路，跟住首先見到除馬騮外城門水塘既另一標誌性動物 - 黃牛了。牠們在叢林裡面吃草，所以就不打擾牠們了。繼續走多幾步就見到一大片草地、有著很多白千層在塘畔，而且還有著一堆堆的小石山，這裡的風景比剛才更漂亮呢，可能水乾的關係，我們眼前才得意呈現出這片青蔥的草地呢。正當我們愉快的拍著照時，剛才在叢林內吃草的牛牛們呢個時候則連群結隊的出巡，走向我們這一帶；牠們真的很友善又唔怕人，有一隻甚至與我是「擦身而過」呢，真的令我感受到大自然本身應該存在著的情景的可愛呢。同佢地影完幾張相之後佢地起行之餘我地都繼續起行了，不過因為水乾的關係，我們唔駛沿住小徑走返上去林道段，反面就在大城石澗出水處的石河間找些石塊就咁「過澗」了，跟住因為水位好低的關係我地繼續決心走「捷徑」，取最內環而行然後揀返一段小路接回城門林道。行左一小段之後我地見到一個小徑的路口，這裡就接上了衛奕信徑第七段，亦有如剛才菠蘿壩自然教育徑般咁既路況一樣。行下又停下影一兩張相，又食下小食同糖果，好不愉快；再行多一陣又黎到一段竹林在兩旁的路段，又有一種截然不同的感覺，另有一番風味呢。

再行下行下，我本身就都係諗住沿住衛徑一路行到城門主壩架啦，點知細表妹望下個乾到烈嘅水塘，佢就提議不如我地行落去然後直接揀個最易「過水位」嘅點就再行返上去對面的小徑，望一望地圖程式，嘩，可以慳到成七百幾到八百米路段，唔駛諗，即刻就離開小徑行出去，見到已經有幾條繩係度比人扶住落，相信平時都唔少人會趁水乾時咁樣行。我著住對越野跑鞋，應付呢種沙石地都輕鬆，加埋都叫一般男仔高度，所以都唔駛遊住繩行；至於兩位女士因為只係穿著普通運動鞋，所以會有點跣，而且佢地比我相對矮了一點點，無咁易找到下一步的食力點，所以會吃力一點點。不過都只係一點點而已，一來有繩，二來我係旁邊都可以伸手給她們輕輕一拉就穩好多了。落完斜到了水塘乾了的泥地上，我們又再找了幾塊乾而穩的石塊就越過水流走到對面的泥地，然後再找路派上去並接回衛徑繼續走。呢段路相對之前一路行既有點點兒悶，但其實景色都開揚同不時都望到水塘，只不過之前一路行都有唔同景觀，感覺新鮮，一浪接一浪咁，但黎到呢度則開始都係圍住塘畔而行，所以我地都係快步而行。此外，因為沿途不時都會有遊人嘛，而我地都唔會同步速的，如果保持住一般既速度，則好難可以超越佢地；呢個感覺唔係幾好，因為好似無乜私人空間咁，所以每當我地見到前面有遊人時我地都會加速超越佢地之後再保持速度走多好幾十甚至一百米才會減低一點步速。就係咁樣我地行左都有大半個鐘，終於就見到草壩同埋主壩啦。今次我地會落下城門水塘果面，所以一定唔會去到草壩果度探上次見到果堆牛牛了。再行多一陣我地就隨住完成衛徑七段嘅同時亦都黎到了上城門水塘嘅主壩了！

嘩，時間真係岩岩好，呢個時候已經係夕陽西下，而今日個咸旦黃又大又紅，再加上有個水塘係度比佢加埋個倒影上去，真係靚到一個點。本來其實我地仲有成四五公里要走呢，日落黎到又唔想天黑哂仲係條山度行山就應該立即出發嘅，不過我地都比今日呢個日落加倒影所吸引，忍唔住係度打卡打到個咸旦黃倒影消失於水塘的水紋內我地才罷休。講起水紋，國語音水雲，而咁啱我剛才於衛徑行走時一路都學住『愛回家』入面曹總嘅半咸淡口音講野，所以我就講話嘩個太陽已經消失於「水紋」入面啦，而兩位女士則對我既水雲毫不懷疑...然後我再重複一次解釋係水紋而唔係水雲佢地先至恍然大悟，然後對我這個令人煩躁的口音表示不滿，哈哈。

不滿還不滿，我地終究還是要再度起行，而且因為太陽已經落緊山，我地其實係要同時間競賽，所以我地一出發就已經加快左少許速度，離開主壩進入衛徑六段我地就一直走，而因為太多數遊人呢個時候都係沿住主壩路段走回草壩那邊再去菠蘿壩或梨木樹，所以我地接下來呢段路基本就已經無再遇見「同路人」了。不過衛徑六段我地都只係走左好少一段路，我地黎到分岔路，再核對一下地圖程式，我地就走上了另一條分岔路，因為我地會沿住引水道加山邊小徑地睇住城門峽同埋環繞住下城門水塘邊而行，由於太陽一落山天開始暗就會黑得好快，而細表妹行開山都知夜行絕對是另外一種體驗而我地今日嘅裝備係唔適合，所以佢就再度提速了。偏偏力高平常膝蓋已經有點不算太好，而落樓梯路段時可能關節擺得不太正，所以令佢行起來有點不舒服甚至疼痛，但這時我們這路段根本已經沒有中途退出的位置，所以唯有繼續向前行。這真是有點矛盾了這時，因為行得慢，又會天入黑了然後我們身處的不是康莊好走的石屎路而是有碎沙石樹枝的山路從而增加絆倒的機會；行得快，能趕路但是力高又可能會增加不適甚至受傷；可幸的是她走平路時還是不會太大影響，只是下梯級時就會有點不適；那還好辦一點，因為結果就是每次下梯級時我都會化身成為人肉的拐杖讓她借力，使她的膝蓋不用承受太大的壓力，從而減低不適的感覺。至於其他路段走到後面因為我們再度提速了所以我就輕輕抓著她的背包，給她提示和避免她不小心跌倒時我手不及時抓住她；始終呢個時候我相信以我經驗我係會比較看得清路線和能選擇一些較有利的路況上而前行。至於細表妹，則負責好好照顧自己及開路，所以佢就走最前。而其實之前我們還在上城門水塘走時她就說到如果要走得快，小時候童軍領袖就教過她只要最前和最後的一位是行走得較快和有經驗一點的，那中間的都自然會走得快，從而提升整隊的速度；估唔到行到黎呢個時候我地真係確切實行並應用了呢個技巧。天愈來愈暗，難得細表妹一點膽怯都沒有，反而越行越快，果然是可以信賴的有經驗人士。她行得悶起來還那手機出來播音機，減輕大家入黑要加速趕路的少許緊張情緒。走著走著，說實在的我真的感覺得到我們步速比下午的時候快多了，而大家其實嘻嘻哈哈的對話也少了，也不一定是緊張的，但就絕對是需要專心去走路，因為這個時候小小犯錯都可能會變成意外的呢。終於隨住我睇著地圖程度我們的路線也啡色的山路變成為白色的石屎路或大路我就知道我們差不多要來到下城門主壩從而得到安全的感覺了。走完一段樓梯再捌個靚彎我地終於黎到下城門水塘主壩呢，不過呢個時候已經因為天全黑而四週都是漆黑一片，什麼景色都睇唔到。不過我地都係度停留左一兩分鐘，不是因為要看風景或休息，而是我們這時才敢把我們剩下的零食和糖果都拎出黎食，因為黎到呢度基本上我地已經唔會再有什麼被困山上或因出意外而離開不了雖要長時間逗留的情況，所以我們可以放心的把帶來的所有零食都吃掉，因為之前真的什麼都留有一手，怕萬一行程因有阻滯而要延長，而如果食物和水都已經全消耗掉那就真的會是麻煩了。不過而家黎到了最後呢段車路，所有野都會變得輕鬆，大家就安安心心的那著零食邊行邊上路了。雖然呢度係下水塘主壩，而我上次係度都比馬騮差點搶去了食物，不過而家都入哂黑，馬騮都走哂了，所以我地見都繼續分享住我地最後的一包腰果和朱古力呢。

由於呢個時候行程已經變得輕鬆，大家都放鬆哂心情，步速亦都減慢了；而我地邊行邊做的活動就是估歌仔同埋唱歌仔，就係由細表妹的手機隨意的播著歌曲，然後就猜是什麼歌並一齊唱歌，好快的我地就已經走到了寶福紀念館再走到了路線的完結點大圍新村。大圍新村距離大圍市中心就大約有十來分鐘路程，咁我地已經肚子餓了，想到的就只有吃晚餐；而我們的表哥則住這區，所以我們就打電話給他向他查詢呢一帶有咩馳名食店好等我地三個去開餐慰勞自己又好、慶功又好啦。點知阿表哥竟然話佢都同阿嫂子係度煮緊飯，叫我地外賣砍多兩碟燒味同埋餸菜，拎上去加餸就開得飯；咁既然有住家飯食，仲有個好地方可以邊食邊傾，當然立即買完餸加料就直接上去阿表哥屋企啦。最後我地就喺享受左一餐充滿歡笑聲嘅晚餐之下，完結了我地今日嘅復活節抗疫休閒郊遊行了。希望下次快點又再同表妹挑戰更高難度嘅路線，事關我覺得佢真係有潛質同我可以拍住上，挑戰更多香港山峰！

！

起點菠蘿壩嘅標誌性門牌