爽踩吐露嘻嘻嘻

路線: 大圍火車站-> 車公廟-> 城門河-> 沙田第一城-> 沙田污水處理廠-> 馬料水-> 科學園-> 吐露港-> 大埔海濱公園-> 大埔公業村-> 汀角路-> 布心排村-> 大尾篤村 -> 船灣淡水湖大尾督水壩-> 沿汀角路回程-> 經完善路回吐露港-> 城門河段經彭福公園及香港體育學院-> 香港文化博物館-> 大圍還車-> 合發海鮮飯店
踩車之友 : 超級嘻嘻、高高嘻嘻、YY

是咁的，話說復活節長假天氣都唔錯，抗疫期間都無咩社交活動可言，最多都係出去郊遊下同釣下魚。不過嘻嘻群組的高高不太喜歡以上運動，我見咁耐無見，咪問佢去唔去踩下單車啦；吖，難得高高話無問題喎，咁再問埋超級佢都無問題咁梗係即刻約得成啦。於是揀左長假期最後一天出發。睇埋天氣預測，無雨有太陽唔太熱非常好天氣，真係天助我地也。可惜嘅係陳車就因事先有約，未能同我地一齊參與呢個即興單車遊，如果唔係我地假期就可以嘻嘻嘻嘻了。

中午約好大圍火車站集合，去左金拱門食個快餐，我地就去單車店租單車了。我自己就有單車嘅，今次亦係第一次自己係屋企山長水遠拎埋架單車出黎玩，始終有自己單車感覺就應該同佢「拍住上」。而兩位嘻嘻則揀左兩架越野山車，其實都無乜得揀，因為假期真係好多人，大家都無得外遊又無乜其他活動，唔係郊遊單車就係去海灘咁，所以今日黎租單車既人都真係比平時假日仲要多。揀完單車就即刻出發，因為唔係自己車，所以兩位嘻嘻都對單車的調速制未熟悉。而高高就係謹慎型人士，所以佢要試左個調速先再開車。但係單車呢，最好就應該邊踩邊調的，否則就較易「甩鍊」。咁唔知係咪真係咁啦，踩左幾步我地見高高就已經落後左，原來佢真係甩左鍊喎，咁我就幫即刻佢搞返掂啦。

上返鍊之後嘅高高就真係好似連人都上左鍊咁，越踩越快，未到城門河兩岸個分岔口就已經唔見左，咁我同超級唯有打電話比佢問佢係邊，費事大家隔住條城門河天各一方咁踩啦。重新集合好之後我地就一路踩直到去馬料水，太陽愈黎愈犀利，高高唯有停低落黎搽太陽油防曬，然後繼續上路。因為真係好多人嘅關係，有時我踩快一小段之後已經同佢地隔開左好多架車，然後我停低影下相之後就唔見左佢地。跟住就係吐露港我同佢地兩個「失散式」啦。咁當然大家都知對尺3吐露港所以就無打比對方，直到我踩到去大埔元洲仔個公廁度，平時我地會係度停低買下野飲野食小休一下，但係今日就唔見人，於是我先打電話比佢地，而佢地都已經過左呢個地方正往大埔海濱公園踩去，因為佢地以為我比佢地踩得快，所以佢地想追返上我喎，殊不知我竟然大落後了，哈。

大埔海濱公園更加多車多人，而且更多那種家庭式巨型單車，所以交通更為擠塞，不過我地今次就有共識，就係海濱公園吐露角見。係果度影完相之後我地就繼續上路往大尾督去，都係果句啦，踩車唔同行山，加埋有時想飛下車，所以都會容易分散，結果再相遇時我地已經身處再大尾督的主壩上了。呢度雖然多人，但我地都可以找到了一個位置，然後停好單車就往石壩上一攤，欣賞住藍天襯托下的漂亮景色、吹住微微的風，再睇住飛到高高的風箏，絕對係賞心樂事！一抖就抖左成個鐘，望下時間，四點幾正點，係時候要回程了。因為單程都有成二十多公里，而家出發返到去都要六點幾了，七點前要還車，所以都係時候起行，仲要比黎既時候再踩快一點，趕一下路了。

於是出發回程，落左主壩之後，我見人多，就行車路出返去大尾督村，諗住係果度等佢地兩個。等左一陣，只見超級就由單車徑那邊出現，但係就唔見高高；但係超級自問都已經算慢了，所以應該高高就比佢快一點出到來，但我又一路都唔見佢喎，咁會唔會係佢一馬當先咁先行出發呀? 事關高高剛剛回程之前就問過係咪沿相同的路一直回程，我就答話我地唔會經海濱公園同埋到城門河之後就會在體育學院呢面河畔度行，跟住高高就話明白哂了；咁所以我就同超級講會唔會高高一心諗住要趕住還車，所以就加速起行，反正大家都會在吐露港上不停的趕路然之後會合的呢。於是我同超級就決定繼續回程的路了，一路係咁踩呀踩，去到科學園，都見唔到高高嘅蹤影，係咪真係咁快呀? 於是超級就發訊息比高高啦，佢又答話佢都係科學園附近喎，但係我地等左幾分鐘都無見到高高，然後高高又無再發短訊給我們，我地唯有繼續上路啦。我同超級一路踩呀踩，過哂城門河都見唔到高高，直到我去到香港文化博物館附近我因為要避開一堆不懂踩車禮儀的星期日車手而甩鍊啦，咁正當我係度搞緊條單車鍊時，呢個時候竟然見到高高從隧道裡面踩住車出黎喎！我同超級都非常意外啦，因為我地一直以為高高是在我地既前面架嘛。原來高高在大尾督主壩一落黎既時候，我就行車路，超級就行單車徑，而佢咁啱就有公司重要電話打黎要傾所以佢就埋左旁邊的大尾督水上活動中心那邊講電話，一講就十來二十分鐘，難怪我同超級在路口等了好一會都不見他的影蹤呢！然之後高高就一路高速趕路，直至與我們於大圍附近的這個博物館才終於會合得到呢，真係搞笑。

不過我地三個並無因此就再一齊上路，因為我就仲搞緊架單車同埋要抹手，而高高就話佢同事有點東西要交比佢，跟上佢同超級都要還單車，所以我地就約係單車鋪見面。咁我整返好條單車鍊、抹完手再上路，去到單車鋪又唔見佢地兩個喎，跟住正想打比佢地之時先見到佢地出現；原來佢地剛剛認錯路兜了一小段路，所以即使明明早過我起步，卻比我慢了幾分鐘先到達呢，今日睇黎我地既命運就係不斷咁樣「捉迷藏」了呢，哈哈。還左單車我地就去左附近食晚飯，亦都度過了一個充滿歡笑聲同埋想當年嘅晚上。陳車，下次要一同出現啊！！

第一次出車


城門河畔