嘻嘻上山探八仙

路線: 大尾督-> 船灣郊野公園遊客中心-> 八仙嶺自然教育徑 ->春風亭-> 衛奕信徑(第十段)-> 仙姑峰(接衛徑第九段)-> 純陽峰(完成八仙嶺)-> 續走衛徑九段-> 犁壁山-> 黃嶺-> 屏風山-> 鶴藪水塘家樂徑-> 鶴藪道->鶴藪水塘主壩->鶴藪圍-> 沙田OutBack牛扒屋
登山之友: 超級嘻嘻、YY

是咁的，話說呢個四月都未有嘻嘻組團行山，不過我地其實就不時都有交流一下一些想行的潛在路線；不過呢個時候天氣偶有不穩，加上本身想等埋陳車一同出發的，不過呢排佢實在太忙以致無法分身，所以行程一拖再拖，結果我同超級決定邊行邊等，即係今次我地倆個自己出發先，等陳車得閒以後我地先三人成行。

唔想太辛苦但又唔想太容易，天色未夠藍唔想行西貢果邊住，於是揀左八仙嶺。其實揀佢都有些因為上星期同嘻嘻們三個爽踩吐露嘻嘻嘻 https://yy08.pixnet.net/blog/post/106444357 踩車入左黎大尾督，然後在大尾督主壩回望入仙嶺時被佢嘅美態一時吸引住了。當時我地就已經討論過要將八仙嶺放入我地待行山的清單了。咁就無問題啦，上星期踩車入左黎大尾督在下面望上山欣賞，今次一於就上山峰上俯瞰返大尾督主壩同船灣淡水糊及附近一帶景色，黎個「雙映成趣」吧。

中午係大埔墟火車站集合，食完金拱門再買埋後備糧水我地就坐巴士入大尾督了。巴士總站落車，去好哂廁所之後我地就向住八仙嶺自然教育徑出發。係山腳底望上去果下感覺真係幾有趣，總覺得嘩乜咁鬼高既，點行呀，然後如果上到去之後又會諗，嘩，咁鬼高，究竟剛才我地係點樣挨上黎架？咁我地係教育徑入口望上去，就已經見到仙姑峰矗立在前，而且頂峰一部分都插進了雲霧，喺我同超級都發出「嘩，上呀」一聲之後，我地正式開始往上爬的路程了。

走這八仙嶺，初段路程感覺上會段是最辛苦的一段，因為一開始就會從幾十米的入口路段一路攀升，直至到達超過五百米的第一峰，之後的七峰除了最後一個的那一段要爬升大約七十米之外，其餘之間都是上落二、三十米，相對輕鬆的。面對呢段一直要攀升四百多米的路程，其實一開始都覺得會幾辛苦，甚至聯想到孖崗山果條直直的天梯咁。尤幸睇完郊野程式高圖示意圖，再加上走了一少段路之後發現，這一邊的斜度，遠低相孖崗、東洋山等，開始都是媛媛的攀升著，直到走到八仙嶺自然教育徑接衛奕信徑的分岔路，才開始變為較斜的路段。行住八仙嶺自然教育徑時，望過船灣郊野公園果邊就伯望到吊燈籠、上下苗田、觀音峒等，就是上次驚險穿林踏紅石 https://yy08.pixnet.net/blog/post/106406962 我同超級行過的路段，那時回望過黎八仙嶺，船灣淡水湖及大尾督主壩、以及馬鞍山等，都好靚好有氣勢，而家行到呢度則係望返上次行過既一段路線，行紅石門嘅回憶即時返哂黎，仲要因為今次同上次都係同超級行嘅，所以大家都即時有哂畫面。

好喇咁終於接上了衛徑，咁呢段就比剛才路段來得斜，所以比較辛苦，不過可幸之處就係暫時都係屬於起行無耐，大家體力都仲係較充沛嘅，所以縱使呢段路算係全日單次攀升幅度係最多最斜嘅，但係我地都算能應付有餘，當然上到咁上下嘅時候，還是會有索氣嘅情況出現既；但係如果呢段路係放到中段走，咁就真係不得了啦。諗起等下如果行完八仙嶺路段再降落去到鶴藪水塘嘅水平，然後又要再爬返上四百多米嘅九龍坑時，咁果陣就真係完全係意志同體力嘅挑戰了，因為行到去鶴藪水塘時相信已經完成了十公里，體力亦肯定下降了不少，而如果呢個時候再需要攀升三百多米到達有四百四十米的九龍坑山頂時，我真係再難以想像了呢。不過又咁諗，如果能夠完成到總共十六、七公里的這段加長版八仙嶺、經九龍坑山、再到太和完結的路線的話，咁就係我地可以挑戰陳車提出的「針、草、帽」路線了！扯得太遠了，講返而家上緊第一個峰先，咁行下行下，本身視野都唔錯，仲可以望得清山下的大尾督和遠處的馬鞍山，但係漸漸的，當我地不斷上升時，情況就似上次嘻嘻嘻重新出發走東洋賞飛鵝 https://yy08.pixnet.net/blog/post/106441624 我地上東洋山咁，開始入了雲霧層了，然後四周圍開始就是白茫茫一片了。對比返個高度，同上次差唔多，都係上到超過四百多點的時候，霧層就來了，不過今天濕度比上次強，所以霧勢也是愈吹愈強呢。

終於上到黎八仙嶺中第一個山峰 – 仙姑峰了，四周樹木都暫時可以見到，但往下看則是什麼都望不到，只有白茫茫的一片。但係偶爾有幾陣風吹過時時候，倒是會把雲霧撥開一小陣子，呢個時候我同超級就梗係拎起相機，不停的按制拍攝吧，因為真係怕蘇州過後就無艇搭架。咁遠既景望唔到，近嘅倒見到有一個牌寫住「懸崖危險、切勿前進」，牌後面倒是隱約的有一條小徑，相信就是通往馬騮崖的，亦即我們剛才在山腳春風亭後附近見到的一條小徑一路往上爬後所到達的地方。爆林唔係唔得，不過唔係今日囉，今次我倆只係打算沿住程式內啡色路線走，即是較清晰可見的山徑，而唔係灰色所代表的絲帶路和難走小徑。

同個山峰名牌打完卡後我地又繼續出發啦，八仙的峰與峰之間不算難走，一般都是小落二三十米再上另一個就是了。就在我們正要爬上第二峰 – 湘子峰的時候，迎面走來兩位從對面方向走過來的姐姐，大家點頭問好之餘，其中一位姐姐還在最後拋低了一句「加油啊，我地就剩最後一個了，你們還有七個啊」，真的是聽到都即刻覺得哭笑不得，有點好似氣餒既感覺但同時又有鬥志的燃燒呢。不要想太多了，就上了眼前的這一個吧。湘子峰，景觀是不錯的，還有一個觀景台，不過剛到的時候就是白茫茫的一片。但係天公卻算突然造美，突然有一瞬間，一陣風把雲霧撥開了，我同超級立即把握機會，東影西拍，就想把大景拍下來先算。很快的，眼前又變回白白的一片了，我們和山峰名牌打完卡後又再上路了。講真，還有六個峰在後頭，而且就算完了八仙嶺，其實還有一大段路才到終點呢，所以真係要追時間了。再者我們見都過來新界了，一於打電話約高高食飯，而難得佢又即刻答好，咁我地就同佢講話我地行到六點零七點完再搵佢睇佢係邊度然後會合食飯；所以其實我地時間都幾緊迫呢，一於一離開峰頂而又唔拍照的話就提速前進了。

又是先落後上的來到了第三峰 – 采和峰。由於周圍都是白茫茫的，我們也就只是如山峰名牌打卡就算了。然後我地就往第四峰 – 曹舅峰前進了。來到了峰頂，因為都係繼續白茫茫一片，所以我地只係打算照舊同個山峰名牌打個卡就算啦。不過喺度遇見兩位阿叔，可能佢見我地同個山峰名牌打卡，所以佢就同我地講話去到第七個峰，即鍾離峰時就要注意一下，因為其山峰名牌不是出現在一般山峰頂部，而是在山坳位的路邊，對於我們這些打卡和拍片的山系男生來說絕對是一個重要的情報呢，哈哈。和大叔們匆匆道別之後我地就繼續往第五峰 – 拐李峰出發了。其實都係一樣啦，匆匆打個卡就算啦，因為都係白茫茫一片咁睇毛毛呢。離開拐李峰，接下來第六峰就是果老峰了，本身上到黎見到四周都係白色一片，不過因為山峰呢度又有張石櫈比山友休息，咁我同超級就坐係度、抖一抖，飲啖水先至再上路。

由於之前得到左兩位大叔提示，所以我地知道黎緊要去嘅鍾離峰既果個山峰名牌唔會好似之前果幾個峰咁在山頂，所以我地一路行都一路留意住路邊兩旁，不過當我地終於找到時又發覺其實唔難發現；但係諗深一層，如果我地係從另一面路線走過來咁就可能會奇怪了，因為到了山頂找不到而是要再落一點點之後再看見這個鍾離峰名牌。點都好啦，都要係度多謝一下那兩位叔叔的提示。

走完了鏜離峰，接著就是八仙嶺最後一個，亦是最高的一個 – 純陽峰了。鍾離峰和純陽峰高度大約差七十米，而好在走完鍾離峰之後，並唔會好似之前幾個山峰咁有明顯往落有一往路再往上到達山峰，而是基本上離開鍾離之後走一少段平坦的山路之後就直接望到要上升往純陽峰的梯級了。係我地準備上純陽峰呢段路時有段有趣小插曲，就係山峰未見，先聞人聲：我同超級正在往上走時，係咁聽到遠處有女人聲叫喊住「有無人呀」咁，真係如果夜媽媽都吁話唔驚嚇。不過走下走下，就見迎面走來三個大媽，佢地仲同我地搭訕話見我地成三點半有多先仲未行完八個山峰，如果要到達佢地出發、即我地其中一個潛在終點位鶴藪時，都已經日落啦。咁我地唯有同佢地講話我地都習慣哂天黑先到終點，所以都無咩問題。佢地同我地講完加油之後佢地都繼續上路了，然後我地再爬仙完果段都幾斜既樓梯後終於到達最後一峰 – 純陽峰的峰頂了。一上到黎真係周圍都白濛濛架，心諗呢度仲要係八個峰最高果個，雲霧入哂山頂都無辦法，點知突然一浸風，吹開了眼前的雲霧，我同超級即時分工合作，佢有佢影相、我有我拍短片；總之點都要都要多謝天公造美！

點都好，匆匆影完之後就要繼續趕路了，因為以路程長度黎講其實只係走左三份一，但係已經成四點了，所以基本上真係點行都會行到日落天黑了。講開八仙嶺，如果未黎過，真係可能會以為走完八個山峰就已經叫做行完一大截路程，其他真係唔係咁樣架，如果由我地今日既起點大尾督出發，咁就只係一開始就先上到黎呢八個山峰，然後跟住仲要走一輪山脊，跨多幾座山，跟住再由唔同地點作為終點也可。咁講返離開純陽峰我地就稍為下降一下高度，避開了雲層之後又可以睇到船灣淡水湖、汀角、慈山寺等。另外望向前面山刃就是我們接著要走的犁壁山以及黃嶺、屏風山等。由呢段路開始都可以欣賞住這些連綿不絕的山脈和山刃，再睇埋山腳底下，甚有氣勢，好不美麗。往犁壁山呢段都算係較易走，唔會有太多升降，都係在山脊上走，所以比較輕鬆。

過左犁壁山之後我地就繼續往黃嶺走去，黃嶺係我地今日呢條路線入面嘅最高點，足足有六百四十米，即是說我地由五百五十米的犁壁山離開之後，稍為下降一些之後就是又要不斷向上走了，而到達黃嶺之前其實中間是有兩個小小又無名的峰。走著走著，隱約覺得體能正在下降，感覺到是要上電的時候了，於是就同超級講話去到最近的那個小峰就坐下來休息一會，補給一下，即是要吃掉我的魚柳包了。匆匆去到，抖返陣，食完野，感覺充返唔少電，於是又再起來繼續趕路了，然後黎到一個分岔路位時，本身我地計劃的路線就不會登黃嶺的頂而係擦邊走過就繼續往屏風山去了，但係我同超級講，既然係全日最高點，如果唔係兜多好大段路，不如都攻頂啦。唯一問題就係因為超級今日是穿短褲的，而我地見到要攻頂的這一段路都有不少及腰的草堆，所以我都問一下超級的意見。但係一來攻頂是一種挑戰，二來一路走來都發覺走在山脊這邊可以一路欣賞山下及山刃的景色，絕對比走在山中多景色睇，所以我地都係決定登頂上黃嶺。一路走，因為我都是長褲，所以就比較輕鬆，係得超級要硬食長草，但係一路走黎果種感覺應該比在山中擦邊走會爽更多。

登頂之後其實都係白濛濛，飲啖水後我地又繼續上路了，之後的路段都是山過山，不過都算是開始緩緩下降著。偶爾遇到雲霧稍為散開我們又會舉機拍照，這裡除了之前一路講的山刃好看，連山谷的一片綠也是另一番風味。雖然今日天色一般，但係景觀呢樣野無得厄，最多都只係色彩唔夠亮麗繽紛，但係個氣勢仍然會睇得到、無得掩蓋的。走在山頭與山頭之間的這段路都幾好走，不過呢我地之前有得揀的話就會可能揀上頂很山脊的，但係呢段路我地山地就揀返行山中的衛奕信徑，因為如果要走上屏風山繼續欣賞山刃的咁就要行一些像絲帶路的及腰草山徑了；而我地一來要趕路、二來我和超級今天的裝束都不太好走這絲帶路，三來我們都大約走了好一段山脊了，大景應該都不會有太大轉變；那就行輕鬆一點吧。不過有幾個小山頭怎麼說呢，在我們走完擦邊路，到去到一些和山峰走下來的小徑會合位時，我們就發現那些小徑上有一些位置是幾好的拍攝點，所以我們也會往回走一點，去拍照。而當中有一個位置更是我無意中發現是非常好的點，因為那段時間我走得較超級快，比他大約行前二三十米，然後我到了一塊大石時，就叫他在他的那個位置試試拍照看看，結果出來的效果奇佳，如果換著時平時我們一同走著的話，那就真的沒有這機會了；所以今次這個拍攝點真的是意外的發現，絕對喜出望外呢！另外不得不講就係雖然一路向前睇都好靚好有氣勢，但係呢段路有時路頭睇返轉頭望返之前走過踡八仙嶺呀、犁壁呀、黃嶺呀咁，望到既山刃雖然其實之前走來時已經望過，但回望就是相反角度，感覺亦都會有所唔同呢；所以記住不要只顧一味向前走呢。這裡的景是三百六十度都可以的，走在山脊上的好處就是這樣了。點都好啦，我地沿住衝徑就在山徑中擦過了屏風山的山峰，來到了一個分岔路，其中一條路可以經南涌郊遊徑通往丹竹坑。這地方的名字挺有趣，發音和我們平常食用或用來釣魚的海蝦 – 花竹蝦有點相似。難怪我會感到無名的親切感。而後來我再看地圖才發現原來丹竹坑再走一小段路就是沙頭角公路，而我的老表也就住在附近呢！不過今日我地有目標路段要走，再加上已經約了高高食飯，老表就等下次再見吧。

一路繼續前進，又來到了一個分岔路，這裡可以通往我們今日不會去的南山，亦有一個位置是通往屏鶴石澗，而我們當然就是繼續沿衛徑九段走啦。而這裡開始就是比較陡峭，下山坡度開始大起來，我和超級一邊行，一邊見到呢段路又斜又長時，不禁都話好彩我們是從大尾督那邊上山而不是從鶴藪又或者沙羅洞那邊走過來上山，因為呢面上山絕對比我們那邊看起來要辛苦得多呢。雖然可能係我地行到呢度已經體力下降了不少，所以見到咁嘅路段都會意志力較弱，從而覺得我地在大尾督上是正確選擇。不過除左喺大尾督果邊做起點上升會上得無咁辛苦之外，另一個揀果邊做起點嘅好處就係可以隨住體能，時間方面等隨時揀終點。我們今日本身是打算走完屏風山，下到鶴藪水塘之後，再繼續經衛徑九段上返有成四百多米嘅九龍坑山，再接上衛徑八段經玉秀峰到太和完成大長征的。亦有人會選擇下山之後到沙羅洞再到鳳圓完結。不過更多的人就會選擇下山後經鶴藪水塘之後一直走，經鶴藪道走到鶴藪圍完成行程，就正如我們今天一樣。在我們一路落山一路戥住要喺呢面上山既人辛苦嘅時候，我們就收到高高電話，約好了食飯地點同時間，所以以已經快要日落的時間來看，我們的進度絕不容許我們選擇其他的終點了，所以我們下山時基本就只有在日落咸旦黃彈了出來山邊時、同埋落到我們有點腳仔軟需要回氣時有所停頓之外，其餘時間我地都係不停咁落，真係行到有點腳他軟呢，枉我一開始在走完八仙嶺時仲口響響咁話今日呢條路線難度只是三粒星，沒有四粒星，因為佢只係長，但技術含量唔高；但係我就預算漏了一樣，就係佢對體力要求都有返咁上下呢。所以今日呢條路線我都會比四粒星，當然，呢個指標就唔係給那些資深嘅山友為準啦。

終於從山上落到了鶴藪道，可以行平路地圍住鶴藪水塘輕鬆走一段。不過因為剛來在山上時已經日落，所以我地都唔會係太放鬆咁樣慢行，黎到主壩亦都只係匆匆拍了幾張相，我地就繼續前進了。繼續走多一小段路，呢個時候回望山上，就會驚覺剛才原來自己仲係喺眼前果兩座高山，屏風山同南山之中走落黎的，真係腳仔有少少軟到都已經唔記得左係點樣行的了。最後我地沿住鶴藪道出到鶴藪圍就完成左我地今日嘅郊遊之旅啦。之後坐少巴出返粉嶺，再坐火車出沙田同高高會合，佢揀左美式扒房食飯，而他亦一早到達，喝起啤酒吃起薯條來了。而這間餐廳出名份量挺多，主菜加配菜以往我是吃不完要打包的，但今攻可能真的是消耗體能有點多了，所以我竟然可以吃完我所有的餐點之餘，還可以食埋高高之前叫落的薯條，認真誇張。不過今日的路程同我地原本計劃的少了一段，我諗，這個挑戰，就等陳車歸隊時，我地下次著好裝束再來挑戰吧！

船灣淡水湖、遠處為西貢深涌、荔枝莊

遠望雞仔峒、再遠的跌死狗等