廚房復出再戰白石

日期: 05/05/2020
農曆: 四月十三 (立夏)
地點: 維港東龍對開大海一帶
艇家: B記
釣友: 阿丹、廚房x 2、YY
天氣: 天晴、南至西南風初時三級後轉四、五級
水流: 中速流、水質可以
釣穫: 沙立 x1 (磅頭) 、什魚一堆埋單六、七斤

是咁的，最近武肺炎疫情仍然持續，雖然有所好轉，但係大家個心都依然未能放鬆，但係就已經因為緊崩得太耐而好想去放鬆一下，釣魚當然係其中一樣不錯嘅戶外活動選擇啦，尤其已經踏入五月，天氣開始熱起來，行山嘅季節亦都可謂接近尾聲呢。咁樣好耐已經無見過我地B記四人團嘅兩位成員了，雖然準備因疫情關係仲係外國未返到黎，但係廚房其實我地已經話左要約出黎「超超」已經講左好一段時間了；而我同阿丹上次限聚搵雞搵著龜 https://yy08.pixnet.net/blog/post/106442053 釣得好唔夠皮，所以就問下廚房有無興趣一齊釣下魚，心動不如行動，佢又話無問題喎，咁就一於搵B記約局啦。睇睇天文台，天氣預測都話過幾日出發當天係晴天，咁梗係即刻打電話問B記啦，佢又有期，搞掂，成局。局成就梗係要做準備功夫，上次填左咁多海，我梗係要去入返些少貨啦。至於廚房，數下手指，原來佢都有成四年無同我地上艇釣魚啦，都要係櫃底摷返些艇釣用具出黎、再睇下有咩要補給了。不過佢無釣咁耐，其實架生都叫做齊備，係要補返一些鉛同小物已經可以了。至於阿丹，佢梗係要準備佢每次都帶去嘅秘製蝦仁啦，不過今次佢話佢用左新方法醃製喎，不過最後仍然都係會染返左紅色呢。咁魚餌除左蝦仁，南極蝦同埋沙蝦仔都會係我負責買嘅，咁出發前一日再打去魚餌鋪訂就已經可以了。一切都準備好，就等待出發吧。

一切看似順利，只等中魚的時候，但係世事往往仲會給你開一些玩笑又或者係小挑戰的… 點解咁講？咪就係出發前一天我如常會先打去魚餌鋪訂蝦，但係我平常訂開果間竟然回覆我話大陸缺蝦，暫時無貨供應香港，咁即時打去第二間，又係咁樣答我；嘩，即時大為緊張，再打多兩三間都係咁樣答我地話生蝦供應，莫非真係要無生蝦仔咁樣出去玩？唔係唔得嘅，但係生蝦仔通常都係我地搏下斤頭魚嘅必備魚餌，而家如果真係無，係咪即係話比我地知，聽日出去都係專心釣魚仔好喇咁呀？我即刻打比阿丹，叫佢都幫手問問佢平時買開蝦既果間魚餌鋪，咁佢就同個老闆都比較熟，所以都叫有偈傾；老闆同佢講都係未有蝦訂住，但係半夜可以再作最後確認，咁既然其他地方都搵唔到，梗係咩方法都好啦，價錢貴少少都無辦法啦，難得出去玩，梗係要盡興嘛。就算我剛剛一聽到話無生蝦都已經即刻同相熟鋪頭留左神仙蝦咁，如果突然有生蝦都一定要買埋，皆因魚餌永遠預多無預少就梗嘅，都係想釣多幾條魚；同埋釣魚人梗係多點幻想，如果多魚食餌無哂魚餌咪好掃興？咁好啦，就算無生蝦，我地都會有蝦仁，神仙蝦同埋南極蝦，如果有埋生蝦咁就梗係完美啦，但要做既都做哂啦，命運如何，就交比上天安排吧。

半夜同阿丹吹緊水，突然收到好消息，魚餌鋪個老細真係打比佢話搵到生蝦，即時興奮無比，始終搏粗野真係旨意佢地架嘛。而家全港蝦仔咁難搵嘅情況下都比我地搵到，係咪預告我地會有好釣況呢？哈哈，真係好期待呢。講開期待，其實阿廚房都有架，因為太耐無玩，中魚感覺已經消退了唔少，但係快樂嘅記憶卻並沒有遺忘，而且想忘都忘不了架，因為有我個隨意窩可以隨時重溫丫嘛，哈哈。我都同佢講話今次佢復出之行最主要就係要搵返個釣魚既節奏同感覺先，熟悉返之後我地有機會就可以再去搵些再勁些嘅艇佬釣魚，今次一於就「超」住咁搵感覺先，所以佢都好想快點搵到個感覺呢。

終於出發了，天氣好好，晴哂，仲有點風添，好舒服。嘉亨灣我地上完艇就過三家村接埋廚房同埋佢叔仔就向住白石出發啦。阿丹一早已經綁好架生，佢係等B記接我地時同埋過去三家村時已經穿好哂線同埋綁埋釣組，至於我就慢慢安置好釣餌再同B記吹陣水先拎架生出黎，反正出得白石起碼都有時半個鐘艇要車。廚房真係太耐無上艇釣魚啦，釣組都已經忘記左點綁，所以我就要同佢首先重溫一下；咁梗係啦，要釣魚首先就要識得綁好架生先係基本嘛。綁好哂架生我地都已經出到黎藍塘海峽過左打浪排對出位置作釣啦。我地都係釣兩門勾，上門阿丹蝦仁、下門蝦仔；落左餌，唔係想像中咁多魚訊，應該咁講，好多好細口既電報型魚訊，但明顯嘅、可以抽得落手既就真係唔多，所以唯一可以做既都係比耐性等待似樣嘅魚訊抽魚。

終於首先開齋嘅係阿丹，上黎嘅係阿丹嘅朋友 - 瓜衫，唔錯。見到有瓜衫釣，唔再係電報員咪餌，大家都精神唔少，始終瓜衫好味夠鮮甜，而且食餌都比較明顯、唔試餌，可謂好玩又好食。轉頭我都開齋了，亦都係瓜衫呢，睇黎今日瓜衫好似比較開口喎。不過跟住阿丹同坐我對面嘅叔仔都上返條黃釘，然後我都上左條黃釘，咁真係打和啦。唔算太密口嘅釣況下，B記就叫我地收繩再車過些少試下有咩釣到，又係阿丹中魚先，都係瓜衫一條；然後到我有魚食餌啦，一逗一抽，重量上較剛才嘅魚明顯重返些少，不過就完全無掙扎，好似自我放棄一樣；上到黎一睇，嘩，良型石釘一條，正。跟住唔夠一分鐘，今次到阿叔仔中魚，睇佢支竿又係比剛才中瓜衫、黃釘嘅時候彎多了一點，我問佢係咪又係毫無反抗，佢答話係，然後上水見魚，果然又係良型石釘一條，只係比我的那條小了一點點，不過絕對非常不錯。石釘同黃釘可謂唔同身價嘅魚黎，食味絕對石釘贏成條街，所以連續兩口執到石釘、仲要係良型，真係開心大發現呢。

諗住執多幾條，點知就係得果兩條，返多一次寨都係搵唔到多一條，再加上B記、叔仔同我接連勾地，但明顯有彈性收到些少、唔似勾石，呢個排口應該有漁民下左綱，咁樣我地唯有轉位再戰。一直向外咁車，我就同阿丹講話喂正呀，以前你上艇同B記講話想釣紅衫，B記就會車出黎車遠少少較近橫欄島方向嘅大海位，而家應該係咁上下啦掛，快點努力執返幾條。果然轉頭中魚嘅又係佢，亦都係佢朋友瓜衫。至於我同叔仔，魚都有中到嘅，不過就係扯旗立仔咁囉。咁之後我都有中返瓜衫嘅，而阿丹都有中黃釘嘅，佢唔係淨係識得搵朋友仔嘅，哈哈。

咦，話時話，講左咁耐，你地發唔發覺有兩個人名我地都無提起過？無錯，因為真係釣到成十點幾，竟然B記、仲有廚房都未開齋，咁我地釣友未開齋就常有嘅，但喺我地幾個人都開左齋之下B記釣左個幾鐘都仲未發市就真係情況罕見啦。既然係咁，我唯有出力打氣鼓勵大家，就係人人先食一個蛋撻先，所謂魚唔開口人都要開下口先嘛。B記見今次我咁早拎食野就講笑話乜咁早食野，都未中魚，應該中左魚先丫嘛。我就話，梗係食左先啦，食完就有得中架啦。

食完蛋撻仲未車到排口咁我就望住個撈箕話拿如果我地個今日有人中撈箕魚咁我地就會用呢個撈箕啦，我仲講話如果其他人中魚我當然好樂意第一時間去拎撈箕啦，但係如果我中魚就有勞其他人士幫手啦。而阿丹則講話如果我中魚，今次佢會負責做戰地記者，因為上次女將兵團初征夢幻釣場 https://yy08.pixnet.net/blog/post/106432006 時幫我拍片嘅細表妹今次無黎。講笑完之後，我仲同個撈箕影左張相添，以示誠意，哈哈哈。

影完撈箕到排口我地又開始作釣啦，我見包南極蝦都解凍溶左少少雪可以用，反正蝦仁唔算特別得食，一於試試佢；叔仔因為釣三門勾，佢就直頭黎個魚餌盛宴，蝦仁、南極蝦、生蝦各一門，至於廚房同阿丹則繼續係蝦仁配生蝦既組合。今次首先中魚嘅係我喎，瓜衫一條，咦，食南極蝦喎，咁我就繼續上門南極蝦下門生蝦啦一於。跟住中魚嘅就到叔仔，又係一條良型瓜衫，又係食南極蝦喎，睇黎呢段時間佢地係咪轉左口味呢？見到咁，叔仔都即刻上面兩門勾索性用哂南極蝦，下門繼續用生蝦搏一搏。廚房見狀，雖然以前未用過南極蝦做餌，但破龜心切，珠玉在前，亦即刻求變，即時換上南極蝦，試試會唔會有轉機。始終南極蝦比蝦仁更「陰濕」，因為南極蝦比蝦仁更貼魚勾，基本除左扯旗立此等小小魚外的魚仔如果食落黎都會中勾，所以係今日魚仔較精口又唔活躍嘅情況下，用南極蝦看來是不錯的嘗試。跟住我都再中多條瓜衫喎，睇黎真係呢個時間南極蝦比較有計喎！嘩，跟住終於到廚房中魚啦，不過過程就有點曲折，因為佢中魚時其實魚絲又同我果副糾纏左，所以我都以為我中，到我收收先知同佢副魚絲攬埋一齊，然後收到上黎解繩就發覺條魚係佢中而唔係我中嘅，不過因為條魚係一條我地又叫做「咬手含」嘅林哥，所以最後都係放生嘅；但係點都好，起碼都叫做開左個齋先！南極蝦果然有料到，於是阿丹都暫時將佢嘅秘製蝦仁擺埋一邊，加入南極蝦戰隊。但呢一寨都叫做人人有魚中嘅結果，咁返寨時我就走入去諗住笑下B記話出面人人都有魚中係差佢啦，點知望下佢個小水桶，竟然已經有成四條瓜衫釣到，我即刻改口話，嘩，B記，食完蛋撻果然係唔同左喎，真係食完即刻有魚中仲要唔止仲一條添喎，蛋撻威力果然唔係講笑。

返寨再釣，都唔夠兩三分鐘，就見B記掟左條瓜衫出黎，呢條仲比之前果堆黎得大條，然後B記都話佢岩岩轉左用南極蝦第一口食埋黎就係呢條暫時最大條嘅，到呢度，南極蝦嘅效能應該係發揮到極致了。原來仲未喎，因為呢個時候廚房又中魚了，而且仲要係起．雙．飛！上門係食南極蝦嘅黃釘，下門則係食蝦仔嘅梳蘿，而呢一個雙飛，亦都係我地全日唯一一次雙飛了。

轉頭B記又再掟條黃釘出黎，又係比我地釣嘅都略大，我見到就同叔仔講笑咁話，你睇，B記真係好神奇架，大家都係用一樣嘅魚餌，但係經佢釣上黎既就好似中左核輻射咁會放大左架，頭先條瓜衫又係、而家條黃釘又係，真係唔到你唔服呢。釣下釣下，人人都偶爾有魚釣到嘅，唔係瓜衫就係黃釘，尤以阿丹中得比較多。不過我就呢個時候竟然起左條雞魚仔，雞魚季節，南極蝦中雞魚，都幾合理丫。但係就係今日嘅第一雞。過左一陣，到阿丹中魚，上水見到嘅，係一條扯旗立，不過就唔係我之前釣嘅五蚊銀大細，而係都有掌心咁大嘅；一般如果有呢個大細開始我地都會稱為波立的。釣左咁耐，真係有點奇怪，釣左半日，點解仲未見到三寶中嘅其中兩寶呢？咩係三寶？咪就係石狗、惑仔、同埋瓜衫囉，一般出B記艇都會釣到嘅魚種；但係今日釣左半日，竟然一條石狗同埋古惑仔都未有，算係少見。趁又車緊去另一個排口位時B記都講話今日竟然狗仔一條都搵唔到，好在瓜衫肯食餌唔係就真係「支支」了，又係真喎，今日瓜衫都算係開口，而且唔揀食，基本上蝦仁、南極蝦、同埋生蝦仔我地都中過瓜衫，咁黃釘都係嘅，不過黃釘為食就全所共知啦，而且今日黃釘都唔算密口，就算食餌都唔見得好似平時咁搶口，唔似得瓜衫佢地食得咁有「決心」哈哈。`

就係咁樣我地一路都係繼續係大海位度釣，B記每隔一兩寨就會走位，我地今日真係算係走得好多位，不停咁掃場，真係白石對開大海位我地都枕住掃。講開白石，相信廚房一定好明白同記得，因為以前同準備仔出黎，白石就係準備仔嘅福地，我地有親好魚，基本上都係果頭中，所以每次出黎其實準備仔都會望到白石實一實，如果我地唔係車去果度，比如去打浪排呀，石澳果面佢就會同我地打哂眼色咁問點解仲未過返去白石果面釣架咁樣；所以白石真係可謂我地出親黎既風水寶地。而其實今日車出黎第一個釣點同白石都有點距離，果陣我就已經笑笑口咁同廚房講話，而家係點都無問題，最後我地都係會返去白石果面然後中好野，一切都已經寫左係劇本之中。然後我地一路都係車出大海位釣，離白石都係有一段咁上下嘅距離，唔知係咪咁，所以我地所期待嘅撈箕魚一直都未出現呢？不過作為釣客，我基本上都唔會主動去同艇佬講話要車去邊度，因為都係果句啦，佢地日車夜車，點都一定熟過你同我嘅。「不要問，只管信」就係我去艇釣跟艇佬嘅六字名言。

咁基本上我地都係繼續邊釣邊轉位搵魚釣咁啦，但係似樣嘅一口同埋較密既魚訊都未有出現，除左那些很努力食餌但基本上都抽唔到嘅扯旗仔仔係度不停攻擊之外…咁我呢個時候又抽到一條扯旗仔，但係阿丹就中條瓜衫，真係人地就釣這些，我就釣那些，哈哈。不過釣魚就係咁架啦嘛，不過亦係咁先好玩嘛，充滿未知數同變化。B記就一路都嗌住話要中沙立架啦，呢個時候終於比佢叫到啦，不過就係掌心都無，仲細過條波立既沙立仔仔，咁梗係放生，等佢媽媽都唔止既嫲嫲黎搵我地啦。講開嫲嫲，亦都係一個關於源自準備仔嘅故事，長話短說就係總之每次釣完魚分「綜援」之時，準備仔往往都會很搞笑咁話，嫲嫲好鍾意食魚嘅，你估佢會唔會想食咩咩魚呢？你估佢又會唔會想試埋咩咩咩魚丫拿咁呢？總之就要試味啦，咁就一於拎多幾條返去比佢試真一點啦。所以以後每次釣魚我地都會講笑咁講話嫲嫲要食魚，今日要釣多點釣大點咁呢，哈哈哈，真係往事暫時只能回味了。

繼續釣，我又搵多一條雞魚，今次係食蝦仁了。咦，點解我會用緊蝦仁嘅？其實就係因為南極蝦時段已經不知不覺間在剛才已經流逝走了，得食較搶口嘅情況已經不復見，咁我咪一於又試下用返蝦仁睇下會唔會有轉機囉；而阿丹亦都同我一樣轉返做蝦仁，而今次又到佢中魚喎，不過同暫時只係我釣到雞魚一樣，佢亦都中多一條暫時只有佢梅開二道嘅波立，真係咪話魚仔唔認人唔跟人呀。

用左陣蝦仁，又唔算特別好景，我見廚房索性兩門勾都用哂沙蝦仔，睇黎決心做大事喎；咁都啱嘅，都已經成三點，我地四點半就要回程，得返大約個半鐘，而家唔搏等幾時喎，不過我都係照樣上蝦仁下生蝦咁樣就算，有魚仔釣一樣開心。不過今日黃釘瓜衫乜餌都食，所以轉頭我地幾個都有起到佢地。阿丹釣釣又會走左入去裡面釣，初頭我以為佢怕曬啦，但原來係因為佢想就住個流水方向黎釣，佢係艇頭果邊個位呢個時段魚絲都會向艇底往入方向去，都幾難釣，所以佢就走左入去艇內，向住我地果面個方位釣，果然就好釣多了，仲比佢搵到我地今日嘅第一條石狗添！然後再一不離二又比佢起多條呢；正諗緊會唔會好似波立咁又係得佢一個釣到石狗時，終於都比B記執多一條，但係全日我地就係呢三條石狗啦，至於惑仔就更加係全日一條都無。

雖然愈車愈近白石，不過我就已經係平常心咁釣，始終今日感覺都係似係得魚仔架啦。但係都係果句啦，劇本一早已經寫好；我都係如常蝦仁同生蝦仔咁釣，然後就有一下魚訊一下索左埋黎，食得都幾有點沉，都未抽就已經感覺到魚絲有點去，我再一逗，先發覺我隻橫絞個榜頂上得唔夠緊，好似有點出線嘅感覺；我又唔知點解出奇地咁冷靜，即刻用手指公壓實個杯同魚絲，然後再抽多一下，感覺到已經中魚，即時再快手較緊個磅頂，然後就已經感覺到久違了嘅走水感覺。不過走水還走水，但收佢兩手都知唔會好大條，但係都夠我支竿彎起來了；佢地見到咁即刻問我駛唔駛撈箕，而我第一時間卻係同阿丹講：「拍片，唔該」；而阿丹亦都其實已經係好似佢之前所講咁見我中魚佢係第一時間會拎機拍片而唔係撈魚，無辦法，潮流興「相機食先」，哈哈。咁所以撈魚嘅「重責」就交左比阿叔仔手上；雖然為左拍片而慢收，但魚仔唔大，所以都終於見魚啦，係B記叫左大半日嘅沙立呀；叔仔第一下落撈箕可能因為無對準魚頭而落空，不過我地兩個都好快修正左然後佢第二下就無甩拖了。沙立唔算大，拎我個魚秤出來秤，十三両幾，斤頭唔夠，不過因為係竿中，所以都已經好好玩了，而且呢條魚更係我呢支竿同絞嘅撈箕開光魚，所以都有紀念價值架。亦都不枉我今朝特登同個撈箕影左張沙龍照，原來勤力、誠心係有回報架，哈哈哈。

大家本身都係釣魚仔釣到心情平靜哂，忽然見到撈箕魚，即刻精神為之一振，戰意返哂黎，而我都好似廚房咁樣兩門勾都用哂生蝦仔了，希望好運起個孖。不過撈箕魚就無啦，黃釘大家倒是執返幾條，然後我呢個時候都釣到一條比波立要細嘅沙立仔仔，當然亦都係放生了啦。望下個鐘，四點十五分，最後三個字，衝刺啦。首先衝到魚嘅係叔仔，仲要係一條今朝中完兩條就無再見到過嘅良型石釘，正，又多條好味魚。然後釣多幾分鐘，阿丹勾左石，然後扯完上黎佢個專用釣組個勾崩壞了，佢就費事再綁野而決定提早收工。未幾，又到廚房勾石，佢都提早完結賽事；得返我同叔仔繼續奮鬥，吖，又真係比我呢個時候磨到條雞魚仔，完成雞仔帽子戲法。本身諗住中魚完再落餌釣多一口嘅，但係B記呢個時候亦都吹雞宣佈完場，就係咁樣我地今日嘅廚房復出釣魚之旅正式完結啦。

由於今日魚獲唔算特別豐富，又無咩大條魚釣到，所以我地決定都係各自拎魚返屋企交差食飯就算了，等下次我地釣到好野先再一齊「事後魚宴」啦。不過雖然唔係爆釣，但係今日卻仍然係非常好「超」，首先天氣已經裶常好，晴哂得黎又我地可以係個蓬下面唔駛曬到燶；亦都唔駛怕大湧大浪釣到人又坐唔穩又怕暈船浪；仲有生果有零食有歡笑，所以大家一釣完已經講緊幾時又再黎下次釣行了。希望下次釣魚時我地B記四人團嘅最後一員大將準備仔可以歸隊啦！

阿丹秘製蝦仁

成品