聶哥信金馬倫嘻嘻戴面具

路線: 大潭水塘道巴士站-> 布力徑-> 過H049見小徑分岔口直上聶哥信山->面具石-> 聶哥信山頂發射站-> 沿林中小徑走回布力徑見BL47黃牌子-> 布力徑至中峽-> 轉港島徑分岔口引水道上-> 小徑直上金馬倫山-> 沿小徑往中峽道-> 中峽道-> 灣仔峽-> 灣仔峽道->堅尼地道-> 集成中心快樂蜂炸雞
登山之友: 超級嘻嘻、YY

是咁的，話說上星期同超級行完玉桂同香港仔水塘出灣仔之後去左買山鞋，跟住過多兩日佢就再買多一對；買完玩具通常都好想快點甚至即刻有得試玩，所以之後果兩三日佢就好有興致咁已經自己去左後山試踩；然後呢排咁啱七十一做緊全香港地區限定芝士撻味軟雪糕就只得南區有得食，所以佢又計劃入黎同我食返支雪糕然後就去行個短山，咁啱又落完幾日雨呢兩日好天，咁即刻起行啦。路線就超級揀既，不過都好在跟左佢揀嘅呢條面具石山路線，令到我地有左開心美滿嘅一天，一陣間會再詳盡點的描述的，哈哈。而由於已經立左夏既日子就開始好熱，所以我地都揀唔太中午時份出發，不過行程唔長，睇介紹都係話全程約八公里，走三個多小時就能完成，所以我同超級就揀左三點係香港仔食完雪糕就坐巴士往起點去。

落巴士之後就走向布力徑，即平時我地行港島徑走返出黎既地方，其實今日要上山嘅地方我同陳車又好，超級又好，幾次都已經經過過那個分岔口，不過之前都唔會行，但係而家既然超級要升級玩手腳並用的小徑，咁今日呢條路線就真係入門練習不錯的路線了。黎到分岔路口上面具石嘅小山徑，其實唔算難行，基本上都唔多駛用手爬都可以上到去，但係如果用手就會方便少少同感覺安全點，所以我都係幾小步就加一下手幫助咁樣上，經過大約二十分鐘我地其實就已經黎到面具石底部，咁我地見到有兩條路嘅，一於先走外圍果條睇睇咩環境，如果難度太大先再返黎行另一條吧。行左幾步，就已經去到面具石嘅正下方，其實我地就可以直接就爬上去架啦，不過呢就見到有兩位漂亮山系姐姐仔就係度影緊相，咁我地咪當休息一下係度睇風景咁囉，反正我地呢個位又唔曬。講開太陽，可能因為地理位置關係，即使我地由布力徑開始行時是大約三點半啦，到上到黎係四點，但係真係唔夠比太陽曬，所以一路上黎都好舒服，而家黎到石下面就更加有點陰涼嘅感覺，真係話之你上面兩位姐姐仔係度影左幾耐。咁佢地又真係影左都幾耐下咁，兩個姐姐仔每個都輪流影左好幾十個姿勢，而且明顯有一位姐姐仔真係好識得影相同埋擺姿勢，係咁指導佢嘅同伴，咁我地見到咁，就諗下不如上左面具石度搵個位坐低啦，總好過喺石底度一路企嘛，反正上去走過去佢地後面都係阻到佢地一兩分鐘吧。咁我地快快趣趣爬左上黎面具石，佢地都好有禮拜咁同我地打招呼，仲話佢地會影好耐，如果我地想打個卡就比我地影左先；咁我就話唔急啦，你地慢慢影，我地啱啱上到黎，一於四周圍參觀一下先。我就爬左去另外一面，姐姐仔佢地就繼續係度影相，剛剛指導人影相果位上完去石影完之後，就到另外果位上去接力，佢地既對話仲好好笑添。因為指導姐姐繼續係度指導上石果位姐姐擺姿勢，而最有趣嘅係佢既提示：「個海係邊呀? 個天呢又係邊呀? 呢排有無工開呀? 頭痛係點架? 牙痛又係點架? 咁腳痛又點呢? 試下換另外一隻腳向出? 拿，好似我咁隻腳轉出少少、要抬高隻腳，剩係腳尖掂住…」嘩，真係大開眼界，總之係短短一兩分鐘之內佢可以指示到姐姐仔連擺二三十個姿勢，唔怪得佢地可以由頭先開始一路咁影玩足大半個鐘。卒之，我地趁佢地係度睇相檢討期間，就到我地上去輪流快速影左幾張，之後我地又去左另外一面探索，不過由於另一邊要穿石洞位有點窄，我又懶除袋而選擇爬上石，結果就唔小心整損左手臂。好彩無乜大礙，不過就要勞煩超級幫我沖傷口同貼膠布了。而我地係個洞入面整理期間，我發覺我都有機會阻礙到出面姐姐仔影相，因為有機會入鏡的；所以我就問佢會唔會阻到佢地，其中一個姐姐話唔怕啦，用軟件後製執走我地就得，另一個就話，如果你地縮開的話，咁個背囊都執埋一面好少少因為都會入鏡。哈哈，真係囡囡為左要靚相真係要執到幾盡。但最好笑既又係我問佢地駛唔駛合照啦，佢竟然諗都唔駛諗就答話，唔駛架我地係唔需要合照既，佢仲反問我地駛唔駛幫我地兩個影合照添，真係唔明佢地諗乜喇。咁唔理啦，佢地就繼續影，我地就繼續上路啦，因為我地其實只係完成左大約七份之一嘅路程咋，卻係度玩左前後成大半個鐘。佢地見地走就順便問下我地知唔知點樣離開係最快嘅，咁我地當然答佢地話就係我地頭先直上黎嘅小徑係最快啦，但係相對就會危險一點，如果安全的話就要好似我地咁樣兜上山頂再從另一邊走林中小徑離開就相對容易得多了。佢地最後都係決定走最快的路線啦，然後我地講過拜拜就繼續上山頂了，因為面具石並唔係聶哥信山的最高位置呢。

走了一會就來到了聶哥信山頂了，這裡有個發射站，我們就圍著它走了一圈，主要是想看看從山頂不同角度可以看到什麼景色。匆匆打過卡後我地就繼續上路了，這一段路挺好走的，都在林中小徑走著，又不太斜，有些路段仲有一點木板梯級，無太陽曬之餘條路仲唔難行，我地都話這些路反而更適合高高，因為高高反而係怕曬同怕高，如果一直走在林中，佢就絕對無問題。走左大約二十分鐘我地就出返黎大路、即重新與布力徑會合了。走在平坦石屎路上我地當然再提速啦，追趕剛才失去不少的光陰。走著走著就黎到布力徑同港島徑的分岔口，因為剛才走的路其實既是布力徑、亦是港島徑來的，走到這個分岔路它們就要分家了。我們選擇了往港島徑方向走去，不過其實都無走左一分鐘就要在這裡搵到另一個分岔路而退出港島徑；啊、嚴格來說都唔叫分岔路，因為呢個岔口其實係一條引水道和從是護土工程才會走的小路。不過我地接下來其實就係要從這裡一直走，走到沒有引水道位時，就離開石屎而接上林中小道，這裡一直到金馬倫山頂都是這些草叢茂密的小道，不過這裡又唔係好同剛才在聶哥信山頂走落來布力徑那條路咁彷彿是在樹林中走著，而是佢有唔少路段你都係有開揚空間，當然你係走在草堆小道之中咁啦，但係這些草叢茂密的小道的小草又唔算界腳，即使我是穿著短褲，但係都可以接受得到；最多有時可能較多長草或樹枝時，我才會用戴了手套的雙手去撥開。再行多一陣我地黎到一個相對開揚、仲有一塊又大又平的石頭的位置；這裡景觀確實不錯，可以看到剛才走過來的聶哥信山啦，亦都可以看到較遠的渣甸山及其引水道、即係果次同超級行驚險一星覓棧道 https://yy08.pixnet.net/blog/post/106406044 時的懸空棧道。俯瞰的話就是跑馬地、甚至更遠的維多利亞港兩岸呢。這裡很舒服，所以我們也在此小休一會，並同係度遇到的一位山友哥哥吹水；佢就係啱啱在金馬倫山頂睇完風景落返來的，佢話呢度影相仲好睇喎；我地聽到咁，當然即時再補多幾張啦，哈哈。吹左一陣水又要上路了，因為都差唔多日落，我地就算離開左金馬倫山頂都仲有一段路要行先可以返會市區呢，所以就同山友哥哥道別、然後再度走在草叢茂密的小徑往山頂走去。行多十零分鐘，我地就黎到全日最高點 – 金馬倫山頂了。雖說是全日最高啦，它其實也比高430米的聶哥信山才高了十米而已，哈哈。不過唔係講笑，呢度景觀真係唔錯，由港島東面可以一直望到西面，而且也望到對面海，再加上口落時份，真係夕陽醉了。但係影完夕陽，意味著咩呢? 就係太陽會落得好快然後天就會好快開始黑起來了，所以我地都想快點離開，雖然有頭燈，但能夠唔用就盡量唔用吧。

在另一端小徑離開山頂，走了幾分鐘又黎到一個景觀很不錯的地方，這裡看到的則是港島的南面，雖然剛才上山時已經可以一直看到山下比如深水灣路段、海洋公園等的景色，不過呢度除左望到果面，仲可以望到香港仔上、下水塘啦，同埋鴨脷洲、以至玉桂山、及更遠的南丫島等。而因為呢個時候係夕陽昤份，陽光反射在兩個水塘的水面上，更加是像鏡面反光一般，閃耀著兩片光芒，還是漂亮。不過都係果句啦，日落時份就係趕時間，所以打左幾張卡之後我地就繼續上路下山了。之後的這一段路都是走在林中小道，但係又不如介紹網頁般說的路線不太分明路不太好找，所以我地都係好快咁樣行左十多二十分鐘就落丁黎中峽道啦。呢度我以前已經黎過，四周圍都係豪宅，所以我地都係邊行邊欣賞豪宅，畢竟睇靚野都係會令人更加開心的，就正如剛才在面具石上睇到兩位山系姐姐仔一樣咁。

邊睇豪宅邊快步行著，好快的我倆又黎到灣仔峽公園了。去過廁所洗過面，我地就要走全日路程最後的一段路、亦都是我覺得最唔好行又最無謂的一段路 – 灣仔峽道了。基本上我平時由香港仔行山出灣仔都係行呢一段路架啦，而呢段路斜得黎又要無景睇，所以甚是乏味，再加上天都已經暗起來了，就更加咩都唔駛睇了。所以接下來我都係倒轉身向後行的下著山，因為咁樣行起來就無咁傷膝頭無咁唔舒服呢。就係咁樣一路走完灣仔峽到我地就算完成左今日既行山之旅了。之後我地沿住堅尼地道一直走，最後去到了灣仔的快樂蜂食晚飯，並吃到了它們新口味的辣炸雞，真的是太爽了。今天真的是美好的行程，天氣又好，但卻因地緣關係我地全程唔駛比太陽曬，然後上到山又有友善可愛的靚姐姐，之後又有山友哥哥，最後仲可以以一個好食又飽滿的炸雞晚餐作結，絕對是令人滿足的一天呢！其實超級講起，今日呢段短路線就係為左鍛鍊及小試一下自己，為之後挑戰蚺蛇尖、狗牙嶺等熱門難度系數較高的路線做熱身，希望我地可以快點挑戰這些「考牌路線」啦。

喺七仔啪左個芝士撻味雪糕先至出發！