我和男神於青馬有個約會

日期: 07/20/2020
農曆: 五月三十
地點: 青馬一帶
艇家: 安叔
釣友: 阿濤、阿恆、華仔、艾力、阿丹、YY
天氣: 天晴、東南風二、三級
水流: 生流、水質尚可
釣穫: 紅魚x 2(斤半x 1、廿兩x 1)、細鱗x2 (磅頭x 1、十兩x 1)、什魚一堆埋單10斤

是咁的，雖然最近疫情反覆，但係魚仍然係要去釣的；尤其已經有成兩個月無出艇，更加係手痕難耐。而且出海釣魚其實都算係戶外活動丫，人又唔密集、空氣又好，總比困在社區裡而對稠密嘅人煙好多了。而今次出艇同以往唔同，唔係我做搞手，我出發當日只需要帶個人出現就可以了，比做搞手輕鬆得多。而重點係，今次搞手係一個香港知名的釣魚Youtuber – 阿濤！我都係因為睇佢嘅片睇得多，覺得佢釣魚片好睇啱睇之餘個人都幾好玩，於是膽粗粗就係佢頻道入面其中一條片留左言，之後再加左佢做面書好友，諗住有咩唔明既時候可以向佢請教。然後佢又好好人咁話就啱時間可以一齊玩；咁可以去釣魚已經好哈皮啦，仲要係同Youtuber釣魚界男神喎，梗係好啦，即時入左佢個群，靜待佳音。

然後終於七月頭我就收到男神短訊，問我十三號果個星期有無興趣出發，諗都唔駛諗，即刻答好，仲問佢介唔介意我叫埋我老友阿丹一齊，佢都欣然答應。然後佢問有無咩提議邊度，我話除左外海要釣魚證我跟唔到之外，其他釣乜我都無問題，只要唔係釣扯其立同池魚就得喇；咁當然係講笑啦，我肯釣佢都唔會啦，我地就研究緊出擔干附近釣離魚定係去青洲一帶搵下妯鱗同花惑，結果最後佢就同佢朋友揀左去擔干，仲已經約埋艇佬，咁我梗係無問題啦。然後呢個月份都開始有鮫魚嘅出現，我仲同阿濤講話雖然我地目標魚唔係鮫魚，但係都帶定一些鐵板仔去，到時都可以拖下鮫，睇下有無得爽下鮫魚咁。一切都叫安排好哂就都係等待出發日子吧。

點知出發前一星期又收到阿濤消息，話個艇佬叫佢個字黎車我地，但係聽佢朋友講話個艇佬囝就幾一般，於是有了轉陣迎戰既念頭，問我有無意見。都係果句啦，同男神玩，死跟！決定左要轉，咁轉咩呢？本身就話不如去返之前講過下既青洲搵細鱗團嘅，但係結果阿濤話時間緊迫，約唔到相熟艇家，所以最後我地就返左去夢幻釣場 – 青龍頭！真係有夠轉折啦，哈哈。

出發前一晚本身同阿濤約左係荃灣會合再坐紅色跑車入去青龍頭落艇，不過最後佢因為要同另一個朋友先去三聖攞生蝦同大眼仔餌先再過青龍頭，所以我地最後都約左係青龍頭集合。不過佢就叫我先喺荃灣同一個新手釣友會合左再帶埋佢入去喎，咁梗係無問題啦，反正我同阿丹本身都係打算坐地鐵去到荃灣再買早餐同糧水先至再入去。咁既然多個人就一於荃灣坐綠色跑車入去啦。

好啦，期待多時嘅我和男神有個約會終於都黎到啦。清晨時份係灑左陣雨，但係到我地出門嘅時候已經係非常好天，今日一定係一個好日子來的！喺金鐘同阿丹會合左之後我地就地鐵宜劈入荃灣，然後買好糧水之後我地就同阿新手華仔會合。一見華仔就覺得佢好年輕，阿丹問佢幾歲先發覺我地兩個如果唔生性的話都可以做佢爸爸了。原來華仔才剛剛二十呢，哈哈。問佢點識到阿濤，佢就話本身佢同佢朋友仔都有睇開阿濤個釣魚頻道，咁佢朋友就話如果有咩問題甚至話想跟埋去釣魚都可以試下留言比阿濤；結果阿濤咁啱就約左我地成左局又仲有一個位，咁就一於叫埋佢黎玩啦。佢就真係幾好彩啦，加左阿濤做好友都唔夠兩星期就有局，佢連支魚竿同隻絞都係新買嘅，都係知道有局之後再問阿濤應該買咩架生黎之後再跟住阿濤嘅建議去魚具鋪照單執一套的，所以我一睇就見到佢套架生都係最新款，即使佢隻絞其中同阿丹係同型號，但係就係唔同年份嘅款咁囉。難得又吸引到一些新人加入釣魚界，都係好事黎，畢竟推動釣魚活動都係我地樂於去做同埋見到的。

話咁快飛的就去到青龍頭，比預定落艇時間早左成十五分鐘，所以都未見阿濤同佢嘅朋友黎，一於食埋我個早餐先落艇。食食下就見到阿濤終於出現了！同佢同行嘅釣友原來都係有拍開片同有自己頻道架，不過就相對上無阿濤咁高認知度咁解。等多幾分鐘佢地個朋友都黎埋我地就人齊了，即時打比早已在碼頭附近等我地嘅艇家，叫佢埋黎接我地。今次個艇家叫做安叔，我就未坐過佢艇嘅，不過就睇過佢地嘅片出呢個艇家，所以都應該算係相熟艇家。安叔等我地安頓好行李之後之問我地想去邊度釣，咁阿濤就話都係青龍頭一帶同埋青衣油庫吧，跟住安叔就叫我地坐穩然後就開艇直飛我地今日第一個釣點 – 馬灣對落半山石錨地個燈塔作釣啦。安叔同阿濤就先用大眼仔做餌，睇下會唔會執到好野；其餘人士則用蝦仔作釣。咁開齋嘅首先就係用手繩嘅艾力，我仲係度綁緊架生佢已經落左餌兼抽埋魚上黎了，小石狗一條。跟住到我啱啱穿好架生勾緊蝦仔時，佢已經又再上多條小石狗上黎，認真快手。其實魚訊就好密下，不過好似阿恆話齋，都是一些小魚在咬餌，沒有一口像樣的，根本起不了手。咁當然都有例外嘅，一係就係大條小小嘅，一係就係佢地食得太貪結果都給抽中了。因為好快我就見到坐我前面嘅華仔開齋了，但係條小石狗真係太細條了，所以佢問左我一聲係咪放之後我再點下頭佢就把小小石狗放回海裡面了。

我就繼續係度等待，同坐我隔離嘅阿恆一樣，都係有食餌、無起手，可以點呢？咪就係睇人地起魚囉。艾力就又再繼續抽魚同起魚，阿恆都笑笑口講話有無咁多食餌呀，大家都係勾蝦仔啫，真係無辦法。跟住到阿丹開齋了，不過重點唔講佢條石狗仔住，而係佢今日個釣組：四勾仕掛，不過佢再係勾上面勾哂沙蝦仔做餌咁樣。總之成抽野遠睇就成棵海底植物咁樣，連阿恆都講笑話放係水底耐少少分分鐘吸引到墨魚埋去產卵，哈哈。唔計揸大蝦嘅兩位，就剩返我同阿恆未開齋，不過無所謂啦，食餌食到好勇猛但都令唔到我地起手嘅，不釣也罷。不過轉頭忽然就見阿恆話勾到野有少少重量，仲問有無同人倒左繩；但係問完都唔見有，咁佢就繼續收繩啦，上到黎，原來係海蘋果一枚！真係海入面嘅魚就仍然未釣到，植物倒是釣到了。唔緊要，繼續努力，你得架，哈哈。釣多陣我都終於開齋了，咪住…又係有點重量但又唔識走水嘅？無錯，上到水，果然又係海蘋果黎，真係有無咁多呀？我倆個就釣海蘋果，艾力就繼續上石狗，仲上多條古惑仔添。不過喺華仔同阿丹都再中魚之後我都終於開齋上返條小石狗了。然之後有動作嘅竟然係安叔！但係望下佢收繩嘅動作條魚又真係唔會大得去邊，上到水一睇，原來係牛秋仔一條，果然夠惡，魚仔唔大都走去搞大眼仔，抵你要上黎見我地。釣多一陣釣況都係毫無改變，安叔就叫繞繩車過去登龍洲果面睇下有無料。

可能安叔都見無咩料，佢都轉左用蝦肉釣，所以都好快咁比佢執返幾條狗仔，我就幾叻仔咁釣到條石釘，唔係話佢大條，而係佢係高級食材黎，所以比個讚自己咁囉。跟住阿恆都終於以石狗仔黎開齋了；到左呢度，剩返唯獨堅持揸大餌嘅阿濤係度苦苦掙扎；不過做大事就係咁架啦，一係西、一係威。艾力就繼續佢嘅上石狗節奏，其他人都真係唔係佢嘅對手，事後估計全日石狗嘅總數量佢應該一個人佔左一半，認真犀利。就係大家都係搵下狗仔之際，我忽然感覺到支竿傳來清脆利落嘅食餌，等佢索多一下我一抽竿，即時感覺到條魚有返少少重量，而且仲會走水添，不過收多兩下就基本確定佢無任何還手之力之下我就慢慢咁收，盡量享受用竿中魚後嘅走水頂魚感覺，話哂呢條魚都係我呢支竿嘅第一條有得爽嘅魚黎，梗係要好好享受並記住個感覺啦。不過魚仔始終唔襟玩，好快都上水了，原來係一架小火車，目測磅頭，事後過磅得十兩。細鱗始終唔會密密有，大家都係繼續緊石狗嘅節奏，尤其艾力繼續做緊工廠工咁樣流水式提供石狗入生倉。但係突然有一見怇拋完絲出去落到黎佢就話有條有少少力水嘅魚接餌，阿恆問佢駛唔駛開機拍片，佢仲話唔駛啦，又唔係大條，不過上到黎，點樣唔大條都叫做係條磅頭細鱗囉。阿濤見大餌好靜，我地又喺廿分鐘內上到兩條細鱗仔，都決定玩一陣波子壓底勾蝦仔，務求開齋之時順便搏下細鱗，不過之後就無再細鱗食餌了。

鏡頭一轉，講返阿丹個釣組，佢之前中極魚都係食底果門，我就同佢講話上面果幾門就算啦，底門中左魚就係上門解隻蝦落去勾返上去就得，反正都係食底門，不過釣釣下佢又由底門中魚進化到尾二果門中魚喎；咁佢補返隻蝦又再掟返落去繼續釣架啦，然之後呢個時候佢一落即有魚接餌，只見佢一抽魚，睇支魚竿就見到有少少重量，應該都係手板大細嘅魚咁啦，上到水一睇，原來係花頭梅黎！重點係佢仲要係食第二門勾，即係又再升一級呢，真係循序漸進呢，哈哈。望下隻錶，先至十點半，有兩三條魚仔壓下倉都好睇過得堆石狗嘅，不過之後果個鐘可能流水問題，連魚仔食餌都少左，咁安叔就叫大家繞繩，然後車過青衣油庫果面，睇下會唔會搵到鱲魚或者火點牙點之類釣下。

講返呢個釣點，呢幾年我大大話話釣左青馬一帶都不下十次，竟然從來都無黎過呢面作釣，今日終於黎到，希望會有個好印象啦。睇個釣場，都唔少碼頭柱位，即時換副手繩勾隻大眼仔落去，希望隻蝦會搵到些大魚攻擊，點知唔好話我同阿濤同安叔等勾頭餌嘅，其餘嘅人仔用細蝦都無任何食餌跡象。我地沿住油庫碼頭嘅樁位一路掃住釣，都係無料，跟住安叔就叫我地收繩車過友聯船廠果面繼續搵魚黎釣。咁我有朋友仔係船廠度做，即時短訊佢，點知條衰仔今日休息，仲話我地知呢度水域嘅魚唔鍾意食蝦，反而用池仔會得食好多。咁我地無池仔，都係要用蝦餌頂硬上啦，然後又真係一路都無食餌，掃到埋個大浮泡度，終於阿濤有一口唔到釣嘅食餌，收返上黎睇下就見到成隻大眼仔食剩個頭，絕對係立仔嘅食餌方式。阿恆仲講笑咁話阿濤次次都有一口唔到釣嘅食餌，然後基本佢可以收工咁。咁佢今日龜唔龜都仲有三四個鐘先知，但係呢度我地磨左個幾鐘一口魚都無就係不爭事實；釣到阿安叔都青哂咁問阿濤點算，可以點搞、可以去邊度搵魚釣。阿濤見大家都有點悶，就同安叔講只要離開呢度就好。咁安叔收叫大家繞繩，話試下車去欣澳、青洲灣果頭試下喎。時為一點。

咁我本身一路勾緊頭蝦，隻大眼仔仲鬼咁生猛，而家要轉位，梗係飛佢落生倉養住先，等到釣點時就有生猛大眼仔繼續用了。點知去到釣點，人人落餌、我都準備拎返隻大眼仔上黎之時，喂點解有重量嘅？再拎上黎一睇，原來頭先阿丹中果條花頭梅竟然吞左我隻大眼仔！真係生倉內仍然會食餌基本上我就淨係見過黃釘會咁做，而家又再多一個魚種記入史冊了。可見條花頭梅真係好好態又好肚餓，頭先阿丹一落餌佢已經即時接餌，而家係生倉又二度食餌，總之大細蝦都比佢食衡，佢都可謂死得抵返哂了今次。好啦，搞笑野就講完啦，但係過左黎呢面個釣況仍然無好轉，食餌都仍然係感覺到有好多勇猛小魚攻擊隻蝦但就無一下起到手抽魚果款。當然偶爾都會抽到一兩條，但係抽到的話都只係好細條，令人毫無戰意，釣到安叔都恰左陣眼訓。過多陣都毫無轉機，佢就叫我地收繩再車過少少去到倒扣灣個尖咀位，果度水淺但係因為兩邊水流互撞所以都幾急流，不過安叔隊得黎呢度，都可能有玄機嘅。流就幾急幾難釣，我就只係比較努力咁去試底避免勾石，安叔就中條狗仔。然後呢個時候就見到阿恆一落餌就有動作，見佢一抽再爽左兩下，一條良型火點就上左黎啦，而佢都話除左石狗外終於有條好少少嘅魚見得下人啦。跟住佢梗係即刻想再接再厲啦，但係落繩無耐就中左地球，同我一齊加入填海計劃了。釣多一陣，無料到之餘又難釣，安叔就叫我地繞繩，話車去汲水門橋一帶又試下睇下有咩可以釣到，不過都係毫無驚喜甚至話係悶場。

終於到左三點我地又再繞繩，安叔話要車返過對面青龍頭旭龍同怡龍別墅對開淺灘，搵下火點仔釣喎；但係呢度流水好急，一拋餌落去就發覺鉛勾已經飄到去艇尾好遠位置，到收返緊魚絲到垂直時又因為下面好鞋底而已經勾左石，真係算係難度挺高既釣場。我試左好幾次都不得要領，勾了幾次石，損失了幾粒鉛同勾，而且亦都見唔到其他人有咩進帳，於是學阿恆咁樣，黎個小休。我就邊吃魚柳包邊綁架生，不過我就決定轉釣頭蝦，因為我覺得雖然隻艇就一路順流咁往青龍灣、海瀧珀洋房果邊飄去，但係如果流水仍然係咁急而釣場都係咁多石咁鞋，咁樣我繼續用波子壓底都只會不斷重蹈覆轍，繼續勾石、綁勾，再勾石，再綁勾。而如果我勾頭蝦，到底即刻拉高少少由得隻生猛大眼仔係下面游，反而可能吸引到大魚之餘又大大減少左勾可嘅機會。諗通左之後我就即時揀左隻扎扎跳、好精靈嘅大眼仔，勾好頭之後就飛佢落水，到底之後搵返起淫半，而我賴腳其實只有一淫，咁樣計落都應該幾安全吧。阿丹咁啱問我用緊咩餌釣，我就同佢講左我嘅想法，話佢知而家水流仍然係咁急的話好難釣，反正蝦仔又唔係特別好景，我決定用我嘅想法去搏一搏。流水真係仍然幾急，不過起碼我就唔駛一到底就勾石，叫做起碼有個機會釣下魚先，我只要定時試一試底再即刻抽返起多少少就無問題。不過阿丹就繼續用馬騮吊頸釣組勾蝦仔作釣，仲比佢呢個時候中條狗棍添，而阿安叔就用蝦仔中條手板沙立仔。咁我咪講笑咁問安叔點解無魚釣架我地，點知安叔好好笑咁話，點會無魚，你睇下人地又有狗棍、呢度又有沙立，個海點會無魚喎。跟住我唯有答番句話咁我唔強求啦，不如比條青龍頭名物 – 法國馬友我玩下都好吖。

正當我用左大眼仔、混混噩噩左都唔夠五分鐘，呢個時候我忽然感覺到有一下好沉既力量就拉住我條魚絲，然後我自然地反射性動作一頂就感覺到條魚同我搏鬥啦；雖然佢個勢係幾沉，但係頂左兩下收左兩手，我都幾確定我可以將佢收伏，始終我唔係用緊幼繩，佢又唔係乜野巨物；唯一有壓力就係有兩個Youtuber係我旁邊睇住我釣，話哂第一次同佢地釣魚，最好唔好失威啦。頂多兩野，條魚仍然想還拖，我咪就下魚囉，阿恆就叫我唔駛心急，慢慢收，我仲講笑話我梗係慢慢啦，比你好好拍片丫嘛，然後因為條魚都不斷還拖我都要專心少少招呼佢，阿濤見我爽到咁，以為係咩大魚仲話可能係青班添，但係我就覺得唔似，更加唔會似係之前我地一路無魚中好悶時我講笑話悶到咁比條爛肉梳我都好嘅法國馬友；雖然水淺魚惡，但係頂多兩手兼慢慢收，都終於見到魚影，係紅色嘅，跟住揸住撈箕嘅安叔見到係紅魚仲要唔多大條，一野插個撈箕兜完條魚就「o趙」左我一聲，好似笑緊我玩條魚仔都玩咁耐又玩到好似大大條魚咁。我即時笑笑口咁話：咪嘘我啦，雖然係下價紅魚，但係以今日呢個逆境釣況黎講，能夠中返條撈箕魚已經算係安慰獎啦。阿恆見狀就笑阿濤話「人揸人餌你揸大餌，你釣到乜？話時話你今日開左齋未？」哈哈，而阿濤都好搞笑咁話佢而家每次釣魚都會帶住一支棍仔，功能就係同黑超特警組入面果兩位特警用嘅一樣，就係要黎抹去記憶的，只要果日一打龜無料到，就即刻用支棍仔掃一下自己，即時可以唔記得自己有去過釣魚一樣，當做什麼事情都無發生過一樣咁，哈哈哈。點都好啦，既然中魚，快快趣影完相即刻勾多隻大眼仔落去繼續釣，希望可以執多一條半條；順便睇下手機，時為三點四十分。距離四點鐘轉流仲有二十分鐘，真係要好好把握。

安叔見狀，都換番勾頭蝦作釣，希望可以標個尾會，不過我同佢都未有食餌；而今朝做左石狗小王子既艾力呢個時候都無乜石狗中到喎，而睇流水就開始又點減慢嘅跡象，黎睇真係就到流尾了。時間一分一秒咁過去，我就邊釣邊望下其他人嘅情況，只見突然阿竿支竿頭跳左幾下就一野沉左落去然後阿丹一抽，支竿即時展現出一條美麗的弧線，係竿腰頂魚嘅弧度呀！阿華見到就話阿丹支竿頭係咁跳喎，我話唔係啦，阿丹頂緊魚條魚掙扎咁咪竿腰彎、竿頭跳囉，然後阿濤就拎住個撈箕走埋去阿丹去邊，等條魚一浦頭，就兜頭插個撈箕落去，又一條紅魚上水，雖然比我剛剛果條細少少，但係事後過磅都有一斤四兩；最緊要係佢雖然唔算大條，但係阿丹都話條魚由食餌果一刻已經交足貨，跟住都係咁衝係咁掙扎，而阿丹支竿係比佢以前用開果支減左火力，所以雖然遠遠唔夠佢果次初試藍旗遇著紅 https://yy08.pixnet.net/blog/post/106406620 中嘅果條三斤紅魚，但係今次仍然玩味十足，過足手癮。幫佢拍完片順便睇下時間，三點五十三分，仲有幾分鐘就轉流了，不過餘下時間都無紅魚食餌了。

流水減慢，魚訊都應該再減少了，除了揸大餌嘅唔講啦，釣蝦仔嘅都無乜食餌啦，不過大家都係保持平常心咁繼續釣，反正成班人嘻嘻哈哈咁吹水真係幾開心，安叔都愈吹愈有趣，自己完全樂在其中，大家也都不時笑到傻。吹吹下，忽然華仔有魚食餌，睇佢支竿頭沉得比今日一般中嘅魚都要沉，佢自己都話感覺到條魚比之前嘅會大條小小；上到水面一睇，嘩，高級食材，手板芝麻班仔一條；佢就話再大條小小就可以比阿媽另眼相看，唔會再睇小佢次次去釣魚都只係帶些魚仔返屋企，我話咁你加油要釣多些，跟多些濤師兄佢地出去啦，好快就可以令到媽媽刮目相看了哈哈。佢中完條魚都話係今日埋齋魚了，不過呢最後埋齋既就係阿恆，佢過多幾分鐘就中多條小狗；雖然安叔話釣多五分鐘後收工，但係最後都無人再中魚了，而我地今日嘅我和男神於青馬有個約會已經黎到尾聲了。繞繩，執野，車返埋深井碼頭果邊撈魚，裝魚，然後就同安叔講再見，上到岸我地再秤下魚同埋影下相，再黎個賽後檢討之後，大家就正式走人了。

今日能夠同到釣魚Youtuber一齊出海釣魚認真夢幻，而除左阿丹之外大家其實都係第一次一齊釣魚，但係可能由於志同道合、有共同語言話題，所以大家整天都被歡樂聲包圍住。雖然釣況一般啦，因為今日係生流日子，青馬有好多位都因流水湍急嘅關係而釣唔到，但係能夠出到黎大家一齊釣魚已經好開心；而我亦都好好彩地係咁一般嘅釣況之下有兩口魚玩下，仲要用竿又中到，手繩又中到，兩樣都有得爽，仲可以比我試到我支竿中撈箕魚嘅感覺，認真感恩；希望下次可以好快咁又同到男神出海釣魚啦，始終我真係好想睇到一條自己身歷其景，置身其中嘅釣魚影片呢！！

青龍頭碼頭集合