當紫羅蘭吊鐘遇上潭崗野豬

路線: 香港仔快樂茶檔-> 黃泥涌水塘公園-> 大潭郊遊徑-> 衛奕信徑第一段-> 紫羅蘭山-> 沿衛徑到孖崗橋-> 淺水灣坳-> 大潭中水塘段-> 大潭中水塘水壩-> 大潭篤水塘石橋-> 大潭水塘道-> 港島徑第六段 -> 潭崗飛瀑-> 港島徑轉小路上野豬徑-> 港島林道美景路段-> 轉小路落大潭道->筲箕灣東大街
登山之友: 大表妹、細表妹、YY

是咁的，話說早兩個星期大表妹因為最近疫情關係沒有其他運動做而加入了我和細表妹的行山小隊而初嘗一趟獅子山後發覺可以繼續參與郊遊。而又因為佢上次還未買適合的越野運動鞋而走得甚為不舒服，於是我就替她去物色適合初階者的鞋子，而最後也順利買到了。而既然有了新「玩具」，正如釣魚買了新魚竿而好想即刻出發去釣魚一樣；因為買了新鞋當然就想去試一下它在山上的適合度和舒適度呢。於是我地就約定了呢個週末要好好去郊遊一番，當然除了因為大表妹是較新手之外、細表妹也因為上午有時而只可中午才能起行，所以我地最後決定選一條較為簡短的路線；而由於呢排到農曆新年前都係欣賞吊鐘花嘅季節，咁我地當然就係揀選一些出名有得睇吊鐘花嘅路線黎行啦。雖然大枕蓋係比較熱門嘅地點，但係又於位於西貢，因此不適宜我地今日既半日、新手行。揀下揀下我都係決定揀返位於港島區、又唔算難行嘅紫羅蘭山去睇吊鐘花；餘下既問題就係點樣設計埋其餘嘅路線呢？諗起紫羅蘭山下大潭附近就有一條比較少人會去但又幾靚的小瀑布-潭崗飛瀑，而再走多一兩公里就可以去到另一個我相信細表妹也未去過但又會有興趣的野豬徑，絕對迎合哂佢地嘅素求：吊鐘花、人較少、唔太難又唔太長；於是同佢地提議，而佢地又無乜異議，於是就相約在香港仔先食完晏再坐車上黃泥涌水塘公園那裡開始路程。

食完晏買完補給品再坐得車上得水塘公園黎都已經成三點鐘了，所以我都同左表妹們講話容易的路程就盡量提速，無乜必要的景色就輕鬆影一兩張或者索性跳過，只專注於我地今日三大境點就可以用較多時間去影相。由於今日係週末假期，所以郊遊人士絡繹不絕，相信有不少都為吊鐘花而來。吊鐘花不用在山頂處就可以找到，所以走上登山小徑無耐沿途已經見到不少遊人在為吊鐘花而打卡；我就著表妹們去「辦事」，而我則選擇離開人堆，獨個兒一口氣走完大約二百米的路段直到山頂標高處。但紫羅蘭山頂這兒也是人山人海，等得到表妹們上來拍一兩張照、喝一兩口水我們又再繼續前進，這邊景色確實不錯，可以俯瞰大潭水塘、和另一邊遠眺南丫島等地，不過我都黎過很多遍了，所以都是稍為拍一兩張就繼續上路，因為要維持我地嘅趕路守則，希望可以日落前走完另外兩大景點而且能在天黑之前走完全程。

落山這段相對輕鬆，走著走著就來到了登孖崗天梯前的地標紫崗橋了，當然今次我地就唔會上天梯，而是選擇旁邊的路、沿住大潭中水塘邊一直走、前往大潭篤水塘水壩。這段路挺輕鬆的，都是較為平坦的小徑路，所以我們都提速而行。途中較為有趣的是當我們過了一些小石橋位時遇上一些「假日郊遊家庭組」，帶頭的是一位爸爸吧，他走得很謹慎的並加很多形容語句去提醒後面他的親友，而其實我們三個只是好輕鬆都能走過的平路而已。阿表妹仲話聽到相信是那位爸爸的姐姐說「嘩比阿森姆講到我地都緊張哂，但其實路都唔係算好難行呢」時我真係忍唔住笑左出黎。點都好，我地爬左佢地頭之後就一路走到去水壩，本來想係度飲下水食下野補給一下，但係細表妹為左我地可以追上進度，所以半開玩笑咁話到左瀑布先食野，就係咁樣我地打左兩張卡，水沾濕一下個口我地又再繼續前進了。接下來的一小段路可算是全段最悶的路 - 大潭水塘道路段，是一段緩緩向上的石屎路，仲要係無乜風景可言，更加唔好講話咩美景了。望下個鐘已經過了五點了，更加要提速，所以就急步的一直走，好快走來到了接往港島徑的分岔口了。由於細表妹之前已經來過潭崗飛瀑，所以接下來的路都是她走在最前帶路、我在後用手機軟件加定位來確認。走了一會我地來到了一個本身貌似幾隱閉、但相信因為已經愈來愈多人知道而漁護處只好加了一個「危險路段、切勿前進」、和「切勿污染水源」的指示牌。咁樣令我地更加肯定我地要找的小徑切入點就係呢度了。根據軟件指示，呢段到達潭崗飛瀑的路段是屬於「灰色路段」、即難度比「啡色路段」來的更高的路段，不過細表妹就話其實呢段路都唔算好難，係有一兩個位可能要手腳並用咁，而且很短，大約五分鐘就能抵達瀑布，所以即使大表妹是首次行這些路況，我們也很順利就能到達。

很諷刺的是，瀑布前這裡被加了封條，相信是想禁止遊人游水污染水源和產生危險和意外吧。點都好，終於黎到第二個計劃之內的打卡地點，當然要好好的影個夠啦，最重要係我地終於可以食野了，哈哈。係度影夠食夠之後，我地其實都要繼續趕路了，因為如果再唔趕路，除左日落前去唔到最後一個打卡點野豬徑瘋狂打卡，而且我地仲要在天黑的情況下落山走回大路呢。呢一點係我同細表妹都唔係幾想的，因為大表妹行山經驗尚淺，雖然路段唔算係太難，但都想一切事件都在安全的情況下進行。於是我地又在繼續前進了。

從瀑布底走回大路再走幾步我地經過瀑頂，本身諗住經過就算，但係見個天色幾靚，都係忍唔住手要走出去影番幾張相。喺三星新手機的味精加持下，本來沒有很鮮色的景色都被拍得十分漂亮，再加上這時太陽剛好反射到石上的小水氹，拍出來的效果更加是令人意想不到。由於係度又用左好幾分鐘，對於爭取日光時間嘅我地黎講即係又要再度提速前行，而且這段港島徑也沒有什麼難走之處，所以我們都是急步走著。但還好的是我有一直開著手機軟件定位，因為走著走著我才發覺我們是錯過了應該離開港島徑而接上野豬徑的分岔口。於是我們只好往回走，此時才找到一個要不手機軟件指示就一定會錯過的小路口了。因為按軟件顯示這段路是「啡色路段」，但從入口到往裡面看都像是「灰色路段」呢！細表妹怕我們趕不及時間上山及下山，再次問我，我話我都未黎過架，不過軟件指示就係啡色囉，你地覺得趕唔到就留番下次，今次先行住港島徑囉，總之安全為上嘛。不過最後大家都決定既然來到，而且也不是「灰路」，一於繼續前進吧。

不過我相信呢條路對新手黎講又算係有點點難度嘅，我同細表妹都覺佢作為「啡路」都應該算係去到接近難度頂點的啡路了，不過也不算太難、只不過天色比較暗、我地又要趕路的關係所以感覺上更加難度提升左咁。路段就是一路攀升高度而且都是在樹林內的山徑、夾雜住不少樹根在地上，所以手腳並用之餘都要小心腳下以免絆倒。我就一路睇住軟件一路帶頭開路，因為雖然唔駛爆林但有時路況都不太容易辨認出最容易落腳走的位置。而為了提升士氣，每過一條等高線我就會話比大家知我地又行多左二十米，距離山頂即是又少了二十米了，哈哈。一路係咁上，天色其實都愈來愈暗，太陽其實都已經落緊，所以我地更加要把握時間。走過了那堆樹林路之後我地就進入了一段叢林路，這裡的草高度及腰，而且都把前路遮到，偏偏我之前下午因為天氣較熱所以都怕長袖衫褲的那截都脫掉，所以走起上黎都有點刮手刮腳的，幸好都只是普通野草，所以又未至於「損手爛腳」的。終於一直走呀走，終於如細表妹所言我們終於看到了標高處，即是代表我們已經到達了是日最後一個打卡點野豬徑的山頂了！雖然已經錯過了日落時間，但景色還是很美，我們襯太陽還在水平線之上、還有光的反射時都盡情的拍照。大表妹就笑笑口話好靚呀不過下次我就未必會再黎了。睇黎，佢對呢個難度有點微言咁喎，哈哈。

打卡過後我地就從山徑另一邊離開，嘩，很快的我們已經從啡路走回港島林道的石屎路段了，再走多一少會我們就黎到了一個分岔路口，果度有幾條唔同嘅路都可以落到大潭道咁樣我地就可以坐車離開了。本身我就揀選了一天比較長一點但落生幅度較緩和、而且終點就是一個巴士站的路線來走；但由於天色呢個時候其實都已經黑了，所以細表妹就提議我地揀一個能夠以最短時間接到大潭道的路線，於是我地就揀左一另一條路、都是石級樓梯的小徑往下走去了。這時我們都把手機拿出來開了電筒功能來用，沒辦法，通常我都會帶真的電筒和頭燈，尤其同細表妹郊遊左幾次每次都係玩到天黑先走，但係今次我諗住同阿大表妹黎玩應該唔會玩到咁盡的所以就出門時候都把燈收起來了，這算是一個失策呢。點都好，大家開著手機電筒慢慢走，不到十分鐘我們就終於到達了屬於是車路的大潭道了。

來到大潭道我們本身以為只要找到車站就能完結是日旅程，點知道呢一個出口的大潭道段都是沒有行人路可以走的，所以我們根本走不到我們本身想去的終點的那個巴士站！所以能夠離開的交通工具就只有小巴和的士。本身想搭小巴的，但連續好幾架經過的小巴都是滿載的，所以我們開始也有了打的嘅念頭。於是大表妹就打去的士電台找的士，可是的士大哥一定要我們給出確實的地址位置，然而我們這裡卻只是馬路旁邊的一小段行人路，所以根本唔知道點話比阿的士大哥知，因此的士大哥也拒絕接單。正當我們有點徬徨的時候，這時有架小巴因見到我們而自動停下來了，而剛巧就是只有三個座位剩下，彷彿就是專門為了駛過來接我們走的呢。就係咁樣，我地終於上到車然後就回到了市區了。由於疫情限定沒有了晚市堂食，所以我們只好到附近的東大街去找一些街頭小食滿足一下口福然後就正式完結今日大表妹買了山鞋之後初試啼聲嘅郊遊之旅了。希望佢可以提升一下郊遊嘅興趣多點加入我地既旅程啦。

黃泥涌水塘公園