狗牙虎吼小鳥遊

路線: 東涌市中心-> 水口村-> 水口燒烤區-> 引水道-> 中狗牙坑-> 虎吼石河-> 狗牙嶺-> 一線生機-> 閻王壁-> 小鳥回頭石-> 斬柴坳-> 鳳凰徑3段 -> 心經簡林-> 昂坪-> 東涌市中心-> 比薩快線

登山之友: 超級嘻嘻、細表妹、YY

是咁的，自從 天書壁 一役之後，大家一路都各有各忙，終於約到時間我地就又再出發了。今次我地想稍稍提升一點難度，就在蚺蛇尖與狗牙嶺之間我地選擇左後者，主要原因係唔想週末日子去西貢範圍，感覺會好多人，雖然佢地係入去玩水，但係交流真係搞唔掂，所以決定閒日先去。我地吸收左上次行天書壁既教訓就係無論幾早出門口都會玩到天黑，所以今次我地醒啦，一於食埋晏晝先開始行，慢慢玩完上到山上面遇著好天氣的話仲可以欣賞埋日落之至走，如果天色一般既就行快少少咁樣，總之就點都比玩足全日無咁消耗大仲要早起身咁辛苦。嗯，聽落都知道係一個可靠之選啦。

十一點半香港站集合再一齊坐東涌線去到東涌，跟住大家就先去食個簡便午餐，然後再例牌地去華御結買飯團做補給，跟住我地就去的士站，諗住打的去到是日起點水口村。可惜去到的士站，的士就唔見有多架，但係人就排左十來個，企左一陣我地都覺得好似無乜機會等到的士，嘗試用手機程式叫的士亦都無果，於是我地只好過巴士站坐巴士了。還好週末大嶼山巴士都唔算疏車，所以我地好快就上到巴士，坐左大約半個鐘我地就黎到水口村了。以前來水口村多數都係中秋前後和親戚朋友過來這邊挖蜆燒烤宿營，不過今日就唔係往海邊走而係往山上去。

上山前先在巴士站旁的涼亭上裝，跟住我地就沿住大路走，來到了與鳳徑十段接上的路口就走了一小段鳳徑，然後來到了水口燒烤區，由於都已經成點幾兩點，除左真係三牙全走已經行完第一輪的，又或者只打算行一條狗牙、或者跟我們一樣只打算走虎吼石河一段的會在這時候還在這裡，所以基本係唔會見到任何其他山友了。不過我地就係涼亭見到一位叔叔，佢剛走完一轉狗牙，不過佢話腿有點小抽筋，所以決定無謂勉強，打算係度抖一陣就出去坐車走人。我地同佢道別左之後就繼續上路，走了兩分鐘就來到了今日行嘅路線既起點地標的引水道分岔口；跨過了圍欄就是中狗牙坑的路了。由呢度開始係一百米，總之上到一線生機就係六百，換而言之我地將會在山坑同石河同埋山路中玩夠5百米就會去到狗牙嶺上的一線生機了。

沿住小引水道走就會開始入林，然後我地就見到需要攀爬的小石壁了，上完小石壁又是繼續沿住河床走著，總之都是在中狗牙坑入面沿河床而行，見到石壁就爬，見到石塊就爬，行到攰就搵塊稍為大嘅石塊坐住休息一陣就繼續上路。行左個半鐘多少少，我地終於從密林路段走了出來，隨著見到的就是很多碎石，亦即代表我地已經來到了虎吼石河了。初段的石河還是不時會有樹林位，所以那種開揚廣闊宏偉之感、網絡上見到好有氣勢嘅位置應該仲需要再行多陣先可以到達。終於沿住碎石塊往上小心的走多十來分鐘，我地終於黎到了那個聞名而久，氣勢磅礡的、全石的石河位置了。既然黎到呢度，梗係要好好享受美景，所以我就揀左一塊較為穩固而又大點的牙頭坐起來，然後拿出飯團來吃了。呢度雖然無遮蔭，但係因為夠開揚又有點風，所以也很舒服，一點翳焗感都沒有。再者，因為行到上黎呢度已經4點幾了，所以都過左最曬既時候了，所以我覺得今日個日程同出發時間係非常之配合的。午間最曬的時分我們就在狗牙坑中的密林入面走著、避開了熾熱的陽光；之後到無咁曬既時候我們就從林中走出來欣賞大景，真係配合得啱啱好。喺我地休息既其間，我地遇到是日第二位，亦係自進入狗牙坑以來的第一位山友。呢位哥哥仔自己一個人從石河底向上的爬著，咁我地見狀，就問佢駛唔駛幫佢影下相打個卡留念。佢就叫我地幫佢拍下短片咁樣，而我們也順便聊多幾句，佢就話佢上星期就黎到玩左狗牙嶺另外的路線，今日黎就係玩虎吼石河，然後經斬柴坳再去昂坪走人，路線即係同我地一樣。同佢吹多兩句佢就繼續起行了，而我地則係度繼續影下相打多陣卡先再慢慢往上前進。

離開左石河之後再往上走我們就來到了狗牙嶺，只要沿住山徑繼續走就會到達我地今日其中一個最出名嘅景點一線生機了。不要以為走完虎吼石河就行完今日最辛苦踲路段，其實石河走出來的這一段我覺得也不比石河輕鬆，可能因為呢度係開揚空曠，那種壓迫感係比在石河以及狗牙坑密林為大。再往上又爬又行咁多走一段路，我地終於黎到「一線生機」了！老實講，由我地呢面走過西狗牙對面是比從對面走過來較為容易，原理都係一樣，就係那種視覺上開揚的心理壓力了。我地呢面走落去其實唔會太有那種恐懼的感覺，但係如果由西狗牙果面走過來往上爬感覺上會係會驚險一些。不過對於那些行山老手當然這裡其實是小菜一碟，而個人感覺這裡其實也不算險和難，只是那些網上視頻和博客誇張了的來說去搏取眼球和點擊的技倆來；當然，佢地作為公眾的版面，提醒遊人注意安全，這裡是險地也是無可厚非，但要說這裡是什麼香港險峰就真是誇大了呢。在我們旁邊的叔叔大媽們更是忘我的在石上擺出各種姿勢去打卡呢，哈哈。

由於超級已經來過，當然就由佢帶頭先走這個一線生機啦，一來有示範的意味，但更重要的是讓他先過去就可以為我同表妹拍照和視頻留念，哈哈哈。超級過了去之後就輪到表妹，阿表妹攀爬同山藝技巧不錯，但她卻有點選擇困難症，在有幾個可供的選擇時，往往可能會做出一些我和超級會認為是較難或另有更好的選擇。而喺過呢個一線生機時，她亦「一如以往」的再次選擇了一些較另類的踏腳位，不過都係果句啦，「佢係攀石架嘛」，所以無問題啦，都係輕輕鬆鬆就走過了「險位」。跟住就輪到我了，雖然望落去都唔算危險，不過既然右邊是懸崖，我都小小心心的一步一步往下踩。唙呢度再次提醒各位大大，雖然一線生機係有上鐵鍊，但係都真係不要盡信這些由好心山友自行設置的輔助設備。畢竟質最如何是沒有保險的，所以能夠不用這些繩呀、鍊呀，就盡量都不要用吧。小心的一步一步往下踏，我亦都好快的走過了這個「一線生機」了。然後我們決定在西狗牙之巔繼續打卡和休息。其實呢度先係影一線生機最靚既位置，而且影其他景色亦都很出色，很多山系女生都會在西狗牙打卡放上網的。本來我都想係度大影特影，不過今天看來是沒可能了；因為當我們上了狗牙嶺之後就其實已經見到雲霧入山了，即是雲霧已經聚集在這個高度為更這，所以當我們身處在這個高度以上的位置時，望落去其實都只係白茫茫咁樣呢。影唔到西狗牙一帶的大景，我們只好影返一線生機。當表妹、同我拍照的時候，天色都是一般，而且還帶點雲霧，但係到超級拍照時，雲霧卻突然消散了一刻，所以我為他拍的那幾張照片，都沒有雲霧而只有藍天、都比我們自己的照片格外漂亮，所以我們就為他起了個外號叫做藍天寶寶呢。打卡及休息過後我們又要再度上路了，因為呢個時候已經差不多六點了，而我們其實還有一段不短的路要走，而且其實根據超級所言，一線生機上閻王壁到斬柴坳這段其實比起剛才的路段其實不但輕鬆不了多少，可能仲會在體力上消耗更多一點；所以我地都要預返一定時間去行，盡量就唔好天黑還要在這些相對困難的路段呢。

離開一線生機我地繼續趕路了，這裡就是一直往上爬的閻王壁了。這裡都是一些往上的山路大斜坡。難度其實唔係真係高，但係體力消耗卻是有，但係我地都係一步一步的往上爬；而由於四周圍都是雲霧，所以我地只有不斷埋頭的前進。走了大半個鐘，我們終於都走完了閻王壁，來到了斬柴坳下方的小烏回頭石。這塊石真的很像有一隻小鳥站在大石上呢，至於「牠」頭向的方向，則是有各自的解讀。由於周圍景色都被雲霧所遮蓋，匈匈拍過照後我地就繼續往斬柴坳走去了。黎到了斬柴坳我竟然化作了藍天寶寶，在本身都是雲霧的情況下，忽然得到了幾秒中的清朗陽光時間；還好超級替我捕捉了這個黃昏日落的時光，也算是一個意外的驚喜。

然後我們在斬柴坳就看到了著名的「不可能路標指示牌」；為什麼它會有這個稱號呢？就是因為它標示著說從這裡行山往昂坪是距離一公里、而所需的時間只需要半小時。而超級也說著這是基本上不現實的事，除非是一直跑著下山的步幅和速度；但如果只是一直按照平常行山走路的速度來看，半個小時真的是沒可能的事。我地沿住那些闊又高、令人沮喪的石級樓梯往下走，而結果半個鐘頭之後我地只係黎到了心經簡林而不是終點的昂坪。本身因為都見天都黑了，而只打算在心經簡林旁的「鳳凰觀日」打個卡就走人，殊不知用了三星味精手機的拍攝功能之後，照片的效果可好多了，於是我地就影多幾張才繼續上路去走是日旅程最後的一小段路了。

一路沿住路向前行，我地都係度研究緊時間上夠唔夠趕得上尾班巴士往東涌，又或者容唔容易截到的士，點知行到出大路口即青年旅舍對開時，竟然見到有架的士喺度等緊，咁我地就梗係睇下佢係等緊人定黠啦，跟住阿司機就話可以載我地，話佢本身有客叫佢黎，但等左成三、四個字都唔見人；我地本來覺得「中途攔截」好似好衰咁，不過阿的哥都話等左好耐都唔見人、二來我地都怕趕唔到尾班車而出面又無的士，所以擾攘一番之後我地最後都係上左的士，直奔東涌去。的士大哥非常健談、亦很有趣，除了問我地剛才行咩山之外，又講到自己平時放假都會行山，但又唔敢行些比較困難路段；就問我地行一線生機呀、蚺蛇尖呀咁會唔會難呀、跣呀咁。不過最好笑都係講起佢行山時，出發得比較晚，去到山頂時佢地都只係諗住打張卡就走人，但係就見到三個年青人仲係度準備開餐咁既款，佢問班年青人唔怕天黑行山定趕得切在天黑前到達目的地嗎，然後年青人就答佢地話真係搞唔掂咪搵飛行服務隊囉。跟住阿的哥就講笑話，到我地落到山時又真係見到有直升機係山頭上面飛過，可能真係果幾個後生仔喎，啊，早知我地兩個人都搭單一齊坐順風機啦。真係笑到我地三個反肚。

一路傾下笑下，時間過得好快，我地8點前已經黎到了東涌。時間比上次行天書壁時返到黎東涌要早。食野就一定夠時間架啦，而既然仲有時間，一於行下商場的特賣商店才吃飯吧。而購物完之後我地就去食飯了。上次由於間關係而在店門口就比攔著的我們，今次終於進得了店，可以食到披薩了！阿表妹終於不用擔心沒得吃了，而我亦終於可以吃上了一直講住話要食嘅披薩了，可說是「還了心願」，哈哈。飲飽食醉之後我地就去坐車返回市區，而今日嘅虎吼石河難度小提升之旅亦都平安落幕了。而我地喺車上就已經研究緊下一次嘅路線選擇，畢竟，真係要趁阿超級離開之前盡量帶住我地行多一點帶有難度又好玩的路線呢。希望我地仨人小隊可以好快又可以出發啦！

水口出發

引水道入口 - 中狗牙坑