彎曲石河上尋覓仙人

路線: 西貢市中心-> 南山村-> 菠蘿輋路-> 彎曲坑-> 香蕉蘭石河-> 企板石河-> 仙人石河-> 仙人點將台-> 彎曲山-> 大金鐘-> 昂平觀景台-> 馬鞍山郊遊徑 -> 馬鞍山村山頂-> 馬鞍山燒烤地點-> 信義新村-> 新港城中心->大圍合發海鮮飯店
登山之友: 超級嘻嘻、細表妹、YY

是咁的，自從狗牙虎吼小鳥遊 https://yy08.pixnet.net/blog/post/106491787 之後，證明左我同表妹都算跟得上超級嘅節奏，而且最緊已經進入左夏天既天氣，所以玩得短少少但係有好玩路段更係我地嘅取態。不過程度始終有差，所以喺超級佢嘅「要行路線列表」裡頭我地今次揀左今年近年山界幾熱下嘅彎曲山，再加埋超級點名要去嘅仙人點將台，睇下路線，大約十一、二公里，而且後段只係輕鬆睇景路線，絕對啱哂呢個時分玩呢。

根據以往經驗，無論係約幾點起行，有幾早出發，我地都係會玩到天黑，所以真係無謂辛苦自己咁早起身；再加上我地今次條路線都係好似上次咁樣：初段就係先入坑爆下林，然之後再行下石河跟住先上山頂，所以中午食完晏出發就岩哂了，最曬時份就讓我們在坑林入面渡過，然後等我地重見天日、行得出來石河、重出得山上景點享受陽光時都已經下午茶時段，然後再悠閒咁行住走人時就可以睇埋日落，真係完美嘅計劃呢。

既然打算大約一點開始行，算上交通同埋食晏時間，所以我地約左十一點喺彩虹地鐵站集合。揀得彩虹埰鐵站，我就係打算去翻上次嘻嘻嘻重新出發走東洋賞飛鵝 https://yy08.pixnet.net/blog/post/106441624 同嘻嘻三寶一齊食晏嘅果間港式冰室食野，就係鍾意佢果浸地道又港式嘅味道。食完晏去坐車，本來週末入西貢嘅交通應該好多人，不過我地都已經中午，要入去玩水嘅人都已經一早出發了，而行山嘅人又唔會多，所以我地基本上唔駛點排隊就已經上到小巴入西貢了。

入到西貢市中心做左補給我地就起行了，我地沿住沙角尾路一直行，黎到了南山新村。呢個時候灑起了一陣驟雨，其實咁樣仲好啦，落左浸雨，無咁熱，而且而家落左先總比我地在山上行走時落雨無咁狼狽，同埋陣間上到山天色咪會係靚天囉，哈哈。就係避雨嘅時候我地就係鄉公所隔離個亭度上裝、搽太陽油同埋噴定冰感噴霧。與此同時我地呢個時候見到係有小巴可以上到黎呢度，跟住我地就呻笨啦，早知坐小巴啦，可以行少成半個鐘呢；不過既然都已經行左，咁就繼續上路囉。

行左一陣，終於黎到係去彎曲坑入口嘅路徑了，嘩，真係不得了。咩事？咪就係個入口已經係成塊蜘蛛網同埋有幾隻蜘蛛係上面囉，即刻隨手執左支樹枝撥開佢然後向裡面前進。但係可能真係呢個天時無乜人行，加上呢度又係樹林又陰又有濕位，所以就算比人撥完消滅完，相信蜘蛛大哥們不出一兩日已經可以再度結出一張張嘅新網了。所以行多一兩分鐘我已經同阿表妹講話要帶返對手套以備「不時之需」，並同時執左兩支樹枝用來開路。本來就我行前嘅，但由於唔熟路，所以都係交返比超級做開路先鋒，咁所以佢就同時變左做消蛛人。以我亦拎多一支樹枝殿後，以防佢有漏網之蜘時我都可以幫阿表妹同我自己撥開佢地前進。雖然身在坑林中有遮蔭，不過天氣著實係熱，再加上沿途都係不斷開路，尤其見到超級好似玩緊三國無雙咁不停要揮動兩枝武器，可想而之額外要消耗多少體力，所以我地前進嘅速度可謂緩慢。再加上有唔少青苔，所以我地行起上黎都要特別注意同小心。另外，平時行這些路都係條路見到就任行，但係由於要避開蜘蛛網，所以基本上我地三個都係行埋一樣既路線呢。

一路喺坑入面行呀行咁行左大半個鐘我地終於去到有些位置係稍為有段空曠位，於是就係度叉電補給。小休過後我地又繼續往上走，行左幾分鐘我地又要入返林入面繼續「食蜘蛛網」。不過還好呢一段路又唔係維持左好耐，行多陣我地終於就見到有「出口」了，離開林蔭位走出來就係一條石河，呢條石河望上去就比上次行嘅虎吼石河細規模，不過係石河中間我地就見到有一堆堆植物，斷估就應該係香蕉蘭了，如果唔係呢條石河都未必會被稱為香蕉蘭石河啦！黎到石河，咁啱又有樹蔭位，梗係休息時間啦。望住西貢漂亮嘅景色，再睇一下頭先大約起步嘅南山村，然後再拎個華御結，無錯，上山啪華御結基本上已經成為我地行山小隊嘅指定動作，哈哈。休息過後，繼續上路。

呢頭講話條香蕉蘭石河好短，行左一陣就已經入返林，原來行多幾步隔離又係另一條石河，呢度平頭先條石河好走一點，石塊無咁碎，繼續向上爬，真係要收返之前話石河好短既說話。因為無錯香蕉蘭石河係唔長，但係要去到仙人點將台卻係要連走香蕉蘭、企板、同仙人三條石河；就係咁樣係石河，同林中玩多半個鐘我地終於望到了仙人點將台。喺呢度我地終於見到了山友，原來大熱天時都仲有人行山爆林架，哈哈。等佢地打卡既時間當然又係我進行補給嘅時間啦，一路走到上來都真係幾攰啦，有段時間我無體力時真係靜哂，阿表妹都話完全兩個人黎；一食完野我又再次生龍活虎，嘴巴說不停。所以趁山友係度打卡我就梗係繼續補給啦，畢竟上山就係為左食丫嘛。終於山友們走了，輪到我地去打卡，但係呢度個位其實係要在石河向點將台影過去先靚，所以我就同超級、表妹講話你地續個過去先，我留係度幫你地影，到你地影完就我過去然後你地一個返來幫我影就得架啦。就係咁樣，超級當然就係做先峰啦。佢地兩個影完之後就到我過去，然後阿超級就過返來，不過佢亦都上埋隔離個小山頭，咁我當然幫佢打卡啦。係度玩完一大輪之後，我地就要往彎曲山頂走去。其實路就唔止一條，其一可以在仙人點將台果面繼續往上走，另一條路就係在仙人石河沿石河往上走。由於我地剛才打卡都將行李放在石河而爬過去仙人點將台，所以都要返來石河取行李，我唔想再爬返上去仙人點將台果度了，所以就選擇左由石河而上。行多十零分鐘我地終於離開了石河，走到山徑路來了，就係咁樣我地今日最「有難度」嘅路程就已經全部走完了。喺呢度我地遇到兩位由彎曲山過過來的叔叔嬸嬸，佢地打算由呢度往下走向仙人點將台影下相；不過佢地好明顯係老手，叔叔問我地係邊邊行上黎，有無係巨灞果邊玩，佢話由果邊上的話會好玩一些，建議我地下次有機會的話可以試一下咁喎。佢地跟住就行左落去，而我地係度打左幾張卡後，就往彎曲山頂走去。

並未有再剛才位置影太多相係因為呢度影彎曲山角度唔太靚，而在彎曲山頂影其實都仲爭一點，反而落返少少影係會更加好睇。真係要感謝上天，我地呢段時間竟然又唔落雨，又唔太霧，想點影都得，真係非常之靚同埋舒服。由於今日都好夠皮，所以我地就唔再往馬鞍山上面玩有難度路線，而係過去大金鐘果邊攻下頂、影下相就算。不過由麥徑個分岔口到攻頂都有成一百米要攀升，所以行得都幾索架。呢個時候怕熱嘅表妹就係背囊度拎左個小風扇出來夾左係個背囊嘅肩帶度，手都慳返，一路上山一路吹風扇，認真舒服。終於行下行下又黎到山頂了，呢度有今日我地唯一會見到嘅標高柱，然後來到時有一班叔叔姨姨係度玩航拍，佢地一人一架，玩得好不開心。影影下，明明一路我地行足全日都無霧霞，跟住上到黎呢度就慢慢見到一浸浸霧氣吹過來，跟住我地基本上都望唔返彎曲山果面了，真係好彩我地頭先係彎曲山時天朗氣清，影條彎曲山地標又清，遠影大金鐘又清。不過上到黎見到霧霞都唔係太差，因為我地竟然可以在這霧霞中看見彩虹！不過因為風速都算快，連霧霞嘅移動速度都幾快，所以如果見到彩虹時先拎部手機出來再拍照，往往就已經來不及了；亦因為咁樣，我地連續幾次錯失左影彩虹嘅時機。喺度休息嘅時候就梗係食野充電，就係充電其間終於有一次比我捕捉到彩虹，雖然影得一般，但總叫有貨交了。跟住航拍叔叔姨姨走了我地就係標高柱打卡，然後就下山往昂平大草原走去。藍天寶寶的確利害，一路下山時，我同表妹有幾張合照，背景都尚有微霧，但係當藍天寶寶一企埋去，即時影到幾張晴朗的大昂平，真的不得不覺得神奇呢。

打卡過後，雲霧又走返埋來，我地當然繼續上路，然後終於來到了昂平大草地，呢度都有唔少人係度露營；無他嘅，草原夠大夠平，而且景觀一流，絕對勾起我也想來這露營一晚的興致呢。係呢度望返上大金鐘也是一番風味，尤其呢個時候已經開始日落了，這份美又真的要感謝上天了，因為呢個時候也是天朗氣清、沒雨沒霧，只見金光都反射到平原和金鐘上，好不美麗！除左人仔，仲有牛牛，佢地都係草原無拘無束咁食草，遊人亦都係度安然睇日落同埋野餐、嘆咖啡，非常寫意。但係我地就要繼續趕路了，因為計返時間出到去馬鞍山都要走多個幾鐘，所以打卡過後我地就要加快腳步、提速起行了。

沿住馬鞍山郊遊徑和麥徑4段的共同路段向馬鞍山市走去，一直走呀走，看住天色就由黃昏日落到漸漸昏暗只剩餘霞，再到黑齊。然後途中亦見一對情侶再走著，顯然就是拍完昂平大草原美景趕著下山。來到了馬鞍山村山頂公廁附近，終於看見他們停下來，上了一輛房車，相信是走的受不了而電召的優步車。我地都笑著，心諗，點解而家先黎叫車，根本一早就應該叫車啦，咁樣女朋友仔就唔駛唔高興啦。而家咁樣，又要叫車又要被埋怨，何苦。不過我地就係繼續走路了，其實都唔算好耐，跟住我地都已經來到了燒烤場，係度稍定幾分鐘休息一下，我地再度起行，終於我地經過了信義新村之後，再沿著路走就到達了馬鞍山市中心了。不過由於馬鞍山又係一個出了名的美色沙漠，所以經過短暫相議之後我地決定坐車去到大圍開餐；而這裡我同超級之前已經同高高來過吃飯了，都叫做質素可以的。就係咁樣，我地今日嘅旅程就隨住飽餐於大圍的小炒雞粥排檔之後完滿結束了。希望好快我地又可以計劃下次的行程喇！

出發