激戰維港跑車歡送會

激戰維港跑車歡送會

日期: 09/24/2022
農曆: 八月二十九
地點: 維港西面一帶
艇家: 朗仔
釣友: 朗仔、朗爸、康哥、阿葉、YY
天氣: 初時晴、其後大驟雨、東南風4, 5級
水流: 慢流、水質一般
釣穫: 牛廣 x 2 (五斤半x 1、磅頭 x 1) 、細鱗 x 4 (斤半 x 2、斤裝 x 1、磅頭 x 1) 、黑沙 x 1 (斤裝x 1)、什魚幾斤，埋單十六、七斤

是咁的，話說早兩日同華仔落左嚟康哥隻艇釣，而最後黃金一小時阿朗仔比牛廣嘅粗暴式食餌咁強暴左兩次，再加上是次釣行將會係朗仔返英國前嘅最後一釣，所以佢早一晚問我行唔行時，諗都唔諗就即刻應該話好。咁佢就講話因為要走人、要同屋企人食飯所以要釣返條魚拎走做食飯魚咁喎。平時佢釣到都唔會點拎魚走，通常都分比隊友，所以今次開到聲要釣條魚拎走，決心真係好大。我都同佢講話當日我都要釣條食飯魚返去賀屋企人生日。不過佢走人緊要啲所以第一條靚魚跟佢，我就只好做小弟排第二咁囉。不過通常我地點都有返一兩條撈箕魚嘅，所以都無所謂啦。不過講真，有無魚都係咁釣架啦，所以平常心就夠。

由於早幾日阿朗斷左條牛廣，所以我今次決定都帶支竿出黎，去到牛廣位時就玩下假餌鐵板仔睇下會唔會有機會搏到一口半口。照舊約左9點上環落艇，早到左少少就綁定架餐，事關落艇之後車出去三兩分鐘就係釣點嘛，仲要睇左流水潮汐表今日朝早8點幾9點就係流頂漲盡轉退之時，換言之行流食餌好時機就係岩岩落艇出去釣果半個鐘島，如果把握唔到就會可能一路坐到下晝3點幾4點轉流先再有口；所以都係有得準備定就準備左先，到釣點就專心啲砌翻佢一頭半個鐘、搵條撈箕魚先再慢慢揸流灘都未遲。

快快手綁好釣組過多兩三分鐘就見到阿朗仔佢地隻艇駛到，落艇就即刻車出去信德開外一帶作釣。睇黎流水表今日好準，一落繩無兩分鐘阿葉就已經有食餌同開齋，上水是為呢一帶嘅名物小真鯛。跟手阿康都抽中左條扯旗位仔上黎，雖然放生級別，但都叫係開左齋先嘛。然後低處未算低，朗爸竟然以一條林哥仔作為佢嘅是日開齋魚，但唔好理，總之朗爸之後就係愈釣愈有咁啦。就係朗爸掉返條林哥仔落去既同時，我都感覺到有魚食餌，等左一等、忍佢一忍佢就食埋黎，跟住輕輕一抽，都有些少重量，上水是為一條手板芝麻斑，都算係個好開始掛。釣魚呢家野好鬼衰，全員有魚中梗係最理想，但通常都有機會漏低一個半個架嘛，但係今日開齋呢回事呢，又真係對個個都咁好，事關我中完條芝麻斑、朗爸再上完條石狗公之後，就輪到阿朗有食餌，輕輕一抽、上魚，石狗公一條，就係咁樣，唔夠二十分鐘我地今日就已經全員開齋達成，真係算係近期最快紀錄！真係食岩流水魚仔開口就人人都執返條，跟住每人執多一兩條魚之後個流就開始靜返落黎，威力有所減退。撈箕魚就無喺出現到，不過沙立仔都叫做肯開返下口，對比前幾日全個上晝5條都唔知有無，我地呢一個鐘內都已經執左7、8條，淨係朗爸都一個人上左四條，照咁睇今日應該都係佢會行到魚運、釣到撈箕魚架喇。

釣多一陣，浸流過左開始無口、上環信德開外呢帶都唔見點食餌但就食哂風，於是朗爸就提議車去近西九果面啲無咁應風既位作釣。呢度我就第一次釣，十米水都唔夠，落繩一陣就見朗爸有動作，睇落就已經知唔會係啲小真鯛貨色，不過都應該唔駛用到撈箕嘅；果然慢慢收返來見到魚影，約半斤火點一條，即時都話起碼都叫有條魚拎返去食下咁喇。諗住係度會唔會有多一兩條好野執到，結果都係無口，又要諗計仔睇下車邊度好。既然前幾日行流時喺果欄度連執幾條磅頭細鱗，一於就車過去睇下仲會唔會有啲餘黨係度。去到無耐車到第二寨嘅時候就聽見康哥話要撈箕，不過我地其他人都仲係保持謹慎，事關康哥不時都會搞下氣氛、中條沙立仔都會叫撈箕咁；不過睇佢收繩都一下一下咁收，都似有翻啲份量嘅，以為係磅裝細鱗啦，點知上到水見魚，原來係條斤裝黑沙鱲！今次阿康哥又真係唔係搞氣氛而係真係中撈箕魚喎，條黑沙仲要藍哂旗，係條好鬼靚仔嘅新水黑沙呢。好啦，諗住黎搵細鱗，點知火車就未搭到，卻又執左條黑沙，咁梗係繼續睇下搵唔搵到啲脫班火車啦。不過車左幾寨都無口，睇黎箕細鱗已經走得七七八八了。

果欄無料到，咁就車前啲過中山睇下有無食餌，可能未岩流水，再加上我地一心諗住上環果面多啲信心，所以車左兩寨無口之後我地都係決定過返上環果面死守，起碼就算無條頭魚起到都仲有啲沙立仔釣到下。一落繩無耐就見阿朗仔勾石，但佢又話係有魚食餌抽完中地球，咁即係可能係條魚入左石啦，帶左幾下，又忍佢兩忍，又真係比阿朗扯得翻條魚出來喎，上水一睇，良型烏絲一條，真係又有好料上碟了。跟住落黎既時間都係疏疏落落咁樣偶爾有一兩口沙立仔上釣，但無所謂啦，其實朝早都已經講左會係過完果浸流之後就係等下晝果轉流水到，希望會好似前幾日咁樣等到一轉流之後果黃金一小時咁就已經係所有野都在計劃之內了，所以呢段時乜其實都係等運到，有乜執到都可以叫係額外獎賞黎。不過睇黎阿朗仔就好似唔多領情咁喎，點解咁講呢？咪就係因為喺大家都等緊運到時，突然間見佢一抽就已經走哂繩啦，跟住頂左兩手條魚升完水又再爆返落去，頂多幾手之後就爆咀甩魚；不過睇條魚咁樣走水法，佢都斷言話呢條失魂魚係白鬚公黎；既然係咁，真係甩左都唔可惜。

斷完條白鬚公之後、繼續等轉流嘅時間都係等住運到咁求其釣，偶爾都有一兩條沙立仔嘅，但係我都係唔多提得起勁咁；咁又可能真係朝早坐到而家都無乜好料掛，同埋一心都係諗住要等轉流果浸食餌啦，所以都係釣得混混噩噩咁。之但係呢個世界好多時都係鍾意比啲教訓無準備、唔多認真嘅人嘅，點解咁講？咪就係正當我仲係度睇電話數住轉流時間仲有成大半個鐘頭既時候，忽然就有食餌喎，而且係好典型細鱗食餌嘅魚訊嚟，咁我梗係當堂都醒左、揸實副繩等佢食落去啦；等到條魚一索餌我一逗，即中然後頂多一下，咦？怎麼沒有了然後嘅？因為斷左囉！呢鋪真係烏鴉口喇，前日釣完魚夜晚先同華仔講起話近年斷乜魚都好、就係未斷過細鱗，點知真係講完之後第一次釣魚就即刻比我斷左條！之但係其實又唔可以真係賴哂落去咩衰多口呀、邪門之類嘅，其實呢下斷魚好大程度就係衰我懶、見到條賴腳布少少披口都無去剪左佢重新綁過，所以其實都算係抵死架喇！哈哈。

斷左魚嘅我都應該注定今日無咩運行架啦，都係睇其他人表演架啦，等下等下都終於等到3點轉流；大家一路講住係時候啦係時候啦，跟住真係一轉流就開始魚訊活躍起來。首先有魚訊嘅係阿葉，不過就係唔駛用撈箕嘅過手板嘅沙立，然後過幾分鐘咋嘛，今次就輪到朗仔有食餌，忍一忍，魚一食佢一抽，即中！不過佢就開話唔係好大條，不過康哥為左穩陣起見，都拎定個細撈箕喺旁邊侍候，始終五磅繩真係撈一撈穩陣啲好嘅。朗仔慢慢收，是日第一鱗終於見影然後康哥輕輕一撈，一條磅裝火車頭就咁上水，同時亦都宣告黃金釣魚時間正式開始！好快我都有條沙立仔起到，但係呢啲魚除非係大爆釣，如果唔係喺呢段時間內係無乜討論價值嘅。跟住返寨再落繩，朗爸副繩基本上係一落即接，佢副3號繩砌啲唔過三斤嘅細鱗基本都算輕鬆，所以抽魚完之後都係見佢一手一手慢慢咁收，都唔係好駛點就魚；好快就見到魚影，又係康哥幫手撈魚，一條斤半細鱗輕鬆上水。黃金流水真係好強大，照個勢睇，要食飯的話應該人人都可以有魚分，只係唔知釣魚就係咪人人有派彩咁啫。

正當我地諗住爽歪歪呢個位咁短時間中到兩條鱗可以有機會搵多一兩條時，跟住劇本就係一如以往咁見到海事或者水警出來趕船，我地真都因為要避海事處隻巡邏船而要走位車過啲去另一個排口位。但係又如何呢，正如我早上已經講過，朗爸今日個勢朝早已經見到係有啲猛，行起運上黎就點都會係你；只見朗仔一候定隻艇落得餌時，朗爸口餌又係落地即接咁滯，只見佢輕輕一帶，條魚一索佢一抽，就又係收魚時間；同樣模式，相隔都只係幾分鐘，只見到又係輕輕鬆鬆、無驚無險，一條斤半細鱗又再上水，朗爸10分鐘不到就達成火車頭梅開二度，認真犀利！

趁住行流，個個都精神奕奕，鬥志滿滿，揸實副繩等派彩，咁當然除左撈箕魚，都仲會有啲什魚釣到啦，石狗、烏絲、沙立仔都有出現，就算未有派彩，其實喺黃金時段內都係唔會悶架。雖然接住落黎黃金流水個威力有啲減弱，但係魚訊點都係比今日其他時段都強；釣多一陣，今次見到阿葉有料到，見佢一手一手咁收，都應該唔會好大條，但係佢又係揸5磅手繩，所以都係比個撈箕侍候穩陣啲。我地以為會係又一條細鱗啦，點知上到水見影，原來係磅頭牛廣仔一條，唔怪得阿葉玩起上黎都咁過癮啦。

既然有魚中，咁就繼續係附近位置繼續釣啦，但係唔知點解呢個時候啲魚仔開始收口咁，釣左一陣都唔見有咩魚仔嘅魚訊出現，周圍附近車左幾寨都係咁嘅情況，正當我地諗住會唔會係黃金時段已過嘅時候，忽然間聽到艇尾大叫一聲「案件重演啊」，之後就見到佢即時要就魚，事關一定係中大牛廣，同前兩日佢收繩收到中水比魚打劫然後秒斷嘅情景一樣；但今次唔同嘅係，佢．無．秒．斷．佢守得住果下衝擊！咁即係有機會同條魚過招啦。但係佢揸五磅繩喎，可以點玩？咪就係只可以等條魚攰囉。所以佢只唯一可以做嘅就係一路就魚一路比繩佢去，然後又要保持住條繩有適當拉力囉；所以朗仔同時間都要同康哥一齊開住部艇尾機去追住條魚，務求令到條魚可以一路游時佢有繩比到條魚去，而又唔會玩哂副繩嘅長度。不過講咩都假，我地第一時間遇到嘅危機已經出現，就係中魚時條魚周圍亂衝而搞到朗仔副繩同我果副疊左，如果唔處理得宜，應該即刻都唔駛玩。朗仔即刻叫康哥幫手剪左我副繩，不過朗爸就夠哂冷靜一路收起我副繩而又唔令到條繩疊到朗仔副繩，所以最後係順利咁將我副繩收左上艇唔駛剪之餘又暫時解決左第一個危機。解決左第一個危機後就多兩就條魚就又迎來第二個難關，朗仔就就下魚既期間可能有魚絲卡到手指頭定咩啦，個繩碌竟然飛左落海，咁佢更為即時要著尾機去追魚，而朗爸就即刻幫手收繩尾同希望盡快收得返個手碌返來；但係就多兩就條魚，佢竟然游左去艇尾機後面喎，如果稍一不慎的話就分分鐘𠝹斷魚絲唔駛玩了；所以朗仔都緊張起來，即時將尾機轉左做空波，然後盡量帶返條魚去艇邊，同時亦叫康哥幫手將尾機方向較到同魚相反，好等條魚一游開些少就即刻比油推開隻艇、離開條魚更遠。咁條魚好彩又真係比佢帶住游返出去艇外位置，康哥梗係即刻著車啦，咁樣我地又解決左第二個危機了。接住落黎就係考驗朗仔就魚嘅功力了，因為都無得點頂條魚，所以都係收到幾多得幾多然後就不停咁就魚等條魚攰，而朗爸就繼續整理繩尾，搞左一輪，手碌終於上返艇喇，但係朗仔仲係度同條魚玩緊，然之後第三個難關又來了；要知道維港出名多船同船浪，我地釣魚嘅位置都又唔少船經過，所以就要嘅同時都要睇埋周圍經過嘅船，睇下會唔會阻到佢地嘅航行，而我地好彩中魚嘅時候船就唔多，而且位置都無阻礙經過嘅渡輪，但係呢個時候就有隻快船係旁邊駛過，而朗仔又將尾機調左去空波，所以我地就要硬食船浪了；咁當然我地都係有經無險咁渡過左呢個同時有船、有浪、魚去艇尾無得著尾機嘅難關喇！真係好好彩，玩到黎呢個時刻，如果我地有任何大意出錯，所有嘅努力都將會係徒然，但係憑住冷靜、技術、同埋運氣，暫時都將危機一一化解。剩餘嘅野，就交比個天同朗仔自己搞掂了。可能條魚都見掙扎左咁耐，結果都係徒勞無功，所以佢都漸見氣餒，玩多兩玩，開始聽話咁比阿朗仔帶返去艇邊開外位置慢慢跟住上，而阿康呢個時候已經大撈箕在旁邊侍候，只要條魚見影又就啱方向就會即時做野。收多兩收，終於見魚影了，嘩、果然係一條大大餅嘅牛廣，只等係魚個頭一對住朗仔，康哥就即時插撈箕入水，然後，就係大家嘅一片歡呼之聲了！就係咁樣，一條大牛廣終於上水了、而朗仔亦都報仇成功！唔怪得釣釣下魚忽然無哂魚仔嘅魚訊啦，可能係啲魚仔都見到呢堆大牛廣所以都紛紛躲起來了。釣到呢條紀錄魚，雖然很想即時影返張相留念，但係難得又再遇到牛廣群，咁梗係即時返寨落餌再釣，睇下會唔會搵到多條啦。

我就即時轉左用竿玩鐵板主力攻牛廣，但係今日嘅我應該都真係得個睇字啦，所以結果都係得個吉啦。至於其他人呢，牛廣都真係再搵唔到啦，但係釣釣下又比阿康哥上多條斤頭細鱗，總之就係黃金時間無得頂喇！見到大家都有派彩，得我自己一個仲係無條頭魚中到，釣魚時一邊打定輸數嘅同時一邊又暗地裡盼望住會有奇蹟出現，但今次應該係上天要懲罰我早兩日嘅張狂，所以我今日注定係做大綜援戶了。而我地嘅釣行亦隨住朗仔中多一條小鯛之後而「圓滿」結束。即時車埋上環碼頭附近撈魚過磅，條牛廣足足有成五斤十両，亦都成為左朗仔嘅新紀錄魚呢。

今次釣行可謂圓滿和刺激，雖然我結果都係中唔到撈箕魚，但係其他人都有派彩，朗爸仲又爆釣沙立、又上火點同埋細鱗梅開二度，而阿朗仔更加可以係走人返英國之前報到佢早幾日嘅斷魚遺憾；而大家都人人有魚返屋企加餸，所以真係大家開心。不過朗仔就要暫別大家了，所以只好等佢出年返來先再同佢釣過了。而其間既時間，就由我同阿康哥、朗爸佢地去繼續精彩吧。

朗仔中是日第一鱗

朗爸又中細鱗