YY08的部落格

20230926

日期: 09/26/2023

農曆: 八月十二
地點: 維港東面一帶
艇家: 朗仔自駕
釣友: 朗仔、華仔、YY
天氣: 天陰、東風4–5級
水流: 中速流、水質一般

是咁的，話說上星期 同朗仔華仔去完    狂飆法拉利去食歡送飯 

https://yy08.pixnet.net/blog/post/108654739

 之後，朗仔深受揸粗繩、勾大餌，中大魚之魅力感染，話中完條大紅鮪之後感受好震撼，而我同華仔上次又未有中到大魚、同樣心癢難耐；於是就研究仲有無機會可以覆桌來個夜水最後一戰，咁啱大家26號晚都得閒，一於就定26號晚吧。而年青人真係好有活力，華仔同朗仔話既然出來釣得夜水，又係朗仔返外國前我地嘅最後一釣，一於就玩大啲，黎個通頂大戰！反正黎緊幾個月都唔會再有機會咁釣，一於就來個瘋狂的釣行吧。

行程都係華仔同我計劃，不過大致個釣行係點行基本上都有概念，係睇到時會唔會有咩變化。而買餌都係好似上次咁樣，我同華仔5點鐘約左係筲箕灣地鐵站等再行過去街市買蝦。由於要釣成晚，所以今次釣手少左但係預蝦反而再多。結果我地買左兩斤棕蝦仔同兩斤大眼仔白蝦。買埋野飲同野食，我地就行出去譚公廟碼頭等朗仔。

落艇，朗仔問我地釣邊，我地就話睇過流水8點先停流，到時先可以釣沉船，咁預返一個鐘先守東駁，所以而家有空閒時間，一於就直劈北角一帶搵放生魚，睇下會唔會沙巴、東星斑釣到。去到第一個釣點，北角渡輪碼頭，我地就係車埋去釣。而就喺我地啱啱落餌釣時，就已經係水面見到有條沙巴躉比條魚絲扣住，綁住係碼頭；朗仔即時話「正呀，魚呀，撈呀」，但係佢個角度睇唔到嘅係，碼頭二樓其實有個阿姨係度，就係佢落地雷釣魚，然後條沙巴好明顯就係佢釣到然後扣住係水面養嘅。所以我同華仔見到朗仔講到咁大聲都笑左。不過唔理啦，一於繼續釣，但係就無魚食餌，守左陣都無，就車左出去大海位，由於朗仔諗住開個齋先，所以佢係揸沙蝦仔嘅，而華仔就係大眼仔，我就係棕蝦，一於睇下啲魚會點揀我地三款蝦。始終蝦仔就多啲機會有魚食餌嘅，所以朗仔無耐就有條手板沙立釣到了，然後我地見碼頭另一面有個位都好似幾好釣於是就車左埋去，不過就係果帶玩左幾個字都無食餌，我地見天都開始黑，於是就繞繩過返去筲箕灣西駁果面諗住釣一陣，車埋東駁口就再出沉船排。

西駁口車左幾寨都無，我地就車去東駁口，不過都係無乜動靜，呢個時候朗仔其實都轉埋做大蝦，所以細魚基本上暫時會同我地絕源。可惜守到成8點都唔見有食餌，我地見流水轉慢於是就車出去大海位沉船排作釣。呢個位真係令人好有遐想，高低凹凸有致，完全就係好適合大魚停留嘅位置。不過咁樣嘅外型，亦都令呢個釣點相當難釣；又或者咁講，係我地比較缺乏釣爛船嘅經驗吧，所以返幾次寨，差唔多每一次唔係我就會係朗仔勾地，華仔係怕深水所以無落繩呢。釣左幾寨，又唔見有食餌，又不停咁勾地，搞到我地都有點怕怕，於是就車去靠油塘果面釣，不過都係無食餌，差唔多九點我地就決定車返埋去東駁搵魚。

來回車左幾寨，終於到我有一下食餌，但係條魚只係輕輕咁樣拉住口餌，然後我就揸住副繩等重頭果下，不過條魚只係再拉多一下就沒有下文，收返副繩上黎睇，隻蝦已經被剪了後面半截去了。唔倒釣，無重口無得抽，非戰之罪，一於返寨睇下條魚會唔會再食餌，不過車多兩寨都無再見到條魚食餌。於是朗仔就提議唔守東駁，一於車去西駁試下；無問題，反正無魚，收繩，慢車過去西駁。不過車車下佢見到有個位話睇聲納見個底好似幾鞋，有舊大石高左再低左，似係一啲水急位同避流位交集嘅排口，一於喺呢度試試再過西駁吧，反正長夜漫漫，大把時間釣。落餌，又真係水流有點急，斜住繩釣，但係隨住隻艇慢慢流到位，水流又真係靜左，魚絲又真係垂直，底又開始鞋，睇黎又真係幾唔錯嘅排口。要講下華仔個釣組，由於佢見我係東駁果陣比魚剪蝦尾，加上佢上次都咁樣被剪左兩口餌，所以佢係除左勾頭蝦隻鉤之外，仲係蝦尾度加左隻細鉤，於係一蝦兩鉤，加上佢用嘅係棕蝦仔，喺頭尾都有鉤之下，佢話今次如果有精口鱲魚食埋黎都一於要同佢鬥志一番然後收服佢。然後就係喺佢落左呢隻雙鉤棕蝦仔作釣時，佢終於話有食餌了；只見佢話條魚輕輕試左一口餌，然後佢做好抽魚準備把手放低，等條魚再食餌一刻，佢就向上一抽，然後我見到嘅卻係佢隻手抽到一半就無再升起，接住嘅畫面就係佢好勉強咁想頂起隻手，而同時魚絲係向艇後方打斜咁瘋狂出繩，而華仔就想勉強揸實副繩再頂魚，但係佢係剎唔住條魚絲，等佢再抓得住條魚絲時，剩低嘅就只係得返魚絲，即係。。。已。經。斷。魚。了！佢話條魚食餌時好輕口，完全唔似咁大條所以佢準備抽魚都只係把口放低而無準備要企起身，等到抽中條魚一刻先至感覺到條魚嘅瘋狂，魚絲係咁出佢都死頂，儘管燒手破皮佢都繼續死忍但真係燒到好痛於是換左手頂，但奈何兩隻手都燒哂水都剎唔住條魚，然後條魚游去佢反手方向更唔就手跟住頂唔住就只有斷魚。我話我睇到嘅係一開始佢聽繩然後抽魚，抽到一半就頂唔起，然後下一秒條魚絲就係咁瘋狂向後出，我仲以為係魚絲打左車葉添；而係朗仔就話一睇佢咁出繩就知係中魚，因為隻艇係無郁，而且佢都無開車，所以一定係條魚帶住魚絲走呢。嘩，真係好誇張呢，以華仔8號炭絲黎講，可以衝到華仔咁樣招架不住，就咁估呢條魚基本為6、7斤上的大紅鮪。呢個時候華仔即刻感嘆話，呢一兩年都無輸過，對上一次輸比條魚就已經係同我和阿鴻入櫃底輸嘅果一次了；而呢條輸得仲印象深刻，因為真係佢已經好盡力咁揸住副繩，但真係制唔住燒哂手而斷絲；同上次都未企起身就比條魚衝返落莊柱而斷絲比，佢今次係力戰而敗，所以係好深刻！哈哈，華仔仲話佢勾隻細蝦都係想釣下斤零兩斤鱲魚，大魚好心就食落去勾緊大眼仔、用緊40磅美絲嘅朗仔度啦，咁樣就大機會拎到條魚好多了。我都深表贊同，話如果食落我度，以我咁嘅功架，多數都只係好似上次甩紅鮪、甩牛廣咁樣再一次走魚架喇。

由於係斷魚，條魚應該都受左驚唔會再食餌，不過我地都即管嘗試係度搵下仲有無食餌，不過磨多兩寨都係無魚訊，於是我地就車過少少去西駁口再釣，不過都係無食餌。然之後我地就掃埋西駁口內的另外兩條駁，但都係無食餌，見呢個時候都黎到午夜12點，於是朗仔就提議車過去觀塘油輪碼頭一帶睇下會唔會有驚喜。

我地先車到去油輪碼頭附近作釣，朗仔話以前係度試過中怪獸，不過我地車左幾寨都無魚訊，之後我地繞繩車入去觀塘避風塘駁口，但係釣左陣覺得個底都唔夠筲箕灣果邊鞋底同靚排口，於是掃左兩寨無料我地就又再繞繩，然後車出大海位有個朗仔話想試下既排口度釣，不過呢度好當風，排口又係啲碎沙石底，所以我地釣左一寨見無魚訊就決定返筲箕灣守魚了。

我地先掃西駁尾，不過都係未有魚訊搵到，於是我地又再車返去剛才斷怪獸嘅「怪獸位」了。釣左陣都係無食餌，朗仔見悶悶地話不如試下勾沙蝦仔釣，華仔就話一於睇下佢會釣到乜，而華仔就繼續用雙鉤綁法希望搵到第一條撈箕魚。釣下釣下，朗仔話有魚食餌，但係食得幾精口，佢忍下手終於等到條魚食餌，然後一抽，中魚，上到黎係一條火點，華仔見到真係哭笑不得，因為真係又比朗仔用蝦仔釣到魚。不過釣完呢口魚好似又靜左少少，我地就車去東駁口繼續搵魚。

既然有魚仔食下餌咁朗仔又樂於繼續用沙蝦仔作釣。釣下釣下，比佢又中魚，不過就係梳蘿一條，咁就當然放生算了。而自從早段比魚剪過蝦尾而一直無魚訊嘅我呢個時候突破感覺到有魚拉左一下魚餌，恰緊眼訓嘅我即時醒哂、並開口話有魚食餌；我就即時揸緊副繩準備抽魚，而華仔則叫我放低少少手比條魚食深啲再抽，等多幾秒，條魚果然又再食餌，我再擺低手等多兩秒然後感覺到佢重口時我再一抽，點知就沒有然後了！吓？點解係斷絲嘅？百思不得其解，佢地兩個話係過石斷，我就覺得可能係抽魚抽得太遲條魚已經索哂隻蝦入嘴而牙就直接過哂鉤而把魚絲咬斷了。真係可惜，白白錯失了全晚最好機會的一口撈箕魚。不過唔理啦，有魚食餌梗係再落餌釣，就係返寨再落餌時，魚餌一到地我就覺得有野接住但又無重口食餌，只係好似有野拉住，咁我心諗就可能會係墨魚攬住我隻棕蝦，於是我就慢慢一手一手咁收繩，然後就去叫華仔遞個細撈箕比我；我繼續慢慢咁收，點知感覺魚絲就到水面見光時就突然一輕，估計係墨魚鬆口走左。但係收繩上黎睇時，隻蝦卻係被剪剩對眼，華仔見到咁就即刻話唔會係墨魚，話如果係墨魚的話就會係有咬痕同不規則咁扯爛隻蝦，而唔係而家咁樣齊口剪左隻蝦，所以段估我呢口其實係魚黎喎，真係只好再次望開齋之門而輕嘆了。

不過捉到鹿都唔識脫角嘅就只係我，朗仔把握力可比我高了；就喺我被剪蝦尾都唔夠5分鐘之時，朗仔話又有魚訊了，忍手等待食餌，然後一抽，見到條魚有點力水，我估緊會唔會係鱲魚之際，點知魚影一現，大家又笑左出聲，原來朗仔釣上黎嘅係佢嘅維港好朋友 — 細鱗一條。點解大家會死？咪就係因為朗仔去到邊都係會釣到細鱗囉，已經諗住黎釣夜水紅鮪，結果佢釣到嘅都唔係其他咩魚而又係細鱗，所以真係大家都即時哈哈大笑。不過笑還笑，見到短短十零分鐘我地艇有幾口食餌，明顯係起左流水，咁梗係把握機會搵魚，即時換餌再釣，而朗仔都即刻轉返勾大眼仔副繩作釣。但係疾流時段真係唔會好長，釣完條細鱗之後，我地又再搵唔到魚訊了，我地就再試下釣埋東駁口入面個位，但係都係無料到，於是我地就車去西駁果面又再搵魚，但係釣左陣都無魚訊，咁我就提議反正咁近碼頭，一於上去買少少零食同飲料，順便比我鬆下筋骨，畢竟都釣左成9個鐘，一於上岸走兩步。於是我地就繞繩，朗仔就車左我埋去上岸，然後佢地就留低喺內塘入面繼續作釣。

買完野、鬆完筋骨，我就落返艇，同佢地車返出去怪獸位搵魚。不過都係無料，再車去東駁一路掃都係無魚訊；本身我地係講話要釣通頂等釣埋曝光水，但奈何風越吹越大，而且又無乜魚訊，再加上我地啲蝦都挨唔到咁耐，好多大眼仔已經提早陣亡，所以我地決定釣到5點用埋果幾隻仲生嘅蝦就收工；而一路釣到5點我地都係無再有魚訊，於是就決定完結今次瘋狂的超長夜水追捕大紅鮪釣行了。

雖然今次釣唔到目標魚，魚獲亦非常不理想，可以算話係打龜，但係其實都叫做有一口超強食餌，只不過真係無好好把握得住，如果拎得到，將會又係另一條紀錄級別紅鮪了；希望今次給收到經驗，下次再遇到同等級對手時可以將其戰勝吧。而今晚我地仨個可以咁樣瘋狂的釣足一個晚上，由天未黑、日未落釣到差唔多天光，真係可以話係超長時釣行，雖然魚就無幾條，但水就真係吹到飽哂，好不歡樂，真係希望阿朗仔可以快啲又再返來放假同我地再次出海搜獵大紅鮋呢！